Folasaga i le Tusi Faalauaitele a Iuta
Aisea e suesueina ai lenei tusi?
O le Tusi Faalauaitele a Iuta o loo faamatala ai vaega o le liliuese na galulue i le uluai Ekalesia. A o suesue e tamaiti aoga lenei tusi, e mafai ona latou aoao ai i auala e iloatino ai i latou o e saili e faaliliu ese soo o Iesu Keriso mai le faatuatuaga. E mafai foi ona lagona ai e tamaiti aoga le taua o le finau faamaoni atu mo le faatuatuaga ma tumau faamaoni i ai.
O ai na tusiaina lenei tusi?
O le tusitala o lenei tusi ua faailoa mai o ia lava o “Iuta, o le auauna a Iesu Keriso, o le uso foi o Iakopo” (Iuta 1:1). E tusa ai ma le talafaasolopito, o le tusitala ua malamalama ai ai o Iuta le uso o Iesu Keriso la te tina faatasi (tagai Mataio 13:55; Mareko 6:3; Bible Dictionary, “Jude”). O Iuta sa mautinoa lava o se tagata o le Ekalesia na maualuga lona tulaga i Ierusalema, ma atonu na femalagaa’i o ia o se faifeautalai (tagai Galuega 1:13–14; 1 Korinito 9:5). E le o i ai se faailoaga po o le a le tofi o le perisitua na umia e Iuta, ae o le tusi lava ia ua fautuaina mai ai, na ia umia se tulaga o le pulega lea na agavaa ai o ia e tusia ia tusi o fautuaga.
O anafea ma o fea foi na tusia ai lenei tusi?
Tatou te le iloa po o fea na tusia ai le Tusi a Iuta. Afai na tusia moni lenei tusi e Iuta le uso o Iesu, atonu la na tusia i le va o le T.A. 40 ma le 80.
O ai na tusi i ai, ma pe aisea foi?
O le Tusi a Iuta na talanoa atu i Kerisiano faamaoni—“i e ua faapaiaina e le Atua le Tama, ma leoleoina e Iesu Keriso” (Iuta 1:1). Na ta’ua e Iuta o lona faamoemoega, o le uunaia lea o lana au faitau e “faamalolosi ona finau mo le faatuatua” e faasaga i aoao e le mama o e na ulufale atu i le Ekalesia ma faalauiloa atu ni amioga le mama ma aoaoga sese na faapea ona teenaina ai le Alii o Iesu Keriso (Iuta 1:3).
O a nisi o vaaiga iloga o lenei tusi?
E ui lava o se tasi lea o tusi aupito puupuu i le Feagaiga Fou, ae o le Tusi a Iuta o loo i ai faamatalaga e le o maua i se isi lava mea o le Tusi Paia. Na tusi Iuta e uiga i “o agelu foi o e na le taofi i lo latou mamalu” (fuaiupu 6; tagai foi Aperaamo 3:26), e uiga i se finauga i le va o Mekaeli ma Lusifelo i le tino o Mose (fuaiupu 9), ma e uiga i se valoaga a Enoka e uiga i le Afio Mai Faalua o le Faaola (fuaiupu 14–15; tagai foi Mose 7:65–66).
Na ta’u mai e Elder Bruce R. McConkie o le Korama a Aposetolo e Toasefululua nisi o vaaiga na tulaga ese ai le Tusi a Iuta:
“I le Tusi Paia atoa, e na’o Iuta lava ua faasaoina mo i tatou le manatu e faapea, o le muai olaga sa avea ma o tatou mamalu muamua ma na i ai nisi o agelu sa le’i tumau faamaoni i le muai olaga.
“O ia lea tatou te liliu atu i ai mo lo tatou malamalama itiiti e uiga i le finauga i le va o Mekaeli ma Lusifelo e uiga i le tino o Mose.
“Ua na’o ia foi ua tusia le valoaga matagofie a Enoka e uiga i le Afio Mai Faalua o le Atalii o le Tagata” (Doctrinal New Testament Commentary, 3 vols. [1965–73], 3:415).
O upu a Iuta e maa’i e faasaga ia i latou o e tetee i le Atua ma Ana auauna ma faasaga ia i latou o e na faia tapuaiga le mama i tupua ma faapea mai ua latou saoloto mai le manaomia ona usitai i poloaiga a le Atua, e aofia ai le tulafono o le ola mama. Na faamatala mai e Iuta nisi o uiga o nei tagata piopio.
Otootoga
Iuta 1 Ua apoapoai atu Iuta i tagata o le Ekalesia ia “faamalolosi ona finau mo le faatuatua” (Iuta 1:3). Ua ia faamalamalama mai e faapea, ua fetolofi faalilolilo atu tagata i totonu i le Au Paia ma ua faasalalauina ia aoaoga faavae pepelo ma faalauiloa atu amioga faatiapolo. Ua lapatai atu Iuta e uiga i faamasinoga e oo mai i luga o i latou o e liliu ese mai le Atua. Ua fautuaina e Iuta tagata o le Ekalesia ia atiina ae o latou faatuatua ma “faatumau ia [i latou lava] i le alofa o le Atua” (Iuta 1:21).