Lesona 107
1 Korinito 9–10
Folasaga
Sa tautalagia e Paulo popolega mai le Au Paia i Korinito e uiga i le faaaogaina o punaoa a le Ekalesia e tuuina atu ai mea mo manaoga faaletino. Sa ia faamatala faapea, o le faamoemoega o lana talaiga o le aumaia lea o le faaolataga i fanau a le Atua. Sa ia apoapoai atu ia te i latou ia aloese mai le agasala faapea foi le faatausuai i isi i o latou talitonuga faalelotu.
Fautuaga mo le Aoaoina Atu
1 Korinito 9
Ua folafola atu e Paulo le talalelei ina ia mafai ai ona faasaoina o ia ma e faalogo ia te ia.
Aumai se uati tatagi i le vasega ma nana mai tamaiti aoga. Faatonutonu ina ia tatagi i se taimi e faatoa amata ai ona e aoao atu.
Ina ia amata le lesona, valaaulia tamaiti aoga e mafaufau pe mata e faapei le ola e faavavau. Fai i ai e tusi i a latou api po o api talaaga mo le suesueina o tusitusiga paia pe aisea ua avea ai le ola e faavavau ma mea latou te mananao i ai. E mafai ona e valaaulia ni nai tamaiti aoga e faitau i le vasega mea sa latou tusia.
Pe a lata i le faaiuga o lea gaoioiga, ua tatau ona tatagi le uati. A tupu lena mea, ona fai atu lea i se tamaitiiti aoga e sue [le uati tatagi] ma tape.
-
O a ni ou lagona i le taimi na e faalogo ai i lena leo?
Fai i tamaiti aoga e mafaufau pe na i ai se taimi na latou tauivi ai e ala i luga pe a tatagi se uati ma o le taunuuga na misia se mea taua. Valaaulia ni nai tamaiti aoga e faasoa mai.
Faamatala atu, e pei lava o le tauivi e ala i luga i se tatagi o le uati e mafai ona taunuu i lo tatou misia po o le le maua o mea taua, o le le “ala i luga” i le olaga ma suia amioga patino e mafai ona tatou le ausia mea e sili ona taua o mea uma, o le ola e faavavau lea.
Valaaulia tamaiti aoga e vaavaai mo se mataupu faavae a o latou suesueina le 1 Korinito 9 lea e mafai ona fesoasoani latou te iloa ai le ala e mautinoa ai latou te mauaina le ola e faavavau.
Valaaulia se tamaitiiti aoga e faitau leotele le aotelegalea o le 1 Korinito 9:1–21:
Na tali atu Paulo i fesili eseese mai le Au Paia o Korinito. Na ia tusia e faapea e ui o le a matuai tauamiotonuina atoa o ia i le lagolagoina i popolega faaletino e tagata o le Ekalesia, sa lei faalagolago lava o ia ia te i latou mo mea na ia ola ai. Sa faamatala e Paulo o le fetuunai i tulaga eseese e aunoa ma le fetuunaia o tulaga faatonuina o le talalelei, sa mafai ai e ia ona fesoasoani i Iutaia, Nuuese, ma soo se tasi sa vaivai i le talalelei ia talia le talalelei.
Fai atu i se tamaitiiti aoga e faitau leotele mai le 1 Korinito 9:17. Valaaulia le vasega e mulimuli i ai, ma vaavaai pe na faapefea ona folafola atu e Paulo le talalelei. Atonu e te manao e faamalamalama le faamatalaga “tisipenisione o le talalelei ua tuuina mai ia te au” e faasino ia Paulo ua faataunuuina lana poloaiga po o le tiute e folafola atu le talalelei.
-
Na faapefea ona folafola atu e Paulo le talalelei?
Valaaulia se tamaitiiti aoga e faitau leotele le 1 Korinito 9:22–23. Fai atu i le vasega e mulimuli i le faitauga, ma vaavaai pe aisea na folafola atu ai e Paulo le talalelei ma le loto naunautai.
-
Aisea na folafola atu ai e Paulo le talalelei ma le loto naunautai?
Valaaulia se tasi o punouai e le aunoa i se polokalama faaleaoaoga (atonu o se faimusika po o se tagata afeleti) e sau i luma o le vasega. Fai atu i le vasega fesili nei:
-
E faapei lau polokalama faaleaoaoga?
-
Pe na i ai ea se taimi na e faataitai ai pe aoaoina oe mo se gaoioiga patino po o se sini patino? Na faapefea ona faaosofia oe i le galue ai agai i se sini patino?
Faafetai i le tagata, ma fai i ai e alu e nofo i lalo.
Fai atu i se tamaitiiti aoga e faitau leotele mai le 1 Korinito 9:24–25 Valaaulia le vasega e mulimuli ai, ma vaavaai mo le tausinioga na faaaoga e Paulo e aoao atu ai le Au Paia i Korinito.
-
O le a le tausinioga na faasino i ai Paulo?
-
O a agavaa po o uiga na fai mai Paulo e manaomia e le au tausinio ina ia faamanuiaina? (Faamatala o le “faifaatatau i mea uma” o lona uiga ia faaaoga le amio pulea atoa.)
-
O le a le pale e le pala o loo faasino i ai Paulo i le e tumau e faavavau? (Ola e faavavau.)
-
O le a le mataupu faavae e mafai ona tatou aoao ai mai le fuaiupu 25e faatatau i mea e tatau ona tatou faia ina ia maua ai le ola e faavavau? (E ono faaaoga e le vaega ni upu eseese, ae ia mautinoa e faailoa maia le mataupu faavae lea: Ina ia maua le ola e faavavau, e tatau ona tatou aoao e faatino le amio pulea i mea uma. Tusi le mataupu faavae lenei i luga o le laupapa. Ia mautinoa e malamalama foi le vasega e ui ina tatau ai le amio-pulea, ae o le ola e faavaau e maua i le na o le “alofa, ma le alofa mutimutivale, ma le alofa tunoa” o Iesu Keriso [2 Nifae 2:8] nai lo le na o lo tatou amio-pulea.)
-
Aisea e te manatu ai o le faatinoina o le amio-pulea e tatau ai ina ia maua ai le ola e faavavau?
Fai atu i se tamaitiiti aoga e faitau leotele mai le 1 Korinito 9:26–27 . Valaaulia le vasega e mulimuli ai, ma vaavaai pe na faapefea e Paulo ona faamatala ana lava taumafaiga e faatino lona lava amio-pulea.
-
E tusa ai ma le fuaiupu 26, na faapefea ona faamatala e Paulo ana taumafaiga e maua le ola e faavavau? (E aunoa ma le faalauaiteleina ma aunoa ma se taumafaiga e maumau.)
-
E tusa ai ma le fuaiupu 27, o le a sou manatu o le a le uiga ina ua tusia e Paulo, “Ou te faatoilaloina lou nei tino ma au fai ai ma pologa”?
Ina ia fesoasoani i tagata aoga ia malamalama i lenei aoaoga faavae, valaaulia se tagata aoga e faitau leotele le saunoaga lenei a Peresitene Polika Iaga:
“E le mafai ona e maua le ola e faavavau, sei vagana ua faapologaina ou manaoga i le agaga o i totonu ia te oe, le agaga lea na avatu e lo tatou Tama i le Lagi ia te oe. O le uiga o lau tala o le Tama o o outou agaga, o na agaga na ia tuu i totonu o nei tino. E tatau ona aumaia tino ia faapologa i le agaga ma le atoatoa, pe o le a le mafai e o outou tino ona toetutu ia maua le ola e faavavau. … Saili ma le filiga, seia e aumaia tagata uma e usitaia le tulafono a Keriso. …
“… Afai e gauai atu le agaga i le tino, o le a pala [le agaga]; peitai afai e gauai atu le tino i le agaga ona mama ai lea [o le tino] ma paia” (Aoaoga a Peresitene o le Ekalesia: Polika Iaga [1997], 204–5).
-
O a ni nai mea e mafai ona tatou fai e fesoasoani ai ia gauai atu o tatou tino i o tatou agaga?
1 Korinito 10
Ua lapataia e Paulo le Au Paia i Korinito e aloese mai le agasala ma le faatausuai atu i isi
Valaaulia se tagata aoga e faitau leotele le saunoaga lenei a Peresitene James E. Faust o le Au Peresitene Sili:
“O se tasi o talatuu tele o le olaga, o le taimi e mafaufau ai le [tagata] e leai se isi e toilalo ai. Ua toatele naua ua mafaufau o i latou e uamea, e lava lo latou malosi e tatalia ai tofotofoga. Ua latou faaseseina i latou lava i mafaufauga,’e le mafai ona tupu ia te au” (“E le mafai ona tupu ia te au,” Ensign, Me 2002, 46).
-
O a tulaga e ono faataga ai e tagata i latou lava ia oo i faaosoosoga ma le manatu e lava lo latou malolosi e tatalia ai? (Lisi tali a tagata o le vasega i luga o le laupapa.)
Faamatala na faasino Paulo i faataitaiga mai le talafaasolopito o Isaraelu e lapataia ai le Au Paia i Korinito e uiga i faaosoosoga ma le agasala. Fai atu i se tamaitiiti aoga e faitau leotele le 1 Korinito 10:1–5. Valaaulia le vasega e mulimuli ai, ma vaavaai mo ni mea sa oo i ai le fanauga a Isaraelu i le taimi o Mose sa tatau ona latou malolosi ai faaleagaga.
-
O a ni mea na oo i ai le fanauga a Isaraelu na tatau ona latou malolosi ai faaleagaga? (Atonu e te manao e tau i ai sa faailoa mai e Paulo le “Papa faaleagaga,” po o Ieova, o Keriso [tagai foi Teuteronome 32:3–4].)
-
e tusa ai ma le fuaiupu 5, o a ni lagona o le Atua i amio a le toatele o nei Isaraelu anamua?
Valaaulia ni nai tamaiti aoga e feauauai i le faitauina leotele o le 1 Korinito 10:6–11. Valaaulia le vasega e mulimuli ai, ma vaavaai mo mea na manao Paulo i le Au Paia i Korinito e aoao mai le faataitaiga a Isaraelu anamua.
-
O le a le faamoemoega o Paulo mo le faasoaina atu o le faataitaiga a Isaraelu anamua? (Na manao Paulo e lapatai atu i le Au Paia i Korinito ina ia latou aloese ai mai le toe faia o agasala a Isaraelu anamua.)
Valaaulia le vasega e tutu ma faitau leotele faatasi le 1 Korinito 10:12
-
I au lava upu, e faapefea ona e aoteleina le savali a Paulo i le fuaiupu 12?
Valaaulia le vasega e nonofo i lalo. Valaaulia se tamaitiiti aoga e faitau leotele le 1 Korinito 10:13. Fai atu i le vasega e mulimuli i le faitauga, ma vaavaai po o a mea na aoao atu e Paulo e uiga i tofotofoga.
-
O le a le mea na aoao atu e Paulo e uiga i tofotofoga?
-
Afai o le a le faatagaina i tatou e le Atua e tofotofoina i luga atu o lo tatou malosi e tetee atu ai, aisea na faamatuu atu ai Isaraelu anamua i tofotofoga?
Tusi le fuaiupu lea e lei uma i luga o le laupapa: O le a saunia e le Atua le ala mo i tatou e sosola ese ai mai tofotofoga, ae e tatau ona tatou …
Valaaulia se tamaitiiti aoga e faitau leotele le 1 Korinito 10:14. Fai atu i le vasega e mulimuli i le faitauga, ma vaavaai mo mea na aoao e Paulo i le Au Paia i Korinito e fai.
-
O a mea na aoao atu e Paulo ia le Au Paia i Korinito e fai?
-
O le a le mea o aoao mai ai i tatou i le fuaiupu 14e uiga i la tatou matafaioi e sosolaese mai tofotofoga? (A uma ona tali mai ia le vasega, faamaea le upumoni o i le laupapa ina ia faitauina faapea: O le a saunia e le Atua se ala mo i tatou e sosolaese mai ai tofotofoga, ae e tatau ona tatou filifili e vavaeese mai i tatou lava mai tofotofoga.
Atonu e te manao e fautua atu i tagata aoga e tusi lenei aoaoga faavae i a latou tusitusiga paia i autafa o le fuaiupu 10:13–14.) Fai i se tamaitiiti aoga e faitau leotele le Alema 13:28. Fai atu i le vasega e mulimuli i le faitauga, ma vaavaai po o a mea e mafai ona tatou faia e vavaeese mai ai i tatou lava mai tofotofoga.
-
E tusa ai ma le Alema 13:28, o le a se mea e mafai ona tatou faia e vavaeese mai ai i tatou lava mai faaosoosoga?
-
E mafai faapefea e le faalotomaualaloina o i tatou lava ma le tatalo e le aunoa ona fesoasoani ia i tatou e vavaeese mai ai i tatou lava mai faaosoosoga?
Tuu i luga se kopi o le tamaitusiMo Le Malosi o le Autalavou, ma fai i le vasega e faamatala pe faapefea e le ola e tusa ai ma tulaga faatonuina o loo lisi i lenei tamaitusi ona fesoasoani e vavaeese ai i tatou lava mai faaosoosoga.
Faamatala atonu e le mafai i taimi uma e tagata o le vasega ona aloese mai tofotofoga. Ona o lena, e manaomia ai ona tatou filifili nei pe o le a faapefea a tatou taga pe a fetaiai ma tofotofoga. Valaaulia se tamaitiiti aoga e faitau leotele le saunoaga lenei mai ia Peresitene Spencer W. Kimball:
“O faaiuga tonu e faigofie ona faia, pe a tatou faia ae le’i taitai ona o’o mai, i le i ai o faamoemoega i le mafaufau; o lenei mea e faasaoina ai le tele o le atuatuvale i le taimi e filifili ai, i le taimi ua tatou vaivai ai, ma matua faaosoosoina ai. …
“Atinae le pulea o lau lava amio ina ia, atili ai ona e le tau filifili ma toe filifili i le mea o le a e faia pe a e fetaiai ma le tofotofoga lava lea e tasi i lea taimi ma lea taimi. E manaomia ona na o le tasilava ona e filifilia nisi mea …
“O le taimi e tuu ai auala leaga o le taimi lea ao lei amataina. O le leolilo o le olaga lelei e i ai i le puipuiga ma le taofiofi. O i latou o e faamatuu atu i le leaga e masani lava o i latou ia o e tuuina i latou lava i se tulaga matautia ( Aoaoga a Peresitene o le Ekalesia: Spencer W. Kimball [2006], 108–9.
Faasoa atu lau molimau o mataupu faavae na faailoa mai e tagata o le vasega. Fai i le vasega e mafaufau pe o fea tofotofoga e sili ona latou tauivia. Valaaulia i latou e mafaufau loloto i fesili nei:
-
O a suiga e mafai ona e faia e aloese ai mai tofotofoga e lua te lei fetaiai?
-
Pe o e naunau ea e faia nei suiga?
Valaaulia le vasega e fatufatu se fuafuaga o le a latou mulimuli ai e sosolaese ai mai faaosoosoga. Fautuaina i latou e saili se fesoasoani mai le Alii e ala i le tatalo a o latou galulue e faataunuu la latou fuafuaga.
Aotele le 1 Korinito 10:15–33 ile faamatala atu sa fautuaina e Paulo o le Au Paia i Korinito e faaaloalo i faiga faalelotu a isi e aunoa ma le fetuunaia o o latou lava, ma toe faia foi mea sa ia folafola atu e fesoasoani ai i le toatele ina ia faasaoina.
Tala ma Faamatalaga o Talaaga
1 Korinito 9:20–23 “Ua avea au ma mea uma mo tagata uma”
O le a le uiga o le tala a Paulo e faapea “sa ou faapei o se Iutaia” ina ia ou “maua ni Iutaia” (1 Korinito 9:20); ua ou faapei o se nofo i le tulafono; po o se Nuuese, ia maua ai ni Nuuese; ma ua ou faapei o se ua vaivai ina ia “maua e ua vaivai”? 1 Korinito 9:22. Na saunia e Elder Bruce R. McConkie o le Korama a Aposetolo e Toasefululua le faamalamalamaga aoga lea:
“Ua fai mai Paulo i i, ua ia faia e ia lava o mea uma i tagata uma i se taumafaiga ia maua i latou e talia le savali o le talalelei; o lona uiga, sa ia fetuunaia o ia lava i tulaga o vasega uma o tagata, e fai ma auala e faagauai mai ai i latou i ana aoaoga ma le molimau. Ma, ina nei aofia ai i lenei mea le taliaina o a latou mataupu pepelo po o aga, pe naaofia ai i soo se itu le fetuunaia o le talalelei ma faiga pepelo o tapuaiga, sa ia faanatinati ai ona faaopoopo mai faapea e tatau ia te ia ma tagata uma ona usitai i le tulafono o le talalelei ina ia faaolaina ai” (Doctrinal New Testament Commentary, 3 vols. [1965–73], 2:353).
1 Korinito 9:25. “Faatatau i Mea Uma”
O nisi taimi e faigata ona iloa pe aisea ua poloaiina ai i tatou e le Alii e faaaoga le amio-pulea o le tagata lava ia. Na tuuina mai e Elder Richard G. Scott o le Korama a Aposetolo e Toasefululua le faamatalaga aoga lea:
“O se olaga amiotonu e manaomia ai le amio pulea. O le amio pulea o le uiga lea o le a e maua ai le malosi e aloese ai mai le fiu i le mea e sili ona e manao ai i le olaga mo se mea e te manatu e te manao ai i le taimi nei” (“O Le Mana o le Amiotonu,” Ensign, Nov. 1998, 69).
1 Korinito 9:27. “Ou te faatoilaloina lou nei tino, ma au fai ai ma pologa”
O le faapologaina pea lava pea o o tatou tino i le pulega a o tatou agaga, o se tasi o suega sili o le olaga i le tino. Na aoao mai Elder M. Russell Ballard o le Korama a Aposetolo e Toasefululua:
“I le lalolagi i le muai olaga, ae tatou te lei tuua le afioaga o le Tama Faalelagi, sa Ia lapataia i tatou e uiga i aafiaga o le a tatou iai i le lalolagi. Na tatou iloaina o le a maua o tatou tino faaletino o aano ma ivi. E lei avea lava ma tino tagata muamua, sa lei i ai so tatou poto masani e taulima ai tofotofoga o le olaga nei. Ae na silafia ma malamalama le Tama Faalelagi. Sa Ia poloaiina i tatou e pulea lelei o tatou tino faitino ma ia faagauai atu i o tatou agaga. E tatau ona faatautaia e o tatou agaga o tatou tofotofoga faaletino o le a fetaiai ma o tatou tino i se lalolagi faaletino. Tatou te maua le mana faaleagaga e manumalo ai i faatosinaga a Satani e ala i le tausia o poloaiga a lo tatou Alii, o Iesu Keriso” (“Tausiga o Feagaiga,” Ensign, Me 1993, 6).
1 Korinito 10:13. Solaese mai faaosoosoga
Na aoao mai e Peresitene James E. Faust o le Au Peresitene sili e uiga i le taua i tagata uma ona aloese mai faaosoosoga:
“E toatele naua i latou ua manatu e … lava le malolosi e tatalia ai soo se faaosoosoga. Latou te faaseseina i latou lava i le mafaufau faapea, ‘E le mafai ona tupu ia te au.’ … E mafai ona tupu ia i tatou i soo se taimi lava. …
“Sa ou faalogo i se alii o tau atu i ona atalii, E mafai ona ou aveina le taavale e latalata tele i le siui nai lo outou aua e tele atu lou poto masani nai lo outou.’ Sa manatu o ia o la na te pulea, ae o le mea moni sa faaseseina. ‘O le faalavelave o le faaaogaina o le poto masani e fai ma taiala o le, e tele ina muamua mai le suega faaiu ona faatoa sau ai lea o’ [Author unknown, quoted in 1,911 Best Things Anybody Ever Said, comp. Robert Byrne (1988), 386]. E manatu nisi tagata o o latou tausaga ma le poto masani ua sili atu ai ona latou mafaia ona tatalia ia faaosoosoga. O se mea pepelo lea.
“Ou te manatua le faalogo atu ia Peresitene J. Reuben Clark o faamatala maia se taimi na alu ai se tasi o lana fanau i se tafaoga faamasani. Na ia faatonuina e foi mai i le fale i se itula patino. ‘O le saga mafaufau atili i lena faamanatu faifai pea, faanatinati, na fai atu ai [le talavou], “Tama, o le a le faafitauli, e te le faatuatuaina au?”
“‘O lana tali atonu na faateia ai o ia ao ia fai atu, “E leai, lou [afafine] ou te le faatuatuaina oe. Ou te le faatuatuaina au lava ia”’ [pei ona sii mai e Harold B. Lee, The Teachings of Harold B. Lee, ed. Clyde J. Williams (1996), 629]” (“E Le Mafai Ona Tupu ia te Au,” Ensign, May 2002, 46–47).