Lesona 24 Mataio 21:17–22:14

Lesona 24

Mataio 21:17–22:14

Folasaga

Ina ua mavae se po sa nofo ai i le nuu o Petania, sa toe foi Iesu i le malumalu. A o i ai i le ala, sa Ia fetuuina se laau o le mati. Na o mai taitai Iutaia ia te Ia i le malumalu ma fesiligia Lana pule. Sa aoai e Iesu i latou ma aoao atu ni faataoto e faapupula atu ai ia taunuuga o le teenaina po o le taliaina o Ia ma Lana talalelei.

Fautuaga mo le Aoaoina Atu

Mataio 21:17–32

Ua fetuuina e Iesu se laau o le mati ma aoai ia taitai o Iutaia

A o lei amataina le vasega, tusi le fesili lenei i luga o le laupapa: O a ni taimi na e maua ai se mea e le o lelei e pei ona foliga mai ai?

Ina ia amata le lesona, valaaulia se tasi pe sili atu o tagata aoga e faasoa mai a latou tali i le fesili o i luga o le laupapa.

Faamatala o le Mataio 21o loo aumaia ai se tala o se taimi na fetaiai ai Iesu Keriso ma se mea e lei lelei e pei ona foliga mai ai. Valaaulia le vasega e vaavaai mo upumoni i leMataio 21e mafai ona taialaina ai i tatou e le gata ia foliga amiotonu i isi ae ia ola amiotonu moni lava.

Ina ia saunia se matalalaga mo le Mataio 21, faamatala ina uma le malaga faatupu a Iesu i Ierusalema ma faamamaina le malumalu, sa nofo o Ia i Petania, o se nuu laitiiti e lata ane i Ierusalema. Valaaulia se tamaitiiti aoga e faitau leotele le Mataio 21:18–22. Fai i le vasega e mulimuli ai, ma vaavaai pe o a mea na faia e le Faaola i le aso na sosoo ai a o malaga atu o Ia mai Petania ma toe foi atu i le malumalu i Ierusalema.

O le a le mea na fai e le Faaola i le laau o le mati?

Faaali se ata o le laau o le mati e i ai lau. Faamatala e masani o lau i luga o se laau o le mati e ta’u mai ai e i ai fua o le laau. I le tautotogo (ina ua oo atu le Faaola i le laau o le mati e leai ni ona fua), e masani lava e vave ona fua mai laau o le mati. Afai e le fua, o lona uiga o le a le fua mai lava i ni fua i le na tausaga. O le laau o loo faamatala ai lenei tala sa foliga mai o se laau e fua mai ni fua, ae sa lei i ai lava se fua. O se tasi o mafuaaga atonu na fetuu ai e le Faaola le laau o le mati o le aoao atu ai lea o Ona soo e uiga i taitai faalelotu piopio o le au Iutaia.

E fua i mea ua e aoaoina e uiga i taitai faalelotu Iutaia i ona po o le Faaola, e faapefea ona faapei le toatele o i latou o le laau o le mati na faamatala mai i lenei tala? (Sa latou foliga mai e mulimuli i le Atua ae e le o fua mai ni fua moni, po o galuega, o le amiotonu.)

Otooto le Mataio 21:23–27 e ala i le faamatala atu o nisi o nei taitai Iutaia na o atu i le Faaola i le malumalu ma fesiligia le pule na ia faia ai Lana malaga faatupu i Ierusalema ma faamama le malumalu. Na tali atu le Faaola i le fesili atu ia te i latou pe o le papatisoga (po o le galuega )a Ioane le Papatiso sa poloaiina e le Atua po tagata. Sa le taliina e nei taitai le fesili a le Faaola ona o le fefefe nei tausalaina i latou lava pe faatausuai i tagata o e sa taliaina Ioane o se perofeta. Na fetalai le Faaola o le a Ia le taliina foi a latou fesili ona ia faamatala atu lea o faataoto e tolu e faapupula ai taga taitai Iutaia piopio. O le faataoto muamua o loo faamatala ai ala eseese na tali atu ai atalii e toalua i lo la’ua tama.

Valaaulia se tamaitiiti aoga e faitau leotele le Mataio 21:28–30. Fai i le vasega e mulimuli ai, ma vaavaai po o le fea atalii sa pei o taitai Iutaia.

O le fea o atalii na pei o taitai Iutaia? E faapefea?

Valaaulia se tamaitiiti aoga e faitau leotele le Mataio 21:31–32. Fai i le vasega e mulimuli ai, ma vaavaai mo mea na aoao atu e le Faaola i nei taitai Iutaia piopio e ala i lenei faataoto. (Atonu e manaomia ona e faamatala atu o telona o le au ao lafoga ma o fafine talitane o fafine e faatau atu o latou tino mo tupe. Sa vaai maualalo ia taitai Iutaia i nei vaega uma o tagata, ma ua manatu o i latou o ni tagata agasala.)

Na faapefea ona faapei ia telona ma fafine talitane o le atalii muamua?
O le a le upumoni e mafai ona tatou aoao mai aoaoga a le Faaola pe o ai e ulu atu i le malo o le Atua? (E ono faaaoga e tagata ni upu eseese ae e tatau ona faailoa mai se upumoni e faapei o lenei: Ina ia ulu atu i le malo o le Atua, e tatau ona tatou usiusitai i lo tatou Tama Faalelagi ma salamo i a tatou agasala ae le na o le fai mai pe faafoliga faapea o loo tatou usitai ia te Ia.

Ina ia fesoasoani ia malamalama tagata i le taua o lenei upumoni, valaaulia se tagata e faitau leotele le tulaga lea:

O se alii talavou e masani ona fai atu i ona matua o loo alu i gaoioiga a le Ekaelsia ae o la e alu i le fale o se uo. A i ai o ia i le mea e i ai taitai o le Ekalesia ma faiaoga, e talanoa ma gaoioi e pei o la na te tausia poloaiga a le Tama Faalelagi, ae i fafo atu o na faatulagaga o loo ia solia ma le iloa le tele o poloaiga.

E mafai faapefea e filifiliga a lenei alii talavou ona taofia o ia mai le ulu atu i le malo o le Atua?
Afai o oe o le uo a lea alii talavou, o le a se mea e mafai ona e fai atu ia te ia e fesoasoani ai ia suia lana amio?

Valaaulia se tagata aoga e faitau leotele le tulaga lenei:

O loo faitatala se tamaitai talavou ma ana uo e uiga i le tele o teineiti i lana aoga ae e faafoliga e agalelei i nei teineiti pe a o mai. E alu o ia e le aunoa i le lotu ma ’ai ma inu i le faamanatuga, ae i le taimi o sauniga e tele lava ina tago auina atu i ana uo ni savali feaveai e i ai faitioga ia i latou o i ai ma ia.

O a ni auala ua na ona faafoliga ai lenei tamaitai talavou o loo tausia poloaiga a le Tama Faalelagi?
E le gata i faataitaiga i nei tulaga, ae o a isi auala e mafai ona tofotofoina ai e faafoliga o loo usitai i le Tama Faalelagi nai lo le usitai moni ia te Ia?

Valaaulia le vasega a o latou suesue pea i leMataio 21e vaavaai mo mea e mafai ona latou faia e aloese ai mai le faapei o le laau o le mati e le fua mai ni fua.

Mataio 21:33–22:14

Ua aoao atu e Iesu ia faataoto i le faifaatoaga amioleaga ma le faaipoipoga a le atalii o le tupu

Vaevae le vasega i ni paga. Afai e mafai, tuu atu i paga taitasi se kopi o le chart lea. Valaaulia le vasega e faitau leotele faatasi le Mataio 21:33–41 ma a latou paga ma faamaea le siata i le tusi ai pe o le a so latou manatu i mea o faatusa i ai faailoga muamua

O Le Faataoto i le Faifaatoaga Amioleaga

Tusi lesona a le Faiaoga Seminare o le Feagaiga Fou

Mataio 21:33–41
Faatusa	Faauigaga
Taitai	Tama Faalelagi
Faifaatoaga
Auauna
O le atalii o le taitai

A uma ona faamaea e le vasega lenei gaoioiga, valaaulia ni paga e lipoti mai mea sa latou tusia. A manaomia, faamanino o le faifaatoaga e faatusa i taitai Isaraelu piopio, o auauna e faatusa i perofeta a le Atua, ma le atalii o le taitai e faatusa ia Iesu Keriso.

O le a le mea sa faapupula mai e Iesu i lenei faataoto? (E tele seneturi sa teena ai e nisi o taitai o Isaraelu ia perofeta o le Feagaiga Tuai, ma sa fuafua ia taitai o Iutaia i le taimi nei e fasiotia Iesu [tagai Tusi lesona a le Tagata Aoga o le Feagaiga Fou (Church Educational System manual, 2014), 65]).

Valaaulia se tamaitiiti aoga e faitau leotele le Mataio 21:43. Fai i le vasega e mulimuli ai, ma vaavaai pe o ai o le a tuu atu i ai le malo o le Atua (o lona uiga o le Ekalesia a Iesu keriso ma faamanuiaga o le talalelei) ina ua uma ona teena e tagata Iutaia.

O ai o le a avatu i ai le malo o le Atua?

Faamatala o le Faaliliuga a Iosefa Samita, Mataio 21:53,o loo faailoa mai ai o Nuuese o le malo o le a tuuina atu i ai le malo o le Atua. Atonu e te manao e faamatala o le upuNuuese e mafai ona faasino i “tagata o nuu e le o ni Isaraelu … [po o ] gafa e le tau ia Iutaia” (Taiala i Tusitusiga Paia, “Nuuese,” scriptures.lds.org) po o malo e le o i ai le pule atoa a le Atua, sauniga, tulafono, ma aoaoga. O le faasolo atu o le malo i Nuuese na amata ina ua faatoa avatu le talalelei i Nuuese e Aposetolo ina ua mavae le Toetu o le Faaola (tagai Galuega 10–11; tagai foi Mataio 20:16). Ua faaauau ai lava i aso e gata ai i le Toefuataiga mai o le talalelei e ala i le Perofeta o Iosefa Samita, o le sa soifua i se malo o Nuuese. I le avea ai ma tagata o le Ekalesia a Iesu keriso, o i tatou o nisi o e ua tuuina mai i ai e le Atua Lona malo.

e tusa ai ma le fuaiupu 43, o le a lo tatou tiutetauave o ni tagata o le Ekalesia a Iesu Keriso? (Ia mautinoa ua faailoa mai e le vasega se mea e talitututsa ma le upumoni lea: I le avea ai ma tagata o le Ekalesia a Iesu Keriso, o lo tatou tiutetauave o le aumaia o fua o le amiotonu. I le faaaogaina o upu a tagata aoga, tusi lenei mataupu faavae i luga o le laupapa.)

Valaaulia le vasega e o mai i le laupapa ma tusi ni ata o fua o le laau o le mati. Fai i ai e faaigoa le fua i upu e faamatala ai mea amiotonu e tatau ona tatou faia o ni tagata o le Ekalesia a Iesu Keriso. Valaaulia le vasega e faamatala mea sa latou tusia i le fesili:

Aisea e te manatu e taua ai ona tatou fua mai i na fua?
Ua faapefea ona faamanuiaina oe a o e taumafai e fua mai i nei fua o le amiotonu?

Otooto le Mataio 21:45–46 i le faamatala atu o faitaulaga sili ma le au Faresaio na feitai ina ua latou iloaina o le faifaatoaga amioleaga i le faataoto e faatusa ia i latou. Peitai, sa latou le faaooina o latou lima i le Faaola ona o lo latou fefefe i le tali atu o tagata pe a latou faia.

Faamatala i le Mataio 22:1–10 tatou te faitau ai faapea na faamatala e Iesu Keriso se faataoto lea na Ia faatusaina ai ia faamanuiaga o le talalelei i se tausamiga o se faaipoipoga sa faia e se tupu mo lona atalii. O tagata na muamua valaaulia i le taumafataga (o e faatusa i le toatele o Iutaia, e aofia ai ma taitai) sa mumusu e o mai. O e na sosoo ona valaaulia ( ia e faatusa i Nuuese) na filifili e o mai ma fiafia ai i le taumafataga.

Valaaulia se tamaitiiti aoga e faitau leotele le Mataio 22:11–14. Fai atu i le vasega e mulimuli i le faitauga, ma vaavaai mo le mea na tupu i le taumafataga.

Aisea na tuliese ai lenei malo faaaloalogia mai le taumafataga?

Faamatala sa faataunuuina e le Tupu se agaifanua anamua e ala i le tuu atu i ana au valaaulia o ni laei mama talafeagai e laei mai i le faaipoipoga. Peitai, na filifili lenei tagata e le ofuina mai le ofu na avatu e le tupu.

I le faataoto lenei, mata o le a se mea na faatusa i ai laei o le faaipoipoga? (Atonu e te manao e faamatala i tusitusiga paia, o laei mama ma ofutalaloa e tele ina faatusa i le amiotonu ma le mama a’ia’i o i latou ua mama e ala i le Togiola a Iesu Keriso [tagai Tusi lesona a le Tagata Aoga mo le Feagaiga Fou (Church Educational System manual, 2014), 66; tagai foi 3 Nifae 27:19].)

Ta’u i ai o le Faaliliuga a Iosefa Samita o le Mataio 22:14 ua faaopoopo i ai e le o tagata uma i le taumafataga o le a ofuina le laei o le faaipoipoga (tagai vaefaamatalaga e). I se isi faaupuga, e le o tagata uma o e faailoa mai le Faaola, ua valaauina, ma taliaina le valaaulia e avea o se tasi o le malo o le a saunia ma agavaa e mau e faavavau faatasi ma ia ma le Tama Faalelagi. O nisi o le a faaleagavaaina i latou lava mai faamanuiaga oa ona latou te le o oofu i le laei o le amiotonu.

E faapefea ona faapupula atili mai e lenei faataoto le mataupu faavae o loo tusia i luga o le laupapa?

Molimau atu i le taua o faamanuiaga e faavavau ua valaaulia i tatou ia maua. Fai i le vasega e mafaufau loloto i mea o latou faia nei e talia ai le valaaulia a le Tama Faalelagi ia maua faamanuiaga uma o le talalelei. Fautuaina i latou e faaaoga mea sa latou aoaoina e ala i le saunia o i latou lava e talia nei faamanuiaga.

Tala ma Faamatalaga o Talaaga

Mataio 21:19–22. Fetuuina o le laau o le mati

O le fetuuina e le Faaola o le laau o le mati ua aoao mai ai le tele o lesona taua. E mafai ona avea le laau o le mati ma faatusa o taitai faalelotu piopio o Iutaia, o e sa faafoliga i fafo atu lo latou lelei ae le o se amiotonu moni. I lea alatoto, o le mea na aoao mai e tatau ia i tatou uma ona taumafai e ola ai o tatou olaga o se tulaga e ogatusa ma mea ua tatou talitonu ai ma aoao atu. O le fetuuina o le laau o le mati o loo aumaia ai foi se ata vaaia o le lesona na aoao atu e le Faaola i le amataga o Lana galuega, i le faataoto i le laau o le mati (tagai Luka 13:6–9): e tatau i tagata uma ona salamo po o le a fano i latou. Ina ua uma ona molimauina le tali a le au soo i le fetuuina o le laau o le mati, sa faaaoga foi e le Faaola lea taimi e aoao atu ai i latou e uiga i le mana o le faatuatua e fai ai e oo lava i vavega sili atu nai lo lea na latou faatoa molimauina.

Mataio 21:42–44. “O le maa na tuulafoaiina e le tufuga faifale”

O Iesu Keriso “o le maa na lafoaiina e le tufuga faifale”(Mataio 21:42) ma ua avea o le maatulimanu o le malo o le Atua i le lalolagi (tagai Galuega 4:11; Efeso 2:19–20). O le fatonuga a le Faaola e uiga ia i latou o e pauu i luga o le maa ma gauia e faasino i le mea moni e faapea, nai lo le fausiaina o o latou lava olaga i luga o lenei maa (tagai Helamana 5:12), o le a tautevateva tagata Iutaia ma pauu i ai i luga (tagai Isaia 8:14; 1 Korinito 1:23). O le a nutililiina i latou, pe faaumatia, ona o le le talaina o Iesu o le Mesia ma le Alo o le Atua ma le le taliaina o Lana talalelei. O le maa na pau i luga o isi e faasino i le Faaola o faaumatia i latou o e e teena o Ia. (Tagai Faaliliuga a Iosefa Samita, Mataio 21:47–56 [i le faaopoopoga o le Tusi Paia].)