Folasaga i Mau Tauloto

Ua filifilia e le Seminare ma Inisitituti o Aoaoga Faalelotu ni fuaitau o mau tauloto e 25 mo kosi taitasi e fa o le seminare. O nei fuaitau ua tuuina atu ai se faavae taua faaletusitusiga paia mo le malamalama ma le faasoaina atu o le talalelei ma mo le faamalolosia o faatuatua. O fuaitau o mau tauloto mo le vasega o le Feagaiga Fou o loo i lalo:

E uunaia tagata aoga o le seminare e atina ae se “taulotoina” o nei mau. O le a sili atu ona mafai ona e fesoasoani i au tagata aoga pe afai e te taulotoina foi nei mau. O le taulotoina o mau tauloto e aofia ai mea nei:

O le mauaina o nei fuaiupu e ala i le iloaina o tusi o mau faasino e fesootai i ai.
O le malamalama i le talaaga ma le anotusi o fuaitau o mau.
O le faaaogaina o mataupu faavae ma aoaoga faavae o le talalelei o loo aoaoina i fuaitau o mau.
O le taulotoina o fuaitau

Tau Soo, Faamoemoega, ma Metotia

Ao e fuafua e fesoasoani i tamaiti aoga e tauloto fuaitau o mau, o le a sili atu ona faamanuiaina oe pe ā e taua soo ia fuaitau o mau tauloto, faatumau ni faamoemoega talafeagai, ma faaaoga metotia e talafeauga ma auala eseese o le aoaoina.

O le taua soo ma le faia soo o le aoaoina o mau tauloto, o le a fesoasoani i tamaiti aoga e tuu ai upumoni i o latou mafaufau mo se taimi umi mo le faaaogaina i le lumanai. Atonu e aoga le faataoto atu o le auivi o le kosi aoaoina mo le tausaga, ma faia ai se fuafuaga e tuu atu soo ai avanoa i totonu o le potuaoga mo tamaiti aoga e tauloto ai fuaitau o mau tauloto. Ia atamai i le fuafuaina pe faafia ma po o le a foi le umi o le taimi e faaalu e fesoasoani ai i tagata aoga i le aoaoina o fuaitau o mau tauloto. Ia mautinoa e le faoa e gaoioiga mo le taulotoina o mau le faasologa i aso uma o le suesueina o tusitusiga paia. E mafai ona e filifili e faaalu ni nai minute i aso taitasi e toe faamanatu ai fuaitau o mau tauloto faatasi ma au tamaiti aoga. Pe mafai ona e filifili e tuuina atu se gaoioiga puupuu mo mau tauloto pe faatasi pe faalua i vaiaso taitasi mo le 10 i le 15 minute. E tusa lava po o a auala ua e fuafua e fesoasoani ai i tamaiti aoga e ao fuaitau o mau tauloto, ia fai soo ma ia talafeagai au taumafaiga.

Ia faavae ou faamoemoega mo le taulotoina o mau i gafatia o tamaiti aoga taitoatasi. O le taulotoina o fuaitau o mau tauloto e manaomia ai le taumafaiga o le vaega a le tagata aoao. Ia talanoa atu i tamaiti aoga o lo latou faamanuiaina i le taulotoina o mau tauloto, e faalagolago tele lea i lo latou uiga faaalia ma lo latou naunautai e galulue. Uunaia i latou e faatutu ni sini e tulei ai o latou gafatia i tulaga maualuluga atu. Ia nofouta i tamaiti aoga o e atonu e faafaigata ona taulotoina, ma ia naunau e fetuunai ou faamoemoega ma metotia faaleaoaoga e tusa ai ma manaoga o au tamaiti aoga.

Ina ia talafeuga ma se vaega lautele o uiga eseese ma sitali eseese o aoaoga, ia suisui auala e te faaaogaina e fesoasoani ai i tamaiti aoga e tauloto ia fuaitau o mau tauloto. E pei uma lava o le aoaoina atu ma le aoaoina mai o le talalelei, ia atamai i au filifiliga o gaoioiga ina ia mafai e le Agaga Paia ona lagolago i le taulotoina e tamaiti aoga o mau ma aoaoga faavae. O le a e tau i se vaega o metotia talafeagai mo le aoaoina atu o mau tauloto i totonu o le tusi lesona lenei. Mo nisi o metotia mo le aoaoina atu o le taulotoina o mau tauloto, tagai i le vaega e taua o “Gaoioiga o Suega Mau Tauloto” i lenei faaopoopoga.

Mau Tauloto i Mataupu Aoaoina

O loo tusia mau tauloto i totonu o le mataupu aoaoina i ni auala [eseese]. O se aikona o le mau tauloto e faailoa ai le taulimaina o fuaitau o mau tauloto i le lesona. O fuaitau o mau tauloto e faailoa atu ma talanoaina i le talaaga o mataupu lea o loo maua ai. O manatu faaopoopo mo le aoaoina atu o fuaitau o mau tauloto, o loo faaalia i le faaiuga o lesona o loo maua ai. O nei manatu faaopoopo mo le aoaoina atu, e fesoasoani e faapaleni ai elemene e fa o le taulotoina o le mau (o le mauaina, malamalama, faaaogaina, ma le taulotoina) e faatatau i mau taitasi. Mo se faataitaiga, afai e fesoasoani le lesona i tamaiti aoga ia malamalama ma faaaoga le fuaitau o le mau tauloto, o le manatu faaopoopo la mo le aoaoina atu o le mau o le a fesoasoani ia i latou i le mauaina po o le taulotoina o le mau.

E masani foi ona tuuina atu e le mataupu aoaoina ia gaoioiga e toe faamanatu ai mau tauloto, lea e mafai ona faaaogaina pe a lava le taimi, ma pe a ogatasi ma sini a lau vasega mo le taulotoina o mau. O nei toe faamanatu e mafai ona faaopoopo atu i gaoioiga mo le taulotoina o mau o loo lisiina i lenei faaopoopoga. Atonu e te faaaogaina ni taimi faaopoopo i le amataga po o le faaiuga o se lesona puupuu e fai ai se tasi o nei gaoioiga toe faamanatu.

Auala Fautuaina mo Mau Tauloto

Ina ia fesoasoani i tamaiti aoga i tomai o le mauaina, e mafai ona e fuafua e faalauiloa atu mau tauloto e 25 e lata i le amataga o le kosi ona galue lea i le faalolotoina o le taulotoina i le gasologa o le kosi. Pe e mafai foi ona e faailoa atu ni nai mau i masina taitasi ma taulai atu i le taulotoina o na mau i le aluga o lena masina. O folasaga faapena e mafai ona aofia ai le fautua atu i tagata aoga e faailoga fuaitau o mau tauloto i a latou lava kopi o tusitusiga paia, fesoasoani i tamaiti aoga e mafaufau i auala e manatua ai upu autu ma mau faasino, ma le faamalamalamaina o aoaoga faavae ma mataupu faavae o loo i ai i mau taitasi. E mafai foi ona e faaaofia ai tamaiti aoga i le faailoaina atu o fuaitau o mau tauloto e ala i le tofia o i latou e faaaoga mau i a latou sauniga lotu, po o le valaaulia o i latou e aoao atu i le tasi ma le isi le auala e manatua ma sue ai mau. Ia suesue i latou mo le manatuaina o fuaitau o mau tauloto e ala i ni suega pupuu faavaitaimi ma gaoioiga mo le sueina o mau (tagai i gaoioiga mo mau tauloto o loo i le faaopoopoga mo faataitaiga). E mafai ona maua se lisi o mau tauloto e 25 mo lenei kosi o suesuega i luga o faailoga tusi a le tamaiti aoga ma kata o mau tauloto.

Ina ia fesoasoani i tamaiti aoga i lo latou malamalama i fuaitau o mau tauloto, ia faamamafa atu nei mau pe a tau atu i ai i au lesona i aso taitasi. Atonu foi e te faaaogaina gaoioiga o mau tauloto o loo i lenei faaopoopoga e faateleina ai le malamalama o tamaiti aoga e uiga i, ma le gafatia ona faamatala upumoni o loo i ai i mau. Tuu atu i tamaiti aoga ni avanoa i faigalotu po o taimi i le vasega, e faamatala ai pe faapefea ona fesoasoani upumoni o loo i fuaitau o mau tauloto, ia i latou e malamalama lelei ai i Aoaoga Faavae Autu.

Ina ia lagolago atu i tamaiti aoga i lo latou faaaogaaga o upumoni o loo maua i fuaitau o mau tauloto, uunaia i latou e mulimuli i uunaiga a le Agaga Paia ina ia malamalama i auala e faaaoga ai upumoni o loo i mau i o latou olaga. Ina ia fesoasoani i tamaiti aoga ia galulue i upumoni ua latou aoaoina, e mafai ona e faapipiiina i luga o se laupapa puletini i le vasega se lui e faatatau i se fuaitau o mau tauloto. Pe e mafai foi ona e tuuina atu i tamaiti aoga ni avanoa i le vasega e faataitai ai ona aoao atu aoaoga faavae ma mataupu faavae o le talalelei, e faaaoga ai fuaitau o mau tauloto (tagai i gaoioiga mo mau tauloto i lenei faaopoopoga mo ni manatu). Atonu foi e te valaaulia tamaiti aoga e faaaoga ia mataupu faavae latou te aoaoina i lesona o loo i ai fuaitau o mau tauloto. Tuu atu i tamaiti aoga ni avanoa— i faigalotu po o isi taimi—e lipoti mai ai o latou aafiaga. O le a fesoasoani lenei mea e faateleina ai lo latou molimau e uiga i upumoni na latou aoaoina mai fuaitau o mau tauloto.

Ina ia fesoasoani i tamaiti aoga e tauloto mau tauloto e 25, e mafai ona e fuafuaina e tuuto atu e tauloto ia ni mau se lua pe tolu i masina taitasi i le vasega. E mafai foi ona e luiina tamaiti aoga e tauloto ni mau faapitoa i le fale (e mafai ona latou faia lenei mea ma o latou aiga pe tauloto atu ia mau i se matua po o se tagata o le aiga). E mafai ona e faia le taulotoga o se vaega o faigalotu i aso uma, e ala i le fai atu i le vasega e tauloto se mau po o le tuu atu o le taimi mo tamaiti aoga e tauloto ai i ni paga. O le tuu atu i tamaiti aoga o ni avanoa e tauloto ai fuaitau o mau tauloto i ni paga po o ni vaega laiti po o i luma o le vasega, e mafai ona fesoasoani latou te tali atu ai mo a latou lava taumafaiga. O gaoioiga mo mau tauloto o loo i lenei faaopoopoga, o loo aofia ai ni metotia eseese mo le taulotoina. Ia faaeteete ia fetuunai faamoemoega mo le taulotoga o mau i gafatia ma tulaga o tamaiti aoga taitoatasi. E le tatau ona faia ia lagona e tagata aoga le matamuli po o le lofituina pe afai e le mafai ona latou taulotoina se fuaitau o mau tauloto.