Potutusi
Lesona 65: Ioane 6

Lesona 65

Ioane 6

Folasaga

O le aso na sosoo ma le aso na Ia fafagaina ai faavavega le motu o tagata e silia ma le 5,000, na aoao atu ai Iesu o Ia o le Areto o le Ola. O nisi o e na mulimuli ia te Ia na teena Ana aoaoga ma fulitua atu ia te Ia. I se faatusatusaga, sa molimau atu Peteru o Iesu na aoao atu i upu o le ola e faavavau ma o le Alo o le Atua.

Fautuaga mo le Aoaoina Atu

Ioane 6:1–21

Ua fafagaina faavavega e Iesu le silia ma le 5,000 tagata ma ua savali i luga o le sami

Faamatala atu ina ua uma ona molimau atu le Faaola i Lona paia i Ierusalema (tagai Ioane 5), sa toe foi o Ia i Kalilaia, lea na aoao atu ai e ia ma Ana Aposetolo le talalelei ma faamalolo i tagata e toatele (tagai Mataio 5–13). Ona sopoia lea e Iesu o le Sami o Kalilaia faatasi ai ma Ona soo ma sa fafagaina ai faavavega le silia ma le 5,000 le motu o tagata (tagai Ioane 6:1–13).

Faaali atu se papa falaoa. Valaaulia se tamaitiiti aoga e otooto mai le tala i le Faaola na fafagaina le silia ma le 5,000 tagata i ni potoi areto e lima ma na i’a laiti e lua.

  • Mata o a ni ou mafaufauga pe ana faapea na e i ai i lenei vavega ma iloa ai o Iesu e i ai le tomai e saunia faavavega ai meaai?

Fai i se tamaitiiti aoga e faitau leotele le Ioane 6:14–15 . Valaaulia le vasega e mulimuli ai, ma vaavaai mo mea na mananao tagata e fai ina ua uma ona fafagaina faavavega i latou e Iesu.

  • O le a le mea na mananao tagata e fai?

Faamatala atu, o se aga masani i tagata Iutaia i ona po o Iesu na ta’u ma ai faapea, a afio mai le Mesia po o le Tupu o Isaraelu, o le a Ia fafagaina tagata i le areto mai le lagi.

  • E tusa ai ma le fuaiupu 15, o le a le mea na fai e Iesu nai lo le faatagaina o tagata e faapaleina o Ia o lo latou tupu?

  • Aisea na le manao ai Iesu e faailoa o ia o le tupu o Iutaia?

Otooto le Ioane 6:16–21 i le faamanatu atu i le vasega na auina atu e le Faaola ona soo i le Sami o Kalilaia, ona oo lea i le tuneva o le po ina ua tauivi le au soo e alo le vaa faasaga i galu ma le matagi, sa savali atu Iesu i le sami e faatasi atu ia i latou. Ta’u i ai o le tala a Ioane i lenei mea o loo faamamafa ai ina ua ”fiafia” le au soo e talia Iesu i lo latou vaa, sa tuta ”loa” (fuaiupu 21) lava lo latou vaa ma le saogalemu i le mea na malaga i ai. Faamatala atu a tatou naunau e talia le Faaola ma Ana aoaoga, e mafai e Ia ona fesoasoani e taiala i tatou ma le saogalemu mai tauiviga o le olaga nei.

Ioane 6:22–59

Ua aoao atu e Iesu o Ia o le Areto o le Ola

Faamatala o le Ioane 6:22–25 o loo tusia ai faapea, o le tele o tagata na fafagaina faavavega e Iesu sa malaga atu i Kapanaumi e saili o Ia.

Valaaulia se tamaitiiti aoga e faitau leotele le Ioane 6:26–27 , e aofia ai le Faaliliuga a Iosefa Samita (tagai fuaiupu 26, vaefaamatalaga a). Fai atu i le vasega e mulimuli i le faitauga, ma vaavaai mo mea na tau atu e Iesu i tagata. Faamatala atu, o le upu mea ’ai i le fuaiupu 27 e faasino i taumafa.

  • E tusa ai ma le Faaola, aisea na saili ai o Ia e tagata? (O upu a le Faaola ua ta’u mai ai sa latou mulimuli ia te Ia ia maua mai ai nisi meaai.)

  • O le a le mea na ta’u atu e le Faaola e tatau ona latou sailia?

Faamatala atu o ”mea e ’ai [po o taumafa] lea e tumau i le ola e faavavau” (fuaiupu 27) e mafai ona faasino i upumoni faavavau o le talalelei a le Faaola.

  • E mafai faapefea e nei fuaiupu ona fesoasoani ia tatou malamalama ai pe aisea na lei faatagaina ai e Iesu lenei vaega o tagata e faapaleina o Ia o lo latou Tupu?

Valaaulia se tamaitiiti aoga e faitau leotele le Ioane 6:28–31 , ma fai i le vasega e vaavaai mo mea na mananao ai tagata mai ia Iesu e atili faamaonia ai ia i latou o Ia o le Mesia.

  • O le a le mea na mananao tagata e fai e Iesu mo i latou? (Faamatala atu o le manai o le ”areto mai le lagi” [fuaiupu 31] lea na saunia e le Atua mo le fanauga a Isaraelu a o latou feofeoai i le vao.)

  • Mafaufau i le mea na faia e le Faaola i le aso na muamua atu, o le a se mea o ta’u mai i lenei talosaga e uiga i le motu o tagata?

  • I le avea ai ma soo o Iesu Keriso i ona po nei, o a ni auala e ono tofotofoina ai i tatou ia amio e faapei o le motu o tagata?

Valaaulia ni nai tagata aoga e feauauai e faitau leotele mai le Ioane 6:32–35, ma fai i le vasega e vaavaai mo mea na aoao atu e le Faaola i tagata e tali atu ai i la latou talosaga mo se faailoga.

  • O le a le mea na aoao atu e le Faaola e uiga ia te Ia lava ina ua Ia ta’ua le manai, po o le areto mai le lagi?

Atonu e te manao e fautuaina tamaiti aoga e maka le fasifuaitau lenei “O au o le areto o le ola” i le fuaiupu 35.

  • O a ni auala tatou te faatatau ai le Faaola ma Ana aoaoga i le areto?

  • O le a sou manatu i le uiga faapea, o i latou o e o mai ia Keriso ”e le laina lava ia”? (fuaiupu 35).

  • O a upumoni e mafai ona tatou aoao mai i aoaoga a le Faaola i le fuaiupu e 35? (E ui e mafai ona faaaoga e tamaiti aoga ni upu eseese, e tatau lava ona latou faailoa mai se mataupu faavae talitutusa ma le mea lenei: Afai tatou te o mai ia Iesu Keriso, o le a Ia fafagaina i tatou faaleagaga. Atonu e te manao e fautua atu i tamaiti aoga e tusi le mataupu faavae lenei i a latou tusitusiga paia i autafa o le Ioane 6:35.)

Tusi le faamatalaga le uma lenei i luga o le laupapa:

Tatou te o mai ia Iesu Keriso e ala i le …

O le a Ia fafagaina i tatou e ala i le …

Vaevae tamaiti aoga i ni paga. Fai i ai e galulue faatasi e fai se lisi i a latou api po o api talaaga mo le suesueina o tusitusiga paia o ni mea e mafai ona tatou faia e o mai ai ia Iesu Keriso ma auala o le a Ia fafagaina ai i tatou faaleagaga. Valaaulia ni nai tamaiti aoga e lipoti mai a latou tali i le vasega.

Ina ia fesoasoani i le vasega ia lagonaina le moni ma le taua o le mataupu faavae sa latou faailoa mai i le fuaiupu 35, fuafua e valaaulia ni nai tagata e faasoa mai pe o a ni o latou lagona ina ua latou mauaina se fafagaina faaleagaga a o latou o mai i le Faaola.

Otooto le Ioane 6:36–47 i le faamatala atu o nisi tagata na muimui i le Faaola aua na Ia aoao atu o Ia o le areto na sau mai le lagi.

Ina ia saunia tamaiti aoga e faailoa mai se isi mataupu faavae na aoao mai e le Faaola, valaaulia ni nai tamaiti aoga i luma o le vasega ma tuu atu i ai ia tofu ma se fasi falaoa. Valaaulia i latou e sogisogi i le falaoa ma mafaufau pe mata o le a sona tofo.

  • E mafai faapefea e lenei falaoa ona fafagaina oe pe a fai e na o lou sogisogi i ai, mafaufau pe o le a sona tofo, ma e fealuai ma ave i le aso atoa?

  • O le a le mea e tatau ona e faia ia e manuia ai i le mea e tatau ona avatu e le falaoa ia te oe?

Valaaulia ni nai tamaiti aoga e feauauai i le faitauina leotele mai le Ioane 6:49–54. Fai i le vasega e mulimuli ai, ma vaavaai pe mafai faapefea ona fesootai le mea na iloa e tagata o le latou vasega i le falaoa ma mea na aoao mai e le Faaola i nei fuaiupu.

  • E ese faapefea le Areto o le Ola mai le falaoa masani? (E le pei o le falaoa lea e mafai ona faamalie ai i tatou mo na o sina taimi puupuu, ua ofoina mai e Iesu Keriso ia i tatou faamanuiaga o le a tumau e faavavau.)

Faasino atu le fasifuaitau lenei i le fuaiupu 51: “O le areto foi ou te avatua, o lo’u tino lea, ou te avatua ma ola o le lalolagi.”

  • Na faapefea ona ofo atu e le Faaola lona tino ma le toto mo le ola o le lalolagi?

  • E tusa ai ma fuaiupu e 53–54, o le a le mea na aoao atu e le Faaola i tagata e fai?

Faamatala na faaaoga e le Faaola ia upu o le ’aai ma le inufaafaatusa. Ina ia fesoasoani ia malamalama le vasega i aoaoga a le Faaola, valaaulia ia tamaiti aoga volenitia e ’ai le falaoa. Ona fai lea i ai e toe foi i o latou nofoaga.

  • O le a le mea e tupu i le falaoa ma ona niuterene pe a ’ai? (O vaitamini ma niuterene e avea ma se vaega o le tino, e maua ai e le tino le malosi ma le soifua lelei.)

  • O le a sou manatu i le uiga o le ’ai ma inu i le tino ma le toto o Iesu Keriso? (E mafai ona faauiga ia teuloto Ana aoaoga ma le Togiola. E mafai foi ona faatusa i le aai ma feinu i le faamanatuga, lea o le a faatuina e le Faaola mulimuli ane.)

  • E tusa ai ma le fuaiupu 54, o le a le faamanuiaga e mafai ona tatou maua pe afai tatou te teulotoina pe faaaoga ia aoaoga ma le Togiola a Iesu Keriso? (A uma ona tali mai tamaiti aoga, tusi le mataupu faavae lenei i luga o le laupapa: Afai tatou te teulotoina, pe faaaogaina, ia aoaoga ma le Togiola a Iesu Keriso, o le a mafai ona tatou maua le ola e faavavau.)

Fai i tamaiti aoga e mafaufau i le fesili lea, ona valaaulia lea o nisi o i latou e faasoa mai a latou tali:

  • E faapefea ona tatou teulotoina ia aoaoga ma le Togiola a Iesu Keriso? (O tali e mafai ona i ai e ono aofia ai le taliaina o Iesu Keriso o le Alo totino moni o le Atua, aai ma feinu i le faamanatuga i vaiaso taitasi, tausia o poloaiga, ma le tumau i le amiotonu e oo i le iuga [tagai Bruce R. McConkie, Doctrinal New Testament Commentary, 3 vols. (1965–73), 1:358].)

Faamatala atu, o le ola faavavau o le ola lea e faavavau faatasi ma avea e faapei o lo tatou Tama Faalelagi ma Lona Alo o Iesu Keriso. Valaaulia se tamaitiiti aoga e faitau leotele le Ioane 6:56–57 , ma fai i le vasega e vaavaai pe mafai faapefea ona tatou avea e faapei oi La’ua a o tatou teulotoina ia aoaoga ma le Togiola a Iesu Keriso. Valaaulia tamaiti aoga e lipoti mai mea ua latou mauaina.

Faamatala atu o le a le nofo faaletino le Faaola i totonu ia i tatou, ae o Lona aafiaga paia o le a tumau ma i tatou e fesoasoani ai ia tatou avea atili e faapei o Ia ma le Tama Faalelagi.

Faasoa atu lau molimau e uiga i upumoni na faailoa mai e tamaiti aoga. Valaaulia tamaiti aoga e tusi i a latou api po o api talaaga mo le suesueina o tusitusiga paia se sini pe o le a faapefea ona latou teulotoina atili le Togiola a le Faaola po o se tasi o Ana aoaoga.

Ioane 6:60–71

Ua molimau atu Peteru o Iesu o loo i ai upu o le ola e faavavau.

Tusi le fesili lenei i le laupapa: Faaauau pe tuu?

Fai i tamaiti aoga e mafaufau i se taimi na tatau ai ona latou filifili pe faaauau pea ona faia se mea faigata pe faamuta? E mafai ona e fai atu i se tasi pe toalua o tamaiti aoga e faasoa mai la’ua aafiaga.

Faamatala atu ina ua uma ona tuu atu e Iesu le lauga na tusia i le Ioane 6, na feagai foi Ona soo ma se faaiuga foi faapea.

Valaaulia se tamaitiiti aoga e faitau leotele le Ioane 6:60, 66 . Fai atu i le vasega e mulimuli ai, ma vaavaai mo le tali a le toatele o soo o Iesu i Ana aoaoga.

  • Aisea na filifili ai le toatele o soo o Iesu e le toe mulimuli atu ia te Ia? (Faamatala atu o le fasifuaitau ”upufaigata” [fuaiupu 60] o lona uiga sa latou lagonaina ua matua faigata tele ona mulimuli i aoaoga a Iesu.)

  • Aisea e faigata ai i nisi tagata ona tausi ia poloaiga a le Alii?

Valaaulia se tamaitiiti aoga e faitau leotele le Ioane 6:67 , ma fai atu i le vasega e vaavaai mo le fesili na fai atu e Iesu Keriso i Ona Aposetolo.

  • O le a le mea na fesili atu ai le Faaola i Ona Aposetolo?

Valaaulia se tamaitiiti aoga e faitau leotele le Ioane 6:68–69 , ma fai atu i le vasega e vaavaai pe na faapefea ona tali atu Simona Peteru i le Faaola. Fai atu i tamaiti aoga e lipoti mai mea ua latou mauaina.

  • Mai le tali a Peteru, o le a le upumoni e mafai ona tatou aoaoina o le a fesoasoani tatou te tumau faamaoni ai i taimi atonu e faigata ai ona mulimuli i le Faaola pe ola foi i Ana aoaoga? (A uma ona tali mai tamaiti aoga, tusi le mataupu faavae lenei i luga o le laupapa: O se molimau mausali ia Iesu Keriso o le a fesoasoani tatou te tumau faamaoni ai i taimi e ono faigata ai ona mulimuli i le Faaola po o le ola i Ana aoaoga.

  • E faapefea e se molimau mausali i le Faaola ona fesoasoani ia te oe po o se tasi e te iloa, ona tumau faamaoni tusa lava pe foliga mai e faigata ona mulimuli i aoaoga o le talalelei?

Fautua atu i tamaiti aoga e faalagolago i a latou molimau ia Iesu Keriso pe a foliga mai e faigata ona ola i aoaoga o le talalelei. Valaaulia tamaiti aoga o e atonu e manatu e le o lava a latou molimau ia Iesu Keriso ia faamalolosia a latou molimau e ala i le saili e teuloto Ana aoaoga ma le Togiola.

Tala ma Faamatalaga o Talaaga

Ioane 6:33–35. O Le Areto moni o le Ola

Ua aoao mai Elder D. Todd Christofferson o le Korama a Aposetolo e Toasefululua, o Iesu Keriso o le Areto o le Ola:

”Ou te tuuina atu la‘u molimau i le soifua moni o le Areto o le Ola, o Iesu Keriso, ma le mana e le iu ma le o’oo’o o Lana Togiola. O le iuga lava, o le Togiola ma Lona alofa tunoa o la tatou areto lea i aso taitasi” (“Recognizing God’s Hand in Our Daily Blessings,” Ensign, Ian. 2012, 23).

Ina ia aoao atili pe na faapefea ona faaaoga e Iesu Keriso ia faatusa, o le talafaasolopito faalelotu Iutaia, ma nofoaga faalelaueleele o Lana au faalogologo e aoao atu ai Lana lauga e uiga i le Areto o le Ola (Ioane 6), tagai Thomas R. Valetta, “O Le Areto Moni o le Ola,” Ensign, Mat. 1999, 6–13; tagai foi “Ioane 6:32–35, 48–51. ”O Le Areto Moni mai le Lagi,” i le Tusitaiala a le Tagata Aoao o le Feagaiga Fou [Church Educational System manual, 2014], 221–22.

Na aoao mai Elder James E. Talmage o le Korama a Aposetolo e Toasefululua:

”O le manai o le meaai faalelagi; a o le areto na Ia tuuina atu ia i latou e o le lalolagi, ma e na o le pau lea o le areto masani sa i ai. E tatau ona Ia faailoa atu ia te i latou o faailoga sili atu, ma avatu ia i latou ni meaai lelei [po o meaai sili atu, a e latou te lei taliaina o Ia o Le na latou muai manatu ai ma Le ua tautino atu nei e Ia lava” (Jesus the Christ, 3rd. ed. [1916], 339–40).

Ioane 6:53. ”Aai i le tino o le Atalii o le tagata, ma inu foi i lona toto”

Na faamalamalama mai e Elder Bruce R. McConkie o le Korama a Aposetolo e Toasefululua e faapea:

”O le ’ai i le tino ma inu i le toto o le Alo o le Atua, muamua, o le taliaina lea o ia i le uiga e aupito sili ona tino mai ai ma i le atoatoa, ma le leai o se faatuai, o le atalii patino i le tino o le Tama e Faavavau; ma le lona lua, o le tausia lea o poloaiga a le Alo e ala i le taliaina o lana talalelei, au faatasi atu i lana Ekalesia, ma tumau i le usiusitai ma le amiotonu e oo i le iuga. O i latou e ala i lenei ala ua aai i le tino ma inu i lona toto o le a maua le ola e faavaau, o lona uiga o le faaeaga i le lagi aupito maualuga o le lalolagi selesitila” (Doctrinal New Testament Commentary, 3 vols. [1965–73], 1:358).

Ioane 6:56. ”O le ’ai i lo’u tino ma inu i lo’u toto, e tumau o ia ia te au, o a’u foi ia te ia.

Na faamatala e Elder Bruce R. McConkie o le Korama a Aposetolo e Toasefululua, le uiga o le fasifuaitau ”tumau o ia ia te au, o a’u foi ia te ia:

Talu ai o i latou o e ua tasi, e mafaufau ma talitonu ma tutusa aga, ua latou maua foi uiga ma uiga auaumama lava e tasi. … O lea, i se uiga faafaatusa ua i ai i le tasi ma le isi, pe ua nonofo foi i le tasi ma le isi” (Doctrinal New Testament Commentary, 3 vols. [1965–73], 1:766).