Lesona 38

Mareko 7–8

Folasaga

Sa aoai e Iesu le au Faresaio ona o a latou uputuu pepelo. Ona Ia faamalolo lea ma le mutimuti alofa o se tamaitiiti na uluitinoina e se temoni, faapea se tagata tutuli ma sa gugu foi. Sa Ia fafagaina tagata e fa afe e lata ane i le Sami o Kalilaia ma sa malaga atu i Petesaita, lea na Ia faamalolo auauai ai se tagata tauaso.

Fautuaga mo le Aoaoina Atu

Mareko 7

Ua aoai e Iesu le au Faresaio, faamalolo i le tamaitiiti na uluitinoina e le temoni, ma faamalolo i le tagata tutuli.

A o lei amataina le vasega, tuu atu i ni tagata se toatolu faatonuga nei Tagata aoga 1: “Pe a faatonuina ai e faia, savali faataamilo i le vasega e aunoa ma se peleue ma faafoliga ua gatete.” Tagata aoga 2: “Pe a faatonuina ai e faia, savali faataamilo i le vasega ma fesili pe i ai se tasi na vaai i lau fagafao ua leiloa.” Tagata aoao 3: “Pe a faatonuina ai e faia, toso le sipi o lau atofaafafa ina ia toulu ese mai ai mea a o e savali.” (E mafai ona e fetuunaia lenei gaoioiga i le faaaogaina o isi tulaga e faaalia mai ai tagata o loo manaomia le fesoasoani, ae ia faaeteete aua nei faaalu ai se taimi tele.)

A amata le vasega, faatonutonu le vasega e famaea nei faatonuga taitasitasi. Fai i le vasega e vaavaai po o a mea e tutusa ai nei tulaga e tolu.

• O a mea e tutusa ai nei tulaga? (O nei tulaga taitasi ua faatusa i se tagata o loo manaomia se fesoasoani.)

• E faafia ona tatou maua avanoa e fesoasoani ai i isi e manaomia le fesoasoani? O a ni nai avanoa na e vaai i ai talu ai nei?

Fautuaina le vasega a o latou suesue i le Mareko 7–8e vaavaai mo mea ua aoao mai e le Faaola tatou te faia pe a tatou matauina se tasi e manaomia se fesoasoani.

Otooto leMareko 7:1–30i le faamatala atu sa aoai e le Faaola le au Faresaio i lo latou mulimuli i uputuu e le sa’o. Sa Ia faamaloloina foi le tama teine a le fafine Eleni, o le sa uluitinoina i se temoni. Faamanatu i le vasega o le taimi lenei, o le misiona a le Faaola e mo le aiga o Isaraelu, ae le o Nuuese, ae na Ia fesoasoani ma le mutimuti alofa i lenei fafine o Nuuese o le sa faatauanau atu ia te Ia.

Valaaulia le vasega e sue ia aai o Turo ma Saitonu ma le Sami o Kalilaia i le Faafanua o le Tusi Paia, nu. 11, “The Holy Land in New Testament Times.” Faamatala ina ua tuua e le Faaola ia Turo ma Saitonu, sa malaga atu o Ia i le itu i sasae o le Sami o Kalilaia, i le itumalo o Tekapoli.

Vaevae le vasega i ni paga. Valaaulia i latou e faitau leotele le Mareko 7:31–37, ma vaavaai pe na faapefea e le Faaola ona faailoa atu le mutimuti alofa i se tagata i Tekapoli. A maea ua lava se taimi, fai i le vasega e talanoaina fesili nei ma a latou paga:

• O a tulaga na sailia e lenei tagata ina ia faamalolo mai ai?

• O le a le mea na faia e le Faaola a o lei faamaloloina e Ia le tagata?

Ina ia fesoasoani i tagata o le vasega i taga a le Faaola, valaaulia se tagata e faitau leotele le saunoaga lenei a Elder Bruce R. McConkie o le Korama a Aposetolo e Toasefululua:

“O loo taulimaina e le Alii se agaga talitonu o le e le mafai ona lagonaina ana upu pe tuuina atu se tali manino. Ma o lea la o le a le mea e sili o le natura e faaaoga ai faailoga masani, ua iloa ma malamalama ai le tagata tutuli ma leo oolo, e ta’u mai ai mea e mafai e le Matai ona fai ma o le a faia … ?” (Doctrinal New Testament Commentary, 3 vols. [1965–73], 1:373).

• O a mea e mafai e taga a le Faaola i lenei tulaga ona aoao mai ia i tatou e uiga i Lona uiga?

Faamatala e ui i le lapataiga a le Faaola ia i latou na Ia faamaloloina e aua nei faasalalauina Ana vavega, ae sa faalogo lava tagata i le itumalo o Tekapoli e uiga i mea ofoofogia sa faia e le Faaola, ma sa faapotopoto atu le motu o tagata e toatele ia te Ia (tagai Mareko 7:36–37).

Mareko 8:1–21

Ua fafagaina e Iesu le silia ma le fa afe ia tagata.

Valaaulia le vasega e tali i le fesili lenei i totonu o a latou api aoga po o tusi talaaga mo le suesueina o tusitusiga paia:

• O anafea na matau ai e se tasi ua e manaomia le fesoasoani ma sa faia se mea e fesoasoani ai ia te oe?

Faamatala i se taimi mulimuli ane i le lesona, o tagata e fia faasoa mai o latou aafiaga o le a maua se avanoa e faia ai.

Valaaulia se tagata e faitau leotele le Mareko 8:1–3. Fai i le vasega e mulimuli ai ma vaavaai mo le faafitauli na tulai mai ona o le motu o tagata na mulimuli atu ia Iesu.

• O le a le faafitauli na tulai mai mo le motu o tagata? O ai na vaaia le mea sa manaomia e le motu o tagata?

• O le a se mea na popole le Faaola e ono tupu pe afai e taumafai tagata e toe foi i o latou aiga e aunoa ma le aai muamua?

• E tusa ai ma lefuaiupu 2, o le a se lagona o le Faaola i le motu o tagata? (Atonu e te manao e fautuaina le vasega e maka le fasifuaitau “Ou te alofa atu i le motu o tagata,” lea e ta’u mai ai sa lagonaina e le Faaola le loto faanoanoa ma le popole mo tagata.)

Valaaulia ni tagata se toalua e feauauai i le faitauina leotele o le Mareko 8:4–9. Fai atu i le vasega e mulimuli i le faitauga, ma vaavaai po o le a le mea na tupu mai i le mutimuti alofa o le Faaola.

• O le a le mea na faia e le Faaola mo le motu o tagata?

• E toafia tagata na fafagaina?

• O le a se mea e mafai ona tatou aoaoina mai i faataitaiga a le Faaola i lenei tala? (Fesoasoani i le vasega e faailoa mai le mataupu faavae lenei: E mafai ona tatou mulimuli i le faataitaiga a le Faaola i le vaai atu i manaoga o isi ona fesoasoani lea e faataunuu na manaoga. Tusi lenei mataupu faavae i luga o le laupapa.)

Ina ia fesoasoani ia malamalama le vasega i le mataupu faavae lenei, faamatala na aoao mai e Sister Linda K. Burton, o le peresitene aoao o le Aualofa, e faapea ina ia mafai ona mulimuli i le faataitaiga a le Faaola i le auauna atu i fanau a le Atua, e manaomia ona tatou “matau muamua, ona auauna atu ai lea”(“Muamua Matau, Ona Auauna Atu ai Lea,” Ensign po o leLiahona, Nov. 2012, 78). Tusi le fasifuaitau lenei i luga o le laupapa i lalo o le mataupu faavae.

• E mafai faapefea ona tatou aoao ina ia sili atu ona tatou nofouta i manaoga o isi? (Fuafua e ta’u i ai nisi o manaoga atonu e le mafai ona iloa vave pe manino mai foi. Peitai, e mafai ona tatou tatalo ma fesili mo se fesoasoani ia matau manaoga o isi ma taulai atu o tatou mafaufauga i isi nai lo i tatou lava.)

• O le a se mea e mafai ona faalavefau i lo tatou tomai ona matau manaoga o isi ma fesoasoani e faataunuuina?

Valaaulia ni nai tagata e faasoamai ni aafiaga na latou tusia i lalo e uiga i se taimi na matau ai e se tasi ua latou manaomia se fesoasoani ma tuuina atu lena fesoasoani.

Fefaasoaai o mafaufauga, lagona, ma aafiaga

O le fefaasoaai o malamalamaaga ma aafiaga talafeagai e mafai ona fesoasoani e faamanino ai le malamalama o tagata aoao i aoaoga faavae ma mataupu faavae. A o faasoa mai e le vasega o latou aafiaga, e tele taimi e taitai e e le Agaga Paia i latou i se malamalama ma molimau e loloto atu i mafaufauga tonu ia o loo latou faaalia. E ala i le mana o le Agaga Paia, o mafaufauga, lagona, ma aafiaga e faasoa mai e le vasega e mafai foi ona i ai se aafiaga tulaga ese i loto ma mafaufau o a latou paaga.

Valaaulia se tagata e faitau leotele le saunoaga lenei mai ia Peresitene Thomas S. Monson:

“Na faafia ona tuia lou loto ina ua e molimauina le tulaga manaomia o se tasi? E faafia ona e faamoemoe faapea o oe e tatau ona fesoasoani atu? Ae faafia foi ona faalavelavea le olaga i lea aso ma lea aso, ma tuu ai lava i isi e faia le galuega fesoasoani, ma lou manatu ‘o le mea moni lava o le a i ai se tasi e taulimaina lena manaoga.’

“Tatou te matua popole tele i le pisi o o tatou olaga. Ae, a sei vaai lava sina minute tatou te toe tepa ai ia tatou mea o fai, atonu tatou te iloa ai ua tatou faatofuina i tatou lava i ‘mea e papa’u ma e le taua.’ I se isi faaupuga, ua faatele ona faaalu le tele o o tatou taimi, e fai ai mea e matua le aoga lava i le fuafuaga autu o le olaga, ma ua faatuatuanai ai mea e aupito sili ona taua” (“O Le A Se Mea ua Ou Faia mo Se Tasi i le Aso?” Ensign po o le Liahona, Nov. 2009, 85).

Fai i le vasega e manatu faalemafaufau i mea e tutupu i se aso masani mo i latou. Valaaulia i latou e mafaufau e uiga i tagata latou te fetaiai o e atonu e manaomia la latou fesoasoani , e pei o matua, uso ma tuagane, ma paaga. Fautuaina i latou e tautino atu e mulimuli i le faataitaiga a le Faaola e ala i le ofoina atu o le fesoasoani pe a latou iloaina se tasi e manaomia.

Otooto leMareko 8:10–21i le faamatala atu ina ua uma ona fafagaina faavavega le 4,000, sa folau atu Iesu ma Ona soo i se nofoaga e igoa o Tamanuta. O iina sa fesili atu ai le au Faresaio ia te Ia mo se faailoga. Sa musu Iesu ma sa Ia aoao atu Ona soo ina ia faaeteete i le mataupu a le au Faresaio, o lea mataupu e taunuu i le tauaso faaleagaga.

Mareko 8:22–26

Ua faamalolo auauai e Iesu se Tagata Tauaso

Faamatala na tuua e Iesu ma Ona soo le nuu o Tekapoli ae o atu i se mea e igoa o Petesaita. Ina ua latou taunuu atu iina, sa aumaia i le Faaola se tagata tauaso e faamalolo ai.

Valaaulia ni nai tagata e feauaua’i i le faitauina leotele mai o le Mareko 8:22–26. Fai atu i le vasega e mulimuli i le faitauga, ma vaavaai pe na faapefea ona faamalolo e le Faaola le tagata tauaso.

• O le a le mea na tupu ina ua uma ona tuu atu muamua e le Faaola Ona lima i luga o le tagata tauaso? (Atonu e manaomia ona e faamatala atu o le fasifuaitau, “Ua ou iloa atu tagata ua faapei o laau” [fuaiupu 24e ta’u mai ai ua mafai e le tagata tauaso ona vaai, ae e le o manino.)

• O le a le mea na tupu ina ua uma ona tuu e le Faaola Ona aao i luga o le tagata i le taimi lona lua?

Ia saunia ni kopi o le lauga lenei a Elder Bruce R. McConkie o le Korama a Aposetolo e Toasefululua, ma fai i se tasi e faitau mai leotele. Fautuaina le vasega e mulimuli ai, ma vaavaai mo mafuaaga atonu na faamalolo auauai ai e Iesu le tagata, pe i ni vaega.

“E tulagaese lenei vavega; na pau lea o le taimi ua tusi faamaumauina na faamalolo auauai ai e Iesu se tagata. Atonu na mulimuli lo tatou Alii i lenei faiga e faamalosia ai le faatuatua vaivai ae ua tuputupu ae o le tagata tauaso. E ono foliga mai o taimi faasolosolo mai o le fesootaiga faaletino ma Iesu sa iai le aafiaga o le faaopoopo atu o le faamoemoe, mautinoa, ma le faatuatua i le tagata tauaso. O Iesu lava ia (1) na taitaia le lima o le tagata tauaso mai le aai, (2) faaaogaina lona lava feanuga i mata o le tauaso, (3) faatinoina le sauniga o le faaee atu o lima, ma le (4) tuuina ona lima faalua i luga o mata o le tagata.

“O le mea moni o le ala na faatino ai lenei faamalologa ua aoao mai ai e ao i tagata ona sailia le alofa tunoa faamalolo o le Alii ma lo latou malosi ma le faatuatua, e ui ua na o se vaega o le faamalologa e lava ai, peitai, pe a maea ona maua, ona mafai lea ona latou maua le faamautinoaga faaopoopo ma le faatuatua e faaatoatoa ai ma manuia uma ai. E tele foi ina faamaloloina tagata mai o latou toatuga faaleagaga e auauai, o lea laasaga ma lea laasaga a o latou faaogatusaina o latou olaga ma fuafuaga ma faamoemoega o le Atua”(Doctrinal New Testament Commentary, 1:379–80).

• E mafai faapefea e le faamalologa ona faatele auauai ai le faatuatua o se tasi ia Iesu Keriso?

• Aisea e taua ai ona malamalama faapea o nisi faamanuiaga, e pei o le mauaina o se molimau i le talalelei pe o le mauaina o le faamalologa faaletino po o le faaleagaga, e tele ina oo malie mai pe i ni laasaga, nai lo le oo mai vave pe i le taimi e tasi?

Mareko 8:27–38

Ua molimau atu Peteru o Iesu o le Keriso.

Valaaulia se tagata e faitau leotele le Mareko 8:27 Fai atu i le vasega e mulimuli i le faitauga, ma vaavaai mo le fesili na fesili ai le Faaola i Ona soo. Valaaulia le vasega e lipoti mai mea ua latou mauaina. Fai i le vasega e toe mafaufau pe na faapefea ona tali atu Peteru i lenei fesili, e pei ona tusia i le Mataio 16:16 (o le fuaiupu lenei o se vaega o se mau tauloto). Afai e le mafai ona latou manatua, valaaulia se tagata e faitau leotele le Mareko 8:29 (o le fuaiupu lenei o loo aofia ai le tali a Peteru).

Otooto le Mareko 8:30–38i le faamatala atu na ta’u atu e le Faaola i Ona soo e aua nei faasalalauina Lona faasinomaga o le Keriso, po o le Mesia. Na amata foi ona ia amata aoao atu i latou e uiga i Lona mafatiaga ma le maliu o loo lupe.

Faaiu le lesona e ala i le valaaulia o le vasega e molimau atu i upumoni sa latou aoaoina mai mau sa latou suesueina i le lesona lenei.

Tala ma Faamatalaga o Talaaga

Mareko 7:11. O Le a Le “Kopano”?

Na faamatala e Elder Bruce R. McConkie o le Korama a Aposetolo e Toasefululua le uiga o le “Kopano” ma le mafuaaga na tausalaina ai e le Faaola le ala na faaaoga ai e le au Faresaio ma le au tusiupu lenei faiga:

“O le ata lenei o loo valiina e Iesu: O matua, atonu ua loa le soifua ma ua vaivai, ua fiaaai, ua le lavalava, ma leai ni mea e nonofo ai. … Ae e i ai a latou fanau—o fanau ua manuia ma tu lelei. … E moni e lava mea mo tagata uma ma mea e faaleoleo. Ae e leai, fai mai le fanau: ‘Ua kopano lea.’ O lona uiga: “Ua matou tuuto atu i faamoemoega paia. O outou, o o matou matua, e mafai ona maalilili ma fiaaai ma leai ni mea e nonofo ai; e le avanoa a matou meatotino e fesoasoani atu ai ia te outou. E tele lo matou naunau atu i le Alii, ma ua tuuto atu a matou meatotino ia te ia; ma e le mafai ona matou solia a matou tautoga.’

“Po o le: ‘Ua kopano ia; ua ou tauto atu o le a tuuto atu a’u meatotino i faamoemoega paia, ma e ui e mafai ona tou faaaogaina i lo’u olaga atoa, o le a leai lava se mea e te maua ona o la’u tautoga.’

“‘… E sili atu ona taua lo’u tausia o la’u tautoga nai lo lo’u faataunuuina o la’u matafaioi e lagolagoina o’u matua. O uputuu tuutaliga a toeaina ua sili atu lea i lo le tulafono paia na tusia e Mose.’

“E foliga mai e faigata ona talitonu faapea e mafai ona gotouga ifo se talitonuga faalelotu i lena loloto, ma o tagata o e sa tautino mai e auauna atu ia Ieova o o latou tama, e mafai lava ona faigofie ona latou faamamaina o latou lotofuatia ifo ma maua e i latou lava le saolotoga mai le tausiga o lana tulafono. Ua faaigoa lava i latou e Iesu o tagata pepelo ma ua ta’u atu e le aoga a latou tapuaiga” (The Mortal Messiah, 4 vols. [1979–81], 2:407–8).

Mareko 8:1–9. “Ou te alofa atu i le motu o tagata”

Na aoao mai e Peresitene Thomas S. Monson e uiga i le gaoioi e fesoasoani atu i isi:

“E i ai lava manaoga o isi, ma e mafai e i tatou uma taitoatasi ona faia se mea e fesoasoani ai i se tasi. …

“O’u uso e ma tuafafine, ua siomia i tatou e i latou e manaomia lo tatou gauai atu, la tatou faamalosiau atu, la tatou lagolago, la tatou faamafanafana, lo tatou agalelei—pe o nisi o le aiga, uo, paaga, po o ni tagata ese. O i tatou o aao o le Alii i luga o le fogaeleele, faatasi ai ma le poloaiga e auauna atu ma ia sii ae Ana fanau. O loo faalagolago mai o Ia i luga o i tatou taitoatasi” (“O Le a Se Mea Ua Ou Faia Mo Se Tasi i le Aso?” Ensign po o le Liahona, Nov. 2009, 85, 86).

Manatu Faaopoopo Faafaiaoga

Mareko 8:1–9. Iloaina ma fesoasoani e faataunuu manaoga o isi

Ina ia fesoasoani i le vasega ia malamalama i le mataupu faavae faapea e mafai ona tatou mulimuli i le faataitaiga a le Faaola e ala i le iloaina o manaoga o isi ona fesoasoani lea e faataunuu na manaoga, valaaulia se tasi o le vasega e faitau leotele le saunoaga lea a Sister Linda K. Burton, peresitene aoao o le Aualofa. Fai i le vasega e faalogologo pe na faapefea e le tamaitai talavou i lenei tala ona faaaoga lenei mataupu faavae:

“E i ai se tamaitai talavou musuia e igoa ia Alesania na matauina lona tausoga, o Matisone, sa le mafai ona faamae’aina mea e manaomia mo lana lava Alualu i Luma o le Tagata lava Ia, ona e matuia le aafia o lona mafaufau i lona ma’i. Sa faapotopoto e Alesania ia tamaitai talavou o lana uarota, talanoa ma o latou taitai, ma fuafua ai e faia se mea e fesoasoani ai ia Mati i mea e le mafai ona faia e ia lava. Sa tofu faamaea e tamaitai talavou taitoatasi se vaega o gaoioiga ma galuega faatino o le Alualu i Luma o le Tagata Lava Ia ma sui ai ia Mati ia mafai ona maua ai ia lana lava asoa”(“Muamua Matau, Ona Auauna Atu Ai Lea,” Ensign po o leLiahona, Nov. 2012, 79).

• Na faapefea ona mulimuli ia Alesania i le faataitaiga a le Faaola?

• E te manatu aisea na mafai ai e Alesania ona iloa se avanoa e fesoasoani ai i se tasi e manaomia le fesoasoani?

Nai lo le valaaulia o se tagata e faitauina le tala e uiga ia Alesania ma Mati, e mafai ona e faaalia le vitio “For Madison” (4:08), o loo maua i le LDS.org.

Mareko 8:22–26. O faamanuiaga mai le Faaola e mafai ona o’o auauai mai ia i tatou pe i laasaga

A uma ona talanoaina e le vasega le mea na tupu ina ua uma ona tuu e le Faaola Ona aao i luga o le tagata tauaso mo le taimi lona lua, fesili:

• Mai le faataitaiga o le ala na faamalolo ai e le Faaola le tagata tauaso, o le a se mea e mafai ona tatou aoaoina e uiga i le ala e oo mai ai faamanuiaga i nisi taimi ia i tatou? (E mafai e le vasega ona faailoa mai ni upumoni eseese, ae ia mautinoa e manino o faamanuiaga mai le Faaola e mafai ona o’o auauai mai ia i tatou pe i laasaga foi. Tusi lenei mataupu faavae i le laupapa.)

• O a ni aoga o le mauaina auauai o nisi faamanuiaga pe i laasaga, nai lo le maua vave mai pe i le taimi e tasi?

Ina ia fesoasoani ia malamalama le vasega o se tasi ala e mafai ona latou faaaoga i lenei upumoni, valaaulia i latou e mafaufau faapea e i ai se uo o se tagata o le Ekalesia ua masua atu ia i latou na te le o mautinoa pe moni le Ekalesia. E talitonu o ia e i ai sana molimau i ni nai mea o le talalelei, ae e le o mautinoa e uiga i isi. Vaevae le vasega i paga, ma fai i ai e talanoaina ma a latou paga pe faapefea ona latou tali atu i lenei uo. Fautuaina i latou e mafaufau pe mafai faapefea ona latou faaaogaina le tala o i le Mareko 8:22–26ma le mataupu faavae o i luga o le laupapa e fesoasoani ai i lenei uo.

A uma ua lava se taimi, valaaulia ia paga e lipoti mai i le vasega mea sa latou talanoaina. Ona fesili atu lea:

• Aisea e te manatu ai o le mauaina auauai o faamanuiaga a le Faaola e mafai ona faateleina ai le faatuatua o se tasi ia Iesu Keriso?

• Aisea e taua ai le malamalama o nisi faamanuiaga e pei o le mauaina o se molimau i le talalelei po o le mauaina o le faamalologa faaletino po o le faaleagaga, e tele ina oo auauai mai pe i laasaga, nai lo le maua vave po o le aumai uma i le taimi e tasi?

• O faapefea ona e vaaia o aoga lenei upumoni i lou lava olaga?