Iakopo 3

Folasaga

Sa aoao e Iakopo le Au Paia i le taua o le pulea o a latou upu. Ona ia faatusaina lea o le poto o le lalolagi i le poto lea e sau mai i le Atua.

Fautuaga mo le Aoaoina Atu

Iakopo 3:1–12

Ua aoao e Iakopo le Au Paia i le taua o le pulea o a latou upu

Aumai se peisi fufulunifo i le vasega. Valaaulia se tamaitiiti aoga e faapasi uma mai i fafo le peisi fufulunifo mai le faaga’au (pe fai atu i tamaiti aoga e vaai faalemafaufau i lenei vaaiga). Fai atu i le isi tamaitiiti aoga e taumafai e toe tuu uma lava le peisi fufulunifo i totonu o lona faaga’au. A uma ona tauivi le tamaitiiti aoga lona lua i le faiga o lena mea, ia fesili atu:

E mafai faapefea ona faatatau le peisi fufulunifo i lenei faatinoga i upu tatou te tautatala ai?

Valaaulia tamaiti aoga e mafaufau loloto pe na latou faia se upu na latou salamo ai mulimuli ane. Valaaulia tamaiti aoga e vaavaai mo ni upumoni ao latou suesue i le Iakopo 3:1–12 o le a fesoasoani ia i latou e filifili ai ma le poto a latou upu.

Valaaulia se tamaitiiti aoga e faitau leotele le Iakopo 3:2–4 ma le fuaiupu muamua o le Iakopo 3:5. Fai i le vasega e mulimuli i le faitauga, ma vaavaai pe na faapefea ona faamatala e Iakopo i latou o e e le faatiga i isi i a latou upu. Faamalamalama atu o le fuaitau “sese ai i tatou uma” i le fuaiupu 2 o lona uiga o i tatou uma lava e faia ni mea sese, ma faamalamalama atu, sa faaaoga e Iakopo le upu laulaufaiva e faatatau atu ai i upu tatou te tautatala ai.

Na faapefea ona faamatala e Iakopo i latou e mafai ona pulea a latou upu?

Mafaufau e faaali pe tusi i luga o le laupapa ata o se fasi uamea [i le faagutu] o le solofanua ma se tapili o se vaa. Atonu e te manao e faamatala atu o se faagutu (fuaiupu 3) o se tamai fasi uamea e tuu i totonu o le gutu o se solofanua lea e faamau i fusi o le faagutu, e mafai ai e se tagata tietie solofanua ona faatonutonu le solofanua. I le fuaiupu lenei, o le upu foeuli (fuaiupu 4) e faatatau i le tapili o se vaa, lea e fesoasoani i se tasi i le uliga po o le liliuga o le vaa.

E tusa ai ma le faamatalaga a Iakopo, o le a le mea e tutusa ai le faagutu o se solofanua, ma le foeuli o se vaa? (E tau fai laiti uma lava, ma e tau fai ulia pe faatonutonu ai mea tetele, ia e pipii i ai.)
E mafai faapefea i faatusatusaga a Iakopo o nei mea faitino i se laulaufaiva, po o upu tatou te tautatala ai, ona fesoasoani tatou te malamalama ai i le malolosi o a tatou upu?
O le a se mataupu faavae e mafai ona tatou faailoa mai i nei fuaiupu e uiga i le mea e mafai ona tupu pe a tatou iloa ona pulea a tatou faaupuga? (E tatau ona faailoa mai e tamaiti aoga se mataupu faavae e tutusa ma lea: A’o tatou aoao e pulea a tatou faaupuga, e mafai ona tatou aoao e pulea a tatou faatinoga uma.)
Aisea e mafai ai e le puleaina o a tatou faaupuga ona fesoasoani i lo tatou pulea o a tatou faatinoga uma?

Valaaulia se tamaitiiti aoga e faitau leotele le fuaiupu mulimuli o le Iakopo 3:5 faapea foi ma le Iakopo 3:6 . Fai atu i le vasega e mulimuli i le faitauga, ma vaavaai po o le a le isi mea na faatusa i ai e Iakopo a tatou faaupuga. Faamalamalama atu o le upu vao laau e faatatau i se vaomatua (tagai fuaiupu 5, vaefaamatalaga e).

O le a le isi mea na faatusa i ai e Iakopo a tatou faaupuga?
O a vaega o o tatou olaga e mafai ona “faamuina” (fuaiupu 6), pe faaleagaina, e ala i lo tatou faaaoga sese o upu?

Faamalamalama atu, o le fuaitau “olaga nei uma lava” i le fuaiupu 6 e mafai ona faatatau i le aluga o le olaga o se tagata.

O a ni itu e mafai ai e upu tatou te tautatala ai ona aafia ai le aluga o o tatou olaga?
E mafai faapefea i le faia o suiga laiti i upu tatou te tautatala ai, ona aafia ai le aluga o o tatou olaga i ni itu lelei? i olaga o isi?

Valaaulia ni nai tamaiti aoga e feauauai i le faitauina leotele mai o le Iakopo 3:7–12. Fai atu i le vasega e mulimuli i le faitauga, ma vaavaai po o le a le isi mea na faatusa i ai e Iakopo a tatou faaupuga.

O le a le isi mea na faatusa i ai e Iakopo a tatou faaupuga? (O se meaola e tatau ona faalataina [tagai i fuaiupu 7–8], “mea oona e oti ai” [fuaiupu 8], o se puna e “puna mai ai le vai oona ma le vai suamalie” “i le gutu e tasi” [fuaiupu 11–12], o se laau o le mati e fua mai i olive ae le o mati, ma se vine e fua mai i le mati [tagai fuaiupu 12].)

Ina ia fesoasoani i tamaiti aoga ia malamalama i le anotusi o nei fuaiupu, valaaulia se tamaitiiti aoga e faitau leotele le saunoaga lenei a Elder Jeffrey R. Holland o le Korama a Aposetolo e Toasefululua:

“E iloagofie lava e le o faapea mai Iakopo o o tatou laulaufaiva e tumu i le agasala i taimi uma e le o mea uma foi tatou te tautatala ai e ‘tumu i le mea oona e oti ai.’ Ae e manino lava lona uiga, o nisi mea tatou te tautala atu ai e faataumaoi, e oona—ma o se tuua’iga matuia lena mea mo se Au Paia o Aso e Gata Ai! O le leo e tuuina atu ai le molimau faamaoni, e momoli atu ai le tatalo naunautai, ma lagiina ai viiga o Siona e mafai ona avea ma leo lava e tasi e otegia ma faitio ai, faamaasiasi ma faamamasagia ai, faatiga ma faatamaia ai le agaga o oe lava faapea foi isi i le gasologa. …

“… Ia tatou taumafai ina ia avea o ni alii ma ni tamaitai ‘atoatoa’ a itiiti i le ala lenei e tasi i le taimi nei—ia le faatiga lava i se upu po o i se isi tulaga lelei e faaupu ai, e ala i se gagana fou, le gagana lea a agelu. O a tatou upu, e faapei foi o a tatou amioga, e ao ina tumu i le faatuatua ma le faamoemoe ma le alofa, mataupu faavae sili faaKerisiano e matua manaomia lava i le lalolagi i ona po nei. Faatasi ai ma na upu, e tautalagia i le uunaiga a le Agaga, e mafai ai ona faamatu loimata, e mafai ona faamaloloina loto, e mafai ona siitia olaga, e mafai ona toe foi mai le faamoemoe, e mafai ona manumalo le mautinoa” (“O Gagana a Agelu,” Ensign po o le Liahona, Me 2007, 16, 18).

O le a se upumoni e mafai ona tatou faailoa mai i nei fuaiupu e uiga i le ala e tatau ona tautatala ai soo o le Atua? (I le faaaogaina o a latou lava upu, e tatau ona faailoa mai e tamaiti aoga se upumoni e tutusa ma lenei: E taumafai soo o le Atua e faaaoga a latou gagana mo faamoemoega amiotonu, ae le o le faasalalauina o le leaga.)
Aisea e avea ai o se faafitauli matuia pe a faaaoga e le Au Paia o Aso e Gata Ai a latou gagana mo faamoemoega leaga pe ia faatiga ai pe toso ai i lalo isi?
O a ni mea e mafai ona tatou faia ia “atoatoa” teisi atili ai (Iakopo 3:2) i le filifiliga o a tatou upu?

Valaaulia tamaiti aoga e faamatala mai pe o le a faapefea ona taiala a latou faatinoga e ala i le ola i upumoni na latou faailoaina mai i le Iakopo 3:9–10 i tulaga nei:

O loo e tesi pe faaaoga ala o faasalalauga faaagafesootai.
O oe o se ositaulaga e faamanuiaina le faamanatuga i aso Sa. I le aoga, ua amata ona taufaalilili au uo i se isi tamaitiiti aoga.
O oe o se tamaitai talavou o le, i se aso ua mavae sa e tautala faalealofa ai e uiga i se isi tamaitai talavou o lau uarota po o le paranesi.
E faaaoga e tamaiti o lau au ia gagana mataga.

Valaaulia se tamaitiiti aoga e faitau leotele le faamatalaga lenei mai le Mo le Malosi o le Autalavou.

“O le auala e te fesootai atu ai e tatau ona atagia atu ai lou ituaiga tagata i le avea ai o se atalii po o se afafine o le Atua. O se gagana mama ma atamai o se faamaoniga lea o se mafaufau atamai ma le lelei. O le gagana lelei e faagaeetia loto, faamalosiau, ma faamalo atu ai i isi e valaaulia ai le Agaga ia faatasi ma oe. O a tatou upu, e pei o a tatou amioga, e tatau ona faatumulia i le faatuatua, faamoemoe, ma le alofa mama” (Mo le Malosi o le Autalavou [tamaitusi, 2011], 20).

O le a se taimi na faagaeetia pe faamalosiauina ai oe e upu a se isi tagata?
Na faapefea ona faamanuiaina oe a’o e taumafai e siitia pe faamalosiau isi i au upu?

Valaaulia tamaiti aoga e tusi se sini i a latou api o le vasega po o api talaaga mo le suesueina o tusitusiga paia, e faatatau i mea o le a latou faia e pulea lelei ai a latou faaupuga ma faaaoga a latou gagana mo faamoemoega amiotonu. Valaaulia i latou e faatino i le aluga o le vaiaso o loo sosoo ai mea na latou tusia.

Iakopo 3:13–18

Ua faatusatusa e Iakopo le poto o le lalolagi ma le poto lea e sau mai i le Atua

Aotele le Iakopo 3:13–18 i le faamalamalama atu, sa faatusatusa e Iakopo le poto o le lalolagi ma le poto lea e sau mai i le Atua. O le poto o le lalolagi e oo atu ai i le “le mautonu” (fuaiupu 16) ma le “misa” (fuaiupu 14), ae o le poto “mai luga” e “mama” ma “tumu i le alofa” (fuaiupu 17).

Molimau atu i upumoni na aoaoina i le lesona o le aso.

Tala ma Faamatalaga o Talaaga

Iakopo 3:2. “A le sese …i le upu”

Ua lapatai mai Elder Jeffrey R. Holland o le Korama a Aposetolo e Toasefululua i le matautia o le tautala leaga, ma saunoa mai i le tatau ona faateleina le lelei i a tatou faaupuga:

“Ou te manatu ua malamalama tagata uma o le tautala le lelei lea e tele ina tafe mai i mafaufauga le lelei, e aofia ai le mafaufau le lelei ia i tatou lava. Tatou te vaai i o tatou lava faaletonu, tatou te tautala—pe mafaufau foi—mamafa ia i tatou lava ma e le umi ae ua faapena foi ona tatou vaai atu i tagata uma ma mea uma. Leai se la susulu, leai ni rosa, leai se folafolaga o le faamoemoe po o le fiafia. E le umi foi a ua tatou faasiasia faapea foi tagata uma e siomia ai i tatou.

“… E tatau ona tatou talitonuina le tautinoga a le Faaola ina ‘ia outou lototetele’ [Mataio 14:27; Mareko 6:50; Ioane 16:33]. (Ioe, e foliga mai ia te au atonu e sili atu lo tatou ta’usalaina i le solia o lena poloaiga nai lo se isi lava!) Tautala ma le faamoemoe. Tautala e faamalosiau, e aofia ai ma oe lava ia. Taumafai e aua nei tomumu pe faitio soo” (“O Gagana a Agelu,” Ensign po o le Liahona, Me 2007, 17–18).

Iakopo 3:10. “E luai mai i le gutu e tasi le vivii ma le fetuu”

Na aoao mai Elder Robert S. Wood o le Fitugafulu, e uiga i le mana o a tatou upu e faamanuia ai isi ma i tatou lava:

“O a tatou upu ma uiga faaalia i fafo e le faapea e le iloa, e tau fai atagia uma atu ai o tatou tagata ma mamanu ai ituaiga tagata e avea ai i tatou. …

“O upu tatou te tautatala ai ma auala tatou te faailoa atu ai i tatou lava, e le gata ina faalataina ai o tatou tagata lilo , ae faapea foi ona mamanu ai lena tagata, i latou e siomia i tatou, ma faapena ai ma tagata uma. O aso uma lava e faaalia taitoatasi ai i tatou i le punitia o le malamalama po o le tulieseina o le pouliuli. Ua valaauina i tatou e valaaulia le malamalama ma ia avea ma se malamalama, ia faapaia i tatou lava ma aoao atu i isi. …

“A tatou tautatala ma faatino, e tatau ona tatou fesili ifo, pe o a tatou upu ma faatinoga ua faamoemoe e valaaulia mai ai mana o le lagi i totonu o o tatou olaga ma valaaulia ai tagata uma e o mai ia Keriso. E tatau ona tatou taulimaina ma le migao ia mea paia. E tatau ona tatou aveesea mai a tatou talanoaga ia faaupuga mataga ma tufanua, o [upu] saua ma le taufaamatau, o [upu] faalumaluma ma pepelo. E pei ona tusia e le Aposetolo o Peteru, ‘A e pei ona paia o ia na valaauina outou, ia faapea foi outou ona paia i a outou amio uma’ (1 Peteru 1:15). O le faaupuga amio o loo faatatau iinei e le gata i faaupuga ae faapea foi i a tatou amioga atoa” (“The Tongue of Angels,” Ensign, Nov. 1999, 83, 84).