Lesona 54: Luka 16

Lesona 54

Luka 16

Folasaga

Na aoao mai e Iesu le faataoto i le auauna amioletonu Na faalogo le au Faresaio i aoaoga a Iesu ma sa latou tauemuina o Ia. Ona aoai atu lea o Iesu i le au Faresaio ma aoaoina i latou i le faataoto i le mauoa ma Lasalo.

Fautuaga mo le Aoaoina Atu

Luka 16:1–12

Ua aoao mai e Iesu le faataoto i le auauna pule amioletonu

Fuafua e aumai i le vasega mea e mafai ona faatusa i oa ma le pule o le lalolagi, e pei o tupe, se masini eletonika, se tipiloma, se taavale meataalo, po o se ata o se fale.

Amata le lesona i le fesili:

O a ni mea e tele e tuu ai e tagata o latou loto ma taumafai ia maua mai? (Afai na e aumaia na mea i le vasega ona faaali lea a o ta’u mai e le vasega. A le o lea, fai i se tagata e tusi ia tali a le vasega i le laupapa.)
O a ni oa e finagalo le Tama Faalelagi tatou te sailia? (Valaaulia se tagata e lisi i le laupapa ia tali a le vasega, ia e ono aofia ai aiga e faavavau, filemu, olioli, ma le mamalu selesitila. Faatonu le tagata e tusi le faaulutala Oa e Faavavau i luga a’e o le lisi.)

Ta’u i ai e mafai ona tatou fiafia i nei oa e faavavau i lenei olaga. Fai i le vasega e mafaufau pe o a oa faavavau e sili ona taua ia i latou. Valaaulia i latou e vaavaai mo upumoni a o latou suesueina le Luka 16 ia e mafai ona fesoasoani latou te maua ai oa faavavau.

Faamatala ina ua uma ona aoao mai faataoto i le mamoe na se, le tupe na leiloa, ma le atalii faamaimau oa, sa aoao mai foi e le Faaola le faataoto i le auauna pule amioletonu. Atonu e te manao e faamatala faapea o le auauna pule o se tasi e vaaia mea tau pisinisi a se tasi tagata, tupe, po o meatotino.

Valaaulia se tamaitiiti e faitau leotele le Luka 16:1–2. Fai atu i le vasega e mulimuli i le faitauga, ma vaavaai mo mea na aoao mai e le mauoa i le faataoto e uiga i lana auauna pule.

O le a le mea na faia e le auauna pule i oloa a le mauoa?
O le a le taunuuga o le faamaumau mea a le auauna pule? (O le a faate’a mai lana galuega.)

Otooto leLuka 16:3–7i le faamatala atu na popole le auauna pule i le mea o le a ia faia pe a te’a ma lana galuega aua na lei manatu o ia e mafai ona ia faia galuega e lima ma e ma foi e faatoga atu. Sa ia fafauina se fuafuaga sa ia manatu e mafai ona maua ai ni avanoa faigaluega i isi aiga. Sa asiasi atu o ia i le toalua o tagata sa nofo aitalafu i le mauoa, ma matuai faapau a la’ua aitalafu, lea sa ia faamoemoe ai o le a alolofa i laua ia te ia.

Valaaulia se tamaitiiti e faitau leotele le Luka 16:8. Fai i le vasega e mulimuli ai, ma vaavaai pe na faapefea ona tali atu le alii mauoa ina ua ia iloa le mea sa faia e lana auauna pule. Faamatala o “tagata o le olaga nei” o tagata e manatu faalelalolagi ma o “tagata o le malamalama” o i latou ia e mulimuli i le Atua, pe o tagata e mafaufau faaleagaga.

Na faapefea ona tali atu le alii mauoa ina ua ia iloa mea sa faia e lana auauna pule? O le a le mea na viia e le alii mauoa? (Na viia e le alii mauoa le poto o le auauna pule na maua ai le alolofa o tagata aitalafu i le mauoa. Na te lei viia le le faamaoni o le auauna pule.

Ia saunia ni kopi mo tamaiti o le saunoaga a Elder James E. Talmage o le Korama a Aposetolo e Toasefululua. Valaaulia se tagata e faitau leotele le saunoaga. Fai i le vasega e mulimuli ai, ma vaavaai mo mea na aoao mai e le Faaola e ala i le faataoto i le auauna pule amioletonu.

“O le faamoemeoga o lo tatou Alii o le faaalia lea o le eseesega i le va o le faaeteetega, mafaufau, ma le tuuto o tagata e galulue i mea faasue-tupe i le lalolagi, ma ala faaleogalua a le toatele o e o faapea o loo taumafai mo oa faaleagaga. …

“… Ia aoao se lesona mai le le faamaoni ma le leaga; afai ua matua fuafua tatau i latou e saunia mo le lumanai e tasi ua mafai ona latou mafaufauina, o le a la le tele e tatau ona e saunia, oe lena e talitonu i se lumanai faaleagaga! … Faataitai i le auauna pule amioletonu ma uo a mamone, e le o lo latou le faamaoni, manatu faapito [matapeapea], ma le soona tolo’a’i o oa e sili ae le tumau [ua na o sina taimi], ae o lo latou naunautai, magafagafa, ma le saunia mo le lumanai”(Jesus the Christ, 3rd ed. [1916], 463, 464).

O le a le mea na finagalo le Faaola i Ona soo e aoao mai tagata e mafaufau faaleagaga e pei o le auauna pule amioletonu?

Tusi le faamatalaga le uma lenei i luga o le laupapa: Afai tatou te saunia ma le poto mo lo tatou lumanai faavavau …

Valaaulia se tamaitiiti e faitau leotele le Luka 16:10–12. Fai atu i le vasega e mulimuli i le faitauga, ma vaavaai mo mea na fetalai mai le Faaola e tatau ona tatou faia ina ia faamanuiaina i oa faavavau. Faamatala o le mamonee faasino i oa o le lalolagi, e aofia ai tupe, meatotino, ma mafutaga.

O le a sou manatu i le uiga o le “faamaoni i le mea itiiti”fuaiupu 10? (A uma ona tali mai le vasega, faaopoopo le faamatalaga lea i le fasifuaitau i le laupapa: ma faaaoga ma le amiotonu oa o le lalolagi …)

Taulai atu le gauai o tamaiti i le lisi o oa faavavau o i luga o le laupapa.

O le a le mea ua “moni ai oa” neifuaiupu 11?

Fai i le vasega e faamaea le faamatalaga o i le laupapa ina ia fatu mai ai se mataupu faavae pe mafai faapefea ona tatou maua oa faavavau. (E tatau i le vasega ona faailoa mai le mataupu faavae lenei: Afai tatou te saunia ma le poto mo lo tatou lumanai faavavau ma faaaogaina ma le amiotonu oa faalelalolagi, e mafai ona faamanuiaina i tatou i oa faavavau.

Aisea e faigata ai i nisi taimi ona saunia ma le atamai ma le filiga mo lo tatou lumanai faavavau?
E mafai faapefea ona tatou faaogaina ma le amiotonu oa faalelalolagi?
E faapefea ona atagia mai i lo tatou faaaogaina ma le amiotonu o oa faalelalolagi lo tatou agavaa e faatuatuaina mo oa faavavau?

Luka 16:13–31

Ua aoai e Iesu le au Faresaio ma aoao mai le faataoto i le mauoa ma Lasalo

Faataulai le gauai a le vasega i le lisi o i le laupapa (pe, afai na e aumaia, i mea faitino e faatusa i oa faalelalolagi), ma fai i ai e mafaufau pe faapefea i le matapeapea i oa o le lalolagi ona taofia i tatou mai le mauaina o oa faavavau. Valaaulia le vasega e vaavaai mo le tali e tasi i le fesili lea ao latou suesueina leLuka 16:13–26

Otooto leLuka 16:13–14 i le faamatala atu faapea na aoao mai le Faaola faapea tatou te le “mafai ona auauna atu i le Atua ma mamone” (fuaiupu 13). Na faalogo le au Faresaio i aoaoga a le Faaola ma “tauemu” ai(fuaiupu 14), pe aamu ia te Ia. Fai i le vasega e saili i le Luka 16:14mo upu e faamatala ai le au Faresaio ma tuuina atu se faamalamalamaga se tasi pe aisea na latou tauemu ai i le Faaola i Ana aoaoga.

Ma mea sa e aoao mai e uiga i le au Faresaio, o le a le mea sa latou matapeapea i ai? (O oa ma le pule o le lalolagi [tagai Mataio 23:2–6, 14].)
O le a sou manatu aisea na avea ai le matapeapea o le au Faresaio ma mea na tau atu ai i lo latou tauemuina o le Faaola?

Faamatala o leFaaliliuga a Iosefa Samita o le Luka 16:16–23 (i le faaopoopoga i le Tusi Paia) ua aumaia ai se isi malamalamaaga i le felafolafoaiga i le va o le au Faresaio ma le Faaola. Valaaulia se tagata e faitau leotele le aotelega o lenei faaliluga:

Fai mai le au Faresaio o le tulafono a Mose ma isi tusi paia faaperofeta (le Feagaiga Tuai) ua avea ma a latou tulafono, ma o lea ua latou teena ai Iesu faapea o lo latou faamasino. Na faamatala e Iesu e faapea o le tulafono a Mose ma perofeta na molimau ia te Ia. sa Ia fesiliga le au Faresaio mo le faafitia o le mea ua tusia ma aoaia i latou i le “faapiopioina o le ala sao”(Faaliliuga Iosefa Samita, Luka 16:21). Ina ia fesoasoani i le au Faresaio, o o latou loto ua tuu atu i oa ma le pule o le lalolagi, ia malamalama i a latou amio ma taunuuga, na faatusa ai e le Faaola i latou i le mauoa i le faataoto o loo tusia i le Luka 16:19–31.

Fai i ni volenitia se toatolu e o mai e faatino se falemata’i a le aufaitau. Tofi se volenitia se tasi e faitau upu a le Faaola(Luke 16:19–23), volenitia lona lua e faitau upu a le mauoa(Luka 16:24, 27, 28, 30), ma le volenitia lona tolu e faitau upu a Aperaamo (Luka 16:25, 26, 29, 31). Faatonu tagata nei e faitau leotele a latou vaega i le Luka 16:19–26. Fai i le vasega e mulimuli ai, ma vaavaai mo mea na oo i ai le tagata mativa e igoa ia Lasalo ma se alii mauoa.

Na eseese faapefea olaga faitino o le mauoa ma Lasalo?
Na faapefea ona eseese o la’ua olaga ina ua mavae lenei olaga? (Atonu e manaomia ona e faamatala atu o le “fatafata o Aperaamo” [fuaiupu 22] e faatusa i le parataiso i le lalolagi o agaga ma o “seoli” [fuaiupu 23] e faasino i le falepuipui o agaga [tagai Bible Dictionary, “Abraham’s Bosom,” “Hell”].)
O a ni auala na le faaaoga ai ma le amiotonu e le mauoa ana oa faalelalolagi?

Faamanatu i le vasega o le mauoa i lenei faataoto e faatusa i le au Faresaio matapeapea.

O le a se mea e mafai ona tatou aoao mai le faataoto i le mea e tupu pe afai tatou te matapeapea ma le faaaogaina ma le amiotonu a tatou oa faalelalolagi? (A uma ona tali mai le vaega, tusi le mataupu faavae lea i le laupapa: Afai tatou te matapeapea ma le faaaogaina a tatou oa faalelalolagi ma le amiotonu, o le a iu ina tatou oo i mafatiaga ma salamo ai [tagai foi MF&F 104:18].)

Ina ia saunia le vasega ina ia faailoa mai nisi upumoni mai le faataoto lenei, valaaulia i latou e mafaufau i se tasi latou te alolofa i ai ua filifili e ola ma le le usiusitai i aoaoga a le Faaola.

O le a sou manatu e mafai faapefea ona faatalitonuina lena tagata ia salamo ma suia lona olaga?

Valaaulia ia tagata na tofi e faitau leotele a latou vaega i leLuka 16:27–31. Fai i le vasega e mulimuli ai, ma vaavaai mo le talosaga a le mauoa.

O le a le mea na manao le alii mauoa e fai i ona uso e toalima? Aisea?
O le a le mea na talitonu le alii mauoa o le a tupu pe a alu atu Lasalo i uso o le alii mauoa?

Faamatala sa talitonu le alii mauoa o le a salamo ona uso ma liua i le upumoni pe afai e alu i ai Lasalo. O le liua o se ”suiga lea o le talitonuga o se tasi, loto, ma le olaga ia talia ma ia ogatusa ma le finagalo o le Atua“ (Guide to the Scriptures, “Conversion, Convert,” scriptures.lds.org).

E tusa ai ma le faataoto, aisea na le auina atu ai e Aperaamo ia Lasalo i uso o le alii mauoa?

Ta’u i ai o le ta’uaina o ”Mose ma le au perofeta“(Luka 16:29, 31), sa toe ta’ua ai e le Faaola ia mau ia na fai mai le au Faresaio sa latou talitonu i ai ma ola ai ae o le mea moni sa latou teenaina. Faamatala o se tagata moni na igoa ia Lasalo na mulimuli ane avea ma ”le [na] faatuina mai le oti“ (fuaiupu 31)ina ua toe faaola mai e le Faaola (tagai Ioane 11). Mulimuli ane, sa avea Iesu ma Le na toe tu mai le oti ina ua toetu mai o Ia. Peitai, o ia mea uma e lua, sa teena e le au Faresaio ma isi le faamaoniga o le paia o le Faaola ma sa lei mafai ona salamo.

O le a le upumoni e uiga i le liua e mafai ona tatou aoao mai i le mea na aoao atu e Aperaamo i le alii mauoa i lenei faataoto? E ono faailoa mai e le vasega ni upumoni eseese, ae ia mautinoa latou te faailoa maia le upumoni lenei: O le liua e sau mai le talitonu ma le gauai atu i upu a perofeta, ae le o le molimauina o vavega pe vaai i agelu.
Aisea e te manatu ai o le liua e sau mai le talitonu ma le gauai atu i upu a perofeta ae le o le molimauina o vavega po o le vaai i agelu?
E mafai faapefea ona tatou fesoasoani i tagata ia talitonu ma gauai atu i upu a perofeta?
O a ni aoaoga patino mai perofeta na tosinaina ai lou liua?

Valaaulia le vasega e tusi i a latou api po o api talaaga mo le suesueina o tusitusiga paia ni auala e mafai ona latou atili talitonu ai pe gauai atu ai i aoaoga patino po o fautuaga a perofeta, ma faamalolosia ai lo latou liua. Fautuaina le vasega e faaaoga mea na latou tusia.

Tala ma Faamatalaga o Talaaga

Luka 16:9. ”O le mamone o le amioletonu ia outou fai ai uo ma outou“

O le faia o ”uo o mamone o le amioletonu“ e faasino i le faaaogaina o tupe o le lalolagi, meatotino, faatosinaga, ma mafutaga e faatino ai faamoemoega amiotonu. Na tuu atu e le Faaola lenei fautuaga i Ona soo i le taimi o Lana galuega i le olaga nei ma i le AuPaia o Aso e GAta Ai (tagai MF&F 82:22). Na faamatala e Peresitene Iosefa Filitia Samita le ala e mafai ai e le Au Paia o Aso e Gata Ai lenei fautuaga:

“E le faapea a faauo atu i ‘mamone o le amioletonu,’ ona tatau lea ona auai faatasi le usoga ma i latou i a latou agasala; e opo i latou i o latou fatafata, fefaaipoipoa’i ma i latou ma, po o le o ifo foi i lalo i lo latou tulaga. Sa tatau ona latou ola ina ia mafai ona puipuia le filemu ma o latou fili. Sa tatau ona latou agalelei atu ia i latou, ia faauo ma i latou i tulaga e faatagaina ai e mataupu faavae sa’o ma mama, ae ia aua lava ne’i laulauvavale ma i latou, pe i ai i ni inuga ma pisapisao ma i latou. Afai e mafai ona latou taofia le faailoga tagata ma faaali atu se naunau e faafesuia’i ma i latou ma faaali atu se agaga agalelei, atonu o le a fesoasoani e aveese ai lo latou ita. E tatau ona taatia atu le faamasinoga i le Alii”(Church History and Modern Revelation, 2 vols. [1953], 1:323).

I le avea ai o ni soo o Iesu Keriso, e tatau ona tatou faaaloalo ma agalelei i isi. O le faia o lena mea, e mafai ai ona faalautele la tatou li’o o uo ma aoao ai mai isi. E ala i fegalegaleaiga faamaoni, o i latou o e tatou te mafuta e mafai ona taitai atu e faia ni manatu lelei mo i tatou ma le Ekalesia a le Alii. E oo lava foi ina latou o mai e puipua le Ekalesia pe a tulai mai se tulaga e manaomia ai.

Luka 16:1–12. Aoao mai le faataoto i le auauna pule amioletonu

Mo ni lesona faaooopo e mafai ona tatou aoao mai le faataoto i le auauna pule amioletonu, tagai Brother Tsung-Ting Yang, o se sa avea ma Fitugafulu Eria, “Faataoto a Iesu: O Le Auauna Pule Amioletonu,” Ensign, July 2003, 28–31.

Luka 16:19–26. Taunuuga o le faatuatuanai i manaoga o isi

Sa ola fiafia le alii mauoa i le maumea a o Lasalo sa mafatia i le mativa E ui ina leai se agasala patino a le alii mauoa o loo ta’ua i lenei faataoto, ae o le faamatalaga o Lasalo, e aofia ai le mea moni faapea sa “taatia o ia i le faitotoa [o le alii mauoa” (Luka 16:20), ua ta’u mai ai sa faatuatuanai e le alii mauoa ona tali atu i aioiga a Lasalo mo se toomaga. Na faamanatu mai e Elder Jeffrey R. Holland o le Korama a Aposetolo e Toasefululua o i tatou uma lava o tagata aisi mo le alofa mutimutivale o le Atua ma sa aoao mai e uiga i lo tatou tiutetauave e fesoasoani i isi o i ai manaoga faaletino. Na ia faia le folafolaga lenei e tusa ai ma le auala e mafai ona tatou iloa ai le ala sa’o e saunia ai lenei fesoasoani:

“[Le Atua] o le a fesoasoani ma taiala outou i ni galuega agaalofa faalesoo pe afai o outou mananao ma le lotofuatiaifo ma tatalo ma saili mo ni auala e tausi ai poloaiga ua Ia tuuina mai pea lava pea ia i tatou” (Pe le o i tatou ea o ni Tagata Aisi?” Ensign po o le Liahona, Nov. 2014, 41).

Luka 16:19–31. Faasa’oina o Faaituau o le olaga nei

I le faataoto i le alii mauoa ma Lasalo, sa ta’u atu ai i le alii mauoa, “Na e maua au mea lelei i lou olaga, na maua foi e Lasalo o mea leaga; a o lenei, ua faaolioliina ia, a ua puapuagaina oe”(Luka 16:25). O aafiaga eesese o le alii mauoa ma Lasalo i le olaga nei ma i le lalolagi o agaga ua faapupula mai ai le mana o le Togiola e toe fuli ai pe faasa’oina ai le faaituau ma le amioletonu e i ai i lenei olaga. Ona o le Togiola a Iesu Keriso, e tu atu le faamasinogatonu mo, ma o se uo i, e amiotonu.

Na aoao mai Elder D. Todd Christofferson o le Korama a Aposetolo e Toasefululua:

“Ua faasa’oina ai e le Faaola ia mea uma. E le tumau le faailoga tagata i le olaga faaletino, e oo lava i le oti, aua na Ia toefuatai mai le ola. E leai se manu’a, faaletonu, faafitia, po o se sauaina e le tauia i le faaiuga ona o Lana faamasinoga tonu ma le alofa mutimutivale” (“O Le Toetu o Iesu Keriso,” Ensign po o le Liahona, Me 2014, 112).

Luka 16:19–31. O le lalolagi o agaga i le faataoto i le alii mauoa ma Lasalo

“O le faataoto i le alii mauoa ma Lasalo e faasino i tulaga eseese e lua i le lalolagi o agaga pe a mavae le tino nei: ’Fatafata o Aperaamo’ ma ’seoli’ (tagai Luka 16:22–23). O le muamua ua faaalia mai ai se nofoaga o le toafilemu i le mafutaga ma e amiotonu (ua faatusa ia Aperaamo), a o le lona lua o se nofoaga o le tagiaue. … I le va o lenei malu o e faamaoni ma ’seoli’ o loo i ai ’se ’vanu tele’(Luka 16:26), ua taofia ai le fesootaiga i le va o ia nofoaga e lua. …

“… A o lei maliu Keriso, sa le mafai e agaga mai parataiso ona asiasi atu i e o i le falepuipui o agaga. O Lana galuega i le lalolagi o agaga na faafesootaia ai le vanu i le va o parataiso ma le falepuipui o agaga, ma ua mafai ai e agaga o i le falepuipui ona maua le savali o le talalelei mai faifeau faatonuina e auina atu mai le parataiso (tagai D&C 138:18–37; Ioane 5:25–29; 1 Peteru 3:18–21; 4:6)” (Tusi lesona a le Tagata Aoga o le Feagaiga Fou [Church Educational System manual, 2014], 173). commentary for Luke 16:19–31 in the New Testament Student Manual.

Faaliliuga a Iosefa Samita, Luka 16:16–23 (i le faaopoopoga i le Tusi Paia). O le amioleaga o le au Faresaio

Pei ona tusia i le Faaliliuga Iosefa Samita, Luka 16:16–23, na aoai e Iesu le au Faresaio i le ”faapiopioina o le ala sa’o” (Faaliliuga Iosefa Samita, Luka 16:21 [i le faaopoopoga i le Tusi Paia]). O se tasi ala na faia ai e Faresaio o le faafoliga lea o loo mulimuli i le tulafono a Mose ma isi tusi paia ae o le mea moni sa latou faaaogaina mo faamoemeoga amioleaga. Sa faasino Iesu i se faataitaiga se tasi o lenei mea ina ua ia ta’ua Faresaio o tagata mulilulua, lea na latou tali atu ai ma le ita e ala i le toe tauemuina foi o Ia. Ona faamatala lea e Iesu o le faasalaga o le faate’a o se toalua ona o mafuaaga e ese mai le faitaaga, lea na latou taumafai e tauamiotonuina e ala i le femilosa’i o se tulafono na tuuina mai e Mose (tagai foi Mataio 19:3–9). Sa tautino atu foi e le Faaola e le talitonu moni nei tagata i le Atua i o latou loto.

I Lana galuega atoa, sa faaaliali atu ai e Iesu le faatautala o le au Faresaio ma le femilosaia o faaliliuga o le tulafono a Mose ma isi aoaoga a perofeta anamua. Na avea o Ia ma se faamata’u i le pule faaagafesootai ma faaupufai lea sa maua e le au Faresaio e ala i lo latou amioleaga. Ona o lena, sa toatele ai le au Faresaio na saili ina ia fasiotia Iesu.