Lesona 150
Iuta
Folasaga
Na apoapoai atu Iuta i tagata o le Ekalesia ina ia faamalolosi mo le finau i le faatuatua e faasaga i aoao sese. Sa ia faamatalaina aoao sese ma fautuaina le Au Paia ina ia atiina ae o latou olaga i luga o le talalelei a Iesu Keriso. E masani ona iloa Iuta o le uso o Iesu Keriso la te tina faatasi (tagai Mataio 13:55). O Iuta sa foliga mai sa o se tagata malosi ma faaaloalogia tele i le Ekalesia i Ierusalema.
Fautuaga mo le Aoaoina Atu
Iuta 1:1–19
Ua apoapoai atu Iuta i tagata o le Ekalesia ina ia faamalolosi mo le finau i le faatuatua e faasaga i aoao sese
Faitau leotele ia vaaiga nei, ma valaaulia tamaiti aoga e mafaufau pe o le a faapefea ona latou tali atu i ai:
-
I se saite o ala o faasalalauga faalauaitele, ua tusi ai luga e se uo se faamatalaga e faitioina ai le tulaga o le Ekalesia e uiga i faaipoipoga a itupa tutusa.
-
Ua iloa e se tuaoi o oe o se tagata o le Ekalesia. Ua ia fai atu ia te oe sa faitau i le Tusi a Mamona ma lagona ai o se tusi faitau manaia ae e le o se afioga a le Atua.
-
I le taimi o se talanoaga a le vasega i le aoga, sa finau atu ai se tasi o lau tupulaga e faapea, e leai se leaga o le matamata i ponokalafi ma e le tatau ona faasaina.
-
O a ni auala eseese e mafai ona tali atu ai se tagata i nei tulaga?
Valaaulia se tamaitiiti aoga e faitau leotele le Iuta 1:3–4. Fai atu i le vasega e mulimuli i le faitauga, ma vaavaai po o le a le mea na lapatai mai Iuta i tagata o le Ekalesia e uiga i ai.
-
E tusa ai ma le fuaiupu e 4, o le a le mea na lapataia ai e Iuta tagata o le Ekalesia?
Fesoasoani i tamaiti aoga ia malamalama o “tagata faalemata’u” ma o latou faamoemoega leaga na avea ma se vaega o tagata auai o le Ekalesia. O nei tagata o le Ekalesia sa faalauiloaina faiga piopio ma amioga le mama e ala i le aoao atu e faapea, o le aoaoga faavae o le alofa tunoa na faatagaina atoa ai tagata e agasala aua o le a faamagaloina ma le mutimutivale e le Atua. Sa latou teena foi ni upumoni faapitoa e uiga i le Tama Faalelagi ma Iesu Keriso. O le fuaitau “ua leva foi ona muai tusia o i latou ia sa oo i lenei lava faasala” (fuaiupu 4) o lona uiga o le ta’usalaina o tagata faapena ua leva ona tusia e uiga i ai.
-
O le iloa ai o aoaoga pepelo ma faiga piopio na faasalalauina e nei tagata, o le a le mea na apoapoai atu Iuta i tagata faamaoni o le Ekalesia e fai? (“Faamalolosi ona finau mo le faatuatua” [fuaiupu 3].)
Faamalamalama atu, o “le faatuatua na tuuina mai faatasi i le au paia” (fuaiupu 3) e faatatau i le talalelei a Iesu Keriso—o upumoni, tulafono, ma sauniga na aoao mai e le Faaola ma Ana Aposetolo.
-
O a ni upumoni e mafai ona tatou aoaoina e uiga i le tiutetauave o soo o Iesu Keriso i le taulimaina o aoaoga pepelo ma faiga piopio? (Atonu e faaaoga e tamaiti aoga a latou lava upu e faailoa mai ai upumoni nei: E tatau i soo o Iesu Keriso ona faamalolosi ona finau mo le talalelei a Iesu Keriso e faasaga i aoaoga pepelo ma faiga piopio.)
-
O le a sou manatu i le uiga o le faamalolosi ona finau atu mo le talalelei? (E tatau ona tatou aoao atu ma molimau atu ma le totoa e uiga i le talalelei) Ae, e le tatau ona tatou le alolofa, faasausili, pe faafinau a o tatou faia lena mea [tagai Alema 38:12; 3 Nifae 11:29].)
-
E mafai faapefea ona tatou finau mo le talalelei e aunoa ma le faafinau?
Faamanatu i tamaiti aoga ia tulaga na tuuina atu i le amataga o le lesona.
-
I nei tulaga ma ni tulaga talitutusa, o a nisi o auala e mafai ona tatou finau ai mo le talalelei e faasaga i aoaoga pepelo ma faiga piopio?
Valaaulia se tagata o le vasega e faitau le faamatalaga lenei a Elder Neil L. Andersen o le Korama a Aposetolo e Toasefululua. Fai atu i le vasega e faalogologo pe na faapefea ona finau atu le tamaitai talavou mo le talalelei.
“Talu ai nei, sa ou talanoa ai i se [tamaitai] Lora e sau mai le Iunaite Setete. Ou te sii mai i lana imeli:
“‘O le tausaga ua mavae atu nei sa amata ai ona tusia e nisi o au uo i luga o le Facebook o latou manatu e uiga i le faaipoipoga. Sa toatele na lagolagoina le faaipoipoga o itupa tutusa, ma e feoloolo nai talavou o le AAG sa faailoaina lo latou “fiafia” i le tusiga. E leai sa’u faamatalaga na faia.
“‘Sa ou filifili loa e tau atu lou talitonuga i le faaipoipoga ua masani ai i se ala magafagafa lelei.
“‘I le ata i lo’u talaaga otooto, sa ou faaopoopo i ai le faamatalaga, “Ou te talitonu i le faaipoipoga i le va o se alii ma se tamaitai.” Sa lei pine ae amata ona ou mauaina ni feau. “E te manatu faapito.” “E te tusitusilima.” Sa faatusaina au e se tasi o se pule o pologa. Ma sa ou mauaina lenei tusiga mai se uo lelei tele o ia o se tagata malosi o le Ekalesia, ‘E ao ona faafou ou manatu. O loo suia lava ia mea ma ua tatau foi ona e sui.”
“‘Ou te le i toe finau i ai,’ o lana tala lea, ‘ae ou te le i aveesea lau faamatalaga mai luga o la’u itulau.’
“Sa ia faaiuina e faapea: ‘O nisi taimi, e pei ona saunoa mai Peresitene Monson, “E tatau ona e tu na o oe.” E faamoemoe i le avea ai o ni talavou, o le a tatou tutu faatasi i le faamaoni i le Atua ma i aoaoga a Ana perofeta soifua’” (“O Asiosio Faaleagaga,” Ensign po o le Liahona, Me 2014, 19–20).
-
Na faapefea ona finau lenei tamaitai talavou mo le talalelei?
-
O le a se taimi na e finau ai pe na finau ai se tasi e te iloa mo le talalelei a Iesu Keriso. O le a se mea na e aoaoina mai i lena aafiaga?
Fai atu i tagata aoga e mafaufau loloto i mea e mafai ona latou faia e finau malolosi ai mo le talalelei a Iesu Keriso. Uunaia i latou e mulimuli i soo se uunaiga latou te maua.
Aotele le Iuta 1:5–7 i le faamalamalama atu, na faatusa e Iuta nei tagata tetee o le Ekalesia i tagata i le vaitaimi o le Feagaiga Tuai o e sa tetee faasaga i le Atua ma mafatia ai i Ana faamasinoga. O nei tagata na aofia ai le toatele o le fanauga a Isaraelu o e na faaumatia i le vao ma tagata o Sotoma ma Komoro, o e na faaumatia i le afi. Na faatusatusa foi e Iuta tagata faatuiese o le Ekalesia ia i latou o e na tetee faasaga i le Atua i “lo latou mamalu,” po o le muai olaga, ma na tuliese i fafo o Lona afioaga (Iuta 1:6; tagai foi Aperaamo 3:22–26).
Tusi le ulutala lenei i luga o le laupapa: Uiga o Aoao Pepelo.
Faamatala atu, i le Iuta 1:8–16, tatou te faitau ai i le faamatalaina e Iuta o le tele o uiga o le a fesoasoani i tagata o le Ekalesia e iloa ai i latou o e na faasalalauina aoaoga ma faiga piopio i le Ekalesia. Ina ia faaalia lenei manatu, ia faailoa atu fuaitau, “o ao i latou e le o i ai se vai, ua feleleaiina i matagi” ma “o laau ua malili o latou lau, ua le fua” i le Iuta 1:12.
-
E faapefea ona avea aoao pepelo o ni ao e le o i ai se vai ma laau ua le fua?
Vaevae le vasega i ni vaega taitoatolu pe taitoafa. Faatonu tagata aoga e faitau le Iuta 1:8, 10, 14–19 ma tagata o a latou vaega, ma vaavaai mo uiga faaopoopo o aoao pepelo. Valaaulia tagata aoga e faailoga mea ua latou maua. Atonu e manaomia ona faamalamalama atu, o “aso e gata ai” (fuaiupu 18) e faatatau i le periota o le vaitaimi na ola ai Iuta faapea ma vaitaimi mulimuli o loo tatou ola ai.
A ua lava loa se taimi, valaaulia tamaiti aoga e o mai i luma i le laupapa ma tusi se uiga o aoao pepelo na latou maua. O uiga e ono tusia e tamaiti aoga e aofia ai mea nei (atonu e manaomia ona faaaoga nisi o faamatalaga nei e fesoasoani ia malamalama ai tagata aoga i mea na latou faitauina):
Uiga o Aoao Pepelo
Faaleaga o latou tino i mea le mama (fuaiupu 8)
Taufaatauvaa i alii [taitai] ma upuleaga i e ua mamalu (fuaiupu 8)
Upu leaga i mea latou te le malamalama i ai (fuaiupu 10)
Faaleaga i latou i le ola le mama (fuaiupu 10)
Faia o amio faalemata’u (fuaiupu 15)
Tautala i upu malolosi e faasaga i le Atua (fuaiupu 15)
Muimui ma faitio (fuaiupu 16)
Mulimuli ma faatino o latou tuinanau (fuaiupu 16)
Faasausili (fuaiupu 16)
Faaneenee atu i isi ina ia maua mai ai ni mea (fuaiupu 16)
Tauemu i le Ekalesia a le Alii ma ona tulaga faatonuina (fuaiupu 18)
Vavae ese i latou lava mai tagata talitonu (fuaiupu 19)
Mafaufau ma amio i amioga faaletino (fuaiupu 19)
Le i ai le Agaga (fuaiupu 19)
-
E mafai faapefea e le le mauaina o le Agaga ona taitai atu i le atinaeina o uiga ua lisiina i le laupapa?
-
Aisea e taua ai le iloa o uiga o aoao pepelo?
Fesoasoani i tamaiti aoga ia malamalama, e le o tagata uma e i ai se tasi pe sili atu o nei uiga, pe aoao mai se mea le sa’o, ona faapea ai lea o se aoao pepelo e pei ona faamatala mai e Iuta. O se tagata faapena atonu o loo mama lava lona faaseseina i lona malamalamaaga e uiga i se mataupu. Ae peitai, o nei uiga e mafai ona fesoasoani tatou te iloa ai aoao pepelo o e ua faamoemoe e faavaivai le faatuatua ma le usiusitai o isi e ala i le faaseseina o i latou ma faalauiloa mai mea leaga.
Valaaulia tamaiti aoga e toe faamanatu filemu le Iuta 1:17–18.
-
O ai na lapataia muamua tagata o le Ekalesia e uiga i aoao pepelo?
-
O le a se upumoni tatou te aoao mai i nei fuaiupu i le ala e mafai ai e aposetolo ma perofeta ona fesoasoani ia tatou taumafaiga e finau faasaga i aoao pepelo? (Atonu e faaaoga e tamaiti aoga a latou lava faaupuga ae e tatau ona faailoa mai se upumoni e pei o lenei: O aposetolo ma perofeta e lapataia i tatou e uiga, ma fesoasoani ia tatou iloa i latou o e taumafai e faavaivaia o tatou faatuatua ma le usiusitai. Tusi le upumoni lenei i luga o le laupapa.)
Valaaulia se tamaitiiti aoga e faitau leotele le saunoaga lenei mai ia Elder M. Russell Ballard o le Korama a Aposetolo e Toasefululua. Fai atu i le vasega e faalogologo pe faapefea ona atagia mai i lana saunoaga lenei upumoni.
“O le aso, matou te lapataia outou o loo i ai ni perofeta pepelo ma ni faiaoga pepelo ua tulai mai; ma afai tatou te le faaeteete, e oo lava ia i latou o tagata faamaoni o Le Ekalesia a Iesu Keriso o le Au Paia o Aso e Gata Ai, o le a afaina ai i la latou taufaasese” (“Ia Faaeteete i Perofeta Pepelo ma Faiaoga Pepelo,” Liahona, Ian. 2000, 62).
-
O le mafaufau ai i lenei upumoni, aisea e taua ai ona suesue i upu a aposetolo ma perofeta?
-
O a nisi o aoaoga pepelo ua lapatai mai ai perofeta ma aposetolo i ona po nei?
Iuta 1:20–25
Ua fautuaina e Iuta le Au Paia e atiina ae o latou olaga i luga o le talalelei a Iesu Keriso ma ia fesoasoani e laveai mai isi
Tusi le faamatalaga le mae’a lenei i luga o le laupapa: E mafai ona tatou tumau faamaoni i le faatuatua e ala i le …
Valaaulia se tamaitiiti aoga e faitau leotele le Iuta 1:20–21. Fai atu i le vasega e mulimuli i le faitauga, ma vaavaai mo le mea na fautuaina e Iuta le Au Paia e fai e tumau faamaoni ai le faatuatua. Atonu e manaomia ona faamalamalama atu, o le uiga “o le Agaga Paia tou te tatalo ai” o le tatalo faatasi ma le fesoasoani o musumusuga mai le Agaga Paia.
-
E tusa ai ma fuaiupu 20–21, e faapefea ona e faaumaina le faamatalaga o loo i le laupapa? (O se tasi o auala e mafai ona faauma ai e tamaiti aoga le faamatalaga e faapea: E mafai ona tatou tumau faamaoni i le faatuatua e ala i le atinaeina o o tatou olaga i luga o le talalelei a Iesu Keriso.)
-
E mafai faapefea e le mulimuli i faatonuga faaopoopo a Iuta o loo i fuaiupu 20–21 ona fesoasoani e atiina ae ai o tatou olaga i luga o le talalelei?
-
Aisea e aoga ai taumafaiga e tumau faamaoni i le faatuatua?
-
E faapefea ona fesoasoani ia te oe po o isi e te iloa, le ola i le fautuaga a Iuta ia tumau faamaoni ai i le faatuatua?
Valaaulia tamaiti aoga e tusi ia latou api talaaga mo le suesueina o tusitusiga paia po o api o le vasega, se auala se tasi e mafai ona faaleleia atili ai le mulimuli i le fautuaga a Iuta. Fautuaina i latou e faaaoga le mea sa latou tusia.
Aotele le Iuta 1:22–25 i le faamalamalama atu, na fautuaina e Iuta tagata faamaoni o le Ekalesia ia lagolago atu i isi o e o loo tauivi faaleagaga, atonu ona o faatosinaga a aoao pepelo, ma ia ofoina atu le viiga i le Atua.
Faaiu i le faasoa atu o lau molimau i upumoni sa talanoaina i lenei lesona.
Toe Faamanatuina o Mau Tauloto
Atofa atu i tamaiti aoga taitasi ni fuaitau eseese o mau tauloto. Faatonu tamaiti aoga e tusi se tulaga moni [o se mea na tupu] i luga o se pepa, lea e mafai ona faaaoga i ai ni aoaoga faavae ma ni mataupu faavae o loo i a latou mau tauloto na atofa i ai. A uma ona tusi e tagata aoga, ia ao mai a latou tulaga [o mea na tutupu]. Faitau atu ni nai tulaga, ma valaaulia tamaiti aoga e faasoa mai pe faapefea ona faaaoga ma faatatau ia aoaoga faavae ma mataupu faavae i tulaga taitasi. E mafai ona e tuuina atu nisi o vaaiga i le amataga po o le faaiuga o lesona i le aluga o le vaiaso o agafua nei.
Tala ma Faamatalaga o Talaaga
Iuta 1:3. “Faamalolosi ona finau mo le faatuatua”
Na aoao mai Elder M. Russell Ballard o le Korama a Aposetolo e Toasefululua e uiga i le finau atu mo le talalelei a Iesu Keriso e faasaga i aoao pepelo ma faiga piopio:
“Afai e manao le tiapolo e faaleaga ma faalavelaveina le ute o le galuega a le Atua, na te osofaia lava le aiga. Na te osofaia i le taumafai lea ia le amanaiaina le tulafono o le legavia, ia faafenumiai kenera, ia tuumaualaloina le matautia o le faatupu vevesi, ia avea le gagana masoa ma le upu vale ma mea e masani ai, ma ia avea amioga le mama ma le leaga ma mea sili ona taua nai lo le teenaina.
“E moomia ona tatou manatuaina le saunoaga a Edmund Burke: “E na o le pau le mea e moomia e le tiapolo ina ia manumalo ai o le leai lea o se mea e faia e tagata lelei’ [attributed in John Bartlett, comp., Familiar Quotations, 15th ed. (1980), ix]. E moomia ona sii i luga o tatou leo faatasi ma isi tagatanuu popole i le lalolagi atoa i le tetee atu i nei faiga ua fotu mai” (“Ia Lagonaina O Tatou Leo,” Ensign po o le Liahona, Nov. 2003, 18).
Ua faatonuina e Aposetolo i ona po nei ia tagata o le Ekalesia i auala e finau ai mo le talalelei e aunoa ma le faafinau. Mo se faataitaiga, tagai Elder Robert D. Hales, “Lototele Faakerisiano: O Le Tulaga Manaomia o se Soo,” Ensign po o le Liahona, Nov. 2008, 72–75; Elder Jeffrey R. Holland, “O Le Tau—ma Faamanuiaga—o le Avea ma Soo,” Ensign po o le Liahona, Me 2014, 6–9; ma le Elder Dallin H. Oaks, “Ola Faatasi ma Alolofa atu i Isi e Eseese o Tatou Talitonuga,” Ensign po o le Liahona, Nov. 2014, 25–28.
Iuta 1:9, 14–15. Tusi faa-apokalifa
Atonu na faatatau atu Iuta i tusi faa-apokalifa o le Assumption of Moses (tagai fuaiupu 9) ma le Tusi a Enoka (tagai fuaiupu 14–15). Ua faaali mai e le Alii e faapea, e tele mea o loo i tusi apokalifa e sa’o, ma o i latou o e e faamalamalamaina e le Agaga e mafai ona faamanuiaina i le faitauina o na mea. Ae peitai, o nisi o tusi o loo i ai faaopoopoga ua faapiopioina ia uluai anotusi (tagai MF&F 91). Mo nisi faamatalaga e uiga i le Apokalifa, tagai i le Taiala i Tusitusiga Paia, “Apokalifa.”