Galuega 20–Roma 7 (Iunite 20)

Sauniuniga o Anomea mo le Faiaoga o Suesuega e Fai i le Aiga

Aotelega o Lesona o Suesuega e Fai i le Aiga i Aso Taitasi

O otootoga o aoaoga faavae ma mataupu faavae nei sa aoaoina e tamaiti aoga ao latou suesueina leGaluega 20–Roma 7 (iunite 20) e le o faamoemoeina e aoao atu o se vaega o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tagata aoga.

Aso 1 (Galuega 20–22)

Mai malaga faafaifeautalai a Paulo, sa aoao ai e le vasega e faapea, o auauna moni a le Alii e faatinoina ma le faamaoni o latou tiute, ma o le faia o lea latou te lagona ai le olioli. Sa latou aoao ai foi o auauna moni a le Alii e naunau e faia le finagalo o le Atua tusa lava po o a mea e patino e alu ai. Mai le tala a Paulo i lona liuaina, sa aoao ai e le vasega e faapea a tatou usiusitai i afioga a Iesu Keriso, e mafai ona tatou liua atoatoa.

Aso 2 (Galuega 23–28)

A o suesue e le vasega le molimau a Paulo i luma o le Tupu o Akeripa, sa latou aoaoina ai afai tatou te salamo ma liliu atu i le Atua, e mafai ona tatou faatoilaloina le mana o Satani i o tatou olaga, maua le faamagaloga o a tatou agasala, ma agavaa mo le malo selesitila. Sa latou faailoa mai ai foi le upumoni e faapea o le liua ia Iesu Keriso, e tatau ai ona tatou flifili e talitonu ma tautino atu atoatoa e ola ai i le talalelei. Mai le tala i le malaga a Paulo i Roma, sa aoao ai e le vasega afai tatou te faamaoni, e mafai e le Atua ona fesoasoani ia i tatou e liliu ia tofotofoga i faamanuiaga mo i tatou lava ma isi.

Aso 3 (Roma 1–3)

I le tusi a Paulo i le Au Paia i Roma, sa aoao ai e le vasega upumoni nei: A o tatou mauaina se molimau faapea o i ai i le talalelei a Iesu Keriso le mana e laveai ai i tatou, ona tatou le mama lea e faasoa atu i isi. O tagata uma lava ua onomea ona faamasinoina e agasala, ma e manaomia le faamagaloga a le Atua. E ala i le taliaina ma le faamaoni o le Togiola a Iesu Keriso, e mafai ai e tagata uma ona tauamiotonuina ma maua le faaolataga.

Aso 4 (Roma 4–7)

Mai aoaoga a Paulo i le Au Paia i Roma, sa aoao ai e le vasega e tauamiotonuina i tatou e ala i le faatuatua ma galeuga e ala i le alofa tunoa. Sa latou suesueina foi upumoni nei: O le papatisoga e ala i le faatofu, e mafai ona faatusa i lo tatou oti i le agasala ma le fou o le ola faaleagaga. Afai tatou te faamatuu atu i le agasala, ona avea lea o i tatou ma pologa a le agasala. Afai tatou te faamatuu atu i tatou lava i le Atua, e mafai ona tatou saoloto mai le agasala ma maua le meaalofa o le ola e faavavau.

Folasaga

I le avea ai o se pagota, sa aveina atu Paulo i Roma e ui atu i le sami i le taimi o masina o le taumalulu. A o lei tuuvaa ese atu, sa lapataia e Paulo o le taunuuga o le malaga o le a “tele mea leaga” (Galuega 27:10). I le taimi o le afa, sa valoia e Paulo e ui ina o le a faatamaia le vaa, ae o le a ola tagata o i luga o le vaa. Na faataunuuina le valoaga a Paulo.

Fautuaga mo le Aoaoina Atu

Galuega 27

Ua afatia Paulo a o aveina atu o ia i Roma

A o lei amataina le vasega, tusi faamatalaga nei i luga o lelaupapa. (O loo maua nei faamatalaga i le [tamaitusi 2011]Mo Le Malosi o le Autalavou, 4, 11, 16.)

“Ia aloese mai le tafafao soo ma le tagata lava e tasi.”

“Aua nei alu, matamata, pe faaauai i soo se mea e leaga, e le mama, faatautala, pe faaponokalafi i soo se itu.”

“Afai e uunai oe e au uo e faia mea e sese, ia avea oe ma tagata e tu atu mo le mea sao, e tusa lava pe e te tu na o oe.”

Valaaulia se tagata e faitau leotele ia faamatalaga o i le laupapa.

Aisea e ono filifili ai e ni talavou e le gauai i nei lapataiga ma fautuaga?

Valaaulia le vasega e vaavaai mo upumoni a o latou suesueina le Galuega 27ia o le a fesoasoani e faamalolosia ai o latou faatuatua e gauai atu i lapataiga ma fautuaga a auauna a le Alii.

Faamanatu i le vasega na molia pepelo Paulo i le faatupu vevesi ma faafalepuipuia ai. Sa ia toe talosagaina lona faamasinoga ia Kaisara i Roma, o lana aia tatau lea o se tagatanuu o Roma. Aotele le Galuega 27:1–8e ala i le faamatala atu na malaga Paulo faatasi ma isi pagota i le vaa agai atu i Roma, i lalo o le vaavaaiga a se leoleo Roma. Ina ua mavae ni aso e tele o le folauga, sa latou afe i le motu o Kereta. Ina ua latou tuua le taulaga, sa lapatai atu Paulo ia i latou sa i luga o le vaa e le tatau ona latou faaauauina le malaga.

Valaaulia se tamaitiiti aoga e faitau leotele le Galuega 27:9–10. Fai i le vasega e mulimuli ai, ma vaavaai mo mea sa lapataia e Paulo o le a tutupu pe afai latou te fauauau pea le malaga i Roma. Atonu e te manao e faamatala o le upu anapogi e pei ona faaaogaina i le fuaiupu 9e faasino i le le ai i lou lava loto malie. O le tulaga lenei, “o le anapogi” atonu na faasino i le aso paia faa-Iutaia sa ta’ua o le Aso o le Togiola, lea e faailoga ai le amataga o le vaitau lea sa masani ona manatu i ai e le saogalemu ona femalagaai ai i luga o le Sami Meititirane ona o afa matautia. O le Aso o le Togiola, e masani ona faia i le faaiuga o Setema po o le amataga o Oketopa. Faamatala foi o le upuuta i le fuaiupu 10 e faasino i mea sa i ai i le vaa.

E tusa ai ma le Galuega 27:10, o le a le mea na lapatai atu Paulo o le a tupu pe afai e faaauau pea le latou faigamalaga?

Valaaulia se tamaitiiti aoga e faitau leotele le Galuega 27:11–12. Fai i le vasega e mulimuli ai, ma vaavaai pe na faapefea ona tali atu le taitai o le toaselau ma isi sa i le vaa i le lapataiga a Paulo.

Aisea e te manatu ai semanu e sili atu ona faigofie mo le taitai o le toaselau ona talitonu i le pule o le vaa nai lo Paulo?
E tusa ai ma lefuaiupu 12, aisea na le amanaiaina ai e le toatele o tagata sa i le vaa le lapataiga a Paulo? (Atonu e manaomia ona e faamatala atu o le uputaulaga e faasino i se uafu ma lelei o lona uiga o le lagolelei pe faigofie.)

Valaaulia ni nai tamaiti aoga e feauauai i le faitauina leotele mai o le Galuega 27:13–21. Fai i le vasega e mulimuli ai ma vaavaai mo mea na tutupu ao faaauau atu pea le vaa i Roma.

O le a le mea na tupu a o faaauau atu le vaa i Roma?
E tusa ai ma le fuaiupu 20, o a ni lagona o tagata sa i luga o le vaa i le taimi o le afa, e uiga i o latou tulaga?
O le a le mataupu faavae e mafai ona tatou aoao mai le fuaiupu 21e uiga i mea e mafai ona tutupu pe afai tatou te le amanaiaina lapataiga ma fautuaga a auauna a le Alii? (E ono faaaoga e le vasega ni upu eseese ae e tatau ona faailoa mai le mataupu faavae lea: Afai tatou te le amanaiaina lapataiga ma fautuaga a auauna a le Alii, ona tatou tuu lea o i tatou lava i tulaga matautia. Tusi le mataupu faavae lenei i luga o le laupapa. Faamatala o tulaga matautia e ono aofia ai le mauaina o faamanuiaga semanu tatou te maua.)

Toe iloilo ma le vasega ia mafauaga na le amanaia ai e le taitai o le toaselau ma isi tagata sa i le vaa le lapataiga ma fautuaga a Paulo (tagai Galuega27:11–12).

E faapefea e tagata i ona po nei ona faia ni alofaga faapena e faatuatuanai ai lapataiga ma fautuaga a auauna a le Alii?

I le faaaogaina o le Mo Le Malosi o le Autalavoupo o lauga o le konafesi talu ai, tau mai nisi faataitaiga o lapataiga a perofeta ma fautuaga e te lagona e talafeagai i tagata o lau vasega.

O a tulaga matautia atonu na tuu ai e tagata i latou lava e ala i le faatuatuanai i na lapataiga ma fautuaga mai perofeta?

Valaaulia se tamaitiiti aoga e faitau leotele le Galuega 27:22–26. Fai atu i le vasega e mulimuli i le faitauga, ma vaavaai po o le a le mea na tau atu e Paulo i tagata sa i luga o le vaa.

Pe ana fai sa e i ai i luga o le vaa i le ogaoga o le afa, o a upu a Paulo e ono faamafanafanaina ai oe?
O le a le mea na valoia e Paulo o le a tupu i le vaa?

Aotele le Galuega 27:27–30i le faamatala atu o le itu po lona 14 o le afa, sa lafo ifo ai e le auvaa ni taula se fa i le sami e taofiofi ai le vaa mai le fetoai ma papa. Ona o ane lea o le auvaa i luma o le vaa ma faafoliga faapei o loo latou toe lafoina ifo nisi taula. Peitai, sa latou fuafuaina moni lava le lafoai o le vaa ae sosola i se tulula ona sa latou fefefe nei goto le vaa.

Valaaulia se tamaitiiti aoga e faitau leotele le Galuega 27:31–32. Fai i le vasega e mulimuli ai, ma vaavaai mo le lapataiga na tuu atu e Paulo i le taitai o le toaselau ma tagata tau. Faamatala o le upulatou i le fuaiupu 31 e faasino i le auvaa o e sa taumafai e sosola ese.

O le a le lapataiga na tuu atu e Paulo i le taitai o le toaselau ma tagata tau?
Na faapefea ona tali atu fitafita i le lapataiga ma le fautuaga a Paulo? (Sa latou gauai atu i lana apoapoaiga ma sa puipuia ai le auvaa mai le sosola ese e ala lea i le tatipiina o maea o le tulula ae tuu e faatafea ese atu e aunoa ma se mea.)

Aotele le Galuega 27:33–44 e ala i le faamatala atu faapea na fautuaina e Paulo ia aai sina mea ai e tagata uma sa i luga o le vaa ina ia maua ai lo latou malosi. Mulimuli ane sa lafoia le vaa i se gaoa a o folau agai atu i le laueleele, peitai na sosola ese saogalemu tagata uma. Faamanatu i le vasega le valoaga a Paulo o loo tusia i le Galuega 27:22–26e faapea e leai se tasi e oti e ui ina o le a maumau le vaa.

O a mataupu faavae e mafai ona tatou aoao mai lenei tala e uiga i mea e mafai ona tututpu pe afai tatou te gauai atu i fautuaga ma lapataiga a auauna a le Alii? (E mafai ona faamatala mai e tagata o le vasega ni mataupu faavae e pei o nei: Afai tatou te gauai atu i fautuaga ma lapataiga a auauna a le Alii, ona mafai lea ona tatou faataunuuina Ana folafolaga ia i tatou. Afai tatou te gauai atu i fautuaga ma lapataiga a auauna a le Alii, ona mafai lea ona tatou tatalia tulaga matautia e faamatauina ai i tatou. Tusi le mataupu faavae lenei i luga o le laupapa.)

Ina ia fesoasoani i tamaiti ia malamalama i mataupu faavae sa latou faailoa mai i le Galuega 27,valaaulia se tagata e faitau leotele le saunoaga lea a Henry B. Eyring o le Au Peresitene Sili:

“O taimi uma i lou olaga pe a ou filifili e faatuatuai ona mulimuli i fautuaga musuia pe tonu foi faapea e le aofia ai au, sa ou iloa ai sa ou tuuina au lava i se itu e faatamaia ai. O taimi uma lava na ou faalogo ai i fautuaga a perofeta, ma lagonaina i se tatalo e faamautu ai, ma mulimuli i ai, na ou iloa ai lou agai atu i le saogalemu” (“Mauaina o le Saogalemu i Fautuaga,” Ensign, Me 1997, 25).

Na faapefea ona fesoasoani ia te oe le gauai atu i lapataiga ma fautuaga a auauna a le Alii e te tatalia ai tulaga matautia e faamatauina ai lou saogalemu faaleagaga ma faaletino?

Valaaulia le vasega e mafaufau pe o le a latou faatuatuanai i soo se lapataiga po o se fautuaga mai auauna a le Alii pe mafaufau e uiga i auala e mafai ai ona latou gauai atili atu i lapataiga ma fautuaga sa latou mauaina. Valaaulia i latou e tusi i lalo se sini pe faapefea ona latou gauai atili atu i lena fautuaga.

Iunite e Sosoo Ai (Roma 8–1 Korinito 6)

Faamatala i le vasega a o latou suesueina le Roma 8–16 ma le 1 Korinito 1–6 i le vaiaso a sau, o le a latou aoao ai e uiga i fautuaga poto na tuu atu e le Aposetolo o Paulo i tagata o le Ekalesia i Roma ma Korinito e fesoasoani ai ia i latou ia latalata atu i le Atua i se lalolagi amioleaga ma le faigata. Fai atu ia te i latou e vaavaai mo tali i fesili nei: Aisea e pei ai o tatou tino faaletino o se malumalu? E faapefea ona foia e tagata o le Ekalesia eseesega o le tasi ma le isi?