Galuega 13–19 (Iunite 19)

Sauniuniga o Anomea mo le Faiaoga o Suesuega e Fai i le Aiga

Aotelega o Lesona o Suesuega e Fai i le Aiga i Aso Taitasi

O aotelega o loo i lalo o aoaoga faavae ma mataupu faavae ua aoaoina e tamaiti aoga a o latou suesue i le Galuega 13–19 (iunite 19) e lei fuafuaina o se vaega e aoaoina o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tagata aoga.

Aso 1 (Galuega 13–14)

A o suesue le vasega e uiga i fegalegaleaiga a Paulo ma Panapa ma se faataulaitu, sa la aoaoina ai e matua sili mamao atu le mana o le Atua nai lo le mana o le tiapolo. A o aoao atu Paulo e uiga i le Faaola ma puapuaga, na faailoa mai e le vasega mataupu faavae nei: E mafai ona faamagaloina a tatou agasala ma taumamaina e ala i le Togiola a Iesu Keriso. A o tatou pasia ma le faatuatua ia puapuaga, o le a tatou saunia e ulu atu i le malo selesitila.

Aso 2 (Galuega 15)

Ao suesue e le vasega le ala na faia faatasi ai e taitai o le Ekalesia ni faaiuga, sa latou iloa ai e mafai ona tatou iloa le finagalo o le Alii e ala mai i Ana perofeta soifua ma aposetolo, e ala i le suesueina o tusitusiga paia, ma ala mai i musumusuga mai le Agaga Paia. Sa la iloaina ai foi e ala i le fefautuaai faatasi ma le sailia o faaaliga mai le Atua, e maua ai e taitai o le Ekalesia ia musumusuga e uiga i faafitauli faigata.

Aso 3 (Galuega 16–17)

Mai i le tala i le misiona a Paulo ma Sila, na aoao mai ai e le vasega upumoni nei: A o tatou mulimuli i faaaliga e tuuina mai e le Atua, e mafai ona taialaina i tatou ia i latou o e ua saunia e talia le talalelei. O le faaolataga e manaomia ai le talitonu ia Iesu Keriso, ma tatou te faaalia lo tatou talitonuga ia te Ia e ala i le papatisoina. Afai tatou te talia upu a auauna a le Atua ma le fiafia tele, ma saili i tusitusiga paia i aso taitasi, ona faamalosia lea o lo tatou talitonuga i a latou upu.

Aso 4 (Galuega 18–19)

E ala i le faamautinoaga a le Alii ia Paulo ina ua ia lagona le faanoanoa i tagata o Korinito, sa aoao ai e le vasega afai tatou te ola agavaa, o le a faatasi le Alii ma i tatou a o tatou faia Lana galuega. A o latou suesue e uiga i aoaoga a Paulo ma le faamalologa i Efeso, sa aoao ai e le vasega mea nei: Ina ia aoga, e tatau ona faatinoina le papatisoga e se auauna ua faatagaina a le Atua. Ina ia atoa le papatisoga, e tatau ona o faatasi ma le taliaina o le Agaga Paia. O se tasi auala e faaalia ai e le Atua Lona mana o le ala lea i Ana auauna ua faatagaina. O le tautau atu ma le lafoaia o faiga faatiapolo, tatou te faaalia ai lo tatou faatuatua ia Iesu Keriso.

Folasaga

I Areopako i Atenai, na aoao atu ai e Paulo ia tagata e uiga i le natura o le Atua. E mafai ona fesoasoani lenei lesona e malamalama ai le vasega i nisi o uiga o le Tama Faalelagi ma lo latou sootaga ma Ia.

Fautuaga mo le Aoaoina Atu

Galuega 17:16–34

Ua folafola atu Paulo i Areopako

Valaaulia le vasega e sue i Ata o le Tusi Paia, nu. 29, “Atenai,” i le faaopoopoga i le Tusi Paia. Tau i ai o le ata lea o loo faaalia ai se tasi o malumalu i Atenai sa faaaoga e tapuai ai i atua pepelo. I totonu o malumalu sa i ai faatagata o nei atua na faia e tagata. O fafo sa iai fatafaitaulaga ia sa osi ai i luga taulaga i nei atua pepelo.

Faamatala ina ia puipuia Paulo mai se vaega taufaaleaga o Iutaia i Tesalonia, sa auina atu o ia e tagata o le Ekalesia i Atenai (tagai Galuega 17:13–15). I le galuega 17:16–21 ua tatou faitau ai e faapea sa matua popole ia Paulo i le ifo i tupua i Atenai, ma sa ia aoao atu i totonu o sunako ma nofoaga faitele iina. Ona valaaulia lea o Paulo e le au faimanatu e faamatala atu ia i latou lana “mataupu fou” Galuega 17:19 i le fono faatonu, lea sa fono i Areopako.

Valaaulia se tamaitiiti aoga e faitau leotele le Galuega 17:22–23. Fai i le vasega e mulimuli ai, ma vaavaai po o le a le mea na matau e Paulo i se tasi o fatafaitaulaga i Atenai.

O le a se mea na vaai i ai Paulo i luga o se tasi o fatafaitaulaga i Atenai?

Faamatala o le Galuega 17:22 o loo tusia ai na faaviivii atu Paulo i tagata Atenai i lona fai atu ua latou “sili lo latou tapuai i atua,” o lona uiga ua latou “faaeteete i mea paia” (Galuega 17:22, vaefaamatalaga a). O le fatafaitaulaga “mo le aua e le iloa” (Galuega 17:23) o le taumafaiga o tagata Atenai e faamalie se atua e le mailoa po o se isi lava atua e le o iloa se igoa. Ua manino lava sa latou lei mananao e faatiga pe le amanaiaina soo se atua.

Faasino i le fuaiupu mulimuli o le Galuega 17:23 ona fesili lea:

Aisea na ta’ua ai e Paulo lenei fatafaitaulaga “mo le atua e le iloa”? (Sa ia faaaogaina e folasia atu ai le manatu i le Atua moni, le Tama Faalelagi, le Atua sa latou lei iloa.)

Vaevae tamaiti i paga po o ni vaega laiti. Valaaulia vaega taitasi e sailiili le Galuega 17:24–31 mo ni upumoni uma e mafai ona latou maua e uiga i le Atua o le sa lei iloa e tagata o Atenai. A o latou suesue, lisi numera o fuaiupu taitasi (24--31) i le laupapa.

A uma ua lava se taimi valaaulia ni tagata e o mai i le laupapa e tusi se upumoni sa latou maua i autafa o le numera o le fuaiupu na latou maua ai. (Ina ia fesoasoani i le vasega e faailoa mai se upumoni i le Galuega 17:27, atonu e manaomia ona e faasino i latou i le Faaliliuga a Iosefa Samita i le Galuega 17:27, vaefaamatalaga e.)

E mafai ona fautuaina tamaiti e maka ia upumoni taitasi ia latou tusi paia. O nisi o upumoni na latou lisia i luga o le laupapa e mafai ona aofia ai mea nei:

Fuaiupu 24: O le Atua na faia le lalolagi.
Fuaiupu 25: O loo foai mai e le Atua le ola i mea uma lava.
Fuaiupu 26: E pulea e le Atua le ola uma.
Fuaiupu 27: Afai tatou te loto e saili le Atua, o le a tatou iloa e le o mamao o Ia ma i tatou.
Fuaiupu 28: O fanau i tatou a le Atua.
Fuaiupu 29: Na faia i tatou i le faatusa o le Atua.
Fuaiupu 30: Ua poloaiina e le Atua tagata uma e salamo.
Fuaiupu 31: O le a faamasinoina i tatou e le Atua; O le a faatuina e le Atua tagata uma mai le oti.

Valaaulia le vasega e filifili se upumoni se tasi o i le laupapa e taua ia i latou. Fai i nisi o i latou e faasoa mai po o le fea upumoni sa latou filifilia ma pe aisea e taua ai ia i latou.

Faasino i le upumoni o i le Galuega 17:28, “O fanau i tatou a le Atua.”

O le a le uiga o le avea ma “fanau” a le Atua? (O i tatou o fanau agaga a le Tama Faalelagi.)
Aisea e matuai taua ai le malamalama i lenei aoaoga faavae? (E mafai ona fesoasoani tatou te iloa ai lo tatou taua e le ua i le Tama Faalelagi ma lo tatou gafatia e avea ai faapei o Ia.)
O a faafitauli po o fenumiaiga e mafai ona tulai mai i le le malamalama i lenei aoaoga faavae?

Afai e mafai, tuu atu i tagata o le vasega se kopi o le saunoaga lenei a Elder Dallin H. Oaks o le Korama a Aposetolo e Toasefululua. Valaaulia se tamaitiiti e faitau leotele. Fai i le vasega e faalogologo pe vaavaai pe aisea e tatau ai ona tatou manatua e vaai muamua ia i tatou lava o fanau a le Atua.

“Ia faaeteete i le ala tou te faauiga ai outou lava. Aua le faauigaina outou pe faamatala oe lava i ni uiga auaumama e le tumau. Na pau le uiga auaumama e tasie tatau ona faauigaina ai i tatou o le o i tatou o se atalii po o se afafine o le Atua. O lena mea moni e silisili atu i lo isi lava uiga, e aofia ai le lanu, galuega, vaaiga faaletino, mamalu, e oo lava i sootaga faalelotu” (“How to Define Yourself,” New Era, June 2013, 48).

Aisea e taua ai le muai manatua o i tatou o fanau a le Atua?

Faasino i le upumoni o i le Galuega 17:27, “Afai tatou te loto e saili i le Atua, o le a tatou iloa e le o mamao o Ia ma i tatou.”

O a ni auala e mafai ona tatou sailia ai ia iloa ma latalata atili i le Atua?
E faapefea e le malamalama i lo tatou sootaga ma le Atua ona aafia ai lo tatou naunau e saili o Ia?
O le a se taimi na e lagonaina ai le Tama Faalelagi i ou autafa?

Aotele le Galuega 17:32–34 i le faamatala atu e faapea sa filogia lagona o Atenai i le ta’ua ai e Paulo o “le toetutu o e ua oti” (Galuega 17:32). O nisi o i latou sa tauemu ia Paulo, o isi sa mananao e faalogo atili, a o nisi sa talitonu.

Atonu e te manao e molimau atu e mafai ona iloa ma malamalama le vasega i le Atua, tusa lava pe le iloa e le toatele o tagata. Valaaulia le vasega e tusi le Mo Le Atua e Iloai se fasipepa po o se kata ma lisi ai ni auala o le a latou sailia ai ma atiina ae se sootaga ma le Atua. Fautuaina i latou e tuu lenei pepa i se mea o le a faamanatu atu ai ia i latou a latou sini.

Le Isi Iunite (Galuega 20–Roma 7)

Faamatala i le vasega e faapea o le isi iunite o le a latou maua ai tali i fesili “O ai na faatu mai e Paulo mai le oti?” ma le “O a tulaga na siosiomia ai le oti o lenei tagata?” Valaaulia i latou e manatu e faapea sa puefaapagota seseina i latou, paulia i se motu, ona u lea e se gata. Fesili pe o le a se mea e mafai ona latou aoao mai i ia faigata. Fai i le vasega e vaavaai mo se tupu na fai atu ia Paulo i le taimi o se faamasinoga, “o se mea itiiti ona e faaliliuina lea o au e fai ma Kerisiano” Galuega 26:28. Fautuaina i latou a o latou suesue i Galuega o totoe a Aposetolo, ia mataitu pe mafai faapefea ona fesoasoani luitau ia i tatou e latalata atu ai i le Faaola. Tau i ai o le a latou faitauina foi se vaega o se tusi na tusia e le Aposetolo o Paulo i tagata o le Ekalesia i Roma.