Folasaga i le Tusi a Paulo ia Tito

Aisea e suesue ai lenei tusi?

O le tusi a Paulo ia Tito, e pei o ana tusi ia Timoteo, o loo i ai le mau fautuaga mai le Aposetolo o Paulo i se taitai o le Ekalesia i le lotoifale. Na tusia e Paulo faapea o le “faamoemoe i le ola e faavavau” o le uluai mea lea na folafola mai e le Atua i le muai olaga “a o lei amata le lalolagi” (Tito 1:2). Na ia aoao atu i le Au Paia e tatau ona faatalitali atu i “lena faamoemoe e manuia ai” o le faaeaga ma le Afio Mai FaaluaTito 2:13. Sa tusi atu foi Paulo ia Tito e uiga i le “faataeleina i le toefuataiina” ma le “faafouina e le Agaga Paia,” e faatusa i le sauniga o le papatisoga ma le aafiaga faamama o le mauaina o le meaalofa o le Agaga Paia, o ia mea uma o le sauniuniga e avea ma “suli e tusa ma le faamoemoe i le ola e faavavau” (Tito 3:5, 7). O le suesueina o le fautuaga musuia a Paulo ia Tito, e mafai ai e le vasega ona faateleina lo latou faatuatua o aoaoga faavae ma sauniga o le talalelei e aumaia le faamoemoe mo le ola e faavavau.

O ai na tusiaina lenei tusi?

O le tusi a Tito sa tusia e Paulo (tagai Tito 1:1).

O anafea ma o fea foi na tusia ai lenei tusi?

E foliga mai na tusia e Paulo le Tusi ia Tito i le va o le tusiga o le 1 ma le 2 Timoteo pe tusa o le T.A. 64–65 (tagai Taiala i Tusitusiga Paia, “Pauline Epistles,” scriptures.lds.org). Sa tusia e Paulo le Tusi ia Tito ina ua mavae le uluai faafalepuipuiina o Paulo i Roma. E lei tau maia e Paulo pe o fea na i ai o ia ina ua ia tusia le Tusi ia Tito.

O ai na faatatau i ai le tusiaina o lenei tusi, ma pe aisea foi?

Na tusia lenei tusi e Paulo ia Tito, o le sa faasino i ai Paulo o “lou lava atalii i la le faatuatua” (Tito 1:4). O Tito o le Eleni (Kalatia 2:3) ma sa faaliliuina i le talalelei e Paulo lava ia (tagai Bible Dictionary, “Titus”). Ina ua mavae lona liua mai, sa galulue Tito ma Paulo e faasalalau le talalelei ma faatulaga le Ekalesia (tagai Bible Dictionary, “Titus”). Sa fesoasoani o ia e ao mai foai mo e matitiva i Ierusalema (tagai 2 Korinito 8:6, 16–23) ma sa malaga faatasi ma Paulo i le fonotaga i Ierusalema (tagai Kalatia 2:1). Sa faatuatuaina e Paulo ia Tito e ave le tusi muamua a Paulo i Korinito i le Au Paia sa nonofo ai iina (tagai 2 Korinito 7:5–15). Na tusi atu Paulo ia Tito e faamalosia o ia i lona tofiga e taitai ma vaaia le lala o le Ekalesia i Kereta e ui i le teetee (tagai Tito 1:5, 10–11; 2:15; 3:10).

O a nisi o vaaiga iloga o lenei tusi?

O le tusi lenei o se tasi o Tusi faafaifeau (i se faifeau, poo se taitai, i le Ekalesia), faatasi ai ma le 1 ma le 2 Timoteo (tagai Bible Dictionary, “Pauline Epistles”). O le Tusi a Tito ua aumaia ai se faamaoniga vave o le Ekalesia sa faatuina i le motu Eleni o Kereta i le Sami Meititirane (tagai Tito 1:5). Sa ia Tito le tiutetauave o le valaauina o epikopo fou i le motu. Sa lisi ai e Paulo nisi o agavaa faaleagaga mo epikopo (tagai Tito 1:6–9). E le gata i lea, sa avatu e Paulo se fautuaga patino i tane, o fafine, ma auauna e uiga i amioga e tatau ai mo le Au Paia (tagai Tito 2:2–10).

Otootoga

Tito 1Ua faatonuina e Paulo ia Tito e faauu ia taitai o le Ekalesia ona lisi ai lea o ni agavaa mo epikopo. Ua ia faatonuina ia Tito e faasao talitonuga sese ma ia aoai ia aoao pepelo o e “tau ane ua latou iloa le Atua; ae i a latou galuega … ua faafitia o ia” (Tito 1:16).

Tito 2Ua fautuaina e Paulo ia Tito e faatonu ia tagata matutua o le Ekalesia e faia ni faataitaiga mo le Au Paia talavou . Ua ia talosagaina foi Tito e aoao ia auauna e gauai atu i o latou matai. Ua faamatala atu e Paulo le amio e tatau ona ola ai soo a o latou sauniuni mo le toe afio mai o le Alii. Ua ia faamatala atu e aumaia le togiola e ala mai ia Iesu Keriso.

Tito 3 Ua aoao atu e Paulo e tatau i tagata o le Ekalesia ona avea ma tagatanuu lelei ma soo amiotonu o Iesu Keriso. O le papatisoga, e mafai ai e i tatou ona maua le ola e faavavau e ala i le alofatunoa o le Alii.