Kolose–1 Timoteo (Iunite 26)

Sauniuniga o Anomea mo le Faiaoga o Suesuega e Fai i le Aiga

Aotelega o Lesona o Suesuega e Fai i le Aiga i Aso Taitasi

O lenei otootoga o aoaoga faavae ma mataupu faavae na aoaoina mai e tamaiti aoga a o latou suesueina le Kolose–1 Timoteo (iunite 26) ua le faamoemoeina e aoao atu o se vaega o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tagata aoga.

Aso 1 Kolose)

I lana tusi i le Au Paia i Kolose, na aoao atu ai e Paulo faapea o Iesu Keriso o le Togiola, o le ulumatua o fanau agaga a le Tama Faalelagi, o le Foafoa o mea uma, o le ao o le Ekalesia, ma o le na muamua toetu. Sa aoaoina foi e le vasega faapea e mafai ona tatou faalelei ma le Atua e ala i le Togiola a Iesu Keriso pe afai tatou te tumau pea ma mautu i lo tatou faatuatua. E le gata i lea, e ala i le mauaa ma fausia ia Iesu Keriso, e mafai ai ona tatou aloesea mai le taitaiseseina e filosofia ma uputuu o le lalolagi.

Aso 2 (1 Tesalonia)

I le tusi lea i le Au Paia i Tesalonia, sa viia ai e Paulo i latou mo lo latou faamaoni ma aoao atu i latou i upumoni e uiga i le Afio Mai Faalua. Ao suesueina lenei tusi, sa aoao e le vasega upumoni nei: Ao tatou aoao atu le talalelei a Iesu Keriso e ala i le upu ma le mana o le Atua, e mafai ona tatou fesoasoani i isi e avea ma soo o le Alii ma Ana auauna. E mafai ona tatou faasoa atu le talalelei e ala i a tatou faataitaiga. O le Au Paia faamaoni e oti a o lei oo i le Afio Mai Faalua o le a toetutu pe a toe afio mai Keriso. O le Au Paia faamaoni o e ola i le Afio Mai Faalua o Iesu Keriso o le a siiae i latou e faafetaiai ia te Ia pe a afio mai o Ia. Afai tatou te faamaoni ma mataala mo faailoga e muamua mai i le Afio Mai Faalua o Iesu Keriso, ona tatou saunia lea pe a toe afio mai o Ia.

Aso 3 (2 Tesalonia)

I le suesueina o le tusi lenei a Paulo i le Au Paia i Tesalonia lea sa faamanino ai upumoni e uiga i le Afio Mai Faalua o Iesu Keriso, sa aoaoina ai e le vasega afai tatou te tumau faamaoni i le onosaia o mea faafeagai a puapuaga ma le faatuatua, e mafai ona faitaulia i tatou ua agavaa mo le malo o le Atua. Na aoao mai Paulo e faapea o le Afio Mai Faalua o Iesu Keriso, o le a malolo ai e amiotonu ae o le a faaumatia e amioleaga. Sa ia aoao mai foi e faapea a o lei oo i le Afio Mai Faalua o Iesu Keriso, o le a tulai mai se liliuese. Sa aoaoina foi e le vasega e faapea ua poloaiina i tatou e taumafai ia faalagolago le tagata ia te ia lava ma ia fesoasoani i isi.

Aso 4 (1 Timoteo)

Mai le tusi a Paulo ia Timoteo, o se taitai perisitua talavou i Efeso, sa aoao ai e le vasega e faapea o taitai perisitua ua i ai le tiutetauave e faamautinoa ua aoao atu ia aoaoga faavae moni ma faiga sao. Sa latou aoaoina foi faapea o le manao i le tupe e taitai atu ai i le amioletonu ma le liliuese. I se isi itu, afai tatou te talitonu i le Atua soifua ma tamaoaiga i galuega lelei, ona mafai lea ona tatou maua le ola e faavavau.

Folasaga

Na tusi atu Paulo ia Timoteo, o se taitai perisitua i Efeso, ma sa fautuaina o ia ina ia avea ma faataitaiga o e talitonu.

Fautuaga mo le Aoaoina Atu

Manatua: I le iunite lea, sa aoao ai e le vasega le fuaitau o le mau tauloto 2 Tesalonia 2:1–3. E mafai ona e iloiloina lenei fuaitau faatasi ma le vasega i le fai atu i ai e aotele mai ia upumoni o loo aoao mai ai. Ina ia fesoasoani i le vasega e tauloto se vaega o lenei fuaitau, atonu e te manao e tauloto mo ni nai taimi le fuaiupu 3o se vasega.

1 Timoteo 4.

Ua faamatala mai e Paulo ia uiga o se auauna faamaoni a Iesu Keriso

Aumai se kilipa pepa, se fasi manoa, teipi, ma se maneta i le vasega. Nonoa le tasi pito o le manoa i le kilipa pepa, ona teipi lea o le isi pito o le manoa i se kesi po o se laulau. Uu le maneta faalatalata i le kilipa pepa e aunoa ma le pai o le maneta i le kilipa. O le malosiaga faamaneta ua tatau ona afua ai ona gaioi le kilipa pepa agai i le maneta. Fesiitai le maneta faataamilo e faailoa atu ai lona faatosinaina o le gaoioi o le kilipa pepa.

Afai e faatusa le kilipa pepa i se tagata, mata o le a le mea e faatusa i ai le maneta?

Fai i tagata e mafaufau pe ua faapei faapefea i latou o le maneta ma faatosinaina ai isi. Valaaulia i latou e vaavaai mo se mataupu faavae a o latou suesue i le 1 Timoteo 4lea o loo aoao mai ai i tatou i le ala e mafai ai ona avea ma tosinaga lelei i olaga o isi.

Aotele le 1 Timoteo 4:1–11 i le faamatala atu faapea na valoia e Paulo faapea i “aso amuli” (fuaiupu 1) o le a o ese ai nisi tagata o le Ekalesia ai le faatuatuaga ma mulimuli atu i aoaoga ma faiga sese, e pei o le “vavao ona faiava” (fuaiupu 3). Sa apoapoai atu e Paulo ia faafailele le Au Paia i aoaoga faavae moni.

Valaaulia le vasega e faitau lemu le 1 Timoteo 4:12, ma vaavaai po o le a le mea na fautuaina e Paulo ia Timoteo ia avea ai. Faamatala o le upuupu i le fuaiupu lenei e faasino i le amio po o amioga (tagai 1 Timoteo 4:12, vaefaamatalaga i). Fai atu i tagata aoga e lipoti mai mea ua latou mauaina.

O le a sou manatu o le a le uiga o le avea “o se faaaoao i e ua faatuatua”? (Atonu e te manao e fautua atu i tagata o le vasega e faailoga le fuaitau lenei i a latou tusitusiga paia.)
O a ni ala na fautua atu ai Paulo ia Timoteo ia avea o se faaaoao o e ua faatuatua? (Lisi tali a tamaiti aoga i le laupapa.)

Valaaulia se tamaitiiti aoga e faitau leotele le 1 Timoteo 4:13–16. Fai i le vasega e mulimuli ai, ma vaavaai mo nisi fautuaga na tuu atu e Paulo o le a fesoasoani ai ia Timoteo e avea o se faaaoao o e faatuatua.

O a nisi fautuaga mai ia Paulo atonu na fesoasoani ia Timoteo e avea ai ma faaaoao o e faatuatua?
E tusa ai ma le fuaiupu 15, aisea na tau atu ai e Paulo ia Timoteo e mafaufau i aoaoga faavae na aoao atu e Paulo ma ia ola atoatoa ai o ia? (Ina ia mafai ai e isi ona vaai isi o le faia na faamanuiaina ai Timoteo.)
E faavae i aoaoga a Paulo i le fuaiupu 16, o le a se mea e mafai ona tulai mai a o tatou taumafai e avea o faataitaiga o e talitonu ia Iesu Keriso? (I le faaaogaina o upu a le vasega, tusi se mataupu faavae e pei o lea i le laupapa: Afai o tatou o ni faataitaiga o e talitonu ia Iesu Keriso, e mafai ona tatou fesoasoani e aumaia le faaolataga ia i tatou lava ma isi.
E mafai faapefea e le avea o se faataitaiga o se tasi e alitonu ma mulimuli ia Iesu Keriso ona fesoasoani e aumaia le faaolatga i isi?

Valaaulia le vasega e toe iloilo le isi i le laupapa ma mafaufau i ni auala e avea ai Timoteo o se “faaaoao o e faatuatua”(1 Timoteo 4:12). Fai i le vasega e faamatala ni auala e mafai ai e se tasi ona avea ma faaaoao i vaega taitasi nei.

O anafea na avea ai se tasi ma se faataitaiga o e faatuatua mo oe i se tasi o auala na taua e Paulo? (Atonu e te manao e faasoa atu foi se aafiaga mai lou lava olaga.)

Valaaulia le vasega e tusi se sini ia latou api o le vasega po o le api talaaga mo le suesueina o tusitusiga paia e tusa ma le ala e mafai ona avea i latou ma faataitaiga o e faatuatua ia Iesu Keriso ma mafai ai ona aumaia le faaolataga iai latou lava ma isi.

Iunite e Sosoo ai (2 Timoteo 1–Eperu 4)

Valaaulia le vasega e mafaufau i nisi o luitau o le avea ai ma soo o Iesu Keriso i ona po nei. Faamatala a o latou faaauau pea ona suesue i aoaoga a Paulo i le vaiaso a sau o le a latou aoaoina upumoni o le a fesoasoani ia i latou e tumau faamaoni ai tusa lava po o a faigata ma sauaga.