Lesona 105
1 Korinito 5–6
Folasaga
Sa lapataia e le Aposetolo o Paulo le Au Paia mai le faatagaina o tagata amioleaga e faatosinaina i latou. Sa ia lapataia le Au Paia e aloese mai filosofia le mama ma faiga ua taatele i Korinito.
Fautuaga mo le Aoaoina Atu
1 Korinito 5
Ua lapataia e Paulo le Au Paia mai le mafuta atu ia i latou o e ua filifili ma le loto e faia le agasala
I luga o le laupapa, tusi ai se atafaigofie o se pesini o fualaau aina suamalie fou ma se fasi fualaau se tasi ua pala e tuu i ai. A le o lena, e mafai ona e faaalia se fasi fualaau suamalie ua pala.
-
O le a le mea e tupu pe e tuua ai pea se fasi fualaau aina suamalie pala i se pesini faatasi ma isi fualaau aina?
-
O le a se mea e mafai ona faatusa i ai le fasi fualaau aina suamalie ua pala i o tatou olaga? (O faatosinaga e mafai ona faatamaia ai i tatou.)
Valaaulia le vasega e vaavaai mo upumoni a o latou suesueina le 1 Korinito 5lea e mafai ona fesoaoani ia i latou e tali lelei atili atu ai i faatosinaga faataumaoi i o latou olaga.
Valaaulia se tamaitiiti aoga e faitau leotele le 1 Korinito 5:1–2. Fai atu i le vasega e mulimuli i le faitauga, ma vaavaai mo se faiga amioleaga a le Au Paia i Korinito.
-
O a faiga amioleaga sa i ai i le Au Paia i Korinito? (Faamatala o le faitaaga e faasino i soo se sootaga faalefeusuai i fafo atu o le faaipoipoga. O se tasi o tagata o le Ekalesia i Korinito na faia le agasala feusuai ma le ava a lona tama.)
-
E tusa ai ma le fuaiupu 2, o le a le mea na fautuaina e Paulo ia taitai o le Ekalesia e fai i lea tagata? (Faamatala o le fasifuaitau “tuueseeseina ia te outou” i le fuaiupu 2o lona uiga ua tatau ona faateaeseina le tagata agasala mai le Ekalesia.)
Tau i ai e fuafua ma le faaeteete e taitai o le Ekalesia mea moni e tele a o lei faateaeseina se tasi po o se isi lava aoaiga faaleEkalesia a o lei faataunuuina. E le gata i le fuafua pe o le a le matuia o le solitulafono, ae fuafua foi e taitai o le Ekalesia faamoemoega eseese mo aoaiga faale-Ekalesia, e fesoasoani ai i se tagata ina ia salamo, e puipuia ai i latou o le a le lelei se aafiaga i faatinoga a se tagata po o le faasalalauina o talitonuga o lena tagata, ma ia puipuia ai le amiotonu o aoaoga a le Ekalesia (tagai “Church Discipline,” mormonnewsroom.org/articles/church-discipline).
Valaaulia le vasega e faitau leotele le 1 Korinito 5:6–7, ma fai i le vasega e vaavaai mo le talafaatusa na faaaoga e Paulo e faamatala ai pe aisea na manaomia ai ona aveeseina lenei tagata mai le Ekalesia.
-
O le a le mea na faatusa i ai e Paulo ia tagata agasala e le salamo? (Faamatala o le mea faafefete, po o le fefete, e iu ina afua ai ona leaga le falaoa pe legalega ai.)
-
O le a le tele o le mea faafefete e manaomia e aafia ai se paluga o se potoi atoa?
-
O le a le mea e faatusa i ai le paluga o se potoi? (O Le Ekalesia A Iesu Keriso.)
-
E faapefea ona e aoteleina le uiga o lenei talafaatusa e fai ma mataupu faavae? (Faaaoga a latou lava upu, e tatau i le vasega ona faailoa mai se mataupu faavae e pei o lenei: Afai tatou te filifili e mafuta vavalalata ma i latou o e fiafia i le agasala, e mafai ona tosina ai i tatou e ala i a latou amioleaga. Tusi lenei upumoni i luga o le laupapa.)
Valaaulia se tamaitiiti aoga e faitau leotele le 1 Korinito 5:9–11. Fai atu i le vasega e mulimuli i le faitauga, ma vaavaai mo le fautuaga na tuuina atu e Paulo i le Au Paia i Korinito.
-
O le a le mea na faatonu e Paulo le Au Paia i Korinito e aloese mai ai?
Ina ia fesoasoani ia malamalama atili le vasega i le fautuaga a Paulo ia aua nei faia ni mafutaga ma le au faitaaga po o isi e talia le agasala, ia tuu atu i le vasega se kopi o le saunoaga lea a Elder Neal A. Maxwell o le Korama a Aposetolo e Toasefululua. Fai atu i se tamaitiiti aoga e faitau leotele:
“Aua tou te mafuta ma le au faitaaga—e le faapea ona ua tele tele lo outou lelei nai lo i latou, ae na tusia e [C.S.] Lewis, ona e le i lava lo outou lelei. Manatua o tulaga leaga e mafai ona faaumatia e oo lava i tagata lelei”(“The Stern but Sweet Seventh Commandment,” New Era, June 1979, 42).
-
E mafai faapefea e le mafuta vavalalata ma i latou o e fiafia i le agasala ona faavaivaia ai lo tatou tomai e faia filifiliga amiotonu?
-
O a ni nai faataitaiga o tulaga leaga e mafai ona faaumatia ai tagata lelei?
-
O le a se mea e mafai ona tatou faia e aunoa ma le fetuunaia o o tatou tulaga faatonuina e fesoasoani ai i tagata o e ua fiafia i le agasala? (E mafai ona tatou tatalo mo i latou, faaalia le agalelei ma le faaaloalo mo i latou o fanau a le Atua, ma faia se faataitaiga amiotonu o le tausia o poloaiga.)
Valaaulia le vasega e mafaufau ma le loto tatalo pe o le a le mea e mafai ona latou faia e faatosina ai isi i se ala lelei e aunoa ma le fetuunaia o o latou tulaga faatonuina.
Aotele le 1 Korinito 5:12–13 e ala i le faamatala atu sa aoao atu e Paulo faapea ua i ai i le Ekalesia se tiutetauave e valaau ia tagata ia salamo ma i nisi tulaga ia “tuueseeseina mai [le Ekalesia]” (fuaiupu 13) i latou o e faia solitulafono matuia.
1 Korinito 6
Ua aoao atu e Paulo le Au Paia e uiga i le lotogatasi ma le tulafono o le legavia.
Tusi se ata faigofie i le laupapa o se pesini o fualaauaina suamalie pala ma se fasi fualaau aina suamalie fou se tasi e tuu i ai. Valaaulia le vasega e mafaufau pe ua latou mafaufau ea pe faapefea ona latou aloese mai le agasala a o lea ua siomia uma ai i latou. Tau i ai o se luitau lea sa feagai ma le Au Paia i Korinito.
A o suesue e le vasega le 1 Korinito 6 , valaaulia i latou e vaavaai mo upumoni sa aoao mai e Paulo e mafai ona fesoasoani ia i latou e ola amiotonu ai e ui ina siomia i latou e faatosinaga leaga.
Aotele le 1 Korinito 6:1–8 i le faamatala atu sa fautuaina e Paulo le Au Paia i Korinito ia foia ma le amiotonu ia feseeseaiga o i latou lava nai lo le ave loa lava i faamasinoga faalemalo.
Valaaulia se tamaitiiti aoga e faitau leotele le 1 Korinito 6:9–11. Fai i le vasega e mulimuli ai, ma vaavaai mo faiga agasala i Korinito ia sa aoao atu e Paulo tagata o le Ekalesia e aloese mai ai.
-
O ituaiga o amioga e tumu i le agasala na aoao atu e Paulo tagata o le Ekalesia e aloese mai ai?
-
E tusa ai ma le fuaiupu 11, o le a le mea na faamanatu atu e Paulo i nei Au Paia e uiga ia i latou lava? (E toatele tagata liliu mai i Korinito sa auai i le faatinoga o nei agasala a o lei auai i le Ekalesia, ae sa latou salamo ma ua faamamaina mai a latou agasala.)
Faamatala o Korinito anamua sa lauiloa i amioga le mama, ma e toatele tagata o Korinito sa faalauiloaina le manatu faapea na faia o tatou tino mo le faamalieina. Aotele le Faaliliuga a Iosefa Samita o le 1 Korinito 6:12 i le faamatala atu sa aoao atu Paulo e faasagatau i le filosofia faapea e leai se sao po o se sese.
-
E talitutusa faapefea ia manatu ma faiga i Korinito i mea ua tatou vaaia ua aga atu i ai le lalolagi i aso nei?
Valaaulia se tagata aoga e faitau leotele le 1 Korinito 6:13. Fai atu i le vasega ia mulimuli i le faitauga, ma vaavaai mo mea na aoao mai e Paulo e uiga i le faamoemoega o o tatou tino.
-
O le a le mea na aoao mai e Paulo e uiga i o tatou tino? (E ui o le toatele o Korinito na talitonu faapea sa faia le tino e tau ina ia faamalie ai faaletino, ae sa faasaoina e Paulo lena manatu e ala i le aoao atu faapea o o tatou tino sa foafoaina e faataunuu ai faamoemoega o le Alii.)
Aotele le 1 Korinito 6:14–17 i le faamatala atu o i latou o e ua auai i le Ekalesia ua tasi ia Keriso o ni “itutino” faaleagaga o Lona tino. Sa faamatala foi e Paulo faapea feusuaiga le mama e le talafeauga ma se sootaga faaleagaga ma Iesu Keriso.
Valaaulia se tamaitiiti aoga e faitau leotele le 1 Korinito 6:18. Fai i le vasega e mulimuli ai, ma vaavaai mo mea sa aoao atu e Paulo i le Au Paia i Korinito e fai. (Atonu e te manao e tau atu o le Faaliliuga a Iosefa Samita o le 1 Korinito 6:18 ua suia le fasifuaitau “e aunoa ma le tino” i le “faasagatau i le tino o Keriso.”)
-
O le a le mea na aoao atu e Paulo le Au Paia i Korinito e fai?
-
O le a le upumoni na aoao atu e Paulo e uiga i e faia le faitaaga? (Atonu e te manao e fautua atu i tagata o le vasega e faailoga upu i le fuaiupu e 18 o loo aoao mai ai le upumoni lenei: O i o latou o e faitaaga ua agasala i latou i o latou lava tino.
Faamatala na sosoo ai ma le aoao atu e Paulo le mafuaaga ua avea ai le faitaaga po o feusuaiga le mama, o se agasala “faasaga i le tino [o le tagata] lava ia.”
Valaaulia se tamaitiiti e faitau leotele le 1 Korinito 6:19 Fai i le vasega e mulimuli i le faitauga, ma vaavaai mo le mea na faatusa i ai e Paulo o tatou tino.
-
O le a le mea na faatusa i ai e Paulo o tatou tino?
Faaali atu se ata o se malumalu.
-
O le a le eseesega o se malumalu ma se isi lava fale?
-
E faapefea ona e aoteleina upumoni na aoao mai e Paulo i le fuaiupu 19? (E ono faaaoga e le vasega nisi upu ae e tatau ona faailoa mai le aoaoga faavae lenei: O o tatou tino o malumalu ia o le Atua e mafai ona afio ai le Agaga.
-
E mafai faapefea e le malamalama o o tatou tino o malumalu ona faatosinaina ai le ala tatou te taulima ai o tatou tino ma tino o isi?
Valaaulia se tamaitiiti aoga e faitau leotele le saunoaga a Elder D. Todd Christofferson o le Korama a Aposetolo e Toasefululua. Fai i le vasega e faalogologo mo ni malamalamaaga faaopoopo pe mafai faapefea e le malamalama i lenei upumoni ona faatosinaina ai le ala tatou te taulima ai o tatou tino.
“I le aloaiaina o nei upumoni [mai le 1 Korinito 6:19–20] … , o le a tatou le suia lava foliga o o tatou tino, e pei o le taina o pea; pe faavaivaia i fualaau faasaina; pe faaleagaina i le faitaaga, mulilua po o uiga le mama. … Ona o o tatou tino o le meafaigaluega lea a o tatou agaga, e taua tele le tausi i ai i le mea sili. E tatau ona tatou faapaiaina lona mana e auauna atu ai ma faalautele ai le galuega a Keriso” (“Toe Manatunatuga i se Olaga Faapaiaina,” Ensign po o leLiahona, Nov. 2010, 17).
-
O le a sou manatu o le a le uiga o le fasifuaitau lea a Paulo “e le aia outou ia te outou” i le fuaiupu 19?
Valaaulia se tagata aoga e faitau leotele le 1 Korinito 6:20. Fai i le vasega e mulimuli ai, ma vaavaai pe aisea o o tatou tino e le ni o tatou lava. .
-
O le a le fasifuaitau o loo tau mai ai le mafuaaga o o tatou tino e le ni o tatou lava? ? (Faamatala o le “ua faatauina outou i le tau” o lona uiga ina ia togiolaina pe toe aumaia e ala i le Togiola a Iesu Keriso.)
-
E faapefea ona e aoteleina se upumoni mai 19–20? (A uma ona tali mai le vasega, mafaufau e valaaulia i latou e tusi le upumoni lea i a latou tusi paia i autafa o fuaiupu 19–20: Ona ua faatauina i tatou i se tau e ala i le Togiola a Iesu Keriso, o o tatou tino ua le o ni o tatou.
Valaaulia se tamaitiiti aoga e faitau leotele le saunoaga lenei a Elder Jeffrey R. Holland o le Korama a Aposetolo e Toasefululua:
“Faamolemole, ia aua lava nei faapea mai: ‘O ai e tiga ai? Aisea e le tuu mai ai sina saolotoga itiiti? E mafai ona ou solitulafono nei ae salamo mulimuli ane.’ Faamolemole aua lava nei e faavalevalea ma agaleaga naua. E le mafai e aunoa ma se faasalaga ona ‘toe faasatauroina Keriso’ [tagai Eperu 6:6]. ‘Sosola mai le faitaaga [1 Korinito 6:18], ua alaga atu ai Paulo, ma sosola ‘mai soo se mea faapena’ [MF&F 59:6; faaopoopo le faamamafa],e faaopopo le Mataupu Faavae ma Feagaiga. Aisea? Ia, o le mafuaaga e tasi ona o le mafatiaga e le mafuatia i le tino ma le agaga na onosaia e le Faaola o le lalolagi ina ia mafai ai ona tatou sosola ese [tagai faapitoa i le Mataupu Faavae ma Feagaiga 19:15–20]. Ua tatou nofo aitalafu ia te Ia mo lena mea. E moni, ua tatou nofo aitalafu ia te Ia i mea uma mo lena mea” (“Personal Purity,” Ensign, Nov. 1998, 76).
-
E tatau faapefea e le manatuaina o o tatou tino e le o ni o tatou lava ona faatosinaina ai a tatou filifiliga tatou te faia e tusa ai ma o tatou tino?
Faasino le vasega i le ata o i le laupapa o le fualaau aina suamalie fou o loo sio e fualaau aina suamalie pala.
-
E mafai faapefea e le malamalama i nei upumoni e uiga i o tatou tino ona fesoasoani tatou te tumau ai i le mama aiai pe a siosiomia i tatou e le amioleaga?
Molimau atu e uiga i upumoni sa outou talanoaina. Valaaulia le vasega e mafaufau i uunaiga po o musumusuga latou te mauaina i le taimi o le lesona ma faatino na uunaiga.
Mau Tauloto—1 Korinito 6:19–20
Valaaulia le vasega e tusi se lauga puupuu e faavae i le 1 Korinito 6:19–20. Fautuaina i latou e faaaofia ai mea nei: (1) talaaga o faamatalaga, e faatatau i lenei fuaitau, (e mafai ona maua talaaga o faamatalaga i luga o kata o mau tauloto), (2) o le mataupu faavae o loo aoao mai ai, ma le (3) o se aafiaga faaletagata lava ia e faapupula ai le upumoni o loo aoao mai i lenei fuaitau. E mafai ona e valaaulia ni nai tamaiti aoga e fai atu a latou lauga i le vasega. Fautuaina le vasega e mafaufau i avanoa latou te maua e tuuina atu ai a latou lauga i le fale po o le Lotu.
Tala ma Faamatalaga o Talaaga
1 Korinito 5:9. “Aua tou te feoai ma e faitaaga”
Na aoao mai e Elder M. Russell Ballard o le Korama a Aposetolo e Toasefululua e faapea, o le avea ai o ni tagata o le Ekalesia, tatou te talitonu i “se aoaoga faavae o le faaaofia ai.” I le aoaoina mai o lenei aoaoga faavae, sa saunoa ai Elder Ballard:
“[O le Faaola] o lona faaaogaina ma le manatu i ai o tagata Iutaia ma tagata Samaria o loo manino ona aoao mai ai faapea o i tatou uma lava o tuaoi, ma e tatau ona tatou alolofa, faatauaina, faaaloalogia, ma auauna atu le tasi i le isi e ui i ni o tatou feeseeseaiga—e aofia ai eseesega faalelotu, faaupufai, ma aganuu. …
“[E ui i lea,] Ou te le o fautua … atu foi ina ia tatou fegalegaleai i soo se fegalegaleaiga e ono tuu atu ai i tatou poo o tatou aiga i se tulaga pagatia faaleagaga ” (“Aoaoga Faavae o le Faaaofia Ai,” Liahona, Ian. 2002, 37).
Na aoao mai foi Elder Dallin H.Oaks o le Korama a Aposetolo e Toasefululua e uiga i le faaaloalo i isi, tusa lava pe latou te talitonu pe ese foi a latou taga mai tagata o le Ekalesia.
“E toatele faiaoga i ekalesia ma aoga e faanoanoa i le auala o loo taulimaina ai e nisi talavou, e aofia ai ma le autalavou o le Ekalesia, le tasi ma le isi. O le poloaiga ia outou fealofani ua mautinoa lava o loo aofia ai le alofa ma le faaaloalo i va o lotu eseese faapea ai ma soo se tulaga faale-ituaiga, faaleaganuu ma faaletamaoaiga. Matou te luiina le autalavou uma ia aloese mai le faamaasiasi tagata, faatiga, po o gagana ma faiga ia ua faamoemoe e faatiga ai i isi. O nei mea uma e solia ai le poloaiga a le Faaola ia fealofani” (“Alolofa i Isi ma Ola ma Eseesega,” Ensign po o le Liahona, Nov. 2014, 27).
1 Korinito 5:13. “Ia faateaeseina e outou lena tagata amioleaga”
A oo ina tuuesea aloaia e le Ekalesia se tagata ua fiafia i se agasala matuia, e tau o le aoaiga faale-Ekalesia. O le tusiga lenei mai le Faamaoni i le Faatuatua: O Se Tusitaiala o le Talalelei ua faamatala mai ai le faagasologa o le aoaiga faale-Ekalesia:
“O epikopo, peresitene o paranesi ma siteki, misiona, ma peresitene o itu ua i ai se tiutetauave e fesoasoani i tagata o le au paia e faatoilalo le solitulafono e ala i le salamo. “O soligatulafono sili ona ogaoga, e pei o le solia o tulafono a le malo, o le faasaunoa i taitoalua, faasaunoa i tamaiti, mulilua, faitaaga, toso teine, ma le mata’ifale po o le toe ui i fanau, e masani ona manaomia ai aoaiga aloa’ia faale-Ekalesia. O aoaiga aloa’ia faale-Ekalesia e aofia ai le taofia o avanoa o se tagata auai o le Ekalesia, po o le tape o le igoa mai faamaumauga a le Ekalesia.
“O le faagasologa o le aoaiga aloaia e amata pe a valaau e se taitai perisitua pulefaamalumalu se fono aoai. O faamoemoega o fono aoa’i o le laveaiina o agaga o e ua solitulafono, puipuia o e ua ta’umamaina, ma le malupuipuia o le mama atoatoa, amiotonu, ma le igoa ta’ulelei o le Ekalesia.
“O aoaiga faale-Ekalesia o se faagasologa musuia lea e faia mo se vaitaimi. O lenei faagasologa ma le Togiola a Iesu Keriso, e mafai ai ona maua e se tagata o le ekalesia le faamagaloga o agasala, toe maua le filemu i le mafaufau, ma maua le malosi e aloese mai ai i le solitulafono i le lumanai. O faaiuga o aoaiga faale-Ekalesia e le i fuafuaina e avea ma iuga o le faagasologa. Ua fuafua e fesoasoani ai i fanau a le Tama Faalelagi ina ia faaauau a latou taumafaiga e toe foi atoatoa mai ai i le mafutaga ma faamanuiaga uma o le Ekalesia. O le taunuuga moomia o le faia lea e le tagata po o a lava suiga e tatau ai ina ia salamo atoatoa” (“Fono Aoai Faale-Ekalesia,” Faamaoni i le Faatuatua [2004], 37–38).