Lesona 28: Mataio 25:1–13

Lesona 28

Mataio 25:1–13

Folasaga

A o aoao atu e Iesu Keriso faalilolilo Ona soo i luga o le Mauga o Olive e uiga i Lona Afio Mai Faalua, sa Ia aoao atu le faataoto i taupou e toasefulu.

Fautuaga mo le Aoaoina Atu

Mataio 25:1–13

Ua aoao atu e Iesu Keriso le faataoto i taupou e toasefulu

Valaaulia se tagata e faitau leotele le tala lea na faamatala mai e Elder Jeffrey R. Holland o le Korama a Aposetolo e Toasefululua e uiga i se faifeautalai talavou ua foi mai le misiona, ma sa faasoa maia se aafiaga patino i se sauniga molimau. Valaaulia le vasega e mafaufau pe mata o a o latou lagona pe ana fai o i latou o le alii talavou lea e i le tala lea.

“Ona Ia … faamatalaina lea o le taimi sa foi mai ai i le fale mai se tafaoga faamasani ae lei leva ona faauuina o ia o se toeaina i le 18 tausaga. Sa iai se mea na tupu i lena aso lea na le fiafia ai o ia. Na te lei faamatalaina auiliili mai, ae e le tatau foi ona ia faamatalaina i se nofoaga faitele. E oo mai i lenei aso ou te le iloa lava le tulaga o le mea na tupu, ae na taua tele ia te ia aua na aafia ai lona agaga ma lona tulaga faatauaina faaletagata lava ia.

“Ao nofo o ia i lana taavale mo sina taimi i le auala taavale o lona fale, ma mafaufau loloto ma lagonaina le faanoanoa moni mo le mea na tupu, sa tamoe mai ma le popole lona tina e le lotu mai le fale ma agai sao mai lava i lana taavale. I lena lava taimi sa tau atu ia te ia sa pau le uso laititi o lenei alii i le fale, ma sa malosi le tau o lona ulu i lalo ma e foliga mai ua tau oso ai sona mai maliu. sa vave ona valaauina e le tama le lotu le taavale a le falemai ae e fai sina tuai o le taimi e oo mai ai le fesoasoani.

“‘Sau e fai se mea ,” sa tagi mai ai o ia. ‘E leai ea se mea a le tou ekalesia e te faia i taimi faapenei? o loo ia oe le latou perisitua. Sau e fai se mea.’ …

“… Ae ui o lea ina ua manaomia lona faatuatua ma lona malosi i lena po e se tasi na te matuai alofa lava i ai, sa le mafai ona tali atu lenei alii talavou. O le tauiviga ma lagona ma le fetuunaiga na ia lagonaina sa na faia—po o le a lava lena mea—sa le mafai ai ona ia alu atu i luma o le Alii ma ole atu mo le faamanuiaga lea sa manaomia” (“O le Talitonuina o le Agavaa,” Liahona, Apr. 2014, 58–59).

Mata o a ni ou mafaufauga pe ana faapea o oe o le alii talavou lea e i le tulaga lea? Aisea e matuai taua ai le saunia i taimi uma?

Faaali le ata O Le Faataoto i Taupou e Toasefulu (Tusi Ata o le Talalelei [2009], nu. 53; tagai foi i le LDS.org). Faamanatu i le vasega a o i ai Iesu Keriso i luga o le Mauga o Olive faatasi ai ma Ona soo, sa ia aoao atu i latou e uiga i Lona Afio Mai Faalua (tagai Mataio 24). Ona Ia tuu atu lea o le faataoto i taupou e toasefulu e faapupula ai le ala e saunia ai mo le Afio Mai Faalua.

Valaaulia se tamaitiiti aoga e faitau leotele le Mataio 25:1–4. Fai atu i le vasega e mulimuli i le faitauga, ma vaavaai mo elemene autu o le faataoto. Valaaulia i latou e lipoti mai mea latou te maua. Tusi ia fasifuaitau nei i luga o le laupapa:

O le faatoafaiava

O taupou popoto ma taupou valelea

Lamepa ma le suauu

Faamatala atu e tusa ai ma faaipoipoga faaagaifanua a Iutaia, o le alii faaipoipo po o le faatoafaiava, faatasi ai ma ana uo mamae e o i le po i le fale o le faatoafaiava mo le sauniga o le faamanatuga. A maea le sauniga, ona faagasolo atu lea o le au valaaulia o le faaipoipoga i le maota o le faatoafaiava mo se tausamiga. O le au valaaulia o le faaipoipoga o e sa auai atu i le solo, e tatau ona ave a latou lava lamepa po o moliuila e ta’u atu ai o i latou o se vaega o le au valaaulia o le faaipoipoga, ma ia faaopoopo atu ai le malamalama ma le matagofie o le faamoemoe.

Valaaulia ni tamaiti aoga e feauauai i le faitauina leotele o le Mataio 25:5–13. Fai i le vasega e mulimuli ai, ma vaavaai po o a mea na fai e taupou popoto, ma pe o a mea na fai e taupou valea.

O le a le mea na fai e taupou popoto e toalima? O le a le mea na fai e taupou valea e toalima?

Tagai i elemene o le faataoto o loo tusia i luga o le laupapa. Fai i le vasega e ta’u mai pe o le a se mea latou te manatu e mafai e elemene taitasi ona faatusa i ai.

Tusi Iesu Keriso i autafa o O le faatoafaiava i luga o le laupapa. Faamatala o fasifuaitau “ua tuai mai le faatoafaiava” (fuaiupu 5) ma “ua oo i le tulua o po ona sau ai lea o le alaga” (fuaiupu 6) faasino i le Afio Mai Faalua o Iesu Keriso.

O le a se mea e mafai ona tatou aoao e uiga i le Afio Mai Faalua o Iesu Keriso mai nei fasifuaitau?

Faamatala o taupou popoto ma taupou valelea, o e sa valaaulia i le tausamaaga, e faatusa i tagata o le Ekalesia (tagai Dallin H. Oaks, “O Sauniuniga mo le Afio Mai Faalua,” Ensign po o le Liahona, May 2004, 8). TusiTagata o le Ekalesia i autafa o le Taupou popoto ma taupou valelea i luga o le laupapa.

Valaaulia le vasega e toe iloilo le Mataio 25:8–9 ma mafaufau loloto pe aisea na le tuu atu ai e taupou popoto a latou suauu i taupou valea. Valaaulia se tagata aoga e faitau leotele le saunoaga lenei a Peresitene Spencer W. Kimball. Valaaulia le vasega e faalogologo pe o le a le mea e mafai ona faatusa i ai le suauu ma pe aisea e le mafai ai ona faasoa.

“Sa le o se manatu faapito po o le agaleaga lea mea. O le ituaiga suauu e manaomia e faamalamalama ai le ala ma faasusulu i le pogisa e le mafai ona faasoaina. E mafai faapefea e se tagata ona faasoa atu le usiusitai i mataupu faavae o le sefuluai; se mafaufau toafilemu ona o le ola amiotonu; se faaputuga o le malamalama? E mafai faapefea e se tasi ona faasoa atu le faatuatua po o le molimau? E mafai faapefea e se tasi ona faasoa atu uiga faaleatua po o le ola mama, po o le aafiaga o se misiona? E mafai faapefea e se tasi ona faasoa atu faamanuiaga o le malumalu? E tatau ona tofu maua mai lena ituaiga o suauu mo le tagata lava ia. …

“I le faataoto, e mafai ona faatau le suauu i le maketi. I o tatou olaga, o le suauu o le saunia e faaputuina o lea mataua ma lea mataua i le ola amiotonu. … O taga taitasi o le tuuto ma le usiusitai o se mataua lea e faaopoopo i lo tatou faleoloa” (Faith Precedes the Miracle [1972],255–56).

O le a le mea e faatusa i ai le suauu i le faataoto? (Tusi tali a le vasega, e pei o lesauniuniga faaleagaga, molimau, faatuatua, liua, ma le poto masani, i autafa o le Lamepa ma suauu i luga o le laupapa. Ina ia maua se malamalamaga faaopoopo i faatusa o le suauu, atonu e te manao e fautuaina le vasega e faitau leMataupu Faavae ma Feagaiga 45:56–57 ma faatusatusa i le Mataio 25:8.)
O le a le upumoni e mafai ona tatou aoao mai le faataoto ma le saunoga a Peresitene Kimball e uiga i le nonoina mai o sauniuniga faaleagaga? A maea ona tali mai tamaiti aoga, tusi le upumoni lea i luga o le laupapa: E le mafai ona tatou nonoina mai ni sauniuniga faaleagaga mai isi.
O a upumoni ua tatou aoao mai le faataoto i le ala e saunia ai mo le Afio Mai Faalua? (E ono faaaoga e le vasega upu eseese, ae ia mautinoa latou te faailoa mai le upumoni lea: Tatou te sauniuni mo le Afio Mai Faalua e ala i le faateleina o a tatou molimau ma le liua e ala i le amiotonu i aso taitasi. Tusi le upumoni lenei i luga o le laupapa.)

Tuu atu i le vasega ni kopi o le tufaaga o loo avatu i i. Valaaulia i latou e lisi i luga o le tufaaga ni auala e mafai ona latou maua ai le “suauu” o le saunia faaleagaga.

tufaaga, Saunia mo le Afio Mai Faalua o le Alii

A uma ua lava se taimi, fai atu i nai tagata o le vasega e faasoa mai a latou tali i le vasega.

Fai i se tamaitiiti aoga e faitau leotele le Mataio 25:10–12 . Valaaulia le vasega e mulimuli i le faitauga, ma vaavaai pe o a mea na fai atu ai le faatoafaiava i taupou valea. Fai atu i tagata o le vasega e lipoti mai mea ua latou mauaina.

Faamatala o le Faaliliuga a Iosefa Samita o le Mataio 5:11 o loo faamanino mai ai na saunoa le faatoafaiava, “Ou te le iloa outou” (i le Mataio 25:12, vaefaamatalaga a).

O le a le mea o ta’u mai e le faamatalaga “ou te le iloa outou” e uiga i taupou valea e toalima? E faapefea ona ese le iloa o le Alii mai le na o le iloa e uiga ia te Ia?
O le a se mea e mafai ona tatou aoao mai i lenei fuaiupu e uiga i le mea e tatau ona tatou faia e saunia ai mo le afio mai o le Alii? (Fesoasoani i le vasega e faailoa mai le mataupu faavae lenei: Ina ia saunia mo le afio mai o le Alii ma agavaa e tumau ai i Lona afioaga, e tatau ona tatou iloa o Ia.
O a ni auala na e iloa atili ai i le taimi nei le Faaola?

Faamanatu i le vasega le tala mai le amataga o le lesona e uiga i le talavou e umia le perisitua o le na lei saunia mo le taimi e manaomia ai. Faamatala sa faanatinati atu le alii talavou i le fale o se toeaina matua i lana uarota sa nofo i lalo atu o le ala. Na tuu atu e le toeaina i le uso talavou se faamanuiaga sa faamausaliina ai lona tulaga seia oo ina taunuu atu le au fesoasoani laveai. Valaaulia se tagata e faitau leotele le molimau a se alii talavou e pei ona faamatala mai e Elder Holland:

“‘E leai lava se tasi e lei fetaiai ma le mea sa feagai ma au i lena po o le a iloaina le maasiasi na ou lagonaina ma le faanoanoa sa ou oo i ai i le le lagonaina o le agavaa e faaaoga le perisitua sa ou umiaina. O se manatuaga sili atu ona tiga mo au ona o lou lava uso laititi lea sa manaomiaina au faapea ma ou matua pele e le auai i le ekalesia o e sa popole ma o e sa i ai se aia e faamoemoeina ai ni mea e sili atu mai ia te au. Ae ao ou tu atu i o outou luma i le aso, ou te folafola atu ia te outou le mea lenei,” o lana tala lea. ‘Ou te le atoatoa, ae mai lava i lena po ou te lei toe faia lava se mea e taofia ai au mai le alu atu i luma o le Alii ma le talitonuga ma ole atu mo lana fesoasoani pe a manaomia. o le agavaa faaletagata lava ia o se taua lea i lenei lalolagi o loo tatou ola ai. Sa ou lagonaina le tamatamai lima o le tausalaga o faasino mai ia te au i se taimi o lou olaga, ma ou te le o faamoemoe ina ia aua nei toe lagonaina pe afai e mafai ona ou faia soo se mea e uiga i ai. ma o le mea moni na ia faaiu mai ai,“e mafai ona ou faia mea uma e uiga i ai’” (“O le Talitonuina o le Agavaa,” 59).

Fai i le vasega e mafaufau pe o le a le mea latou te manaomia ona fai ina ia saunia ai faaleagaga mo le afio mai o le Alii ma ia agavaa ai e tumau ai i Lona afioaga. E mafai ona e fautuaina i latou e li’o se tasi pe lua o taga sa latou lisia i luga o le tufaaga ma faatu se sini e galue ini auala o le a faateleina ai a latou sauniuniga faaleagaga. Valaaulia i latou e ave a latou tufaaga i le fale e fai ma faamanatu o a latou sini.

Tala ma Faamatalaga o Talaaga

Mataio 25:1–4. O taupou popoto ma taupou valelea

Na faamatala e Elder Dallin H. Oaks o le Korama a Aposetolo e Toasefululua le mea e faatusa i ai taupou e toasefulu:

“O taupou e toasefulu, e faasino i tagata o le ekalesia a Keriso, aua sa valaaulia uma lava i le tausamaaga o le faaipoipoga, ma sa iloa foi e tagata uma mea sa manaomia, ina ia mafai ai ona ulufale atu pe a sau le faatoafaiava. Ae sa na o le afa o i latou sa saunia ina ua sau o ia” (“Sauniuniga mo le Afio Mai Faalua,” Ensign po o le Liahona, Me 2004, 8).

Mataio 25:1–13. O le faataoto i taupou e toasefulu ma a tatou molimau

Na faamalamalama mai e Elder David A. Bednar o le Korama a Aposetolo e Toasefululua e faapea:

“Ua ou manao nei e faaaoga se tasi o le mau faamatalaga talafeagai o taupou e toasefulu e faamalamalamaina ai le sootaga i le va o le molimau ma le liuaina. O taupou e toasefulu, o e sa popoto ma le toalima sa valelea, na ave a latou lamepa ma o e faafetaiai i le faatoafaiava. Faamolemole ia mafaufau i lamepa na faaaoga e taupou, o ni lamepa o le molimau. Na ave e taupou valelea a latou lamepa o molimau ae leai se suauu na aveina. Mafaufau i le suauu, o le suauu o le liuaina. …

“Pe na manatu faapito ea taupou popoto ma lē mananao e faasoa atu, pe na latou ta’u sa’o atua e le mafai ona nonoina le suauu o le liuaina? Pe mafai ea ona e tuuina atu i se isi tagata le malosiaga faaleagaga lea e te maua mai i le usiusitai e le aunoa i poloaiga? Pe mafai ona pasi atu i se tasi o manaomiaina, le malamalama e maua mai i le suesue o tusitusiga paia ma le maelega ma le mafaufau loloto? Pe mafai ona sii atu i se tagata o loo feagai ma mafatiaga po o se luitau tele, le filemu e aumaia e le talalelei i se tagata faamaoni o le Au Paia o Aso e Gata Ai? O le tali manino lava i nei fesili o le leai.

“E pei ona faamamafa lelei mai e taupou popoto, e tatau ia i tatou taitoatasi ona ‘faatauina mo i tatou lava.’ E pei ona faamamafa lelei mai e taupou popoto, e tatau ia i tatou taitoatasi ona “faatauina mo i tatou lava.” Sa le’i faamatalaina e nei tamaitai musuia se faiga faapisinisi; ae, sa latou faamamafaina lo tatou tiutetauave faaletagata lava ia, e faamumu a tatou lamepa o molimau ma ia lava se sapalai o le suauu o le liuaina. O lenei suauu taua, e maua i le tasi le mataua i le taimi—“o lea upu [ma] lea upu lea mataupu ma lea mataupu” (2 Nifae 28:30), i le onosai ma le faifai pea. E leai ni auala ‘alo o i ai; leai ni taimi faafuasei e tapena ai.

“O le mea lea, ia faamaoni, tatalo e le aunoa, ia teuteu a outou lamepa ma faamumu, ma ia i ai ni a outou suauu, ina ia e saunia ai mo le afio mai o le Faatoafaiava’(MF&F 33:17)” (“Liua i le Alii,” Ensign po o le Liahona, Nov. 2012, 109).

Na faamatala mai e Elder Bruce R. McConkie o le Korama a Aposetolo e Toasefululua ia taupou e toasefulu:

“E toalima e naunautai ma tuuto, ae toalima sa faapalapala ma faaleogalua; e toasefulu e i ai molimau ia Iesu, ae na o le toalima sa malolosi” (Doctrinal New Testament Commentary, 3 vols. [1965–73], 1:685).

Mataio 25:6. O taua o le sau o le faatoafaiava i le tulua o po

O le a afio mai Iesu Keriso i le taimi tatou te le o faatalia ai. Sa faamatala mai e Peresitene Spencer W. Kimball:

“Sa le’i tetee taupou valelea i le faatauina mai o suauu. Sa latou iloa e tatau ona i ai ni suauu. Ae sa latou faatuai, ma le le iloa o le taimi e sau ai le faatoafaiava. …

“E matua tuai tele le tulua o po mo i latou o e faatuatuai”(Faith Precedes the Miracle [1972], 256).

Mataio 25:7. Sa “tutu [taupou] ma teuteu a latou lamepa”

O le fasifuaitau “teuteu a latou lamepa”Mataio 25:7o lona uiga na ’otioti e taupou ia vavae o a latou lamepa i se ala e mafai ai ona mumutele.