Folasaga i le Tusi Lona Lua Faalauaitele a Peteru
Aisea e suesueina ai lenei tusi?
Sa saunoa mai le Perofeta o Iosefa Samita, “Sa tusia e Peteru le gagana aupito sili ona matagofie i lo seisi o aposetolo” (i le History of the Church, 5:392). O le matagofie o lona uiga o le faaeaina i manatu, e maoae le taua, ma e matele ina musuia ai le faamemelo.
I le avea ai o se molimau vaaitino i le liuga o Iesu Keriso (tagai 2 Peteru 1:16–18), sa timai atu ai Peteru i lana au faitau ia faateleina lo latou malamalama ia Iesu Keriso ma ia saili ia maua uiga faaleatua ina ia mafai ona latou tofusia i le “amio atua” (tagai 2 Peteru 1:4–8). Sa ia faamautinoa atu i lana au faitau, o lenei tuputupu a’e faaleagaga o le a fesoasoani ia i latou ia “faamauina lo [latou] valaauina ma lo [latou] filifilia” (2 Peteru 1:10). “Sa toe faamautu atu e Peteru o le a afio mai le Alii mai le lagi i le mamalu tele ma i le faamasinoga i luga o le lalolagi” (Bible Dictionary, “Peter, Epistles of”). O le suesue o le Tusi Lona Lua a Peteru, e mafai ai e tamaiti aoga ona atiina a’e le faatuatua malosi atu ia Iesu Keriso ma maua faatonuga ma musumusuga e mafai ona fesoasoani ia i latou ia avea atili e pei o Ia.
O ai na tusiaina lenei tusi?
O le tusitala o le Tusi Lona Lua a Peteru o Simona Peteru, le Aposetolo sinia a Iesu Keriso (tagai 2 Peteru 1:1).
O anafea ma o fea foi na tusia ai lenei tusi?
Tatou te le iloa tonu pe o anafea ma o fea foi na tusia ai lenei tusi. E masani ona faapea sa tusia e Peteru lenei tusi i Roma, ina ua uma ona tusia le tusi ua taua o le 1 Peteru, lea atonu na tusia i se mea o le T.A. 64 (tagai Bible Dictionary, “Peter, Epistles of”).
O ai na tusi i ai, ma pe aisea foi?
Na fai mai Peteru sa ia tusi atu “i e ua maua le faatuatua e tusa lona lelei ma lo matou” (2 Peteru 1:1). E ono faaalia i lenei mea o le au faalogologo a Peteru o le au Nuuese Kerisiano lava ia sa mauaina le Tusi Muamua a Peteru (tagai 2 Peteru 3:1). O le anotusi o le 2 Peteru 1:12–15 ua faaalia ai sa faamoemoe Peteru o lenei tusi e avea o se savali faatofa i lana au faitau.
E le pei o le Tusi Muamua a Peteru, lea sa fesoasoani i le Au Paia e taulima ai sauaga mai fafo, o le Tusi Lona Lua a Peteru na talanoaina ai le liliuese o totonu lea na faamata’uina ai le lumanai o le Ekalesia. Sa faasalalauina e perofeta ma a’oa’o pepelo “vaevaega e fano ai [aoaoga pepelo], ma latou faafiti i le Alii na ia faatau mai ia te i latou” (2 Peteru 2:1). Sa tusia e Peteru le tusi e uunaia ai le Au Paia ia ola i lo latou malamalama e uiga i le Alii ma ia faia “ia faamauina lo [latou] valaauina ma lo [latou] filifilia” (2 Peteru 1:10).
O a nisi o vaaiga iloga o lenei tusi?
“O le tusi lona lua sa mautinoa lava le tusiaina i ekalesia lava e tasi e pei o le tusi muamua ([2 Peteru] 3:1). Sa tusia ae ua lata ina oti ([2 Peteru] 1:14)” (Bible Dictionary, “Peter, Epistles of”). O loo i ai foi nisi o upu aupito malolosi ma molimau faaiu a Peteru.
O se autu taatele i le 2 Peteru o le taua o le maua o le malamalama e uiga ia Iesu Keriso. Sa folafola atu e Peteru i lana au faitau, afai o le a latou sailia uiga faaleatua ma atiina a’e se amio atua, o le a avea i latou ma “e ua le paie a o e fua mai le iloa lelei o lo tatou Alii o Iesu Keriso” (2 Peteru 1:8) ma o le a faia ia “faamauina lo [latou] valaauina ma lo [latou] filifilia” (2 Peteru 1:10).
Sa faaeseeseina e Peteru le malamalama moni ia Iesu Keriso i le malamalama ma aoaoga pepelo e faasalalauina e tagata liliuese (tagai 2 Peteru 2). I le faaiuga o lenei tusi, sa tuuina mai ai e Peteru se valaaulia faaiu mo le Au Paia ina ia “tutupu i le alofa tunoa, ma le poto a lo tatou Alii o lo tatou Faaola lea o Iesu Keriso” (2 Peteru 3:18).
Otootoga
2 Peteru 1 Ua faamalamalama mai e Peteru o folafolaga a Iesu Keriso ua mafai ai e le Au Paia ona “tofusia …i le amio atua” (2 Peteru 1:4). Ua ia uunaia i latou ia “faamauina lo [latou] valaauina ma lo [latou] filifilia” (2 Peteru 1:10). Ua faamatala e Peteru lona aafiaga i le Mauga o Liua, lea sa ia molimauina ai le Keriso faamamaluina ma faalogo i le siufofoga o le Tama. Fai mai Peteru ua ia te ia “le upu o le valoaga e sili lona mausali” (2 Peteru 1:19).
2 Peteru 2 Ua lapataia e Peteru tagata o le Ekalesia e uiga i perofeta pepelo ma a’oa’o pepelo o e o le a o mai ia i latou ma saili e taitai sese le Au Paia. O nei a’oa’o amioleaga o le a teena le Alii ma tautala leaga e uiga i le “ala o le upumoni” (2 Peteru 2:2). Ua a’oa’o mai Peteru, e sili atu le le talia o le talalelei nai lo o le osia o feagaiga ae le ola ai.
2 Peteru 3 Ua faamautu mai e Peteru le moni e faapea, o le a afio mai Keriso i Lona lava taimi, faamama le lalolagi i le afi, faatamaia e amioleaga, ma laveai e e filiga ma faamaoni. Ua uunaia e Peteru le Au Paia ina ia “tutupu i le alofa tunoa, ma le poto, ia … Iesu Keriso” (2 Peteru 3:18).