Anomea o Sauniuniga mo le Faiaoga o Suesuega i le Aiga
Aotelega o Lesona Suesueina i le Fale i Aso Taitasi
O otootoga o aoaoga faavae ma mataupu faavae nei sa aoaoina e tamaiti aoga ao latou suesueina le Luka 18–Ioane 1 (iunite 12) e le o faamoemoeina e aoao atu o se vaega o lau lesona. O le lesona e te aoao atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia ao e mafaufau i manaoga o au tamaiti aoga.
O le lesona lenei sa suesue ai e tamaiti aoga ia faataoto o le faamasino le faamaoni ma le Faresaio ma le telona. Sa latou faitau foi e uiga i se tagata tauaso o le sa saili atu i le fesoasoani a le Alii ma faapea foi Sakaio. Mai nei tala sa aoao ai e tamaiti aoga afai tatou te faamaoni ma tumau pea pe a tatou faatinoina le faatuatua i le Alii, e mafai ona tatou maua Lona alofa mutimutivale.
A o faitau tamaiti aoga e uiga i le fautuaga a le Faaola ia Peteru, sa latou aoao ai afai tatou te liua mai i le talalelei a Iesu Keriso, e mafai ona tatou faamalolosi atu i isi. Na aoaoina foi e tamaiti aoga ia upu moni nei ao latou faitau e uiga i mafatiaga o le faaola i Ketesemane: Afai tatou te naunau e usiusitai i le Tama Faalelagi, o le a Ia aumaia ia i tatou le malosi e faia ai Lona finagalo. Na afutoto Iesu Keriso ao Ia mafatia i le Faatoaga o Ketesemane.
I le lesona lenei, e faitau ai tamaiti aoga i le Faasatauroga, falelauasiga, ma le Toetu o Iesu Keriso. Na latou aoaoina ia upumoni nei: E mafai ona tatou mulimuli i le faataitaiga a Iesu Keriso i le filifili e faamagalo ia i latou o e soona faia i tatou. O agaga o tagata uma e ulu atu i le lalolagi o agaga i le taimi e oti ai. Ua ia Iesu Keriso se tino toetu o aano ma ivi.
A o suesue e tamaiti aoga ia upu a Ioane le Soo Pele ma Ioane le Papatiso, sa latou aoaoina ai sa i ai faatasi Iesu Keriso ma le Atua i le amataga, o mea uma na faia e Ia, ma o Ia o le Malamalama o le Lalolagi. A o faitau tamaiti aoga pe na faapefea ona iloa e nisi o soo ia Iesu Keriso, sa latou aoaoina ai, a tatou taliaina le valaaulia e aoao ma mulimuli ia Iesu Keriso, ua tatou mauaina uma a tatou lava molimau ia te Ia.
Folasaga
E mafai ona fesoasoani lenei lesona e malamalama ai tamaiti aoga i le ala e valaaulia ai le Agaga Paia e aoao i latou e uiga ia Iesu Keriso. E le gata i lea, o le a latou aoao ai foi o Iesu Keriso o le tamalii toetu e i ai aano ma ivi.
Ua talanoa atu le Alii toetu i soo e toalua i le ala i Emau
Fai i tamaiti aoga e mafaufau loloto pe na i ai se taimi na latou tauivi ai ia iloa pe moni se manatu faavae o le talalelei.
Faamatala atu i le Luka 24:13 ua tatou aoao ai o soo e toalua na tuua Ierusalema i le aso lava lea, na o atu ai ni fafine ma maua le tuugamau o Iesu ua avanoa. Sa la malaga pe tusa ma le 6-7.5 maila (10--12 kilomita) “i se nuu e igoa o Emau.” O le suesueina o la la’ua aafiaga i le ala i Emau e mafai ona fesoasoani tatou te iloa ai le ala e faamalolosia ai a tatou molimau ia Iesu Keriso ma Lana talalelei.
Valaaulia se tamaitiiti aoga e faitau leotele le Luka 24:14–17. Fai i le vasega e mulimuli ai, ma vaavaai po o ai na auai faatasi atu i soo a o savavali.
O ai na faatasi atu i soo a o malaga atu i la’ua i Emau?
Aisea na le iloa ai e le au soo ia Iesu? (Faamatala atu o le upu punitia i le Luka 24:16 o lona uiga ua taofia pe ufitia.)
Valaaulia ni nai tamaiti aoga e feauaua’i i le faitauina leotele mai o le Luka 24:17–33. Fai i le vasega e mulimuli ai, ma vaavaai mo mea na aoao mai e le au soo mai ia Iesu a o latou savavali faatasi ma Ia e aunoa ma le iloaina pe o ai o Ia.
Afai o maua i la outou gagana, nai lo le faitauina o le Luka 24:17–33, atonu e te manao e faaali le vitio “Christ Appears on the Road to Emmaus” (3:32) mai le The Life of Jesus Christ Bible Videos, lea e mafai ona maua i le LDS.org. Fai i tamaiti aoga e matau pe o a mea na aoao e le au soo mai ia Iesu a o latou savavali ma Ia e aunoa ma le iloaina pe o ai o Ia. A o lei faaalia le vitio faamatala atu, o le talatalanoaga i le vitio e mai le Luka 24:17–33 ina ia mafai ai e tamaiti aoga ona mulimuli i a latou tusi paia pe a mananao ai.
Ta’u i ai i le vitio lenei, tatou te le faalogo ai i mea na aoao atu e Iesu i le au soo a o latou savavali. Valaaulia se tamaitiiti aoga e faitau leotele le Luka 24:27. Fai atu i le vasega e mulimuli i le faitauga, ma vaavaai po o le a le mea na aoao atu e Iesu i le au soo.
O a mea na aoao atu e Iesu i le au soo?
O le a le meafaigaluega na Ia faaaogaina e aoao ai e uiga ia te Ia lava? (O tusitusiga paia.)
I le fuaiupu 32, o le a le uiga o le mu o loto o le au soo i totonu o i la’ua? (Na molimau atu e le Agaga Paia o aoaoga e uiga ia Iesu i tusitusiga paia e moni ia.)
Valaaulia tamaiti aoga e mafaufau pe o a mea atonu na aoao mai e le au soo mai ia Iesu i le faaaogaina o mau e aoao atu ai i la’ua nai lo le na ona faaali atu pe o ai o Ia. E mafai ona e fai atu i ni nai tamaiti aoga e faasoa mai o latou mafaufauga.
O le a le mataupu faavae o aoao mai e nei fuaiupu e uiga i le aafiaga o a tatou lava suesuega o tusitusiga paia? (A uma ona tali mai tamaiti aoga, tusi le mataupu faavae lenei i luga o le laupapa: A o tatou suesue i tusitusiga paia, tatou te valaaulia le Agaga Paia e aoao mai ia i tatou e uiga ia Iesu Keriso.)
E le gata i le mu o o tatou loto, ae o le a se isi mea e mafai ona e faamatalaina e mafai ona tatou oo i ai a o molimau mai le Agaga Paia ia Iesu Keriso?
Fai i le vasega e sue se mau sa fesoasoani ia i latou e lagonaina ai le aoao atu o le Agaga Paia e uiga ia Iesu Keriso. Valaaulia i latou e faasoa mai a latou mau ma aafiaga o mea sa latou lagonaina. Atonu foi e te manao e faasoa atu se mau sa fesoasoani ia te oe lava ia.
Faamanatu i tamaiti aoga e ui ina taua le faitau o le Feagaiga Fou mo togi o le seminare, ae e sili atu ona taua ona suesue ia tusitusiga paia i se ala e valaaulia ai le Agaga Paia e faamalolosia ai a latou molimau i le Faaola.
Afai e mafai, saunia ni kopi o se faailogatusie faaaoga ai le saunoaga lea a Elder D. Todd Christofferson o le Korama a Aposetolo e Toasefululua, pe valaaulia tamaiti aoga e tusi le saunoaga i se fasipepa po o se kata malo e mafai ona faaaoga o se faailogatusi. (O loo maua se pepa PDF ma le mau faailogatusi i le fatuga i luga o peaulagi o lenei lesona.)
Tusitaiala a le Faiaoga Seminare o le Feagaiga Fou--Suesuega i le Fale Lesona (Iunite 12)
Ata
Elder D. Todd Christofferson
“O le faamoemoega tutotonu o tusitusiga paia uma o le faatumuina lea o o tatou agaga i le faatuatua i le Atua le Tama ma Lona Alo, o Iesu Keriso. …
“… O le Faatuatua e oo mai mai le molimau a le Agaga Paia i o tatou agaga, Agaga i le agaga, a o tatou faalogo i le afioga a le Atua. Ma e matua le faatuatua a o tatou faaauau pea ona taumamafa i le upu. …
“… Suesue ma le faaeteete, ma le totoa i tusitusiga paia. Mafaufau loloto ma tatalo i ai. O tusitusiga paia o faaaliga, ma o le a latou aumaia faaaliga faaopoopo” (D. Todd Christofferson, “O Le Faamanuiaga o Tusitusiga Paia,” Ensign po o le Liahona, Me 2010, 34–35).
Valaaulia se tamaitiiti aoga e faitau leotele le saunoaga lenei mai ia Elder Christofferson. Fai i le vasega e mulimuli ai, ma vaavaai mo auala e mafai ona latou faaleleia atili ai a latou lava suesuega o tusitusiga paia.
Valaaulia tamaiti aoga e faatu se sini e suesue a latou tusitusiga paia i ni auala e valaaulia ai le Agaga Paia e faateleina ai lo latou faatuatua ma le malamalama ia Iesu Keriso. E mafai ona e fautauina ia latou tusia se sini i tua o a latou faailogatusi ina ia mafai ai ona latou faaaogaina e fai ma faamanatu i le taimi o a latou suesuega o tusitusiga paia.
Ua faaali atu Iesu i Ona soo ma faailoa atu ia i latou Lona tino toetu
Faamatala atu, o soo sa faatasi ma Iesu i le ala i Emau na toe foi vave loa lava i Ierusalema ma toe faamatala atu le mea na la oo i ai i Aposetolo ma isi soo (tagai Luka 24:33–35).
Valaaulia tamaiti aoga e faitau leotele faatasi le mau tauloto i le Luka 24:36–39, ma vaavaai mo le mea na tupu a o lipoti atu e soo lo la’ua aafiaga i le au soo.
O le a le mea na tupu a o lipoti atu e soo lo la’ua aafiaga?
O le a le mea na valaaulia e Iesu Ona soo e fai e fesoasoani ai ia latou malamalama sa na o se agaga o Ia ae e i ai sona tino faitino?
O a ni aoaoga faavae e mafai ona tatou aoao mai i nei fuaiupu? (E ono faailoa mai e tamaiti aoga ni aoaoga faavae eseese, ae ia mautinoa e faamamafa atu faapea, O Iesu Keriso o se tagata ua toetu e i ai se tino o aano ma ivi. Tusi le aoaoga faavae lea i luga o le laupapa, tagai foi MF&F 130:22.)
Valaaulia ni nai tamaiti aoga e faasoa mai a latou molimau i le Toetu o le Faaola ma faamatala mai pe aisea e taua ai lenei aoaoga faavae ia i latou, pe valaaulia i latou e faasoa mai mea sa latou tusia i a latou api talaaga mo le suesueina o tusitusiga paia mo le galuega faatino 3 mai le Iunite 12: Lesona o le aso 3. Faaiu i le molimau atu i le moni o le Toetu o Iesu Keriso.
Faamatala atu i tamaiti aoga a’o latou suesueina le Ioane 2–6, o le a latou aoao i tali i fesili nei: O le a le vavega lautele muamua lava a Iesu? Na faapefea ona fesoasoani i Lona tina? Aisea na Ia faamama ai le malumalu? O ai na uluai tautino atu i ai e Iesu o Ia o le Mesia? O le a le mea na Ia faailoa atu i lenei fafine e uiga i lona olaga lea e na o Ia e mafai ona iloa? Asiea na faasino ai e le Faaola ia te Ia lava o le vai ola ma le Areto o le Ola? O le a faitau foi tamaiti aoga e uiga i le galuega a Iesu Keriso i le mamalu ma le mana.
