Lesona 19

Mataio 16

Folasaga

Na aoai e Iesu Keriso le au Faresaio ma le au Satukaio o e sa sailia se faailoga o lona paia. Sa tuuina atu e Peteru le molimau o Iesu o le Keriso ma sa folafola atu ia te ia ki o le malo. Sa aoao atu e Iesu Ona soo e amo o latou satauro ma mulimuli atu ia te Ia.

Fautuaga mo le Aoaoina Atu

Mataio 16:1–12

Ua sailia e le au Faresaio ma le au Satukaio se faailoga mai le Faaola.

A’o le’i amataina le vasega, tusi fasifuaitau nei i luga o le laupapa:

E ala i le faaali mai o se agelu

E ala i le Agaga Paia

E ala i le talitonu i upu a se uo po o se tagata o le aiga

E ala i le molimauina o se molimau

Ina ia amata le lesona, fai i le vasega e filifili le fuaitau i luga o le laupapa e sili ona faamatalaina ai pe faapefea ona latou mananao ia maua se molimau o le talalelei. Valaaulia ni nai tagata e lipoti mai pe o le fea fuaitau ua latou filifilia ma faamatala mai pe aisea ua filifili ai.

Valaaulia le vasega a o latou suesue i le Mataio 16, e vaavaai mo upumoni e faatatau i le ala e fesoasoani mai ai le Alii ia i tatou ia maua ma faamalolosia a tatou molimau i le talalelei.

Valaaulia se tamaitiiti aoga e faitau leotele le Mataio 16:1. Fai i le vasega e mulimuli ai, ma vaavaai mo mea sa mananao ai le au Faresaio ma le au Satukaio mai ia Iesu.

• O le a le mea sa mananao ai le au Faresaio ma le au Satukaio mai ia Iesu?

• O le a sou manatu i le uiga faapea sa “tofotofoina” e le au Faresaio ma le au Satukaio ia Iesu ina ua latou fesili atu mo se faailoga? (O se isi uiga o le veape tofotofoo le taumafai lea e suesue.)

Valaaulia ni tamaiti aoga e feauauai i le faitauina leotele o le Mataio 16:2–4. Fai atu i le vasega e mulimuli i le faitauga, ma vaavaai mo le tali a le Faaola i le au Faresaio ma le au Satukaio.

• O le a le faailoga na fetalai mai le Alii o le a Ia aumaia?

Faamatala sa faasino atu Iesu i le perofeta o le Feagaiga Tuai o Iona, o le sa foloina e “se i’a tele”Iona 1:17 O le “tanuga” o Iona i totonu ma le toe sau i fafo mai le manava o le i’a ina ua mavae aso e tolu, e faatusa i le maliu, tanuga, ma le Toetu o Iesu Keriso mai le tuugamau i le aso lona tolu.

• O le a le mea na faia e le Faaola ina ua uma ona Ia aoaia le au Faresaio ma le au Satukaio?

• O le a se mea e mafai ona tatou aoao mai lenei aafiaga e uiga i le auala e le tatau e saili ai upumoni faaleagaga? (E ono faaaoga e tagata ni upu eseese, ae ia mautinoa ua latou faailoa maia le upumoni lenei: Tatou te le mauaina se upumoni faaleagaga e ala i le saili mo faailoga.

Otooto le Mataio 16:5–12 e ala i le faamatala faapea sa lapataia e le Faaola Ona soo i aoaoga pepelo a le au Faresaio ma le au Satukaio. (Manatua: O le a saga auiliiliina atili lenei mea i le lesona i le Mareko 8.)

Mataio 16:13–20

Ua molimau atu Peteru ia Iesu Keriso ma ua folafola atu i ai ki o le malo.

Faamatala ina ua uma ona aoai e Iesu le au Faresaio ma le au Satukaio mo le sailia o se faailoga, sa Ia aoao atu Ona soo i le ala e maua ai se molimau i le upumoni. Valaaulia se tamaitiiti aoga e faitau leotele le Mataio 16:13–14. Fai i le vasega e mulimuli ai, ma vaavaai mo le fesili sa fai atu e Iesu ma le tali na tuuina atu e Ona soo.

• O le a le fesili a le Faaola i Ona soo? Na faapefea ona latou tali atu? (Atonu e manaomia ona e faamatala atu o Elaia ma Ieremia o perofeta o le Feagaiga Tuai o Elia ma Ieremia.)

• O le a se mea e mafai e la latou tali ona ta’u mai ia i tatou pe o le a le lelei o le malamalama o tagata pe o ai Iesu i le taimi lea o Lana galuega?

Valaaulia se tamaitiiti aoga e faitau leotele le Mataio 16:15–17. Fai atu i le vasega e mulimuli i le faitauga, ma vaavaai mo le fesili lona lua na fai atu e le Faaola.

O le Mataio 16:15–19 o se fuaitau o se mau tauloto. O le suesueina o fuaitau o mau tauloto o le a fesoasoani i tagata o le vasega e faateleina ai lo latou malamalama i aoaoga faavae autu ma ia saunia ai e aoao atu i isi. Atonu e te manao e fautua atu i tagata o le vasega e faailoga fuaitau o le mau tauloto i se auala e iloagofie ai ina ia faigofie ai ona latou mauaina. Tagai i le manatu mo le aoaoina atu o loo i le faaiuga o le lesona, e fesoasoani ai i tagata o le vasega i le taulotoina o le mau lenei.

• O le a le fesili lona lua na fai atu e le Faaola? Na faapefea ona tali atu Peteru?

• E tusa ai ma lefuaiupu 17, na faapefea ona iloa e Peteru o Iesu Keriso o le Alo o le Atua? (Ta’u i ai o le Tama Faalelagi na faaalia lenei upumoni ia te ia e ala i le Agaga Paia.)

• O le a le upumoni ua tatou aoao mai i nei fuaiupu e uiga i le auala e mafai ai ona tatou maua ai se molimau ia Iesu Keriso? (O tali a tagata aoga e tatau ona atagia mai ai le upumoni faapeatatou te maua se molimau ia Iesu Keriso e ala i faaaliga mai le Agaga Paia.)

• Aisea e te manatu ai e taua mo i tatou le mauaina o se molimau e ala i faaaliga mai le Agaga Paia ae le o se isi lava ala?

Ina ia fesoasoani ia malamalama atili le vasega i le matafaioi a le Agaga Paia i le fesoasoani ai ia tatou maua se molimau i le Faaola, valaaulia se tagata e faitau leotele le saunoaga lea mai ia Peresitene Iosefa Filitia Samita:

“Sa aoao mai Peresitene Iosefa Filitia Samita e faapea “o le fetalai atu o le Agaga o le Atua i le agaga o le tagata e i ai le mana e fesootai atu ai le upumoni i se aafiaga sili atu ma le malamalama nai lo le upumoni e mafai ona fesootai mai e se fesootaiga faaletagata e oo lava i tagata faalelagi. “E ala mai i le Agaga Paia e ulu atu ai le upu moni i musele ma uaua tetele uma o le tino ina ia le mafai ona galo” (Aoaoga a Peresitene o le Ekalesia: Iosefa Filitia Samita [2013], 183–84).

• O a ni mea e mafai ona tatou faia e saunia ai i tatou lava e maua faaaliga e ala i le Agaga Paia?

• Na faapefea ona e iloa o Iesu Keriso o le Alo o le Atua ma lou Faaola? O le a le mea na e faia e saunia ai mo le mauaina o lena molimau mai le Agaga Paia?

Valaaulia tagata aoga e mafaufau loloto i a latou molimau i le Faaola. Fautuaina i latou e tusi ia latou api po o api talaaga mo suesuega o tusitusiga paia pe mafai faapefea ona latou faamalolosia a latou molimau pe o a mea e mafai ona latou fai ia maua ai se molimau e ala i le Agaga Paia.

Valaaulia ni tagata se toalua e o mai i luma o le vasega ma faatino se gaoioiga i taga. Tofi se tagata se toatasi e suia o ia lava a o le isi e fai ma sui o se uo e le o se tagata o le Ekalesia. Tuu i le tagata o loo sui i le uo e le lotu se fasipepa o loo i ai fesili ia e lua. Fai i le tagata lea e faitau leotele ia fesili taitasi, ma fai i le isi tagata e tali mai. (Atonu e te manao e fautuaina le vasega e aumai ni tali talafeagai e mafai e le tagata o loo tali ona tuuina mai.

1. Ua ou faalogo ua fai mai le tou ekalesia ua na o le pau lea o le ekalesia moni a Iesu Keriso. O le mea lena e te talitonu i ai?

2. E talitonu foi la’u ekalesia ia Iesu Keriso, aisea la e te manatu ai o la outou ekalesia ua na o le pau lea o le ekalesia moni?

Faafetai i tagata mo le faatinoina, ma valaaulia i latou e toe foi i o la nofoaga.

Valaaulia le vasega a o latou faaauau i le suesueina o le Mataio 16 e vaavaai mo upumoni ia e mafai ona fesoasoani tatou te malamalama ai ma faamatala atu i isi le mea e tulagaese ai le Ekalesia a Iesu Keriso o le Au Paia o Aso e Gata Ai o le Ekalesia a le Alii i luga o le fogaeleele.

Kaisareia Filipi

Faamanatu i le vasega ina ua fesili Iesu i Ona soo i fesili e uiga i Lona faasinomaga, sa i ai i latou i le itulagi e igoa o Kaisareia Filipi (tagai Mataio 16:13). Afai e mafai, faaali se ata o Kaisaraia Filipi (see Bible Photographs, no. 26, “Caesarea Philippi”). Fai i le vasega e faailoa mai pe o le a le mea o i tua atu o le vaitafe ma laau i le ata lea. Faamatala o le fatugapapa tele i Kaisareia Filipi ua saunia ai se nofoaga anoa a o faaauau pea e le Faaola Lenei talanoaga ma Ona soo.

Valaaulia se tamaitiiti aoga e faitau leotele le Mataio 16:18–20. Fai i le vasega e mulimuli ai, ma vaavaai mo le ala na faaaoga ai e le Faaola la manatu faavae o se papa e faamatala ai le faavae o Lana Ekalesia.

• O le a sou manatu i le uiga o le fetalaiga a le Faaola ina ua Ia faapea mai o le a Ia fausia Lenei Ekalesia “i luga o lenei papa”? (fuaiupu 18).

Ina ia fesoasoani i tagata aoao ia malamalama i lenei fasifuaitau, valaaulia se tasi e faitau leotele le saunoaga lenei a le Perofeta o Iosefa Samita.

“Na fetalai Iesu i Ana aoaoga, ‘Ou te ati ae foi la’u Ekalesia i luga o lenei papa. …’ [Mataio 16:18.] O le a le papa? Faaaliga” (Aoaoga a Peresitene o le Ekalesia: Iosefa Samita [2007], 195).

“O Le Ekalesia a Iesu Keriso o le Au Paia o Aso e Gata Ai sa faavae i luga o faaaliga tuusao, o le Ekalesia moni a le Atua ua i ai, e tusa ai ma Tusitusiga Paia (Amosa 3:7, ma le Galuega 1:2)” (Aoaoga: Iosefa Samita, 195).

• E faapefea ona e aoteleina le aoaoga a le Faaola e uiga i Lana Ekalesia o loo tusia i le fuaiupu 18? (E ao i le vasega ona faailoa mai se mea e pei o le mataupu faavae lenei: O le Ekalesia a Iesu Keriso o loo atiae i luga o faaaliga mai le Atua. Tusi le upumoni lenei i luga o le laupapa.)

• E mafai faapefea e le iloa ai O Le Ekalesia a Iesu Keriso o le Au Paia o Aso e Gata Ai o loo atiae i luga o faaaliga mai le Atua ona faamalosia ai lau molimau i le talalelei?

• E tusa ai ma le fuaiupu 19, o le a le mea na folafola atu le Faaola e tuu ia Peteru?

• O le a le aoaoga faavae e mafai ona tatou aoao mai i le folafolaga na tuu atu e le Faaola ia Peteru? (Ia mautinoa e faailoa mai e le vasega le upumoni lenei: Ua tuuina atu e Iesu Keriso ia ki o Lona malo i Ana perofeta filifilia ma aposetolo.

• O a ki o le malo? (O le mana taitai, aia tatau, ma le pule tatau e pulefaamalumalu ai i le malo o le Atua i le lalolagi, po o le Ekalesia a Iesu Keriso.)

Ina ia fesoasoani i tagata o le vasega ia malamalama i ki o le perisitua, valaaulia se tagata o le vasega e faitau leotele le saunoaga lenei a Elder Dallin H. Oaks o le Korama a Aposetolo e Toasefululua.

“O ki o le perisitua o le pule lea a le Atua ua tuuina mai i e o umiaina le perisitua e faatonu ai, faafoe ai, ma pulea ai le faaaogaina o Lana perisitua i luga o le fogaeleele’ [Tusitaulima 2: Taitaiina o le Ekalesia (2010), 2.1.1]. O gaoioiga uma po o sauniga e faia i le Ekalesia e faia i lalo o le pule tuusao pe faamatuu atu e se tasi e umia ki mo lena galuega”(“O Ki ma le Pule o le Perisitua,” Ensign po o le Liahona, Me 2014, 49).

• O le a le fetalaiga a Iesu faapea o le a mafai e Peteru ona faia ona o ki o le a tuu atu i ai?

Faamatala sa i ai i ki na folafola atu e le Faaola ia Peteru ia ki o le mana o faamauga. O lenei mana ua mafai ai e sauniga e faatinoina i lalo o le pule a taitai o le Ekalesia ona aoga i le lagi. E faaaogaina foi e fusia faatasi ai aiga mo le faavavau. I o tatou taimi, o le mana o faamauga o loo umia e le Au Peresitene Sili ma le Korama a Aposetolo e Toasefululua.

• E faapefea ona e aoteleina le mafuaaga ua tuu atu ai e le Alii ia ki o le perisitua i Ana perofeta ma Aposetolo? (E ao i le vasega ona faailoa mai se upumoni e talitutusa ma lea: E taua ki o le perisitua e taitai ai le Ekalesia a le Alii i luga o le laueleele.)

Fai i se tagata e faitau leotele mai ia fesili mai le faatinoga lea sa fai? Valaaulia le vasega e faamatala mai pe faapefea ona latou tali atu i nei fesili e faaaoga ai upumoni sa latou faailoa mai i le Mataio 16:18–19. Atonu foi e te manao e valaaulia isi e faasoa mai a latou molimau i nei upumoni.

Fuafua e faaali se ata o le Au Peresitene o i ai nei ma le Korama a Aposetolo e Toasefululua (tagai LDS.org [mo se faataitaiga, Feiloai i Perofeta ma Aposetolo o le Taimi Nei] ma lomiga o konafesi aoao o le Ensign po o leLiahona) ma molimau atu o ki lava ia na tuu atu ia Peteru ma isi Aposetolo anamua, o loo umia ma faaaogaina i le taimi nei e perofeta soifua ma Aposetolo a le Alii.

Mataio 16:21–28

Ua aoao atu Iesu i le uiga o le mulimuli atu ia te Ia.

Otooto le Mataio 16:21–28 i le faamatala atu na fetalai Iesu e uiga i Lana taulaga togiola. Na Ia aoao atu foi i Ona soo e tatau ona latou naunau e faafitia le tagata natura (tagai Mosaea 3:19), ia usiusitai, ma ositaulaga ina ia mafai ai ona latou mulimuli atu ia te Ia ma le fiafia.

Mau Tauloto—Mataio 16:15–19

Mataio 16. Fuafua e filifili se vaega o le Mataio 16:15–19 e tauloto e le vasega i le taimi o aso e sosoo ai. E mafai ona tatou suea ni aitia mo le taulotoina i le faaopoopoga o le tusi lesona lenei.

Tala ma Faamatalaga o Talaaga

Mataio 16:1–4. Ua saili e le au Faresaio ma le au Satukaio se faailoga

O loo faamatala mai e le Mataio 16:1–4 se felafolafoaiga i le va o Iesu Keriso ma nisi o Faresaio ma Satukaio sa sailia se faailoga, o e na o mai e “tofotofo” i le Faaola e faaali atu ia i latou se faailoga (fuaiupu 1). (O se tasi faauigaga o le veape tofotofo o le taumafai e suesue.) I le tali atu i la latou talosaga, sa aoai ai i latou e Iesu i lo latou faamaualuga i lo latou tomai e iloa ai faailoga o le suiga o le tau ae le iloa ia faailoga a le Atua (tagai fuaiupu 2–3). Na aoao atu foi e le Faaola faapea “o tupulaga leaga ma le mulilulua e saili i se faailoga”(fuaiupu 4). A oo ina faifai pea e tagata le agasala matuia, o se tasi o taunuuga o lo latou le toe iloaina lea o musumusuga lemu ma le malu a le Agaga ma latou te pulunaunau atu mo se faamaoniga i ni faailoga faaletino, e mafai ona pa’i atu i ai, pe ofoofogia.

Mataio 16:4. “O le faailoga o le perofeta o Iona”

Na aoao mai e Elder Bruce R. McConkie o le Korama a Aposetolo e Toasefululua, le faailoga o le perofeta o Iona:

“O le tanuga o Iona ma le toe sau mai le ‘i’a tele’ (Iona 1:15–17; 2) e faatusa i le maliu, tanuga, ma le toetu o Keriso” (Mormon Doctrine, 2nd ed. [1966], 711–12).

Mataio 6:18. “Ou te atiae la’u Ekalesia i luga o lenei papa”

“A o aoaoina e le Faaola ia Peteru e uiga i faaaliga, sa Ia faaaogaina se faiga malie i le igoa o Peteru, e ta’u atu ai ia Simona, “O Peteru oe, [Petros], o luga o lenei papa [petra] ou te ati ae ai la’u ekalesia” (Mataio 16:18). O le upu Eleni petros o lona uiga o se papa po o se maa laitiiti e taatia ese. O le upu Eleni petra e mafai foi ona faauigaina “o se maa,” ae e mafai foi ona faasino i se palapala malo, malo tiaa, po o se papa tele. Mai nei upu ua tatou aoao ai faapea e leo luga o Peteru o se tagata o le a atiae ai le Ekalesia, ae o luga o le moegapapa o faaaliga (Tusi lesona a le Tagata Aoga o le Feagaiga Fou [Church Educational System manual, 2014], 53).

Mataio 16:18–19. “O ki o le malo”

Sa faamatala e Elder Russell M. Nelson o le Korama a Aposetolo e Toasefululua le ala o faaauau ai pea e le Alii ona taitai Lana Ekalesia ma le malo i le lalolagi e ala i perofeta ma ki paia o le perisitua:

“E taitai e le Alii soifua Lana Ekalesia ola [tagai MF&F 1:30, 38]! E faaali mai e le Alii Lona finagalo mo le Ekalesia i Lana perofeta. O ananafi, ina ua maea ona valaaulia i tatou e lagolagoina Thomas S. Monson o le Peresitene o le Ekalesia, sa tatou maua foi le avanoa e lagolagoina ai o ia, o fesoasoani i le Au Peresitene Sili, ma uso o le Korama a Aposetolo e Toasefululua o ni perofeta, tagatavaai, ma talifaaaliga. Mafaufau i lena mea! Tatou te lagolagoina tamalii e 15 o ni perofeta a le Atua! Ua latou umiaina ki uma o le perisitua ua faaee mai i luga o tagata i lenei tisipenisione. …

“Na faamatala mai e Peresitene Gordon B. Hinckley,] ‘O le Au Peresitene Sili ma le Aufono a Aposetolo e Toasefululua, e valaau ma faauuina e umia ki o le perisitua, ua i ai le pule ma le tiutetauave e pulea ai le Ekalesia, e taitai ai ona sauniga, e tuu atu ai ona aoaoga faave, ma faatuina ma faatumauina ona faiga’[“Ua i ai le Atua i le Foeuli,”,” Ensign, May 1994, 54]” (“Lagolagoina o Perofeta,” Ensign po o le Liahona, Nov. 2014, 75–76).

Mataio 16:21–23 Ua aoai e Iesu Keriso ia Peteru

“E ala i le taulai atu na o le maliu o le a oo mai o le Faaola, sa le malamalama ai Peteru i le misiona moni a Iesu Keriso—o le togiolaina o tagata uma. Ina ua aoai e le Faaola ia Peteru ma faasino ia te ia o ‘Satani’ [Mataio 16:23; Mareko 8:33], e le faapea ua ia faapea o Peteru o Lusifelo. O le upu Eperu satanio lona uiga o le ‘fili po o le e tofotofo.’ O lea, sa silafia e Keriso o le taimi lena na tuu ai e Peteru o ia lava i se matafaioi a le fili, e tetee atu ai i le misiona laveai a le Faaola.

“Atonu o se uiga lelei le uiga o le teena e Peteru o le aoaoga a Iesu faapea e tatau ona puapuagatia ma fasiotia (tagai Mataio 16:22; Mareko 8:32). Peitai, afai na faaaoga e Iesu ia moomooga o Peteru e ala i le aloese mai le mafatiaga o le Togiola, semanu e leai se togiolaina mai agasala ma leai se Toetu e manumalo ai le oti. Semanu e fano tagata uma tagai Alema 34:9), ma le galuega a le Atua o le faataunuuina ‘o le tino ola pea ma le ola e faavavau o le tagata’ (Mose 1:39) o le a le faataunuuina. O nei mea uma semanu e taulimaina ai faamoemoega faataumaoi o Satani. I le taimi o lenei tetee e aunoa ma se mafaufau i ai, sa tu ai Peteru e aunoa ma se mafaufau i le fili” (Tusi lesona a le Tagata Aoga o le Feagaiga Fou [Church Educational System manual, 2014], 122).

Manatu Faaopoopo mo le Aoaoina Atu

Mataio 16:24–28. “Ave Lou Satauro ma Mulimuli Mai ia te Au”

Tusi le faamatalaga lenei e lei maea i luga o le laupapa: Ina ia mulimuli ia Iesu Keriso, e tatau ona tatou …

Valaaulia ni nai tamaiti aoga e feauauai i le faitauina leotele mai o le Mataio 16:24–28. Fai atu i le vasega e mulimuli i le faitauga, ma vaavaai mo le fautuaga na tuuina mai e le Alii ia i latou o e saili e mulimuli atu ia te Ia.

• O le a le fautuaga na tuu atu e le Faaola ia i latou o e saili e mulimuli ia te ia?

Fai atu i se tagata o le vasega e faitau leotele le faamatalaga lenei:

“E oo lava i luma mai o le Faasatauroga o le Faaola, o le ata o le ‘ave lou satauro’ (tagai Mareko 8:34) semanu o se mea ua masani ai ma atonu e faaletonu mo le au soo. O le faasatauroga o se auala masani o le fasiotia i le Malo o Roma, ma o e na aafia ai e amoina o latou lava laau faalava i le nofoaga e fasiotia ai (tagai Ioane 19:16–17). O le faaaogaina o lenei ata, sa aoao manino atu ai e le Faaola Ona soo i le mea e tatau ona latou sauniuni i ai ma valaaulia i latou e mulimuli atu i Lana faataitaiga e ala ile gauai atu i le finagalo o le Tama i o latou olaga” (Tusi lesona a le Tagata Aoga o le Feagaiga Fou [Church Educational System manual, 2014], 122).

Valaaulia se tamaitiiti aoga e faitau leotele le Mataio 16:15–19. Fai i le vasega e mulimuli ai, ma vaavaai pe faapefea ona fesoasoani le Faaliliuga a Iosefa Samita o lenei fuaiupu tatou te malamalama atili ai i le uiga o le ave o o tatou satauro.

• E fua i le Faaliliuga a Iosefa Samita o lenei fuaiupu, e faapefea ona e faamaeaina le faamatalaga o i luga o le laupapa? (A uma ona tali mai le vasega, faaaoga a latou upu e faamaea ai le faamatalaga ina ia faitau ai faapenei: Ina ia mulimuli ia Iesu Keriso, e tatau ona tatou faafitia i tatou lava mai mea eleelea uma ma tuinanau uma o le lalolagi ma tausia Ana poloaiga.

Faamatala o le upueleelea e faasino i soo se mea e leaga pe le aoga ma e taofia ai i tatou mai le avea e faapei o le Tama Faalelagi ma Iesu Keriso.

• O a ni nai auala e mafai ona tatou sailia e faafitia ai i tatou lava mai mea “eleelea” uma ma “tuinanau o le lalolagi”?