Anomea o Sauniuniga mo le Faiaoga o Suesuega i le Fale
Aotelega o Lesona o Suesuega i le Fale i Aso Taitasi
O otootoga o aoaoga faavae ma mataupu faavae nei sa aoaoina e tamaiti aoga ao latou suesueina leMareko 10–Luka 4 (iunite 9) e le o faamoemoeina e aoao atu o se vaega o lau lesona. O le lesona e te aoaoina atu e taulai atu na o ni nai aoaoga faavae ma matupu faavae nei. Mulimuli i musumusuga a le Agaga Paia ao e mafaufau i manaoga o au tamaiti aoga.
A o aoao le vasega e uiga i le valaaulia a le Faaola mo tamaiti e o mai ia te ia, sa latou aoaoina ai a tatou taliaina Lana talalelei e faapei o tamaiti laiti, o le a tatou saunia e ulufale atu i le malo o le Atua. A o latou faitau e uiga i le apoapoaiga a Iesu Keriso i le taulealea mauoa, sa latou iloa ai ona o Lona alofa ia i tatou, o lea o le a fesoasoani ai le Alii ia tatou iloa le mea tatou te le o faia i a tatou taumafaiga e mulimuli ia te Ia, ma afai tatou te ole atu i le Alii, o le a Ia aoao i tatou i mea e manaomia ona tatou faia ina ia maua ai le ola e faavavau. O tala i le fafine ua oti lana tane na foai atu ana tupe iti ma Maria o uuina le Faaola, sa fesoasoani e aoao ai e tagata aoga afai tatou te naunau e foai atu a tatou mea uma ua i ai i le Alii, o le a Ia taliaina a tatou foai tusa lava pe foliga e laitiiti pe a faatusatusa i foai a isi, ma e fiafia le Faaola pe a tatou foai atu ia te Ia a tatou mea silisili.
I lea lesona sa suesue ai e tagata e uiga i le folafolaga a le agelu o Kaperielu faapea o le a maua se atalii o Sakaria ma Elisapeta. Na ta’u atu e Kaperielu ia Maria o le a avea o ia ma tina o le Alo o le Atua. Mai nei mau sa aoaoina ai e tagata aoga upumoni nei: O afioga a le Alii e tulei mai e ala mai i Ana auauna o le a faataunuuina i o latou vaitau. O Iesu Keriso o le Alo o le Atua le Tama. E leai se mea e le mafaia e le Atua. Afai tatou te taumafai ma le faamaoni e faataunuu a tatou matafaioi mai le Alii, e mafai e Ia ona faia mea sili i o tatou olaga.
A suesue le vasega e uiga i le soifua mai o Iesu Keriso, sa latou aoaoina faapea talu ai sa soifua mai le Faaola i le lalolagi, e mafai ona tatou maua le olioli sili. Sa latou aoaoina foi faapea a tatou manaomia faatonuga mai le lagi, e mafai ona tatou maua a tatou lava molimau ia Iesu Keriso, ma a tatou maua a tatou lava molimau ia Iesu Keriso, o le a tatou mananao e faasoa atu a tatou molimau i isi. A o suesue le vasega e uiga i le talavou o Iesu, sa latou iloa ai e mafai ona tatou mulimuli i le faataitaiga a Iesu e ala i le mauaina o le poto ma e ala i le tuputupu ae faaletino, faaleagaga, ma faaleagafesootai.
I le lesona lenei sa aoao ai e le vasega e uiga ia Ioane le Papatiso ma le papatisoga o Iesu Keriso. Sa latou aoao ai foi e uiga i le tautinoga a Iesu i Nasareta o Ia o le Mesia. Mai nei tala sa aoao ai e tagata aoga upumoni nei: E tuueseese e Iesu Keriso e amiotonu mai e amioleaga. O Iesu o le Mesia o le sa auina mai e faamalolo i e loto momomo ma laveai i latou ua noanoatia faaleagaga. A tatou faaalia lo tatou faatuatua ia Iesu Keriso, e mafai ona tatou vaai ua tutupu vavega.
Folasaga
E mafai ona fesoasoani lenei lesona e malamalama ai le vasega i nisi o mea na puapuagatia ai Iesu Keriso o se vaega o Lana Togiola. E le gata i lea, o le a malamalama foi le vasega i nisi o mafuaaga na puapuagatia ai le Faaola mo i tatou.
Ua amata e Iesu Lana Togiola a o Ia mafatia i Ketesemane mo a tatou agasala; sa faalataina o Ia e Iuta le Sekara ma sa aumai i luma o taitai Iutaia
Valaaulia tamaiti aoga e mafaufau loloto e aunoa ma se leo i fesili nei:
Pe i ai ea se taimi na e lagonaina ai e leai se tasi e malamalama ia te oe po o mea o e mafaufau i ai?
Pe i ai ea se taimi na e lagonaina ai e le mafai ona faamagaloina oe i au agasala ua mavae?
Valaaulia le vasega e vaavaai mo upumoni a o latou suesue i leMareko 14ia e mafai ona fesoasoani i se tasi atonu o i ai nei lagona.
Valaaulia se tamaitiiti aoga e faitau leotele le Mareko 14:32–34. Fai atu i le vasega e mulimuli i le faitauga, ma vaavaai pe o a lagona o le Faaola i le Faatoaga o Ketesemane.
O a lagona o le Faaola i le Faatoaga o Ketesemane?
A maea ona tali mai tamaiti aoga, tusi le faamatalaga lea i le laupapa: matautuia, atuatuvale, matua tiga.
Faamatala o nei fasifuaitau e faasino i puapuaga na oo i ai Iesu Keriso o se vaega o Lana Togiola.
O a mea e mafai e nei fasifuaitau ona aoaoina ai i tatou e uiga i le Togiola a Iesu Keriso? A maea ona tali mai tamaiti aoga, tusi le upumoni lea i le laupapa: E avea o se vaega o Lana Togiola, sa puapuagatia ai Iesu Keriso ma matua tiga i le Faatoaga o Ketesemane.
Ina ia fesoasoani i tagata aoga ia malamalama i lenei aoaoga faavae, valaaulia se tagata e faitau leotele le saunoaga lenei a Elder Neal A. Maxwell o le Korama a Aposetolo e Toasefululua.
Ata
Elder Neal A. Maxwell
”I Ketesemane, i le puapuaga o Iesu, sa amata ona ia ’matautuia’(Mareko 14:33), pe i le faa-Eleni, ua ’maofa’ ma ’ofotele.’
”Sei faauta, ua ’maofa’ Ieova, le Tufuga o le lalolagi lenei ma lalolagi uma! … Sa Ia lei silafia muamua le auala tonu ma le tiga e fai ai le togiola! “O lea, ina ua oo ifo ai le tiga atoatoa ia te ia, sa sili atu, sili atu lona tiga tele, nai lo le mea na ia silafia! E leitioa alu ifo se agelu e faamalosi ia te ia! Tagai Luka 22:43.
“Sa oo ifo i le Alo alofa le pona ma atoatoa le mamafa o agasala—ua mavae atu ma le taimi nei ma le lumanai—! Sa faaopoopo foi i ai o tatou vaivaiga ma tiga uma, i le matuia o le Togiola. Tagai Alema 7:11–12; Isa. 53:3–5; Mata. 8:17.) …
”Mata na ia faamoemoe i se mamoe o lavelavea i le laau filifili i le taimi o lona puapuaga tele? Ou te le iloa. “… O Lona mafatia—le, mamafa e le mafaatusalia—na alaga atu ai Lona agaga i le satauro, o se alaga o le tuulafoaiina. (Tagai Mata. 27:46.) …
”O le Togiola ofoofogia o le galuega aupito sili lea ona taua o le talafaasolopito o tagata. O le poutu lea e tasi ua taula i ai mea uma. Ae na taula i le lotomaualalo faaleagaga o Iesu!” (“Gauai Atu,” Liahona, Iulai 1985, 67–69).
Valaaulia ni nai tagata e feauaua’i i le faitauina leotele mai o le Mareko 14:35–42. Fai atu i le vasega e mulimuli i le faitauga, ma vaavaai mo mea na faia e le Faaola ona o le ogaoga o Ona mafatiaga.
O a mea na faia e le Faaola ona o le ogaoga o Ona mafatiaga? (Fesoasoani i le vasega ia malamalama na matuai matuia puapuaga o Iesu o lea na Ia ole atu ai pe mafai ona Ia le oo i ai.)
Tusi ia fuaitau nei i luga o le laupapa: Na puapuagatia Iesu Keriso … ina ia Ia …
Faamatala e mafai ona fesoasoani ia fuaitau o isi mau tatou te malamalama ai i mafatiaga o Iesu Keriso ma le mafuaaga na Ia naunau ai e mafatia mo i tatou.
Tusi mau faasino nei i luga o le laupapa: Isaia 53:3–5 ma leAlema 7:11–13. Vaevae le vasega i paga, ona valaaulia lea o i latou e faitau faatasi ia fuaiupu, ma vaavaai mo mea na mafatia ai le Faaola ma pe aisea na mafatia ai. Fai i le vasega e tusi i a latou api po o api talaaga mo le suesueina o tusitusiga paia pe faapefea ona latou faamaeaina le fasifuaitau na tusia i luga o le laupapa e faaaoga ai mea latou te aoao mai le Isaia 53:3–5 ma le Alema 7:11–13. (Atonu e manaomia lou faamatala atu o le upufesoasoanii leAlema 7:12 o lona uiga e faanatinati e avatu se toomaga pe alu e fesoasoani i se tasi.)
A uma ua lava se taimi, valaaulia le vasega e lipoti mai pe na faapefea ona latou faamaeaina le fasifuaitau. O a latou tali e tatau ona pei o lea: Na mafatia Iesu Keriso i o tatou tiga, puapuaga, tofotofoga, ma’i, vaivaiga, ma faanoanoaga ina ia silafia ai e Ia le ala e fesoasoani mai ai. Sa mafatia Iesu Keriso mo a tatou agasala ina ia mafai ai e Ia ona soloiesea a tatou solitulafono. Faamanatu i le vasega o mafatiaga o le Faaola mo agasala a tagata na amata i Ketesemane ma sa faaauau atu ai ma taualuga ai i Lona Faasatauroga i luga o le satauro.
Ina ia fesoasoani ia lagonaina e le vasega le taua o le upumoni faapea e avea o se vaega o Lana Togiola, sa puapuagatia Iesu Keriso ma tiga i le Faatoaga o Ketesemane, fuafua e faaali le vitio “Special Witness—Elder Holland” (2:38), lea o loo molimau mai ai Elder Jeffrey R. Holland o le Korama a Aposetolo e Toasefululua i puapuaga o le Faaola i Ketesemane. O loo maua lenei vitio i le LDS.org.
E mafai faapefea e le iloaina o mea na mafatia ai le Faaola ma le mafuaaga na Ia mafatia ai ona fesoasoani ia te oe pe a e feagai ma tofotofoga, tiga, ma puapuaga? (Tagai MF&F 45:3–5.)
O le a se taimi na e lagonaina ai le fesoasoani a le Faaola ia te oe i se taimi o le tiga, ma’i, po o le faanoanoa?
O a ni lagona na e oo i ai a o e salamo ma lagonaina ua soloiesea au agasala (pe tape) e ala i le Togiola a Iesu Keriso?
Otooto leMareko 14:43–16:20i le faamatala faapea na molia Iesu i se faamasinoga e le tusa ai i luma o le au Saneterini (taitai Iutaia) ma faasalaina ai i le oti. Ina ua mavae le maliu o le Faaola i luga o le satauro ma sa toetu mai, sa faaali atu o Ia i Ana Aposetolo ma auina atu i latou e talai atu, ma sa folafola atu ia i latou o le a mulimuli atu faailoga ia i latou o e talitonu. (Manatua: O le maliu, tanuga, ma le Toetu o Iesu Keriso ua uma ona aoao auiliili a o suesue e le vasega le Mataio 27–28.)
Fai atu i se tamaitiiti e faitau leotele le Mareko 16:15. Fai atu i le vasega e mulimuli i le faitauga, ma vaavaai mo le poloaiga na tuuina atu e le Alii i Ana Aposetolo.
E mafai faapefea ona e fesoasoani e faataunuu le poloaiga e talai atu le talalelei i le ”lalolagi uma” i le taimi nei ma i le lumanai?
Atonu e te manao e faaiu lenei lesona i le molimau atu e uiga i upumoni sa outou talanoaina i le aso.
Fai i le vasega e mafauafu pe na i ai se taimi na latou tau manatunatu ai pe mafai ona faamagaloina i latou ai a latou agasala. Faamatala a o latou suesueina le Luka 5:1–10:37 i le vaiaso a sau, o le a latou aoao ai e uiga i le naunau o le Faaola e faamagalo a latou agasala ma mea e mafai ona latou faia ina ia faamagaloina ai.
