2 Peteru–Iuta (Iunite 30)

Anomea o Sauniuniga mo le Faiaoga o Suesuega i le Aiga

Aotelega o Lesona Suesueina i le Fale i Aso Taitasi

O aotelega o loo i lalo o aoaoga faavae ma mataupu faavae ua aoaoina e tamaiti aoga ao latou suesue i le 2 Peteru–Iuta (iunite 30) e lei fuafuaina o se vaega e aoaoina o lau lesona. O le lesona e te aoao atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tagata aoao.

Aso 1 (2 Peteru)

Na tusia e le Aposetolo o Paulo le tusi lenei i le Au Paia e fesoasoani ia i latou i le ogatotonu o sauaga, tofotofoga, ma le liliuese i totonu o le Ekalesia. A o suesue e tamaiti aoga upu a Peteru, na latou aoao ai e maua mai e perofeta tusitusiga paia e ala i le Agaga Paia, ma e taumafai faiaoga pepelo e faasese i tatou i le talitonu o le agasala e taitai atu ai i le saoloto sili atu. Na aoao foi e tamaiti aoga e mafai ona tatou saunia mo le Afio Mai Faalua o le Faaola e ala i le ola i ni olaga lelei ma vaavaai atu ma le naunautai mo Lona afio mai.

Aso 2 (1 Ioane)

Mai le 1 Ioane, na aoao ai e tamaiti aoga afai tatou te maua ma mulimuli i aoaoga a perofeta ma aposetolo, e mafai ona tatou maua le mafutaga ma le Tama ma le Alo. Ma le isi, na latou aoao ai a tatou alolofa i le Atua, o le a tatou alolofa i isi.

Aso 3 (2 Ioane–3 Ioane)

I isi tusi e lua a le Aposetolo o Ioane i le Au Paia, sa faaauau ai ona ia faailoa atu le popole i aafiaga o le liliuese i le Ekalesia. Mai i nei tusi na aoao ai e tamaiti aoga, afai tatou te tausia poloaiga ma mataala, e mafai ona faaauau pea ona tatou olioli i faamanuiaga o le talalelei ua tatou maua, ma afai tatou te mulimuli i le aoaoga faavae a Keriso, o le a faatasi le Tama ma le Alo ma i tatou. Na aoaoina foi e tamaiti aoga o le ola i le talalelei e aumaia ai le olioli e le gata ia i tatou lava ae i isi foi, ma e tatau i tagata o le Ekalesia ona talia ma lagolago i auauna uma a le Alii.

Aso 4 (Iuta)

A o suesue e tamaiti aoga le tusi a Iuta i le Au Paia o e sa feagai ma feteenaiga ogaoga, na latou aoaoina ai o soo o Iesu Keriso e tatau ona finau malosi atu mo le talalelei a Iesu Keriso e faasaga i aoaoga pepelo ma faiga piopio. Na aoaoina foi e tamaiti aoga o aposetolo ma perofeta e lapataia i tatou e uiga i, ma fesoasoani ia tatou iloa i latou o e taumafai e faavaivai o tatou faatuatua ma le usiusitai, ma e mafai ona tatou tumau faamaoni i le faatuatua e ala i le atinae o o tatou olaga i luga o le talalelei a Iesu Keriso.

Folasaga

Na uunaia e le Aposetolo o Peteru le Au Paia ina ia faateleina o latou malamalama ia Iesu Keriso e ala i le saili ia avea e pei o Ia. Sa ia faamautinoa atu ia i latou, o lenei tuputupu a’e faaleagaga e mafai ona fesoasoani e “faamauina [lo latou] valaaulia ma [lo latou] filifilia” (2 Peteru 1:10).

Fautuaga mo le Aoaoina Atu

2 Peteru 1:1–11

Ua aoao mai Peteru i le ala e aafia ai i le natura paia o Iesu Keriso

Manatua: I le talanoaina o le mataupu faavae lenei ma fuaitau o mau, ia faaeteete e aua le talanoaina ni autu e faatatau i sauniga ma aoaoga faavae o le malumalu.

A o le’i amataina le vasega, tusi le faamatalaga lenei i luga o le laupapa (mai le “The Will Within,” Ensign, Me 1987, 68):

“O le tatou galuega, o le avea o i tatou lava ma tagata e sili ona lelei” (Peresitene Thomas S. Monson).

Vaevae tamaiti aoga i ni paga. Valaaulia i latou e faitau le faamatalaga o loo i le laupapa ma talanoa i fesiil nei ma a latou paga:

O le a lou manatu i le uiga o le saunoaga a Peresitene Monson o le avea “o i tatou lava ma tagata e sili ona lelei”?
Aisea e te manatu e taua ai le avea o i tatou lava ma tagata e sili ona lelei?
O le a se mea e mafai ona taofia i tatou mai le avea ma o tatou tagata sili ona lelei?

Valaaulia tamaiti aoga e vaavaai mo se upumoni a o latou suesue i le 2 Peteru 1 e mafai ona fesoasoani latou te iloa ai ona avea o i latou lava ma tagata e sili ona lelei.

Aotele le 2 Peteru 1:1–2 e ala i le faamalamalama atu na tusi atu Peteru i tagata o le Ekalesia o e na i ai le faatuatua ia Iesu Keriso ae o e atonu na tofotofoina e toe foi i auala agasala a le lalolagi.

Valaaulia se tamaitiiti aoga e faitau leotele le 2 Peteru 1:3–4. Fai atu i le vasega e mulimuli i le faitauga, ma vaavaai mo le mea na aoao atu e Peteru e fesoasoani ai i le Au Paia ia tumau faamaoni i a latou molimau e uiga i le Faaola.

E tusa ai ma nei fuaiupu, o le a le mea na aoao atu e Peteru i le Au Paia?
O le a le uiga o le “ia tofusia faatasi i le amio Atua”? (2 Peteru 1:4).

Valaaulia tamaiti aoga e faitau filemu le 2 Peteru 1:5–7, ma vaavaai mo uiga auaumama o Iesu Keriso na valaaulia e Peteru le Au Paia e atiina ae. Ona fai atu lea i tamaiti aoga e lisi ia uiga auaumama latou te maua i luga o le laupapa. Mafaufau e valaaulia tamaiti aoga e su’e i se lomifefiloi ia uiga o nisi o nei uiga auaumama latou te fia malamalama atili i ai.

Valaaulia tamaiti aoga e mafaufau i ni faataitaiga o se taimi na faaalia ai e le Faaola se tasi o nei uiga auaumama paia. Fai atu i nisi o tamaiti aoga e lipoti mai o latou manatu i le vasega.

Tusi le mataupu faavae e le uma lenei i luga o le laupapa: A o tatou atiina ae ni uiga auaumama paia i totonu ia i tatou lava, o le a faapea ona tatou …

Valaaulia se tamaitiiti aoga e faitau leotele le 2 Peteru 1:8–9. Fai atu i le vasega e mulimuli i le faitauga, ma vaavaai mo se faamanuiaga e mafai ona tatou maua a o tatou atiina ae uiga auaumama paia o le Faaola.

O le a se faamanuiaga e mafai ona tatou maua a o tatou atiina ae ia uiga auaumama paia? (A uma ona tali mai tamaiti aoga, faauma le faamatalaga o loo i le laupapa ina ia faitauina faapenei: A o tatou atiina ae ni uiga auaumama paia i totonu ia i tatou lava, o le a faapea ona tatou iloa Iesu Keriso.)
Aisea e te manatu ai, o le atiina ae o uiga auaumama e fesoasoani tatou te iloa ai Iesu Keriso?

Valaaulia se tamaitiiti aoga e faitau leotele le 2 Peteru 1:10–11. Fai atu i le vasega e mulimuli i le faitauga, ma vaavaai mo se isi faamanuiaga e mafai ona oo mai ia i latou o e filiga i le atiina ae o uiga auaumama paia.

O a faamanuiaga e mafai ona oo mai ia i latou o e filiga i le atiina ae o uiga auaumama paia o Iesu Keriso? (Faamalamalama atu o le fuaitau “ia faamauina lo outou valaaulia ma lo outou filifilia” [fuaiupu 10] o lona uiga ia maua i lenei olaga le faamautinoaga a le Atua o le a e maua le ola e faavavau. Na faatatau atu foi Peteru i lenei mea o “le upu o le valoaga e sili ona mausali” [2 Peteru 1:19]. Tagai foi i le MF&F 131:5.)
O le a se mataupu faavae e mafai ona tatou aoao mai i nei fuaiupu e uiga i le pogai e tatau ona tatou filiga ai i le atiina ae o o tatou gafatia paia? (Atonu e faaaoga e tagata aoga ni upu eseese, ae ia mautinoa latou te faailoa mai le mataupu faavae lenei: Afai tatou te filiga i le atiina ae o o tatou gafatia paia a o tatou i ai i lenei olaga, e mafai ona tatou maua le faamautinoaga a le Atua o le ola e faavavau. Tusi lenei mataupu faavae i luga o le laupapa.)

Valaaulia tamaiti aoga e mafaufau i ni tagata latou te iloa o e o loo taumafai ma le filiga e atiina ae uiga auaumama faaKeriso.

O le fea o uiga auaumama faaKeriso na atiina ae e tagata na e mafaufau i ai?
O a ni auala na fesoasoani ai a latou taumafaiga ma uiga auaumama ia i latou ma isi o loo siomia i latou?

Atonu e te manao e faasoa atu lau molimau e faapea, o le atiina ae o nei uiga auaumama e fesoasoani tatou te iloa ai Iesu Keriso ma saunia ai i tatou e maua le ola e faavavau.

Valaaulia tamaiti aoga e tusi i a latou api o le vasega po o api talaaga mo le suesueina o tusitusiga paia se tasi o uiga auaumama paia e sili ona latou mananao e atiina ae. Fai atu ia i latou e tusi se faatinoga faapitoa e mafai ona latou faia e atiina ae ai lena uiga auaumama.

Iunite e Sosoo ai (Faaaliga 1–11)

Fesili atu i le vasega pe ua latou faalogo i le upu Apokalifa. Faamalamalama atu, o le tusi o Faaaliga e masani ona taua o le Apokalifa, o le upu faaEleni mo le “faailoaga.” I le tusi o Faaaliga o loo faamatalaina ai e le Aposetolo o Ioane se faaaliga vaaia na ia maua lea e aofia ai le tele o valoaga e uiga i o tatou aso ma mea e tutupu i le lumanai, e aofia ai le Afio Mai Faalua o Iesu Keriso ma le iuga o le lalolagi. O le tele o le faaaliga a Ioane e aofia ai faatusa. Valaaulia tamaiti aoga e vaavaai mo faatusa o loo faaalia ai le manumalo mulimuli o le lelei e faatoilalo ai le leaga, a o latou suesue i le tusi o Faaaliga.