Lesona 117

2 Korinito 10–13

Folasaga

Na aoao mai le Aposetolo o Paulo e uiga i le taua faaleagaga o loo punouai ai le fanau a le Atua. Sa ia puipuia o ia lava mai ia i latou o e sa tetee ia te ia. Sa ia toe faamatalaina le ala na segia ai o ia i le lagi tuatolu ma faamatala le ala na faamaonia ai ona vaivaiga e avea ma se faamanuiaga. A o lei faaiuina lana tusi, sa apoapoai atu Paulo i le Au Paia i Korinito e suesue ia i latou lava ma faamaonia lo latou faamaoni.

Fautuaga mo le Aoaoina Atu

2 Korinito 10–11

Ua tusi Paulo e uiga i le taua faaleagaga, taufaasese o Satani, ma ona lava puapuaga

Tusi le upu taua i luga o le laupapa.

• O a ni auala o tatou punouai ai i le taua faasaga ia Satani?

• O a ni taua aupito sili ona faigata o tatou feagai ai i lenei taua faaleagaga?

Valaaulia se tamaitiiti aoga e faitau leotele le 2 Korinito 10:3–6. Fai i le vasega e mulimuli ai, ma vaavaai poo a mea na aoao mai e Paulo e tatau ona tatou faia ina ia manuia i lenei taua ma Satani.

• O a mea e tatau ona tatou fai ina ia manuia ai i lenei taua ma Satani?

• O le a sou manatu o le a le uiga o le “faatoilaloina manatu uma i le anaana ia Keriso”? (fuaiupu 5).

• O le a le mataupu faavae e mafai ona tatou aoao mai le fuaiupu 5e uiga i le ala e manuia ai i le taua ma Satani? (A uma ona tali mai le vasega, tusi le upumoni lea i le laupapa: A o tatou puleaina o tatou mafaufauga i le usiusitai ia Iesu Keriso, o le a sili atu ona manuia i tatou i le taua ma Satani.

• O le a se mea e mafai ona tatou faia e pulea ai o tatou mafaufauga? (Faatasi ai ma isi mea, e mafai ona tatou tatalo, tauloto ia mau, ma usu pe tauloto ia viiga.)

Atonu e te manao e faasoa mai se aafiaga e faapupula mai ai pe na faapefea e le puleaina o ou mafaufauga i le usiusitai i le Faaola ona fesoasoani ia te oe e faatoilalo ai faatosinaga a Satani. Fuafua e valaaulia le vasega e faasoa mai foi o latou lava aafiaga. Valaaulia le vasega e faatu se sini e pulea atili o latou mafaufauga i le usiusitai i le Faaola.

Valaaulia se tamaitiiti aoga e faitau leotele le aotelega lenei.

I le 2 Korinito 10:7–18ua tatou aoao ai na vivii atu Paulo i le Alii ma sa aoao atu e le tatau ona faaaoga ona lava vaivaiga e tauamiotonuina ai le le faalogo atu ia te ia. I le 2 Korinito 11ua tatou faitau ai na taua e Paulo ni auala o loo saili ai Satani e faafememeai o tatou mafaufauga ma taitai ese atu ai i tatou mai ia Iesu Keriso, e aofia ai le faaaoga o Keriso pepelo ma aposetolo pepelo. Sa toe faamatala e Paulo le mafatiaga na ia onosaia o se Aposetolo moni a le Faaola.

2 Korinito 12

Ua toe faamatala e Paulo le segia o ia i le lagi tuatolu ma aoao mai pe mafai faapefea e le faailoa atu o o tatou vaivaiga ona tatou manuia ai.

Aumai se mea matuituia pe tusi seata i le laupapa e pei o lea na faaalia. Valaaulia le vasega e mafaufau i taimi na tuia ai i se mea matuituia.

• O a ni auala e mafai ai e mea matuituia ona faafaigata le olaga?

Faamatala na faaaoga e Paulo le manatu faavae o se mea matuituia e faatusa ai i se tofotofoga po o se vaivaiga na ia oo i ai.

Valaaulia se tagata o le vasega e faitau leotele le faamatalaga lenei a Elder Dallin H. Oaks o le Korama a Aposetolo e Toasefululua. Fai i le vasega e faalogologo ma mafaufau pe o a ituaiga tofotofoga po o vaivaiga sa feagai ma i latou po o e latou te alolofa i ai:

“O nisi ua mou atu e pele ona o le oti pe o loo tausia se tasi e le atoatoa le malosi. O nisi o loo faamanualia ona o le tetea. … O isi o loo i ai ni le atoatoa i le tino po o le mafaufau. O nisi o loo tauivi ma le tosina atu i tagata o lana lava itupa. O isi o loo i ai lagona matautia o le lotovaivai po o le le atoatoa. Po o le a lava le tulaga, e toatele lava o loo mafatia i avega” (“Na te Faamaloloina i latou e Mafatia i Avega,” Ensign po o le Liahona, Nov. 2006, 6).

Valaaulia le vasega e vaavaai mo upumoni a o latou suesueina le 2 Korinito 12 ia e mafai ona fesoasoani ia i latou pe a feagai ma tofotofoga ma vaivaiga.

Valaaulia se tamaitiiti aoga e faitau leotele le 2 Korinito 12:1–4. Fai atu i le vasega e mulimuli i le faitauga, ma vaavaai mo se faaaliga na maua e Paulo. (Faamatala o nei fuaiupu o loo faasino ia Paulo i le tagata lona tolu.)

• O le a sou manatu o le a le uiga faapea o Paulo na “segia i le lagi tuatolu”? (fuaiupu 2). (Sa ia maua se faaaliga o le malo selesitila.)

Faamatala o le fasifuaitau “pe na i le tino … pe lei i le tino, ou te le iloa”(fuaiupu 2) o lona uiga e lei iloa e Paulo pe na aveina o ia i le malo selesitila pe sa ia vaai i se faaaliga o le malo selesitila.

Valaaulia se tamaitiiti aoga e faitau leotele le 2 Korinito 12:5–6. Fai atu i le vasega e mulimuli i le faitauga, ma vaavaai pe na faapefea ona tali atu Paulo i lenei faaaliga.

• Na faapefea ona tali atu Paulo i lenei faaaliga?

• O le a le mea na popole ai Paulo e ono tupu pe a viia o ia lava? (Sa popole Paulo nei soona maualuga ia mafaufauga o nisi ia te ia a o i ai pea lava ana tauiviga faaletino e tatau ona faatoilaloina)

Valaaulia se tamaitiiti aoga e faitau leotele le 2 Korinito 12:7–8. Fai atu i le vasega e mulimuli i le faitauga, ma vaavaai pe na faapefea ona fesoasoani le Alii ia faatumauina le lotomaualalo o Paulo. Atonu e te manao e faamatala o le “faamaualugaina i le silisili ese” (fuaiupu 7) o lona uiga o le faasausili.

• Na faapefea ona fesoasoani le Alii ia Paulo ia tumau i le lotomaualalo?

• Na faafia ona tatalo Paulo ina ia aveese lenei “mea matuitui i le tino”?

Tau i ai e ui i tatalo a Paulo, e foliga mai na filifili le Alii e le aveesea “mea matuitui i le tino” o Paulo.

• O le a se mea e mafai ona tatou aoao mai ia Paulo e uiga i le mafuaaga e ono tuu ai e le Alii i tatou e feagai ma vaivaiga ma tofotofoga? (E ono faaaoga e le vasega ni upu eseese, ae ia mautinoa latou te faailoa mai upumoni nei: Atonu e faatagaina i tatou e le Alii e feagai ma vaivaiga ma tofotofoga ina ia mafai ai ona tatou aoao ia lotomaualalo. Tusi lenei upumoni i luga o le laupapa.)

Valaaulia le vasega e faitau lemu le 2 Korinito 12:9–10 ma vaavaai mo upumoni na aoao e Paulo na fesoasoani ia te ia e onosaia ai ona vaivaiga. Fai i tagata o le vasega e tusi i a latou api o le vasega po o api talaaga mo le suesueina o tusitusiga paia, ia upumoni na latou faailoa maia.

• O a upumoni na aoao e Paulo na fesoasoani ia te ia e onosaia ai ona vaivaiga. E mafai ona faailoa mai e le vasega ni upumoni e pei o nei: Ua lava ma totoe le alofa tunoa o Iesu Keriso e faamalolosia ai i tatou i o tatou vaivaiga. E le aveesea pea e le Alii o tatou luitau, ae o le a Ia faamalolosia i tatou a o tatou onosaia ma le faamaoni.

Faamanatu i le vasega o le alofa tunoa o le “auala faalelagi o le fesoasoani po o le malosiaga” ua mafai ona o le Togiola a Iesu Keriso (Bible Dictionary, “Grace”).

• O le a le uiga o le alofa tunoa o le Faaola ua lava ma totoe e faamalolosia ai i tatou i o tatou vaivaiga? (E ala mai i le malosi tatou te maua mai le Faaola, e mafai ai ona tatou faia mea uma e poloai mai o Ia ia i tatou e fai.)

Valaaulia se tagata o le vasega e faitau leotele le faamatalaga lea mai ia Elder Dallin H. Oaks:

“O le mana faamalolo o le Alii o Iesu Keriso—e tusa pe aveeseina ai a tatou avega pe faamalosia ai i tatou ina ia onosaia ma ola faatasi ma i latou e pei o le Aposetolo o Paulo—o loo avanoa mo mafatiaga uma i le olaga faaletino” (“Na te Faamaloloina I Latou e Mafatia i Avega,” 8).2006, 6, 9).

• E mafai faapefea e upumoni sa tatou faailoa maia ifuaiupu 9–10ona fesoasoani ia i tatou a o tatou feagai ma vaivaiga ma tofotofoga?

• O anafea na faamalosia ai oe po o se tasi e te iloa e le Faaola? (Faamanatu i le vasega e aua nei faasoa maia se mea e le faalauaiteleina pe patino naua.) Na faapefea ona avea ma faamanuiaga ia te oe po o i latou lena aafiaga?

Valaaulia tagata o le vasega e molimau

E mafai na e uunaia tagata o le vasega e molimau i upumoni o le talalelei e ala i le fai atu o fesili e valaaulia ai i latou e faasoa mai o latou aafiaga ma talitonuga. A o molimau mai le vasega i upumoni o le talalelei, e tele ina mafai e le Agaga Paia ona taitai i latou i se molimau e loloto atu o mea lava ia latou te faailoa mai. E ala i le mana o le Agaga, e mafai ai foi e a latou upu ona faia se aafiaga taua i loto o o latou tupulaga.

2 Korinito 13

Ua apoapoai atu Paulo i le Au Paia e suesue ifo i latou lava ma ia faamaonia lo latou faamaoni

Faamanatu i le vasega sa i ai aoaoga pepelo i le Au Paia i Korinito o e sa luitauina Paulo ma lana pule o se Aposetolo.

• O a ni nai faataitaiga pe o faapefea e tagata i ona po nei ona luitauina i latou o e ua valaauina i tulaga taitai i le Ekalesia?

Valaaulia se tamaitiiti aoga e faitau leotele le 2 Korinito 13:3. Fai i le vasega e mulimuli ai, ma vaavaai mo mea na saili e tagata o le Ekalesia i Korinito ni faamaoniga.

• O a ni mea sa saili e tagata o le Ekalesia i Korinito ni faamaoniga?

Valaaulia se tamaitiiti aoga e faitau leotele le 2 Korinito 13:5–6. Fai i le vasega e mulimuli ai, ma vaavaai mo mea na apoapoai atu Paulo i le Au Paia i Korinito e fai nai lo le fesili pe na fetalai le Alii e ala ia te ia o se Aposetolo. Faamatala o le pepeloo se tagata fai mea piopio pe amio le mama.

• E tusa ai ma le fuaiupu 5, o le a le mea na manao Paulo i le Au Paia i Korinito e fai? (Atonu e te manao e fautuaina le vasega e maka ia veape o lesuesue, tofotofo, ma leiloa i le fuaiupu lea.)

• O le a le tala a Paulo i le mea e manaomia e nei Au Paia ona suesue e uiga ia i latou lava? (Faamatala [“i le faatuatua”fuaiupu 5]o lona uiga ia faamaoni i le Ekalesia a le Alii.)

• O le a le mataupu faavae e mafai ona tatou aoao mai nei fuaiupu e uiga i mea e tatau ona tatou fai nai lo le faitio i taitai o le Ekalesia? (E tatau i le vasega ona faailoa mai se mataupu faavae e pei o lenei: Nai lo le faitioina o taitai o le Ekalesia, e tatau i tagata o le Ekalesia ona suesue lo latou lava faamaoni.

Valaaulia se tamaitiiti aoga e faitau leotele le faamatalaga lenei mai i le Perofeta o Iosefa Samita:

“[A i ai se tagata] e tulai mai e tausalaina isi, saili masei i le Ekalesia, ma faapea mai ua le toe aoga, a o ia lava ia e amiotonu, ona iloa lea ma le mautinoa, o lena tagata ua i le alatanu i le liliuese; ma afai e le salamo, o le a liliuese lava, aua o loo soifua le Atua”Aoaoga a Peresitene o le Ekalesia: Iosefa Samita [2007], 318).

• O le a le mea e tupu pe a tatou faitioina o tatou taitai nai lo le suesue ifo i lo tatou lava faamaoni?

Ina ia fesoasoani i le vasega e suesue lo latou faamaoni ma o latou uiga faaalia i taitai o le Ekalesia, tuu atu ia i latou ni kopi o fesili nei. Tuu i le vasega se taimi ia lava e faitau ai ma tali lemu ia fesili.

Tusi lesona a le Faiaoga Seminare o le Feagaiga Fou—Lesona 117

1. I se fuafaatatau o le 1–10 (10 e atoa), o le a le lelei o lou mulimuli i fautuaga a taitai o le Ekalesia?

2. O le a se tulaga faatonuina e tasi na aoao mai e perofeta ma aposetolo e mafai ona e mulimuli atili ai ma le faamaoni?

3. I se fuafaatatau o le 1–10 (10 o avanoa uma e te maua), o le a le tele e te faaali atu ai lou lotofaafetai mo ou taitai o le Ekalesia, pe i le tagata po o tatalo?

4. O le a se mea e mafai ona e faia e faaalia atili ai le talisapaia mo osigataulaga ma taumafaiga a ou taitai o loo faia mo oe?

© 2015 Puletaofia e le Intellectual Reserve, Inc. Ua taofia aia tatau uma.

A maea ua lava se taimi, ona fesili lea:

• O a faamanuiaga e mafai ona maua mai i le suesueina e le aunoa e oe lava faaleagaga faapea?

Aotele le 2 Korinito13:7–14 i le faamatala atu na apoapoai atu Paulo i le Au Paia e aloese mai mea leaga ma taumafai ia atoatoa.

Molimau atu i upumoni na outou talanoaina i le lesona lenei. Valaaulia le vasega e tusi i lalo se sini patino pe faapefea ona latou faaaogaina se tasi o nei upumoni i o latou olaga.

Toe Faamanatuina o Mau Tauloto

O le a faateleina le malamalama o le vasega i fuaitau o mau a o latou fatufatuina a latou lava fesili e uiga i na fuaitau. Vavae le vasega i ni au se lua (pe sili atu). Valaaulia ia au e tusi ni faaataataga e faasino atu i fuaitau patino o mau tauloto. (Atonu e te manao e filifili se vaega o mau e te manao i tagata o le vasega e aoaoina pe toe faamanatu.) Fautuaina le vasega e aua nei faia ni faaataataga e faigata tele. A uma ua lava se taimi, valaaulia ia au e feauauai e faitau leotele ia faaataataga e vaai pe mafai e isi au ona faailoa mai le fuaitau sao.

Manatua: Afai e leai sou taimi e fai ai le gaoioiga lenei o se vaega o lenei lesona, e mafai ona e faaaogaina i se isi aso. (O le lesona e sosoo ai e fai lava si puupuu. Atonu e te maua ai se taimi e faaaoga ai le gaoioiga lea.) Mo isi gaoioiga o le iloiloga, tagai i le vaega faaopoopo o loo i le faaiuga o lenei tusi lesona.

Tala ma Faamatalaga o Talaaga

2 Korinito 12:4. “E le tatau i se tagata ona tautala i ai”

Faapei o Paulo, o le sa “faalogo i ‘upu e le matautaua’ ia e e le tatau i se tagata ona tautala i ai ina ua segia o ia i le lagi tuatolu (2 Korinito 12:2, 4), e mafai foi e i tatou ona i ai ni aafiaga faaleagaga seiloga e faatonuina ai e le Agaga ona faasoa lea. Na aoao mai Peresitene Boyd K. Packer o le Korama a Aposetolo e Toasefululua:

“‘Ua ou talitonu … e le o se poto le talanoa pea lava e uiga i ni aafiaga faaleagaga e le masani ai. E tatau ona puipuia ma le faaeteete ma seiloga ua uunaia oe e le Agaga lava ia e faaaoga ina ia manuia ai isi ona faasoa lea’ [‘O Le Lamepa a le Alii,’ Ensign, Jan. 1983, 53]” (Tusi lesona a le Tagata Aoga o le Feagaiga Fou [Church Educational System manual, 2014], 407).

2 Korinito 12:7. O le a le “mea matuitui” na faalavelave i le Aposetolo o Paulo?

Sa fautuaina mai e Elder Bruce R. McConkie o le Korama a Aposetolo e Toasefululua e faapea o le mea matuitui a Paulo atonu o “se vaivaiga faaletino e le o taua, e mautinoa lava o se mea matuia na mafatia ai le Aposetolo a le o taimi uma po o tulai mai pea lava” (Doctrinal New Testament Commentary, 3 vols. [1965–73], 2:448).

2 Korinito 12:9. “O lou vaivai e faaatoaina ai lou malosi”

Na sii mai e Elder Robert D. Hales o le Korama a Aposetolo e Toasefululua mai lona aafiaga patino i luitau faaletino e faamatala ai pe mafai faapefea e le alofa tunoa o le Faaola ona faamalolosia i tatou i vaivaiga:

“I tausaga e lua ua mavae, sa ou faatalitali ai i le Alii mo lesona faaleolaga nei e aoao mai ai au i vaitaimi o le tiga faaletino o puapuaga faalemafaufau, ma manatunatuga loloto. sa ou aoaoina ai o le tiga oooo faifai pea, o se faamama faapaiaina lea e faalotomaualaloina ai i tatou ma faalatalata atili atu ai i le Agaga o le Atua. Afai tatou te faalogo ma usiusitai, o le a taitaiina i tatou e Lona Agaga ma faia Lona finagalo i a tatou tauiviga i aso taitasi.

“Sa i ai taimi sa ou faia ai ni fesili tuusao i au tatalo, e pei o le, ‘O a ni lesona e finagalo Lau Afio ou te aoaoina mai i nei aafiaga?’

“Ao ou suesue i tusitusiga paia i lea taimi faigata o lou olaga, sa manifinifi lava le veli, ma sa tuuina mai ia te au e pei ona tusia i olaga o isi sa feagai ma faigata e sili atu ona ogaoga. …

“E i ai ni nai taimi, sa ou tau atu ai i le Alii ua aoaoina moni au i lesona e tatau ona aoaoina ma ua le manaomia ona ou toe onosaia nisi tiga. O ia aioiga na foliga mai sa le fesoasoani, aua na faamanino mai ia te au o lenei aluga faamamaina o tofotofoga, e ao ona onosaia e tusa ai ma le taimi a le Alii. E ese le aoao atu, ‘Ia faia lou finagalo’Mata. 26:42). E ese foi le ola ai. Sa ou aoaoina ai foi o le a le tuua na o au e feagai ma nei tofotofoga ma mafatiaga, ae o le a i ai agelu e leoleoina au. …

“O aafiaga na ou oo i ai i tausaga e lua ua mavae atu, na atili ai ona ou malosi i la le agaga ma ou maua ai le lototele e saga tautino atu ai ma le lototoa i le lalolagi lagona loloto o lou loto” (“O Le Feagaiga o le Papatisoga: O Le I ai i le Malo ma Ni O Le Malo,” Liahona, Nov. 2000, 6).

Manatu Faaopoopo mo le Aoaoina Atu

2 Korinito 13:1. “Mau a le toalua po o le toatolu”

Fai i le vasega e mafaufau i faataitaiga o le numera tolu i totonu o le talalelei. (O nisi faataitaiga e aofia ai le Aigaatua, le Au Peresitene Sili, ma Molimau e Toatolu o le Tusi a Mamona.)

Valaaulia se tamaitiiti aoga e faitau leotele le 2 Korinito 13:1. Fai atu i le vasega e mulimuli i le faitauga, ma vaavaai pe na faapefea ona faamautu e le Atua Ana upu.

• E faapefea ona faamautu e le Atua Ana upu uma? (Fesoasoani i le vasega e faailoa mai le upumoni faapea e faamautu e le Alii upu uma e ala i molimau e toalua pe toatolu.

• O a ni auala e fesoasoani ai le i ai o ni molimau se toalua pe toatolu o upumoni nai le na o le tasi?

Tau i ai sa fuafua ia Paulo e asiasi atu i le Au Paia i Korinito mo le taimi lona tolu o se molimau lona tolu ia i latou i ana aoaoga. E i ai taimi atonu tatou te moomia ai e molimau atu pe tautino atu faatele ia upumoni i isi a e tatou te lei mauaina la tatou molimau.