Anomea o Sauniuniga mo le Faiaoga o Suesuega i le Fale
Aotelega o Lesona o Suesuega i le Fale i Aso Taitasi
O lenei otootoga o aoaoga faavae ma mataupu faavae na aoaoina e tamaiti aoga a o latou suesueina le Luka 5:1–10:37 (iunite 10) e le o faamoemoe e aoao atu o se vaega o lau lesona. O le lesona e te aoaoina atu e taulai atu na o ni nai aoaoga faavae ma mataupu faavae nei. Mulimuli i musumusuga a le Agaga Paia ao e mafaufau i manaoga o au tamaiti aoga.
Mai le tala i le Alii o loo valaaulia Peteru, Iakopo, ma Ioane e avea ma faifaiva i tagata, sa aoao ai e le vasega afai tatou te faia mea e poloai mai ai le Alii tusa foi pe tatou te le malamalama ai pe aisea, e mafai lava e Ia ona saunia mo i tatou ni faamanuiaga e sili atu nai lo le mea e mafai ona tatou faamoemoeina. Ma mai le faamaloloina o le lepela ma le tagata ma’i supa, sa aoao ai e le vasega afai tatou te faaaoga le faatuatua ma o mai i le Faaola, e mafai e Ia ona faamalolo i tatou ma e mafai ona tatou fesoasoani i isi e o mai i le Faaola ina ia mafai ona faamaloloina i latou. Ua aoaoina foi e le vasega o le taliaina o le Faaola ma Lana talalelei, e tatau ona tatou lotomaualalo ma naunau e sui.
Na maua foi e le vasega afai tatou faia mea lelei i isi e aunoa ma le faamoemoe e toe maua mai ai se mea, o le a sili lo tatou taui ma o le a avea i tatou ma fanau a Le Silisiliese ma e faamanuiaina i tatou ma le agalelei a o tatou foai atu ma le agalelei i isi. Sa latou aoaoina foi upumoni nei: O le faaaogaina i le faatuatua ia Iesu Keriso, e mafai ai ona tatou fesoasoani e aumaia faamanuiaga i olaga o isi. E mafai ona tatou mulimuli i le faataitaiga a Iesu Keriso e ala i le faaalia o le mutimuti alofa i isi ma auauna atu i o latou manaoga e le o faaleoa maia.
I le lesona lenei sa aoao ai e le vasega o Ioane le Papatiso o le perofeta sa muai faauuina e saunia le ala mo le papatisoina o le Alo o le Atua. Mai le tala i le fafine na mulumuluina vae o Iesu i ona loimata, sa aoao ai e le vasega mea nei: A o tatou faaaoga lo tatou faatuatua e ala i le faaalia o le alofa mo ma le tuuto atu i le Alii, e mafai ona tatou maua Lana faamagaloga. A o tatou maua le faamagaloga a le Alii, e faatumuina i tatou i le naunau e alolofa ma auauna atili atu ia te Ia
Mai lenei lesona sa fautuaina ai le vasega e mulimuli i le faataitaiga a le Faaola e ala i le filifili e tali atu i tulaga faatiga pe faatausuai ma le onosai ma le faapalepale. E le gata i lea, sa latou aoao faapea o le avea ma se soo moni o Iesu Keriso, e le tatau ona tatou faatagaina soo se mea e faamuamua i lo tatou mulimuli atu ia te Ia ma ina ia maua le ola e faavavau e tatau ona tatou alolofa i le Atua ma alolofa i o tatou tuaoi e pei o i tatou lava.
Folasaga
Sa fesili se faitulafono i le Faaola, “Se a se mea ou te faia ina ia ou maua ai le ola e faavavau?” (Luka 10:25). O manatu faafaiaoga nei e mafai ona fesoasoani i le vasega e aoao ai i le uiga o le alofa i le Atua ma le alofa i o tatou tuaoi e pei o i tatou lava.
Ua aoao mai e Iesu le faataoto i le Samaria agalelei
Fai i se tagata e faitau leotele mai le saunoaga lea a Peresitene Dieter F. Uchtdorf o le Au Peresitene Sili:
Ata
Peresitene Dieter F. Uchtdorf
“O tagata o siomia i tatou e le atoatoa. E fai e tagata mea e faaosoita, faanoanoa, ma ita ai. I lenei olaga faitino o le mea lava e tasi o le a i ai” (“The Merciful Obtain Mercy,” Ensign po o le Liahona, Me 2012, 77).
Valaaulia le vasega e mafaufau pe latou te iloaina se tasi e faia mea e faalavelave ai, le fiafia, pe faaita ai i latou.
Aisea e ono faigata ai ona alofa i se tasi e faia nei mea?
Valaaulia le vasega e vaavaai mo upumoni a o latou suesueina le Luka 10:25–37ia e mafai ona taialaina ai i latou a o latou fegalegaleai ma tagata atonu e faigata ona alolofa i ai.
Faamanatu i le vasega i a latou lava suesuega patino o le Luka 10, sa latou aoao ai i se faitulafono sa fesili i le Faaola pe faapefea ona ia maua le ola e faavavau.
Valaaulia se tagata e faitau leotele le Luka 10:26–28. Fai atu i le vasega e mulimuli i le faitauga, ma vaavaai mo le tali a le Faaola. Ona fai atu lea i tagata o le vasega e lipoti mai mea na latou mauaina.
O le a le mataupu faavae ua tatou aoaoina mai nei fuaiupu e faatatau i mea e tatau ona tatou faia e maua ai le ola e faavavau? (E ono faaaoga e le vasega ni upu eseese ae e tatau ona faailoa mai se mataupu faavae e pei o lea: Ina ia maua le ola e faavavau e tatau ona tatou alolofa i le Atua ma alolofa i o tatou tuaoi e pei o i tatou lava. Tusi lenei mataupu faavae i luga o le laupapa.)
O le a le uiga o le alofa atu i le Atua ma lou loto atoa, agaga atoa, malosi atoa, ma le mafaufau atoa?
Faasino i le fasifuaitau “alofa i o tatou tuaoi e pei o i tatou lava” i luga o le laupapa. Ina ia fesoasoani ia malamalama le vasega pe o le a le uiga o le alofa i o tatou tuaoi e pei o i tatou lava, valaaulia i latou e lisi i luga o le laupapa mea latou te faia i se aso masani. (O mea e aofia ai le tapenapenaga mo le aso, ’ai, moe, faia o meaaoga, ma isi mea faapena.)
a uma ona faamaopoopo se lisi i luga o le laupapa, valaaulia le vasega e mafaufau pe fia a latou gaoioiga e taulai ia i latou lava. (E mafai ona e fai atu ia i latou e faailoa mai pe o mea o i luga o le lisi e mo i latou lava, mo isi, pe mo le Atua.)
O le a se mea e mafai ona tatou aoao mai i lenei faatinoga?
O a ni auala e mafai ai ona tatou taulai atu atili i le soifua manuia o isi ma saili e alolofa ia i latou e pei ona tatou alolofa ia i tatou lava?
O a ni auala e mafai ona tatou faia e oo lava i taimi o gaoioiga tatou te faia mo i tatou lava? (O faataitaiga e mafai ona aofia ai le ’aai i le malologa ma i latou o e foliga tuuatoatasi pe faamalo atu i isi i le taimi o a tatou gaoioiga faaleaoga.)
O le a sou manatu e faapefea e le alofa i le Atua ma o tatou tuaoi e faapei o i tatou lava ona fesoasoani tatou te agaigai atu ai i le ola e faavavau?
Valaaulia se tagata e faitau leotele le Luka 10:29. Fai atu i le vasega e mulimuli i le faitauga, ma vaavaai mo se fesili lona lua na fesili atu ai le faitulafono ia Iesu.
O le a le fesili lona lua a le faitulafono?
Sauniuni ni tagata e faatinoina le faataoto i le Samaria agalelei i le Luka 10:30–35. Valaaulia se tagata se toatasi e fai ma faamatala a o isi e faatinoina matafaioi a le tagata Iutaia na manu’a, o le au faomea e toalua, le faitaulaga, le sa Levi, ma le Samaria. (Afai e toalaiti lau vasega, e mafai ona latou faatinoina nisi vaega.) Atonu e te manao e saunia ni nai teuga, ia e mafai ona aofia ai pine o igoa, nisi ofu e aveese mai le tagata Iutaia, ni fagu se lua o le suauu ma le uaina, se nofo e fai uili e faasino i se manu, ma ni tupe siliva se lua e faatusa i le lua tenari. (Manatua: Atonu e te manao e filifili ni tagata e avatu i ai faatonuga patino a o lei amataina le vasega ma ia mautinoa e aoga le faatinoga o le tala, e talafeagai, ma saogalemu.)
Valaaulia le faamatala e faitau leotele le Luka 10:30–35, ma faatonu i latou o loo faatinoina e faatino mai le faataoto. Fai i le vasega o totoe e mulimuli ai, ma vaavaai mo mea na aoao atu e le Faaola pe o ai o tatou tuaoi. A uma ona faatino le tala, ona toe foi atu lea o tagata i o latou nofoaga.
O le fea o taga a le Samaria na sili ona faagaeetia ai oe?
Ina ia fesoasoani ia malamalama atili le vasega i le mea atonu na faamoemoeina mai i se faitaulaga, sa Levi, ma le Samaria, valaaulia se tagata e faitau leotele le faamalamalamaga lea:
I le tulafono tusitusia a Mose, o faitaulaga ma sa Levi na totofi [ma o le latou matafaioi] e auauna atu i le Atua ma o latou uso a tagata, i le malumalu ma o ni aoao ma faataitai o le tulafono a le Atua. O nei tagata sa umia le perisitua ua iloa lelei lava le poloaiga o le “alofa atu i le lua te tuaoi ia pei o oe lava ia te oe” (Levitiko 19:18) O le mea moni, o sa Levi sa patino lo latou nafa ma le fesoasoani i e faimalaga ia gafataulimaina ma i isi auala`(tagai Levitiko 25:35–36). I se tulaga e ese, “o Samaria e i ai le pito Isaraelu ma le pito o Nuuese. O la latou talitonuga faalelotu o se suifefiloi o talitonuga ma faiga faapaupau faa-Iutaia. … Na atiinae e Iutaia se [inoino] i tagata Samaria ona sa liliuese ia Samaria mai le talitonuga faalelotu o Iutaia” (Taiala i Tusitusiga Paia, “Samaritans,” scriptures.lds.org). O Iutaia ma Samaria ua fai ma mea masani le matuai ’alo’alosa o le tasi mai le isi.
I le faataoto, aisea e ono maofa ai i taga a le faitaulaga, sa Levi, ma le Samaria?
O a mafuaaga sa ono le fesoasoani ai le Samaria i le Iutaia na manu’a?
E tusa ai ma leLuka 10:33, o le a le mea na uunaia ai le Samaria e gaoioi ina ua ia vaaia le tagata manu’a?
Ta’u i ai o le i ai o le mutimuti alofa o lona uiga o le matauina o manaoga o se isi tagata po o luitau ma lagonaina se manao e fai soo se mea tatou te mafaia e fesoasoani ai i lena tagata.
Valaaulia se tagata e faitau leotele le Luka 10:36–37. Fai atu i le vasega e mulimuli i le faitauga, ma vaavaai mo mea na sosoo ona aoao atu e le Faaola i le faitulafono.
E faapefea ona tali e lenei faataoto le fesili o i lefuaiupu 29, “O ai foi le tagata ma te tuaoi?”
Fesoasoani ia malamalama le vasega o le faaaogaina e le Faaola o le Samaria i lenei faataoto ua fautuaina mai ai o lo tatou tuaoi ua le na o se tasi e nofo latalata mai ia i tatou, ae o soo se tasi o fanau a le Tama Faalelagi—e aofia ai i latou o e sili ona faigata mo i tatou ona alolofa i ai.
Fai atu i se tagata aoga e faitau leotele le saunoaga lenei mai ia Peresitene Howard W. Hunter:
Ata
Peresitene Howard W. Hunter
“E ao ina tatou manatua e ui ina tatou filifilia a tatou uo, a o le Atua e filifilia o tatou tuaoi—ma e i ai i soo se mea. E le tatau ona i ai ni o tatou tuaoi. … Na fetalai mai Keriso, “Aua afai tou te alolofa atu i e ua alolofa mai ia te outou, se a ea se taui tou te maua ai? e le faia ea e le au telona o lea lava mea?’ (Mataio 5:46)” (“The Lord’s Touchstone,” Ensign, Nov. 1986, 35).
E tusa ai ma leLuka 10:37, o le a le mea na aoao atu e le Faaola i le faitulafono e fai?
Valaaulia le vasega e toe mafaufau tasi i tagata na latou mafaufau muamua i ai faapea e faigata ona alolofa i ai.
O le a se mea e mafai ona tatou fai e alolofa ai ma i ai se mutimuti alofa ia i latou o e faigata ona tatou alolofa i ai?
Mafaufau i se taimi na e mulimuli ai pe mulimuli ai se tasi e te iloa i le fautuaga a le Faaola ia “alofa atu … i le lua te tuaoi e pei o oe lava ia te oe”(Luka 10:27). O le a le taunuuga?
Molimau atu i upumoni na aoaoina i le lesona o le aso. Tusi le faamatalaga lea e lei maea i luga o le laupapa ma valaaulia tagata o le vasega e kopi i a latou api o le vasega po o api talaaga mo le suesueina o tusitusiga paia: O le a ou mulimuli i le faataitaiga a le Samaria agalelei e ala i le …
Faamatala i le vasega i le iunite o le a sosoo ai, o le a latou suesue ai i le auala na aoai faafia ai e Iesu le au Faresaio mo le saili e foliga amiotonu ae o totonu e manatu faapito. Fai i ai e mafaufau pe mafai faapefea ona itiiti le faapei o Faresaio ae ia atili pei o soo lotomaulalo o Keriso. O le a latou suesue foi i isi faataoto na tuuina atu e Iesu, e aofia ai le faataoto i le atalii faamaumauoa. Fai i ai e matau le mea na tupu i le alii mauoa o le na tuuto atu lona ola i le sailia o le oa ae faagalogalo ai i e matitiva.