Folasaga i le Tusi e Lua a Paulo i Korinito

Aisea e suesue ai lenei tusi?

E tulaga ese le Tusi Lona Lua a Paulo i Korinito ona o ona autu o le faamafanafanaga i le lotolotoi o mafatiaga, o le malosiaga i le lotolotoi o le vaivai (e pei ona faaaoao mai e Paulo lava ia), ma le iloatinoina o aoao moni mai aoao pepelo. O le faataitaiga ma aoaoga a Paulo o loo tusia i le 2 Korinito e mafai ona musuia ai le vasega e tumau faamaoni ma faatuatua i feagaiga o le faavavau sa latou osia ma le Atua, o le Tama e Faavavau, tusa lava po o a tulaga.

O ai na tusiaina lenei tusi?

O Paulo na tusia le Tusi Lona Lua i Korinito (tagai 2 Korinito 1:1).

O anafea ma o fea foi na tusia ai lenei tusi?

E lei leva na uma ona tusia e Paulo le 1 Korinito, ae tulai mai se feteenaiga i Efeso e faasaga i ana aoaoga (tagai Galuega 19:23–41), ma sa ia tuua mo Maketonia (tagai Galuega 20:1; 2 Korinito 2:13; 7:5). E foliga mai a o i ai o ia i Maketonia sa ia tusia le 2 Korinito, pe tusa o le T.A. 55–57 (tagai Bible Dictionary, “Pauline Epistles”; Taiala i Tusitusiga Paia, “Pauline Epistles,” scriptures.lds.org).

O ai na faatatau i ai le tusiaina o lenei tusi, ma pe aisea foi?

O le tusi e 2 Korinito na tusia i tagata o le Ekalesia i Korinito. Ao i ai Paulo i Maketonia i le taimi o lana malaga lona tolu faafaifeautalai, na aumaia ia te ia e Tito se tala mai Korinito faapea o se tusi na ia auina atu muamua na talia lelei e le Au Paia iina (tagai 2 Korinito 7:6–13). Sa agaigai i luma le lala i Korinito, ae sa aoaoina foi e Paulo e uiga i aoao pepelo iina o e sa faapiopioina mataupu mama a Keriso. I se taimi ina ua mavae le uluai asiasiga a Paulo i Korinito, ma atonu ma se asiasiga lona lua (2 Korinito 1:15–16), i le taimi e foliga mai na aoai ai e Paulo nisi o le Au Paia (tagai 2 Korinito 2:1; 12:21), na o mai ai ni e talai mai le itu o Ierusalema i Korinito ma amata ona aoao atu le Au Paia e faapea ua tatau ona latou faaaogaina faiga faa-Iutaia, e ese mai aoaoga a Paulo. O le tele o le 2 Korinito o loo tautalagia ai ia faafitauli na afua mai i nei aoao pepelo.

O le tusi a Paulo na faatuatusi atu ia i latou o se sa mananao atili i ana upu (tagai 2 Korinito 1–9) ma i latou o e sa faatuatuai ona latou taliaina ana aoaoga (tagai 2 Korinito 10–13). I le tulaga lautele, o le anotusi o le 2 Korinito ua faaalia mai ai faamoemoega o lenei tusi:

Ina ia momoli atu ai le agaga faafetai ma faamalolosia le Au Paia o e sa talia lelei lana tusi muamua.
Ina ia lapataia ai aoao pepelo o e sa faapiopioina mataupu mama a Keriso
Ina ia puipuia lona lava tagata ma le pule o se Aposetolo a Iesu Keriso (tagai 2 Korinito 10–13)
Ina ia fautuaina le Au Paia i Korinito e faia ni saofaga lima foai tau tupe e tausia ai le Au Paia le tagolima i Ierusalema (tagai 2 Korinito 8–9)

O a nisi o vaaiga uigaese o lenei tusi?

E ui o le tele o tusi a Paulo e taulai i le aoaoga faavae, ae o le tele lava o lenei tusi e faamamafa ai le sootaga a Paulo ma le Au Paia i Korinito ma lona alofa ma le popole mo i latou. E ui ina mausali Paulo i lona tetee atu i faitioga, o le 2 Korinito atoa tatou te vaaia ai o ia o se taitai perisitua agamalu e manatu mo le fiafia ma le soifua manuia o le Au Paia. Na faasoa mai foi e Paulo i nisi o faamatalaga patino o lona soifuaga ma tusia ai e uiga i le “mea matuitui o le tino” (2 Korinito 12:7).

I se aafiaga paia o loo tusia i le 2 Korinito 12:2–4, sa faamatalaina ai e Paulo o ia lava o “se tagata o Keriso” o le sa “segia o ia i le lagi tua tolu,” lea na ia vaai ai ma faalogo i upu e le matautaua. O lenei faaaliga, faatasi ai ma lana faamatalaga faaleaoaoga faavae muamua e faatatau i eseesega o mamalu mo tino toetutu (tagai 1 Korinito 15:35–44), e mafai ona vaaia o se faatusatusaga faatusi paia i le faaaliga o loo tusia i le Mataupu Faavae ma Feagaiga 76.

1. Otootoga

2 Korinito 1–5 o loo molimau atu ai Paulo e faamafanafanaina e le Atua Ana fanau i o latou mafatiaga uma lava. Ua luiina le Au Paia ia alolofa ma faamagalo le tasi i le isi. O le talalelei ma galuega a le Agaga o le Alii e silia atu ona viia nai lo le mataitusi o le tulafono a Mose. Ua fautuaina e Paulo le aufaitau i o latou taimi o mafatiaga ma faamanatu atu ia i latou e uiga i le natura e faavavau o le alofa ma le mamalu o le Atua. Ua fesoasoani o ia ia malamalama le au faitau i le manaomia ona latou faalelei ma le Atua e ala i le Togiola a Iesu Keriso.

2 Korinito 6–13 Ao feagai ai ma faitioga ma le tetee mai aoao pepelo, na puipuia e Paulo lona faamaoni o se auauna a le Alii ma valaaulia lana aufaitau ina ia vavaeese i latou mai le lalolagi. Ua ia aoao atu e uiga i le “tiga e tusa i le Atua” (tagai 2 Korinito 7:10). Ua faafetai atu Paulo i le Au Paia i Korinito mo a latou saofaga i e matitiva i Ierusalema ma fautuaina i latou e faaauau pea ona foai atu ma le matamau. Ua ia tautala malosi e faasaga i “aposetolo pepelo” (2 Korinito 11:13). Ua vivii atu Paulo i le Alii ma faasoa atu faamatalaga patino i ona puapuaga ma le faatuatua ia Iesu Keriso. Ua ia tusia lana faaaliga i le lagi tua tolu. Ua valaaulia e le Au Paia e suesue ifo ia i latou ma faamaonia i latou lava i le faamaoni.