I Kana, sa faatino ai e le Faaola le uluai vavega i nofoaga faitele o Lana galuega i le lalolagi, ina ua Ia faaliliuina le vai i le uaina. Sa afio atu Iesu Keriso i Ierusalema mo le Paseka. Sa ia faamamaina le malumalu i le tutulieseina o le au faatau tupe sa solivaleina le maota o Lona Tama.
Valaaulia tamaiti aoga e mafaufau e uiga i ”uluai” nei atonu na tutupu i o latou olaga: o lo latou uluai aso i le aoga, o a latou uluai galuega, o le uluai taimi na latou manatua ai le lagonaina o le Agaga Paia.
Aisea tatou te tuu ai i nisi taimi le faataua i nei mea ma isi ”uluai” i o tatou olaga?
Faamatala atu i tamaiti aoga a’o latou suesueina le Ioane 2:1–11, o le a latou aoao e uiga i le uluai vavega na tusia lea na faatino e Iesu i le taimi o Lana galuega i le lalolagi. Valaaulia tamaiti aoga e vaavaai pe aisea e ono taua ai le uluai vavega ua tusia.
Faamatala atu, i sina taimi puupuu ina ua uma ona papatisoina Iesu, sa o atu ai ma Ona soo i se tausamiga o le faaipoipoga i Kana, o se nuu e lata i Nasareta le nuu o Iesu. Valaaulia se tamaitiiti aoga e faitau leotele le Ioane 2:1–3 ma fai i le vasega e vaavaai po o le a le faafitauli na tulai mai i le taumafataga o le faaipoipoga.
O le a le faafitauli na tulai mai i le taumafataga o le faaipoipoga?
Faamatala o le uaina o se meainu masani i se taumafataga o se faaipoipoga. O nisi taimi e faaauau ai mo ni aso se tele le taumafataga o le faaipoipoga. O le maea o le uaina o se tulaga maasiasi lea mo le au talimalo o le taumafataga. Sa i ai ia Maria sina lagona e i ai lana matafaioi mo le taumafataga, o lea la ina ua uma le uaina, sa ia fesootai atu i lona Alo ma talosagaina Lana fesoasoani i se taumafaiga e taofia le faamaasiasia o le aiga sa pule i le tausamaaga. O le tali atu a Iesu na faaalia ai le faaaloalo ma le mutimuti alofa i le manao o Lona tina i le faaipoipoga.
Valaaulia se tamaitiiti aoga e faitau leotele le Ioane 2:4, e aofia ai le Faaliliuga a Iosefa Samita i le vaefaamatalaga a. Fai i le vasega e mulimuli ai ma vaavaai mo le tali a Iesu i Lona tina.
O le a le fetalaiga a Iesu e tali atu ai i Lona tina?
O faapefea ona faaalia i le tali a Iesu Lona faaaloalo mo Lona tina? (Sa lei gata ina fesili atu Iesu i Lona tina po o le a le mea na manao o ia Na te faia, ae sa Ia faaalia foi Lona naunau e fai. Atonu e manaomia lou faamatala atu, i ona po o Iesu, o le ”funa e” o se auala faaaloalo lea e ta’u ai se tina o se tasi.)
O le a le mea na faatatau i ai Iesu ina ua Ia fetalai, ”E le’i oo i lo’u itu aso”?
Fai atu i se tamaitiiti aoga e faitau leotele le Ioane 2:5, ma fai atu i le vasega e vaavaai mo le mea na fai atu ai Maria i auauna. Valaaulia tamaiti aoga e lipoti mai mea ua latou mauaina.
O le a le mea ua aoao mai ia i tatou e le faatonuga a Maria i auauna e uiga i lona faatuatua ia Iesu?
Valaaulia se tamaitiiti aoga e faitau leotele le Ioane 2:6–7 ma fai i le vasega e vaavaai mo mea na faatonu e Iesu ia auauna e fai.
O le a le mea na faatonu e Iesu ia auauna e fai?
Faamatala i ona po o Iesu, o vai maa e gaosia mai maa sa manatu i ai e mama a’ia’i mo le faaaogaina i sauniga faalelotu. O le tu masani a Iutaia e faamamaina i latou faalesauniga a o le’i talisua i se talisuaga e ala i le fufuluina o o latou lima e faaaoga ai le vai mai vai maa nei.
Ata
pou maamora
O vai maa maamora mai le Feagaiga Fou i ona po o Isaraelu
O le a le tele na faatutumu ai e auauna ia vai maa?
Ina ia fesoasoani ia malamalama tamaiti aoga i le tele o le vai i le vai maa, faaali atu se koneteina o matala e mafai ona tuu ai le kalone e tasi (po o le lita e tasi). Faamatala i tamaiti aoga o le ”paita” e tusa ma le iva kalone (po o le 34 lita), o lea la o vai maa e ono sa mafai ona tusa ma le 100 ma le 160 kalone (pe tusa foi o le 380 ma le 600 lita). Faatumu le koneteina i vai.
Valaaulia se tamaitiiti aoga e faitau leotele le Ioane 2:8, ma fai i le vasega e vaavaai mo mea na faatonu e Iesu ia auauna e sosoo ona fai. Fai atu i tamaiti aoga e lipoti mai mea ua latou mauaina. A o lipoti mai tamaiti aoga, lolo se ipu i totonu o le koneteina vai, ma uu i luga le ipu.
Ana fai o oe o se tasi o nei auauna, mata o a ni ou mafaufauga po o lagona a’o e avatuina se ipu i le pule o le tausamaaga, po o le taitai o le tausamaaga?
Fai i se tamaitiiti aoga e faitau leotele le Ioane 2:9–10 ma valaaulia le vasega e vaavaai mo mea na fai atu ai le pule o le tausamaaga ina ua uma ona tofo i le vai na avatu ia te ia.
O le a le mea na fai e Iesu i le vai?
O le a le tala a le pule o le tausamaaga e uiga i le uaina fou? (Faamatala atu, o le uaina sili e tele ina faaaoga i le amataga o le tausamaaga a’o le uaina ua uma le lelei sa faaaoga mulimuli i le tausamaaga.)
Faamatala atu, e lei aumaia lava e Iesu se faaliliuga patino o le uiga o le faatusa o lenei uluai vavega na tusia o Lana galuega i le tino. Peitai, e tele upumoni taua e mafai ona tatou aoao mai i lenei tala i le uluai vavega na tusia a Iesu.
Vaevae tamaiti aoga i ni vaega taitoalua pe taitoatolu. Valaaulia vaega taitasi e lisi i se fasipepa ni upumoni se tele e mafai ona latou aoaoina mai le Ioane 2:1–11. A uma ua lava le taimi, valaaulia se tagata mai vaega taitasi e faasoa mai i le vasega ia upumoni na faailoa mai e a latou vaega. Valaaulia se tamaitiiti aoga e avea ma se failautusi. Fai i le failautusi e tusi i le laupapa upumoni taitasi tulaga ese sa faasoa mai. O nisi nei o upumoni o ono i ai e mafai ona faailoa mai e tamaiti aoga: E i ai ia Iesu Keriso le mana i luga o elemene faaletino. Na silafia e le Faaola e i ai Sana misiona paia e faataunuu. Na faaalia e le Mesia Lona mana paia e ala i vavega. Na alofa ma faaaloalo le Alo o le Atua i Lona tina.
Valaaulia se tamaitiiti aoga e faitau leotele le Ioane 2:11, ma fai i le vasega e vaavaai po o le a le aafiaga o le au soo o Iesu ona o lenei vavega?
O le a le aafiaga o soo o Iesu ona o lenei vavega?
Lio le upumoni lenei i luga o le laupapa mai le lisi o upumoni na faailoa mai e tamaiti aoga: Jesus Christ has power over physical elements. (Manatua:Afai e le’i lisia e tamaiti aoga lenei upumoni, ia faaopoopo i le lisi.)
E faamalosia faapefea lou faatuatua ia Iesu Keriso i lou malamalama o ia Iesu Keriso le mana e pulea ai elemene faaletino?
O a isi tala sa tatou suesueina i le Feagaiga Fou o loo faapupula mai ai foi o ia Iesu Keriso le mana e pulea ai elemene faaletino? (O tali e mafai ona aofia ai ia mea nei: vavega e lua o areto ma ia [lima afe Mareko 6:33–44; fa afe: Mareko 8:1–9], faafilemuina o le matagi [Mareko 4:35–41], po o le savali i luga o le vai [Mataio 14:22–33].)
Valaaulia tamaiti aoga e ta’u mai igoa o taaloga sa latou taaalo ai i fafo a o laiti. A uma ona lisi mai ni taaloga, ona fai atu lea o le fesili lea:
E ui e taumamaina ma malie nei taaloga, ae pe e te lagonaina le toafilemu e taalo ai i laufanua o le malumalu?
Vaevae tamaiti aoga i ni vaega taitoalua. Valaaulia vaega taitasi e faitau le Ioane 2:12–17. A o latou faitau, fai i vaega e vaavaai mo ma talanoaina tali i fesilinei (tusi fesili nei i luga o le laupapa):
O ai na maua atu e Iesu i le malumalu?
E te manatu aisea na le fiafia ai Iesu?
O le a le mea na fai e Iesu e faasa’o ai le faafitauli?
A uma ua lava se taimi, faaali le ata o Iesu o Loo Faamama le Malumalu (Tusi Ata o le Talalelei [2009], nu. 51; tagai foi LDS.org), ma fai i ni nai vaega e lipoti mai a latou tali. Atonu e manaomia ona e faamatala atu o le fiaafe o tagata asiasi na o mai i Ierusalema mo le faamanatuina o le Paseka, na mananao e faatau ni manu e ofo atu ai taulaga i le malumalu o se vaega o la latou tapuaiga. Sa faafesuiai e le au faatau tupe ia tupe Roma ma isi mo tupe o le malumalu ina ia mafai ai ona faatau ni manu e osi ai taulaga, a o isi faatauoloa na faatauina atu manu sa manaomia. E ui ina sa manaomia le fefaatauaiga, ae o le faia o na ituaiga o pisinisi i le malumalu o se le faaaloalo ma le le migao.
O le a le upumoni e uiga i malumalu e mafai ona tatou aoao mai le fetalaiga a Iesu e uiga i le malumalu i le fuaiupu 16? (E tatau ona faailoa mai e tamaiti aoga se upumoni talitutusa i mea nei: O le malumalu o le maota o le Atua.)
O aauala ua avea ai malumalu ma maota o le Atua? (E mafai ona eseese tali a tamaiti aoga ae ia faaaofia ai manatu nei: O malumalu o nofoaga e mafai ona afio mai i ai le Atua, lea e mafai ona lagonaina ai le i ai o Lona Agaga, ma faatino ai sauniga e tusa ai ma Lana galuega o le faaolataga. O malumalu o nofoaga aupito paia i le lalolagi.)
Valaaulia se tamaitiiti aoga e faitau leotele le saunoaga lenei mai ia Peresitene Howard W. Hunter. Fai i tamaiti aoga e faalogologo pe na faapefea ona saofaga le malamalama o Iesu Keriso i le paia o malumalu, i Lana faaiuga e tutuliese le au faatau tupe ma le au faatauoloa mai le malumalu.
Ata
Peresitene Howard W. Hunter
“O le mafuaaga o le vevesi o loo taoto i na o nai upu lava e fa: ‘Maota a Lou Tama.’ Sa le o se fale masani; o le maota o le Atua. Sa faatuina mo le tapuaiga i le Atua. O se fale mo le ua migao lona loto. Sa faamoemoeina e avea o se nofoaga mo faavauvauga ma mafatiaga o tagata, o le faitotoa moni o le lagi. …O le faamamaluga e [Iesu] o Le Silisiliese ua tutuina ai se afi i lona agaga ma avatu ai i ana upu le malosi e tuia ai e faatausuai e pei o se pelu” (“Ia Paia Lou Suafa,” Ensign, Nov. 1977, 53).
Na faaalia faapefea i taga a Iesu Lona migao i le maota o Lona Tama?
Tusi le faamatalaga le maea lenei i luga o le laupapa: Tatou te faaalia le migao mo le malumalu e ala i le …
Vaevae tamaiti aoga i ni vaega taitoalua pe taitoatolu. Valaaulia vaega e tusi i se fasipepa ni auala latou te mafaia e faauma ai le faamatalaga. A uma se minute pe lua, fai i se vaega se tasi e faasoa mai la latou lisi i le vasega. A o faasoa mai le vaega muamua, fai i isi vaega e tuu se maka i autafa o mea taitasi o a latou lisi ua ta’u mai. Sosoo ai, ia faasoa mai e le isi vaega mea o i lana lisi e lei ta’ua mai e le vaega muamua. Toe fai foi le faiga lava lea seia faasoa uma mai ia vaega.
E mafai faapefea ona faaalia lo tatou migao mo le malumalu tusa lava pe tatou te le o i ai i totonu o le malumalu?
Valaaulia tamaiti aoga taitaotasi e tusi ia latou api po o api talaaga mo le suesueina o tusitusiga paia pe aisea ua latou manatu ai e taua lo latou faia o mea uma latou te mafaia, e faaalia ai le migao mo le malumalu. Valaaulia foi tamaiti aoga e tusi se sini e fai se mea se tasi e faaali ai le migao mo le malumalu. Uunai i latou e galulue i lenei sini.
Faasoa atu lau molimau i mataupu faavae na faailoa mai i le lesona i le aso.
Ata
aikona o mau tauloto
Toe Faamanatuina o Mau Tauloto
E mafai ona faaaoga lenei gaoioiga e folasia atu ai pe toe faamanatu se seti o fuaitau o mau tauloto. Filifili se numera o kata o mau tauloto, ma sauni e tufa atu i au tamaiti aoga. (Ia mautinoa e i ai ni kopi se tele o kata taitasi ina ia sili atu i le toatasi se tamaitiiti aoga e mauaina le fuaitau lava lea e tasi o le mau tauloto. (Atonu e te manao ia lava ni kata mo tamaiti aoga taitasi ina ia latou maua ni fuaitau eseese tailua pe taitolu.) Tufatufa atu ia kata i tamaiti aoga. Tuu atu i tamaiti aoga se taimi e suesue ai i fuaitau o mau tauloto, o le tusi, o upu autu, o le faamatalaga o le talaaga, o le aoaoga faavae po o le mataupu faavae, ma manatu mo le faaaogaaga o loo i kata taitasi. Faalau atu nisi o faaataataga mai kata (mo se faataitaiga, o upu mai le fuaitau o mau tauloto po o upu autu, faamatalaga o talaaga, aoaoga faavae po o le mataupu faavae, po o le faaaogaaga). O tamaiti aoga e i ai le kata e fesootai [ma na faaataataga] e tatau ona tutu i luga ma fai leotele le mau tauloto.
”E tele mau faasino i le Tusi Paia i le leaga o le ona ma meainu malolosi (mo se faataitaiga, tagai Faataoto 23:20–21; Isaia 5:11–12; Efeso 5:18). O nei fuaiupu e le o faasaina patino ai le faaaoga o le ava malosi, ae o loo tausalaina le soona faaloloto ma onaga. I o tatou taimi, sa faaalia mai ai e le Alii le Upu o le Poto, lea e faasa ai le faaaoga o meainu malolosi (tagai MF&F 89:4–7). E tatau ona tatou taumamao mai le faamasinoina o tagata o tisipenisione na muamua atu e ala i poloaiga na tuuina mai e le Alii ia i tatou i o tatou aso” (Tusitaiala a le Tagata Aoao o le Feagaiga Fou [Church Educational System manual, 2014], 208).
”O le tali atu a le Faaola i Lona tina atonu e foliga e lei fuafuaina e pei ona faitauina i le Fatuga a King James, ae i le Faaliliuga a Iosefa Samita ma le fatuga faa-Eleni o loo ta’u mai ai na Ia fetalai atu ma le faaaloalo. Na faamalamalama mai e Elder James E. Talmage (1862–1933) o le Korama a Aposetolo e Toasefululua faapea: ‘O le nauna o le ta’uga, ”Funa e,” e pei ona sa faaaoga ai e le atalii i lona tina atonu e foliga malo i o tatou taliga, a leai e le faaaloalo; ae o lona faaaogaaga o se faailoga moni o le faafeagai. … I le taimi, i vaaiga matautia mulimuli o Lona aafiaga i le tino, sa tautau ai Keriso ma maliu i le mafatiaga i luga o le satauro, sa Ia silasila ifo i lalo ia Maria, Lona tina o tagi ai, ma tuuina atu o ia i le tausiga a le aposetolo pele o Ioane, ma upu nei: “Sena e, faauta, o lau tama!” [Ioane 19:26]. Pe mafai ea ona mafaufau i ai faapea o lea taimi maualuga, o le popolega o le Alii mo le tina lea e le o toe mamao ona la valavala lea i le oti, na o faatasi ma se lagona o’oo’o nai lo le faamamaluga, agamalu ma le alofa?’ (Jesus the Christ, 3rd ed. [1916], 144–45).
”Ua fesoasoani foi le Faaliliuga a Iosefa Samita tatou te malamalama ai e le gata ina fesili atu Iesu i Lona tina po o le a le mea sa ia manao na te faia, ae sa Ia faaalia foi Lona naunau e fai: ‘Funa e, se a ea lau na ia te au? o le a ou faia’ (Faaliliuga a Iosefa Samita, Ioane 2:4 [i le Ioane 2:4, vaefaamatalaga a]). O le fesili ’Se a lau na ia te au?’ o lona uiga ’O le a le mea e te manao ou te faia?’ (Ioane 2:4),” (Tusitaiala a le Tagata Aoao o le Feagaiga Fou [Church Educational System manual, 2014], 208).
