Iakopo 2–1 Peteru 5 (Iunite 29)

Anomea o Sauniuniga mo le Faiaoga o Suesuega i le Aiga

Aotelega o Lesona Suesueina i le Aiga i Aso Taitasi

O otootoga o aoaoga faavae ma mataupu faavae nei sa aoaoina e tamaiti aoga ao latou suesueina le Iakopo 2– 1 Peteru 5 (iunite 29) e le o faamoemoeina e aoao atu o se vaega o lau lesona. O le lesona e te aoao atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.

Aso 1 (Iakopo 2–3)

Mai aoaoga a Iakopo i nei mataupu, na aoao ai e tamaiti aoga, o soo faamaoni o Iesu Keriso e alolofa i tagata uma po o a lava o latou tulaga, ma pe tasi lava se agasala tatou te solia, ua ta’usalaina i tatou i luma o le Atua. Sa latou aoaoina foi o le faatuatua moni ia Iesu Keriso e faapea ona faaalia i a tatou galuega amiotonu. A’o latou suesueina aoaoga a Iakopo e uiga i le pulea o a tatou upu, na iloa ai e tamaiti aoga o le aoao ia pulea upu tatou te tautatala ai, e mafai ona i ai se aafiaga tele i o tatou olaga, ma e taumafai soo o le Atua e faaaoga o latou gagana mo faamoemoega amiotonu, ae le o le faasalalau o mea leaga.

Aso 2 (Iakopo 4–5)

A’o suesue e tamaiti aoga nei mataupu i le Iakopo, latou te aoaoina ai upumoni nei: A’o tatou faalatalata atu i le Atua, o le a faalatalata mai o Ia ia i tatou. Afai tatou te iloa ona fai le lelei ae filifili e le faia, ua tatou faia le agasala. E ala i le tatalo o le faatuatua ma le mana o le perisitua, e mafai ai ona faamaloloina e mama’i.

Aso 3 (1 Peteru 1–2)

I lo latou suesueina o aoaoga a Peteru, e aoao ai e tamaiti aoga upumoni nei: E ui ina tatou oo i tofotofoga, e mafai ona tatou olioli i le Togiola a Iesu Keriso, ma i faamanuiaga o le lumanai ua folafola mai e le Atua e tuuina mai ia i tatou. O lo tatou faatuatua ia Iesu Keriso e tofotofoina ma faamamaina a’o tatou onosai faamaoni i tofotofoga. E faaolaina i tatou e ala i le toto faapelepele o Iesu Keriso. Ona sa soifua Iesu Keriso i se soifuaga e leai se agasala, e mafai ai ona Ia ofoina mai o Ia lava o se taulaga atoatoa mo i tatou. Na muai faauuina Iesu Keriso e avea ma o tatou Faaola. Ua valaau le Atua i Lana Au Paia ia te’a ese mai ma ia tulaga ese mai le lalolagi ina ia mafai ona iloa e isi a latou faataitaiga ma viia ai o Ia. E mafai ona tatou mulimuli i le faataitaiga a le Faaola i le tumau ma le onosai i tofotofoga.

Aso 4 (1 Peteru 3–5)

Mai le faamalosiauga a Peteru i le Au Paia i ona aso, o loo aoaoina ai e tamaiti aoga e faapea, i le avea ai ma soo o Iesu Keriso, e tatau ona tatou taumafai ia saunia i taimi uma e faasoa atu ma puipuia o tatou talitonuga i le agamalu ma le migao. O loo aoaoina foi e tamaiti aoga, o le talalelei o loo talaiina atu ia i latou o e ua maliliu ina ia mafai ona latou maua ia lava avanoa e tasi, e pei o i latou e faalogo i le talalelei i le olaga nei. Na aoao mai Peteru, ua i ai i taitai o le Ekalesia le tiutetauave ia tausia ma vaai le lafu mamoe a le Atua i le alofa ma e ala i faataitaiga.

Folasaga

Ua faamanino mai e le Aposetolo o Iakopo nisi o mea sa le malamalama ai le Au Paia i le mea e ta’u o le faatuatua moni. Sa Ia aoao mai foi e uiga i le sootaga i le va o le faatuatua ma galuega.

Fautuaga mo le Aoaoina Atu

Iakopo 2:14–26

Ua aoao mai e Iakopo le matafaioi o le faatuatua ma galuega i lo tatou faaolataga

Valaaulia tamaiti aoga ia faapea, ua iloa e se alii talavou ua agasala o ia. E talitonu o ia i le Togiola a Iesu Keriso ma i le gafatia e le Faaola ona laveai o ia. Fai mai o ia, e pau le mea na te faia o le talitonu ma o le a faamagalo o ia e le Alii, e aunoa ma se isi lava ana taumafaiga.

Fai atu i tamaiti aoga e mafaufau pe ua lava le na o le talitonuga o lenei alii talavou ina ia faamagaloina ai o ia mo ana agasala.

Valaaulia se tamaitiiti aoga e faitau leotele le Iakopo 2:14. Fai atu i le vasega ia mulimuli i le faitauga, ma vaavaai mo mea na fesili atu ai Iakopo i le Au Paia e uiga i le faatuatua.

O le a le mea na fesili atu ai Iakopo i le Au Paia e uiga i le faatuatua?
O a ituaiga galuega e te manatu sa faatatau atu i ai Iakopo?

Faamanatu i tamaiti aoga a’o latou suesue i le lesona i le Iakopo 2 o loo latou aoao ai, sa faasa’oina e le Aposetolo o Iakopo se manatu sese e uiga i le faatuatua. Sa malamalama sese nisi o tagata i le faatuatua e faapea ua na o se faaleoina o le talitonuga. I le anotusi o le Iakopo 2:14, sa ese mai le faaaogaaga e Iakopo o le upu galuega nai lo le Aposetolo o Paulo. Ina ua faaaoga e Paulo le upu galuega, sa ia faatatau atu i galuega o le tulafono a Mose. Ina ua faaaoga e Iakopo le upu galuega, sa ia faatatau atu i galuega o le tuuto po o galuega o le amiotonu.

Faamatala atu sa faaaoga e Iakopo se tala faafaatusa e faaalia ai le tali i lana fesili i le fuaiupu 14.

Valaaulia ni tamaiti aoga se toalua e o mai i le pito i luma o le vasega. Fai atu i se tasi o tamaitiiti aoga e faafoliga e pei o se tagata aisi o loo augani mo se meaai, lavalava, ma fale na te manaomia e ola ai. Valaaulia le isi tamaitiiti aoga e faafoliga e pei o se tasi e mafai ona fesoasoani i le tagata aisi. Valaaulia se tamaitiiti aoga lona tolu e faitau leotele le Iakopo 2:15–16 a’o faatino e isi tamaiti aoga e toalua le mea o loo faamatalaina i nei fuaiupu.

O le a le mea ua sese i le tali sa tuuina atu i le tamaitiiti aoga aisi?
Mata e lava ia tali a isi tamaiti aoga e fesoasoani ai i se aisi?

Valaaulia le vasega e faitau leotele pe tauloto faatasi le Iakopo 2:17–18, ma vaavaai mo le mea na aoao mai e Iakopo e uiga i le faatuatua. Faamanatu ia i latou o le Iakopo 2:17–18 o se mau tauloto.

O le a lou manatu i le uiga o le fuaitau “o le faatuatua, pe afai e le i ai galuega, e mate lava ia ina ua na o ia” (fuaiupu 17)?
E faapefea ona fesoasoani le tala faafaatusa a Iakopo e uiga i le tagata aisi, ina ia tatou malamalama ai i le uiga o lenei fuaitau?
E tusa ai ma le fuaiupu 17, o le a le upumoni na aoao mai e Iakopo e uiga i le faatuatua moni ia Iesu Keriso? (E ono ese ni upu e faaaoga e tamaiti aoga ae e tatau ona faailoa ai se upumoni e tutusa ma lenei: O le faatuatua moni ia Iesu Keriso e faaalia e ala i a tatou galuega amiotonu. Tusi le upumoni lenei i luga o le laupapa.)

Valaaulia se tamaitiiti aoga e faitau leotele le Iakopo 2:19–20. Ia mautinoa foi e faitau leotele e le tamaitiiti aoga le Faaliliuga a Iosefa Samita o le Iakopo 2:19 (i le Iakopo 2:19, vaefaamatalaga a). Fai atu i le vasega e mulimuli i le faitauga, ma vaavaai mo le faataitaiga na faaaoga e Iakopo e faaali mai ai, o le talitonu i le Atua e tau le aofia ai le i ai o le faatuatua i le Atua.

O le a le faataitaiga na faaaoga e Iakopo e faaali mai ai, o le talitonu i le Atua e tau le aofia ai le i ai o le faatuatua i le Atua?

Valaaulia se tamaitiiti aoga e faitau leotele le faamatalaga lenei a Elder David A. Bednar o le Korama a Aposetolo e Toasefululua:

“O le faatuatua moni e taulai atu i le Alii o Iesu Keriso ma e tau atu e le aunoa i faatinoga amiotonu. … O le na o le faatino lava ia, e le o se faatuatua lena i le Faaola, peitai o le faatino e tusa ai ma mataupu faavae sao, o se vaega autu lea o le faatuatua. O le mea lea, ‘ua mate lava le faatuatua pe a leai ni galuega’ (Iakopo 2:20)” (“Ole Atu ma le Faatuatua,” Ensign po o le Liahona, Me 2008, 95).

E tusa ai ma le saunoaga a Elder Bednar, o le a “se vaega autu lea o le faatuatua”?
Aisea e taua ai le malamalama o le faatuatua ia Iesu Keriso, o lona uiga o le talitonu ia te Ia ma le faatino e tusa ai ma mataupu faavae sa’o?

Faamanatu i tamaiti aoga le alii talavou lea sa i le vaaiga o le mea na tupu i le amataga o le lesona.

E mafai faapefea e le malamalama o le faatuatua, e aofia uma ai le talitonu ma le faatino, ona fesoasoani i se tasi o loo saili le faamagaloga o ana agasala?

Aotele le Iakopo 2:21–26 i le faamalamalama atu, sa ta’ua e Iakopo ia Aperaamo ma Raava o ni faataitaiga se lua o tagata o o laua faatuatua ia Iesu Keriso na faaalia e ala ia laua galuega. (O le tala i le fafine lototele o Raava o loo maua i le Iosua 2:1–22.)

Valaaulia tamaiti aoga e faaaoga a latou api o le vasega po o api talaaga mo le suesueina o tusitusiga paia, e tusi ai e uiga i se taimi na latou faaalia ai le faatuatua ia Iesu Keriso e ala i a latou galuega ma pe na faapefea ona faamanuiaina i latou mo le faia o lena mea. Ia uunaia tamaiti aoga ia aofia ai a latou molimau i le Faaola ma o a ni auala o le a latou faaalia ai lena talitonuga e ala ia latou faatinoga. Valaaulia ni nai tamaiti aoga e faasoa mai mea na latou tusia i le vasega.

Valaaulia tamaiti aoga e mafaufau ma le agaga tatalo i auala e mafai ona latou faaali atoatoa ai le faatuatua ia Iesu Keriso e ala i le usitai ia te Ia. Uunaia i latou e mulimuli i soo se uunaiga latou te maua.

Iunite e Sosoo Ai (2 Peteru–Iuta)

Fesili atu i tamaiti aoga pe aisea latou te manatu e filifili ai tagata e agasala e ui lava ua latou iloa e sese. Valaaulia i latou e vaavaai mo upumoni, a’o latou suesue i le 2 Peteru e oo i le Iuta i le aluga o le vaiaso o loo sosoo ai, e mafai ona fesoasoani ia i latou e tali ai fesili nei: E mafai faapefea ona tatou aloese mai le faaseseina i aoaoga faavae sese? O le a le mea na fai mai Ioane e aveesea ai le fefe? E faapefea ona tatou faaalia lo tatou alofa mo le Atua? O a ni uiga faaleatua e tatau ona tatou atiaeina ia maua ai le ola e faavavau? O a lapataiga sa tuuina mai e uiga ia i latou tatou te filifili e faifaimea faatasi?