Potutusi
Folasaga i le Tusi Lesona a le Faiaoga Seminare o le Feagaiga Fou

Folasaga i le Tusi Lesona a le Faiaoga Seminare o le Feagaiga Fou

O Lo Tatou Faamoemoega

O Le Sini Faamoemoeina o Seminare ma Inisitituti o Mataupu Faalelotu e faapea:

“O lo tatou faamoemoega o le fesoasoani lea i le autalavou ma talavou matutua ia malamalama ma faalagolago i aoaoga ma le Togiola a Iesu Keriso, ia agavaa mo faamanuiaga o le malumalu, ma ia saunia i latou lava, o a latou aiga, ma isi mo le ola e faavavau faatasi ma lo latou Tama i le Lagi” ( Aoao Atu ma le Aoaoina Mai o le Talalelei: O Se Tusitaulima mo Faiaoga ma Taitai i Seminare ma Inisitituti o Mataupu Faalelotu [2012], 1).

Ina ia ausia lo tatou faamoemoega, tatou te aoao atu tamaiti aoga i aoaoga faavae ma mataupu faavae o le talalelei o loo maua i tusitusiga paia ma i upu a perofeta. O nei aoaoga faavae ma mataupu faavae e aoao atu i se ala e tau atu ai i le malamalama ma le faagaeetiaina. Tatou te fesoasoani i tamaiti aoga e faataunuu la latou matafaioi i le faagasologa o le aoaoina ma saunia ai i latou e aoao atu le talalelei i isi.

Ina ia ausia nei faamoemoega, e faamalosiauina oe ma tamaiti aoga o loo e aoaoina e tuufaatasia mea nei Mataupu Taua o le Aoaoina Atu ma le Aoaoina Mai o le Talalelei ao e suesueina faatasi tusitusiga paia:

  • Aoao atu ma aoao mai e ala i le Agaga.

  • Atiina ae se siosiomaga e aoao ai le alofa, faaaloalo, ma le faamoemoega.

  • Suesue ia tusitusiga paia i aso taitasi, ma faitau tusi mo le kosi. [O siata mo le siakiina o fautauga o le Feagaiga Fou atoa e mafai ona maua faatasi ma Kata o Mau Tauloto o le Feagaiga Fou i le LDS.org ma i luga o le store.lds.org (aitema nu. 10480).]

  • Malamalama i talaaga ma anotusi o tusitusiga paia ma upu a perofeta.

  • Faailoa, malamalama, ma lagona le moni ma le taua o, ma faaaoga ia aoaoga faavae ma mataupu faavae o le talalelei.

  • Faamalamalama, faasoa atu, ma molimau atu i aoaoga faavae ma mataupu faavae o le talalelei.

  • Tauloto fuaitau o mau autu ma Aoaoga Faavae Autu” (Aoao Atu ma le Aoaoina Mai o le Talalelei, 10).

E faaopoopo atu i le ausiaina o nei sini, e tatau ona e fesoasoani i tamaiti aoga ina ia faamaoni i le talalelei a Iesu Keriso ma aoao ia iloatino le mea moni mai le mea sese. Atonu o i ai ni fesili a tamaiti aoga e uiga i aoaoga faavae a le Ekalesia, talafaasolopito, po o le tulaga i mataupu faaagafesootai. E mafai ona e saunia tamaiti aoga e taulimaina ia ituaiga fesili i le fesoasoani ia i latou ia “saili i le aoaoina, e ala lava lea i le suesue ma le faatuatua foi” (MF&F 88:118) ma i le faaaogaina o punaoa o i le vaega o le Saili le Upumoni i le si.lds.org.

Ua saunia lenei tusi lesona a le faiaoga e fesoasoani ia e manuia i le ausiaina o nei faamoemoega.

Sauniuniga o le Lesona

Na poloaiina e le Alii i latou o e aoao atu Lana talalelei ia “aoao atu …mataupu autu o lau talalelei, ua i ai i totonu o le Tusi Paia ma le Tusi a Mamona, ua i ai le atoatoaga o le talalelei” (MF&F 42:12). Sa Ia faatonu atili mai o nei upumoni e tatau ona aoaoina e pei ona “taitaiina ai …e le Agaga,” lea e “tuu atu …e ala i le tatalo o le faatuatua” (MF&F 42:13–14). A o e saunia lesona taitasi, ia saili ma le agaga tatalo le taitaiga a le Agaga e fesoasoani ia e malamalama i tusitusiga paia ma aoaoga faavae ma mataupu faavae o loo i ai. E faapena foi, mulimuli i uunaiga a le Agaga ao e fuafuaina pe faapefea ona fesoasoani i au tagata aoga ia malamalama i tusitusiga paia, ia aoao e aoaoina e le Agaga Paia, ma lagonaina se manao e faaaoga mea ua latou aoaoina.

I lenei vasega , o le Feagaiga Fou o lau tusitusiga autu ao e saunia ma aoao atu. Suesue ma le agaga tatalo mataupu po o fuaiupu o le ā e aoaoina atu. Saili ia malamalama i talaaga ma anotusi o le poloka mau, e aofia ai le tala, tagata, nofoaga, ma mea na tutupu. Ao e faamasani i le talaaga ma le anotusi o le poloka o mau, saili ia iloa aoaoga faavae ma mataupu faavae o loo iai, ma filifili po o le fea o upumoni e sili ona taua mo au tamaiti aoga e malamalama ma faaaogaina. O le taimi lava e te iloa ai lau taulaiga, iloilo po o ā auala, metotia, ma gaoioiga o lea sili atu ona fesoasoani i au tamaiti aoga e aoaoina ma faaaogaina upumoni paia ua maua i totonu o tusitusiga paia.

O lenei tusi lesona ua mamanuina e fesoasoani ia te oe i lenei faagasologa. Ia iloilo ma le totoa ia mea e faaaoga i lesona e fetaui ma le poloka mau o le a e aoaoina atu. Atonu e te filifili e faaaoga uma po o se vaega ia fautuaga mo se poloka mau, pe atonu e te fetuunaia ia manatu fautuaina e tusa ai ma manaoga ma tulaga o tamaiti aoga e aoaoina.

E taua lou fesoasoani i tamaiti aoga e suesue i le poloka mau atoa i lesona taitasi. O le faia o lena mea, o le a fesoasoani ai i tamaiti aoga ia maua le savali atoa na faamoemoe le tusi mau e faailoa mai. Ae peitai, ao e fuafuaina lau lesona, e iu ina e iloa e le lava sou taimi i le piriota o le vasega e faaaoga ai fautuaga uma faafaiaoga o loo i le tusi lesona. Saili le taitaiga a le Agaga ma mafaufau ma le agaga tatalo i manaoga o au tamaiti aoga a o e fuafua po o le fea vaega o le poloka mau e faamamafa atu, ina ia fesoasoani i tamaiti aoga ia lagona le moni ma le taua o upumoni o le talalelei ma faaaoga ai i o latou olaga. Afai e puupuu le taimi, atonu e manaomia lou fetuunai o isi vaega o le lesona, e ala i le aotele faapuupuu o ni fuaiupu pe taiala tamaiti aoga e vave faailoa mai se mataupu faavae po o se aoaoga faavae a o lei see atu i le isi vaega o fuaiupu.

A o e mafaufau i auala e fetuunai ai mea e faaaoga o lesona, ia mautinoa e te mulimuli i le fautuaga lenei mai ia Elder Dallin H. Oaks o le Korama a Aposetolo e Toasefululua:

“E masani lava ona aoao mai Peresitene Packer, i la‘u faalogo, e muamua ona tatou faaaogaina, ona tatou fetuunaia ai lea. Afai ua tatou mautu lelei i le lesona faatulagaina lea o le a tatou tuuina atu, ona mafai lea ona tatou mulimuli i le Agaga e fetuunaia” (“4.3.4 Decide through Inspiration,” mai le “A Panel Discussion with Elder Dallin H. Oaks” [Seminaries and Institutes of Religion satellite broadcast, Aug. 7, 2012]; LDS.org).

A o e sauni e aoao atu, ia e magafagafa i tamaiti aoga o e e i ai ni manaoga faapitoa. Fetuunai ia gaoioiga ma ni faamoemoega e fesoasoani ai ia faamanuiaina i latou. O fesootaiga ma matua ma taitai o le ā fesoasoani ia te oe ia e malamalama ai i manaoga o tamaiti aoga ma fesoasoani ia te oe e faamanuiaina i le saunia o aafiaga anoa ma faagaeetia faaleaoaoga mo tamaiti aoga.

I le taimi o le sauniuniga o lau lesona, atonu e te filifili e faaaoga ia punaoa o Faamatalaga ma le Api Talaaga o loo i le LDS.org po o le Potutusi o le Talalelei mo masini feaveai. E mafai ona e faaaogaina nei meafaigaluega e faailoga ai mau, saunoaga o konafesi, tusiga i mekasini a le Ekalesia, ma lesona. E mafai foi ona e faaopoopo ma sefe ia faamatalaga mo le faaaogaina i taimi o au lesona. Ina ia aoao atili e uiga i le auala e faaaoga ai nei meafaigaluega, tagai i le itulau o Notes and Journal Help i luga o le LDS.org.

O nisi o anomea o i lenei tusi lesona na suia mai mai le New Testament Student Manual (Church Educational System Manual, 2014).

Faaaogaina o le Tusi Lesona a le Faiaoga mo Aso Taitasi

Folasaga o le Tusi

O le folasaga o le tusi e tuuina mai se vaaiga aoao i tusi taitasi. Mai i isi mea, latou te faamalamalama mai po o ai na tusia tusi taitasi, faamatala nisi o vaega uigaese o tusi taitasi, ma aumaia se aotelega o anotusi o tusi taitasi.

Folasaga i le Poloka Mau

O folasaga i poloka mau e tuuina atu ai se vaaiga aoao puupuu o le talaaga ma le anotusi o le poloka mau mo lesona taitasi.

Tuuvaegaina o Fuaiupu ma Aotelega o Anotusi

O poloka mau e masani ona vaevaeina i vaega laiti po o vaega o fuaiupu ia e taulai atu i se autu po se faatinoga faapitoa. O tusi o mau mo vaega o fuaiupu e sosoo mai ai ma se aotelega puupuu o mea na tutupu po o aoaoga i totonu o na vaega o fuaiupu.

Fesoasoaniga Faafaiaoga

O fesoasoaniga faafaiaoga e fesoasoani e faamalamalama ai mataupu faavae ma auala o le aoaoina atu o le talalelei. E mafai ona fesoasoani ia te oe i au taumafaiga e faaleleia atili i le avea ai o se faiaoga.

Tino o le Lesona

O le tino o le lesona o loo i ai se taitaiga mo oe a o e suesue ma aoao atu. O loo fautua atu ai manatu mo le aoaoina atu, e aofia ai ni fesili, gaoioiga, upusii, ata, ma siata.

Aoaoga Faavae ma Mataupu Faavae

Ao alia’e aoaoga faavae ma mataupu faavae mai i le suesueina o le tusiga o mau, ua faailogaina faamatamatatetele ia fesoasoani ia te oe e faailoa ma taulai atu i ai i au talanoaga ma tagata aoga.

Ata

O ata o taitai o le Ekalesia ma mea na tutupu mai tusitusiga paia, ua fai ma sui o fesoasoani vaaia e mafai ona e faaalia atu, pe afai e maua, ao e aoao atu.

Mau Tauloto

O le 25 fuaitau o mau tauloto o loo maua i le Feagaiga Fou ua faailogaina i talaaga i totonu o lesona i mea o loo iloa ai. E iai foi i nei lesona taitasi manatu faafaiaoga mo fuaitau nei. Ina ia fesoasoani ia te oe ia faauau ai le aoaoina o fuaitau o mau tauloto, o loo taape solo ia gaoioiga o iloiloga o mau tauloto i totonu o le tusi lesona. Mo ni manatu faaopoopo mo le aoaoina atu o mau tauloto, tagai i le faaopoopoga i le faaiuga o lenei tusi lesona po o le Seminary Student Resources i le LDS.org.

Avanoa o le Koluma

E mafai ona faaaogaina le avanoa o le koluma i le tusi lesona ua lolomiina a le faiaoga mo sauniuniga o lesona, e aofia ai le tusitusia o faamatalaga , mataupu faavae, aafiaga, po o isi manatu, ao uunaia ai oe e le Agaga Paia.

Tala ma Faamatalaga o Talaaga

Ua tuuina atu ni upusii faaopoopo ma faamatalaga i le faaiuga o nisi o lesona, e faaopoopo i lou malamalamaaga i talaaga faasolopito, manatu faavae patino, po o fuaitau o mau. Faaaoga le faamatalaga i le vaega lenei e saunia ai e tali ni fesili pe tuuina atu ni malamalamaaga faaopoopo ao e aoao atu. E mafai ona maua aitema o faamatalaga faaopoopo i lomiga faafuainumera o le tusi lesona lenei i luga o le LDS.org ma i le polokalama o le Potutusi o le Talalelei.

Manatu Faaopoopo mo le Aoaoina Atu

Manatu faaopoopo mo le aoaoina atu e vaaia i le faaiuga o nisi o lesona. O nei manatu e tuuina atu ai ni fautuaga mo le aoaoina atu o aoaoga faavae ma mataupu faavae ia atonu e lei faailoaina pe faamamafaina i le tino o le lesona. E mafai foi ona tuuina atu ni fautuaga i le faaaogaina o ata, e pei o aoaoga i le DVD ma vitio i luga o le LDS.org. E mafai ona maua manatu faaopoopo mo le aoaoina atu i lomiga faatekinolosi o le tusi lesona lenei i luga o le LDS.org ma i le polokalama o le Potutusi o le Talalelei.

Polokalama a Seminare mo Aso Taitasi (Seminare i Taimi o Aoga ma le Vaveao )

O lenei tusi lesona o loo maua ai vaega nei mo faiaoga seminare o aso taitasi: 160 lesona ā le faiaoga mo aso taitasi, fesoasoaniga faafaiaoga, folasaga o le tusi, ma punaoa mo le aoaoina atu o mau tauloto ma Mataupu Faavae Autu.

Folasga o le Tusi

O folasaga o le tusi o loo tuu i luma o le lesona muamua o tusi taitasi. O folasaga o tusi e tuuina atu se vaaiga lautele e uiga i tusi taitasi e ala i le taliina o fesili nei: Aisea e suesue ai lenei tusi? O ai na tusiaina lenei tusi? O anafea ma o fea foi na tusia ai lenei tusi? Mo ai na tusia ai ma pe aisea? ma O a ni vaega tulaga ese o lenei tusi? O folasaga foi e otootoina atu faapuupuu le anotusi o tusi taitasi. E tatau i faiaoga ona faaaoga faamatalaga o le anotusi ma le talaaga mai folasaga o tusi i lesona pe a manaomia.

Lesona a le Faiaoga mo Aso Taitasi

Mamanu o Lesona

O lesona taitasi i lenei tusi lesona o loo taulai atu i se poloka mau nai lo o se manatu, aoaoga faavae, po o se mataupu faavae patino. O lenei faatulagaga o le a fesoasoani ia te oe ma au tamaiti aoga e suesue faasolosolo ai mau ma talanoaina aoaoga faavae ma mataupu faavae e tau atu i ai i le anotusi o mau. A o aoao tamaiti aoga i le talaaga sa maua mai ai se aoaoga faavae po o mataupu faavae, e mafai ona faalolotoina lo latou malamalama e uiga i lena upumoni. E le gata i lea, o le a sili atu ona iloa ma malamalama tamaiti aoga i le aano atoa o savali na faamoemoe tusitala musuia o tusitusiga paia e faailoa mai. O le aoaoina o tusitusiga paia i lenei ala o le a fesoasoani ai foi i tagata aoga e aoao pe faapefea ona iloa ma faaaoga upumoni e faavavau i a latou suesuega patino o tusitusiga paia.

I lesona taitasi, e le o faamamafaina atu ai vaega uma o se poloka mau. O nisi o vaega e tau le o taua ona e tau le fitoitonu i le savali aoao a le tusitala musuia, pe ona atonu e itiiti sona faatatauga i le autalavou. Ua ia te oe le tiutetauave e fetuunai ai nei mea e faaaoga e tusa ai ma manaoga ma mea e fiafia i ai tamaiti aoga e te aoaoina. Atonu e te fetuunaia manatu mo lesona i lenei tusi lesona, e ala i le filifili e tuuina atu le faamamafa sili atu i se aoaoga faavae po o se mataupu faavae faapitoa nai lo le mea ua tuuina atu i mea o le lesona, po o le filifili e faaitiiti le faamamafa i se vaega o le poloka mau o loo faasolo ina loloto le talanoaina i le tusi lesona. Saili le taitaiga a le Agaga Paia e fesoasoani e te faia ai nei fetuunaiga pe a e sauni ma aoao atu.

Aoaoga Faavae ma Mataupu Faavae

I totonu o le tino o lesona taitasi, o le a e maua ai ni nai aoaoga faavae ma mataupu faavae autu o loo faailogaina faamatamatatetele. O nei aoaoga faavae ma mataupu faavae o loo faailoaina i le mataupu aoaoina ona (1) o loo atagia mai ai se savali autu o le poloka mau, (2) e faapitoa ona faatatau i manaoga ma tulaga o tamaiti aoga, po o le (3) o i latou o ni upumoni autu e mafai ona fesoasoani i tagata aoga e faaloloto o latou sootaga ma le Alii. Ia matauina o le Feagaiga Fou o loo aoao atu ai le anoanoai o upumoni e sili atu i lo na o loo faailoa mai i mataupu aoaoina. Na aoao mai Peresitene Boyd K. Packer o le Korama a Aposetolo e Toasefululua, o tusitusiga paia o loo i ai “tuufaatasiga e le gata mai o upumoni o le a fetaui ma manaoga o tagata uma taitoatasi i tulaga uma” (“The Great Plan of Happiness” [CES Symposium on the Doctrine and Covenants/Church History, Aug. 10, 1993], si.lds.org; tagai foi Teaching Seminary: Preservice Readings [2004], 69, LDS.org).

A o e aoao atu, ia tuu atu i taimi uma i tamaiti aoga ni avanoa e faailoa mai ai aoaoga faavae ma mataupu faavae o loo i mau. A o tau mai e tagata aoga ia upumoni latou te mauaina, atonu e masani ona latou faaaogaina upu e ese mai le ala o loo taua ai i se aoaoga faavae po o se mataupu faavae i lenei tusi lesona. E mafai foi ona latou maua ni upumoni e le o faailoaina mai i le auivi o le lesona. Ia faaeteete e aua le fautua atu e faapea e sese tali a tagata aoga ona e ese upu o loo latou faaaogaina mai upu o loo faaaogaina i le tusi lesona, pe ona ua latou faailoa mai se upumoni e le o taua i le mataupu aoaoina. Ae ui i lea, afai o le faamatalaga a se tamaitiiti aoga e sese le aoaoga faavae, o lou tiutetauave o le fesoasoani malie atu i le tamaiti aoga e faasao lana faamatalaga ae ia faatumauina pea se siosiomaga o le alofa ma le faatuatuaina. O le faia o lena mea e mafai ona tuuina atu ai se aafiaga faaleaoaoga mo tagata aoga i lau vasega.

Saoasaoa

O lenei tusi lesona o loo i ai lesona e 160 a le seminare i aso taitasi. E mafai ona e fetuunaia ia lesona ma le saoasaoa pe a manaomia ai mo le umi o le taimi e tatau ona e aoaoina atu ai lenei kosi. Tagai i le faaopoopoga o lenei tusi lesona mo se faataitaiga o le taiala o le saoasaoa. O le taiala o le saoasaoa ua faavae i se tausaga faaleaoaoga e 36-vaiaso po o le 180 aso, ma e aofia ai “aso fetuutuunai” e 20 e mafai ona e faaaogaina e fetuunai ai lesona i aso taitasi, fesoasoani i tamaiti aoga ia malamalama i fuaitau autu o mau tauloto ma Aoaoga Faavae Autu, toe faamanatu mea na aoaoina muamua, faaaoga ma toe faamanatu faavasegaga faaleaoaoga e manaomia, ma faataga ai mo taimi e faasalaveia ai le faasologa o lesona.

Galuega Faaopoopo

O le Taiala mo le Suesueina o le Feagaiga Fou mo Tamaiti s Aoga Seminare mo Suesuega i le Aiga, e mafai ona faaaoga i polokalama o aso taitasi ā le seminare o se punaoa e maua ai galuega faaopoopo mo tamaiti aoga. O lesona i le taiala o suesuega mo tamaiti aoga e suesue i le aiga e ogatasi lava ma lena ua tuuina atu i le tusi lesona lenei. O tamaiti aoga e tele naua aso e le aooga ai, e mafai ona tofia e faauma ia galuega atofaina i le taiala o suesuega e o faatasi ma anotusi na latou misia i le vasega. E mafai ona lolomi mai galuega atofaina mai le LDS.org, e te le tau tuuina atu atoa le tusi lesona i tamaiti aoga o e e manaomia ona fai galuega faaopoopo. O isi faamatalaga e uiga i le Taiala mo le Suesueina o le Feagaiga Fou mo Tamaiti Aoga Seminare mo Suesuega i le Aiga o loo maua i le vaega ua faaautuina “Polokalama Seminare mo Suesuega i le Aiga” i nei faamatalaga tomua.

Fesoasoaniga Faafaiaoga

O fesoasoaniga faafaiaoga e faaali atu i pito i autafa o lenei tusi lesona. O nei fesoasoaniga o loo fesoasoani e faamalamalama ma faailoa ai pe faapefea e oe ma tamaiti aoga o loo e aoaoina ona faaaogaina Mataupu Autu o le Talalelei o le Aoao Atu ma le Aoaoina Mai i lau suesuega o le Feagaiga Fou. Latou te ofoina atu foi ni fautuaga i auala e faaaoga lelei ai metotia, tomai, ma faiga eseese faafaiaoga. A oo ina e malamalama i mataupu faavae o loo i ai i fesoasoaniga faafaiaoga, ia vaavaai mo auala e faatino ma faaaoga ai pea lava pea i au aoaoga.

Mau Tauloto ma Aoaoga Faavae Autu

Ina ia fesoasoani i tamaiti e toloai upumoni e faavavau ma faateleina lo latou toafimalie i le aoaoina mai ma le aoaoina atu mai tusitusiga paia, ua filifilia e le Seminare ma Inisitituti o Aoaoga Faalelotu (S&I) ni fuaitau mai tusitusiga paia mo tamaiti aoga taitoatasi e tauloto i le aluga o kosi taitasi. Ma le isi, o se lisi o Aoaoga Faavae Autu ua aofia ai e faamamafa atu ai aoaoga faavae autu e tatau ona malamalama, talitonu, ma ola ai tamaiti aoga i tausaga atoa e fa i le seminare ma mo o latou olaga atoa. Sa saunia tusi lesona mo kosi taitasi o le seminare e faamamafa atu ai Aoaoga Faavae Autu ao aliae mai i se suesuega faasolo a le tagata aoao o tusitusiga paia. O le tele o fuaitau o mau tauloto na filifilia ma le manatu i Mataupu Faavae Autu , ina ia , ao e aoao atu fuaitau o mau tauloto i tamaiti aoga, o lea e aoao atu foi ma Mataupu Faavae Autu.

Ao teufatu e tamaiti aoga ia upumoni e faavavau i o latou mafaufau ma loto, o le a faamanatu mai e le Agaga Paia nei upumoni i taimi e manaomia ai, ma tuu atu ia i latou le lototele e galulue ai i le faatuatua (tagai Ioane 14:26). Sa aoao mai Peresitene Howard W. Hunter:

“Ou te uunaia malosi outou ina ia faaaoga ia tusitusiga paia i a outou aoaoga ma faia mea uma i lo outou malosi e fesoasoani ai i tagata aoga e faaaoga ma maua le lagona mafanafana i tusitusiga paia. Ou te fia manao i o tatou tagata talavou ina ia i ai le talitonuga i tusitusiga paia. …

“… Matou te mananao i tamaiti aoga ina ia i ai le talitonuga i le malosiaga ma upumoni o tusitusiga paia, le talitonuga o loo fetalai moni mai pea lo latou Tama Faalelagi ia i latou e ala i tusitusiga paia, ma le talitonuga e mafai ona latou liliu atu i tusitusiga paia ma maua ai tali i o latou faafitauli ma a latou tatalo. …

“… Matou te faamoemoe e leai se tasi o au tamaiti aoga e tuua lou potuaoga ma le fefe pe maasiasi pe matamuli ona ua latou le mafai ona maua le fesoasoani latou te manaomia ona e le o lava lelei lo latou iloa i tusitusiga paia e sue ai ia fuaitau talafeagai” (“Eternal Investments” [address to CES religious educators, Feb. 10, 1989], 2, si.lds.org; tagai foi Teaching Seminary: Preservice Readings [2004], 20, LDS.org).

Tagai i le faaopoopoga o i le tusi lesona lenei mo nisi faamatalaga e uiga i mau tauloto ma Aoaoga Faavae Autu.

Faaaogaina o Lesona mo Suesuega i le Aiga

Aotelega o Lesona mo Tamaiti Aoga

O le a fesoasoani le aotelega e te faamasani ai i le talaaga ma aoaoga faavae ma mataupu faavae na suesueina e tamaiti aoga i le vaiaso i le taiala mo suesuega a le tamaitiiti aoga.

Folasaga o le Lesona

O le folasaga i le lesona o le a fesoasoani ia te oe e iloa ai po o a vaega o le poloka mau o le a faamamafaina i le lesona.

Tuuvaegaina o Fuaiupu ma Aotelega o Anotusi

O fuaiupu o loo tuuvaegaina e tusa ai ma mea o loo i ai suiga i talaaga po o anotusi i le poloka mau. O tusi o mau mo le tuuvaegaina o fuaiupu taitasi e sosoo ai ma se aotelega puupuu o mea na tutupu po o aoaoga i totonu o lena vaega o fuaiupu.

Tino o le Lesona

O le tino o le lesona e tuuina atu ai se taiala mo oe ao e suesue ma aoao atu. O loo fautua atu ai manatu mo le aoaoina atu, e aofia ai ni fesili, gaoioiga, upusii, ata, ma siata.

Aoaoga Faavae ma Mataupu Faavae

Ao alia’e aoaoga faavae ma mataupu faavae mai i le suesueina o le tusiga o mau, ua faamamafaina atu faamatamatatetele ia fesoasoani ia te oe e faailoa ma taulai atu i ai i au talanoaga ma tamaiti aoga.

Folasaga i le Iunite e Sosoo Ai

O le parakalafa mulimuli o lesona taitasi ua tuuina atu ai sina vaaiga puupuu i le iunite e sosoo ai. Faasoa atu lenei parakalafa i au tamaiti aoga i le faaiuga o lesona taitasi, e fesoasoani ia latou tulimatai atu ai i le suesueina o tusitusiga paia i le aluga o le vaiaso a sau.

Polokalama a le Seminare mo Suesuega e Fai i le Aiga

I lalo o le taitaiga a taitai perisitua i le lotoifale ma le sui o le S&I, e mafai ai ona faatulaga vasega seminare mo suesuega e faia i le aiga i nofoaga e le mafai ona auai atu ai tagata aoga i se vasega i aso taitasi ona o le mamao po o isi tulaga (e pei o se manaoga faapitoa). O vasega o le seminare mo suesuega i le aiga, e masani lava ona le maua i nofoaga ia e tuuina atu ai vasega i aso uma (aso o le vaiaso) i le vaveao po o le taimi o le aoga.

O le polokalama mo suesuega e faia i le aiga, e mafai ai e tamaiti aoga ona maua togi i le seminare e ala i le faamaeaina o lesona taitasi i le aiga, nai lo o le auai atu i vasega i aso o le vaiaso. O nei lesona o loo maua i se tusi lesona e ese mai e taua o le Taiala mo le Suesueina o le Feagaiga Fou mo Tagata Aoga Seminare mo Suesuega i le Aiga. E tasi i le vaiaso ona feiloai tamaiti aoga ma le faiaoga seminare e tuu atu i ai a latou galuega ma auai i se lesona i le potuaoga. O le taiala mo suesuega a le tamaiti aoga ma lesona faalevaiaso i le potuaoga o loo faamalamalama atili atu i lalo.

Taiala o Suesuega mo Tagata Aoga e Faia i le Aiga

O le Taiala mo le Suesueina o le Feagaiga Fou mo Tagata Aoga Seminare mo Suesuega i le Aiga, ua mamanuina e fesoasoani i tagata suesue i le aiga ina ia maua se aafiaga i le suesueina o le Feagaiga Foua e faapei o tamaiti seminare o loo auai i vasega o aso taitasi. O le mea lea, o le saoasaoa o le taiala o suesuega a le tamaiti aoga, faapea foi ma aoaoga faavae ma mataupu faavae o loo faamamafa atu ai, e ogatasi lea ma mea e faaaoga o loo i lenei tusi lesona. O loo aofia ai foi i le taiala o suesuega a le tamaiti aoga ia faatonuga mo mau tauloto. O fuaitau o mau tauloto o loo talanoaina i le talaaga a o latou faaali ae i le anotusi o mau, ma e masani lava o gaoioiga tusitusi e tuuina atu i lesona lea o loo aofia ai ia fuaitau.

I vaiaso taitasi, e tatau i tamaiti aoga seminare e suesue i le aiga, ona faamaeaina lesona e fa mai le taiala o suesuega a le tagata aoga ma auai i se lesona i le vaiaso e tuuina atu e lo latou faiaoga seminare. Sa fai e tamaiti aoga ia galuega atofaina ua faanumeraina mai le taiala suesue i a latou api talaaga mo le suesueina o tusitusiga paia. E tatau i tamaiti aoga ona i ai ni api talaaga se lua mo le suesueina o tusitusiga paia, ina ia mafai ona latou tuua le tasi i le faiaoga ae faaauau lava ona galulue i le isi. A o feiloai tamaiti aoga ma lo latou faiaoga i vaiaso taitasi, e ao atu i totonu le api talaaga e tasi i le faiaoga o suesuega e faia i le aiga, ae o le isi e toe tuuina atu i le tagata aoga e faaaoga mo le lesona o le vaiaso e sosoo ai. (Mo se faataitaiga, i le aluga o le vaiaso e tasi, e fai ai e le tamaiti aoga ia galuega atofaina i le api talaaga muamua. Ona aumai lea e le tamaiti aoga le api talaaga lenei i le vasega ma tuu atu i le faiaoga. I le aluga o le vaiaso e sosoo ai, e fai e le tamaiti aoga ia galuega atofaina i le api talaaga lona lua. A tauaao atu e le tamaiti aoga le api talaaga lona 2, o le a toe faafoi atu e le faiaoga le api talaaga muamua. Ona faaaoga lea e le tamaitiiti aoga le api talaaga muamua e faataunuu ai tofitofiga o le vaiaso e sosoo ai.)

Ua fautuaina tamaiti aoga seminare uma e suesue i tusitusiga paia i aso uma, ma faitau anomea mo le kosi, ae o tamaiti aoga mo suesuega e faia i le aiga, e tatau ona malamalama ua faamoemoeina ia latou faaaluina le 30 i le 40 minute faaopoopo i lesona taitasi e fa e suesue i le aiga i iunite taitasi, ma auai atu i le lesona faalevaiaso o suesuega e faia i le aiga.

Lesona Faalevaiaso a le Faiaoga mo Suesuega e Fai i le Aiga

O iunite uma i le Taiala mo le Suesueina o le Feagaiga Fou mo Tamaiti Aoga Seminare mo Suesuega i le Aiga e fesootai ma lesona e lima i le tusi lesona a le faiaoga mo aso taitasi. A uma lesona e lima taitasi i lenei tusi lesona, o le a e mauaina se lesona e tasi faalevaiaso mo le faiaoga e suesue i le aiga. O le lesona mo suesuega i le aiga, o le a fesoasoani i tamaiti aoga e toe faamanatu ai, faaloloto lo latou malamalama e uiga i, ma faaaoga aoaoga faavae ma mataupu faavae sa latou aoaoina a o latou faamaeaina ia lesona i le taiala mo suesuega a le tamaiti aoga i le aluga o le vaiaso. E mafai foi e nei lesona ona talanoaina ni upumoni faaopoopo e le o aofia i le taiala mo suesuega a le tamaitiiti aoga. (Mo le fesoasoani i le fuafuaina o le faatulagaina o lau lesona, tagai i le taiala mo le saoasaoa mo faiaoga mo suesuega i le aiga o loo i le faaopoopoga i lenei tusi lesona.)

I le avea ai ma se faiaoga mo suesuega e faia i le aiga, e tatau ona i ai sou malamalamaaga atoatoa i mea o loo suesueina e au tamaiti aoga i le aiga i vaiaso taitasi, ina ia mafai ona e tali atu i fesili ma fatuina ni talanoaga anoa pe a tou feiloai ma i latou. Fai atu i tamaiti aoga e aumai a latou tusitusiga paia, api talaaga mo le suesueina o tusitusiga paia, ma taiala mo suesuega a tagata aoga i le vasega faalevaiaso ina ia mafai ona latou faatatau atu i ai i le taimi o le lesona. Fetuunai ia lesona e tusa ai ma manaoga o tamaiti aoga e te aoaoina, ma e tusa ai ma le taitaiga a le Agaga Paia. Atonu foi e te manao e tagai atu i lesona o aso taitasi a le faiaoga o loo i lenei tusi lesona ao e sauni ma aoao atu. O se suesuega o fesoasoaniga faafaiaoga, ma metotia na faaaogaina i lesona i aso taitasi, e mafai ona fesoasoani e faatamaoaiga ai lau aoaoga faalevaiaso. Ia taulima soo se manaoga faapitoa o tamaiti aoga e te aoaoina. Mo se faataitaiga, afai o se tamaitiiti aoga e faigata ona tusitusi, faataga o ia e faaaoga se masini pueleo pe o le faalau atu o [ona] manatu i se tasi o le aiga po o se uo, e mafai ona tusiina i lalo ana tali.

I le faaiuga o lesona taitasi faalevaiaso, ao mai api talaaga mo le suesueina o tusitusiga paia a tamaiti aoga ma uunaia i latou i a latou suesuega faifai pea. Tuu atu ia te i latou se api talaaga mo le suesueina o tusitusiga paia mo galuega atofaina o le vaiaso e sosoo ai, e pei ona faamatala atu i luga i le vaega ua taua “Taiala o Suesuega mo Tamaiti Aoga mo Suesuega i le Aiga.” (I lalo o le taitaiga a taitai perisitua ma matua, e mafai ai e le faiaoga seminare na [valaauina] a le siteki ona fesootai atu faaeletonika i tamaiti aoga o le seminare e lesitala i le seminare mo suesuega e faia i le aiga.)

A o e faitau i galuega atofaina i api talaaga mo le suesueina o tusitusiga paia a tamaiti aoga, ia tali atu i ai mai lea taimi i lea taimi i a latou galuega, e ala i le tusia o se faamatalaga puupuu po o le faaali atu o se manatu i le isi taimi tou te feiloai ai. Atonu foi e te manao e saili nisi auala e tuuina atu ai le lagolago ma ni finagalo faaalia anoa. O le a fesoasoani lenei mea i tamaiti aoga e iloa ai e te manatulia a latou galuega ma o le a fesoasoani e faaosofia ai i latou ina ia maeaea lelei a latou tali.

O le tele o taumafaiga a tamaiti aoga ia malamalama lelei i fuaitau o mau autu, o le a faia ao latou faamaeaina a latou lesona mo suesuega e faia i le aiga. E mafai e faiaoga mo suesuega e faia i le aiga ona tulitatao taumafaiga a tamaiti aoga i le taimi o lesona mo suesuega e faia i le aiga, e ala i le valaaulia o tamaiti aoga e tauloto atu pe toe faamanatu fuaitau o mau tauloto e aliae i le anotusi mo le iunite suesueina o lene vaiaso.

Isi Punaoa

LDS.org

O le Tusi Lesona a le Faiaoga mo le Feagaiga Fou (nttm.lds.org) ma le Taiala mo le Suesueina o le Feagaiga Fou mo Tamaiti Aoga Seminare mo Suesuega i le Aiga o loo maua i le LDS.org ma i le Potutusi o le Talalelei mo masini feaveai. O loo i ai i lomiga faaeletonika o le tusi lesona a le faiaoga ni Tala ma Faamatalaga o Talaaga faaopoopo, Manatu Faaopoopo mo le Aoaoina Atu, ma punaoa o ala faasalalau e le o aofia i lenei tusi lesona ua uma ona lolomiina ona e le lava le avanoa.

si.lds.org

E mafai e faiaoga ona asiasi i le uepisaite a le Seminare ma Inisitituti o Mataupu Faalelotu (si.lds.org) mo se fesoasoani i le sauniaina o lesona ma maua ai ni manatu faaopoopo faafaiaoga.

Punaoa mo Faamatalaga ma Api Talaaga

E mafai ona faaaoga e faiaoga ma tamaiti aoga punaoa o Faamatalaga ma Api Talaaga i le initoneti ma telefoni feaveai, e faailoga ma faaopoopo ai ni faamatalaga i lomiga faaeletonika o nei tusi lesona a o latou saunia lesona ma suesue i tusitusiga paia. O loo maua foi tusi lesona a le faiaoga ma taiala mo suesuega a le tamaitiiti aoga mo le sii mai mai le LDS.org i le isi mamanu (e pei o le mamanu PDF, ePub, ma faila mobi [Kindle]).

Manatu Faaopoopo

O punaoa nei o loo maua i le initoneti, e ala i lou supavaisa, e ala i faletusi a le Ekalesia i le lotoifale, ma e ala i le faleoloa a le Ekalseia i le initoneti (store.lds.org):