2 Peteru 2–3

Folasaga

Sa lapatai mai Peteru o perofeta ma a’oa’o pepelo e taitaieseina tagata. Sa ia valoia o aso e gata ai, o le a tauemu ai e amioleaga i e amiotonu ona o le talitonu e toe afio mai Iesu Keriso. Sa uunaia e Peteru le Au Paia ina ia saunia ma le maelega mo le Afio Mai Faalua o le Faaola.

Fautuaga mo le Aoaoina Atu

2 Peteru 2

Ua lapatai mai Peteru e uiga i le faaseseina e a’oa’o pepelo

Tusi le fesili lenei i le laupapa: Aisea atonu e filifili ai tagata e agasala e ui lava ina latou iloa e sese le mea o loo latou faia?

Valaaulia tamaiti aoga e mafaufau loloto i lenei fesili, ona fai atu lea i ni isi o i latou e lipoti mai a latou tali.

Faamatala atu, i le 2 Peteru 2 tatou te faitau ai, sa lapataiina e le Aposetolo o Peteru le Au Paia e uiga i tagata o e saili e taufaasese i latou. Valaaulia tamaiti aoga e vaavaai mo upumoni ao latou suesue i le 2 Peteru 2 e mafai ona fesoasoani ia i latou ia iloa ma aloese ai i mea taufaasese e faapea ona oo atu ai i le agasala.

Valaaulia se tamaitiiti aoga e faitau leotele le 2 Peteru 2:1–3. Fai atu i le vasega e mulimuli i le faitauga, ma vaavaai mo le lapataiga a Peteru e uiga ia i latou o e o le a taumafai e faasese le Au Paia.

O ai sa lapataia ai e Peteru le Au Paia?
O a mea e a’oa’o atu e na perofeta ma a’oa’o pepelo? (Faamalamalama atu o “damnable heresies” [fuaiupu 1] o aoaoga pepelo ma taufaaleaga.)
O a ni upumoni e mafai ona tatou a’oa’o mai ia Peteru e uiga i mea e taumafai a’oa’o pepelo e fai ia i tatou? (Fesoasoani i tamaiti aoga e faailoa mai se upumoni e tutusa ma lenei: O loo taumafai a’oa’o pepelo e faasese i tatou. Tusi lenei upumoni i luga o le laupapa.)

Valaaulia se tamaitiiti aoga e faitau leotele le saunoaga lenei mai ia Elder M. Russell Ballard o le Korama a Aposetolo e Toasefululua. Fai atu i le vasega e faalogologo po o a ni mea o loo a’oa’o mai e a’oa’o pepelo i aso nei ina ia mafai ona faasese ai i tatou.

Ata
Elder M. Russell Ballard

“O perofeta ma faiaoga pepelo o i latou ia ua faailoa mai e faapea o le Perofeta o Iosefa Samita o se taufaasese; latou te masalosalo i le Uluai Faaaliga o se mea e sao. Latou te faailoa mai e faapea, o le Tusi a Mamona ma isi tusi faavae e le o ni tusitusiga paia anamua. Latou te taumafai foi e toe faamatalaina le natura o le Aiga Atua, ma latou te teenaina e faapea na tuuina mai ma o loo faaauau pea ona tuuina mai faaaliga e le Atua i aso nei i na perofeta faauuina ma lagolagoina. …

“O perofeta ma faiaoga pepelo o loo taumafai foi e suia ia aoaoga na tuuina mai e le Atua ma aoaoga faavae o tusitusiga paia lea e puipuia ai le paia o le faaipoipoga, o le natura paia o le aiga, ma aoaoga talafeagai o le mama faaletagata. Latou te fautuaina se toe faauigaina o le ola mama ina ia faamaonia ai le faitaaga, mulilua, ma sootaga faatauatane” (“Ia Faaeteete i Perofeta Pepelo ma Faiaoga Pepelo,” Ensign, Nov. 1999, 63, 64).

Valaaulia tamaiti aoga e mafaufau i ni taimi atonu na latou tau ai i ni aoaoga po o ni savali mai ni faiaoga pepelo.

Aisea e aoga ai le nofouta i savali ma aoaoga a faiaoga pepelo?

Aotele le 2 Peteru 2:4–17 i le faamatala atu, sa tuuina mai e Peteru nisi o faataitaiga o le mea na tupu i tagata o e sa mulimuli i faiaoga pepelo i taimi ua mavae. Sa tuuina mai foi e Peteru ni faataitaiga o tagata taitoatasi o e sa le’i faatosinaina e faiaoga pepelo. Ona faamatala mai lea e Peteru ia amioga leaga a faiaoga pepelo.

Ata

matau fagota, anufe

Faaali atu se ofe fagota ma nisi o pa po o maunu, pe faaali pe tusi se ata o nei mea faitino i luga o le laupapa. (Afai e sili atu ona masani au tamaiti aoga i se isi auala e maua ai i′a, faaaoga mea faitino po o ata e faaalia ai lena auala.)

Faamatala atu o se tasi o auala e pu’e ai e se faifaiva ia i′a, e ala lea i le faaaoga o pa po o maunu e faatosina ai i′a i totonu o se mailei po o le u o se matau. Valaaulia tamaiti aoga e mafaufau i le tai pei o metotia a se faifaiva, o metotia a se faiaoga pepelo.

Valaaulia se tamaitiiti aoga e faitau leotele le 2 Peteru 2:18–19. Fai atu i le vasega e mulimuli i le faitauga, ma vaavaai mo auala e faatosina ai e faiaoga pepelo le Au Paia ia mulimuli atu ia latou aoaoga.

E faapefea ona faatosina ma faasese e faiaoga pepelo ia tagata o le Ekalesia? (Faailoa atu, o nisi o faiaoga pepelo atonu e faamaoni ae sa faaseseina foi i latou lava.)
O a auala e tai pei ai aoaoga a perofeta ma faiaoga pepelo o se pa o se fagota po o se maunu?
E tusa ai ma le fuaiupu 19, o a mea e folafola mai e nei a’oa’o pepelo? (“Saolotoga.” I nisi faaupuga, latou te aoao mai o le agasala, ae le o le usiusitai i poloaiga, e taitai atu ai i le tele atu o le saolotoga.)

Faaopoopo atu i le upumoni o loo i le laupapa ina ia faitauina faapenei: O a’oa’o pepelo e taumafai e faasese i tatou ia talitonu o le agasala e taitai atu ai i le tele atu o le saolotoga.

Valaaulia tamaiti aoga e toe faitau filemu le fuaiupu 19, ma vaai mo le mea e tupu i tagata o e e faatoilaloina e aoaoga sese ma le agasala.

O le a le mea e tupu i tagata o e e faatoilalo e aoaoga pepelo ma le agasala? (E fai i latou ma pologa i na mea.)
O a nisi o aoaoga pepelo e foliga mai e uunaia ai le saolotoga ae iu moni ai i le saisaitia?

Valaaulia se tamaitiiti aoga e faitau leotele le 2 Peteru 2:20–22. Fai atu i le vasega e mulimuli i le faitauga, ma vaavaai mo le mea na aoao atu e Peteru e uiga ia i latou o e toe foi atu i le agasala ae na sosola mai ai.

Aisea e te manatu ai, o i latou o e “na sosola ai mea leaga a le lalolagi [e ala ia] … Iesu Keriso” (fuaiupu 20) e mafai ona faaosoosoina e toe foi i o latou ala agasala?
O le a se fautuaga e te tuuina atu e fesoasoani ai i se tasi ia tumau faamaoni ia Iesu Keriso ma Lana talalelei, ae le o le toe foi i agasala sa faia muamua?

2 Peteru 3

Ua molimau mai Peteru e uiga i le Afio Mai Faalua

Faamalamalama atu, a’o faaiu e Peteru lana tusi, sa ia faamanatu atu i le Au Paia i le Afio Mai Faalua a Iesu Keriso ma aoao i latou i auala e saunia ai mo lea mea. Aotele le 2 Peteru 3:1–9 e ala i le faamalamalama atu, na aoao mai Peteru, o aso amuli o nisi o tagata o le a tauemu ma taufaifai ia i latou o e talitonu i le Afio Mai Faalua.

Fai atu i ni nai tamaiti aoga e faamatala mai pe aisea latou te talitonu ai i le Afio Mai Faalua, e ui lava ina le talitonu i ai le toatele o tagata.

Valaaulia se tamaitiiti aoga e faitau leotele le 2 Peteru 3:10–14. Fai atu i le vasega ia mulimuli i le faitauga, ma vaavaai mo mea na aoao mai e Peteru e uiga i le Afio Mai Faalua. Faamatala atu o le amio lelei i le fuaiupu 11 o lona uiga o le amio (tagai 1 Timoteo 4:12, vaefaamatalaga i) ae o le “naunau atu” i le fuaiupu 12 o lona uiga o le faatalitali ma le naunautai mo se mea.

E tusa ai ma le fuaiupu 10, o le a le mea ua aoao mai e Peteru e uiga i le Afio Mai Faalua?
E tusa ai ma fuaiupu 11–14, o le a le fautuaga na tuuina mai e Peteru i le Au Paia ia saunia ai i latou mo le Afio Mai Faalua? (Ia ola i ni olaga amio lelei ma amio atua, ia vaavaai ma faatalitali ma le naunautai i le Afio Mai Faalua, ma ia taumafai ma le maelega ina ia maua mai “ua le pona, ma le le mata’uleagaina” [fuaiupu 14].)

Faamatala atu o le fuaitau “ua le pona, ma le le mata’uleagaina” (fuaiupu 14) o lona uiga o le mama mai agasala. O i latou o e mama mai agasala ua uma ona faalelei i le Atua ma o le a maua i le manuia o le Faaola pe a afio mai o Ia.

E faapefea ona e aoteleina se mataupu faavae na aoao mai e Peteru e uiga i le auala e mafai ona tatou saunia ai mo le Afio Mai Faalua o le Faaola? (Fesoasoani i tamaiti aoga e faailoa mai se mataupu faavae e tutusa ma lenei: E mafai ona tatou saunia mo le Afio Mai Faalua o le Faaola e ala i le ola i ni olaga amio atua ma faatalitali ma le naunautai mo Lona Afio Mai. Faamalamalama atu o le “faatalitali” e mafai ona faauiga o loo tatou faatalitali ma le naunautai i le Afio Mai o le Faaola.)
O a nisi o mea e mafai ona tatou faia ia ola ai i ni olaga amio atua a’o tatou faatalitali ma le naunautai mo le Afio Mai Faalua?

Aotele le 2 Peteru 3:15–18 i le faamalamalama atu, ua lapatai mai Peteru e uiga i le pauu atu i le amioleaga. Sa ia valaauliaina le Au Paia ia “tutupu i le alofa tunoa, ma i le poto o [le] Alii” (fuaiupu 18).

Faaiu i le molimau atu i upumoni na aoaoina i le 2 Peteru 2–3. Valaaulia tamaiti aoga e saili ia iloa ma aloese i aoaoga pepelo ma ia saunia ma le maelega mo le Afio Mai Faalua.

Tala ma Faamatalaga o Talaaga

2 Peteru 3:12. “Ia aulia mai le aso o le Atua”

Na molimau mai Elder Neil L. Andersen o le Korama a Aposetolo e Toasefululua i le Afio Mai Faalua o Keriso:

“[I le Afio Mai Faalua, o le a tupu ai] se aafiaga e toetoe ina a le mafai ona mafaufauina: ‘O tagata uma,’ ua fetalai mai ai le Alii, ‘o le a vaai faatasi ia te au’ [MF&F 101:23]. O le a faapefea ona tupu? Tatou te le iloa. Ae ou te molimau atu o le a tupu—tonu lava e pei ona valoiaina. O le a tatou tootutuli i le migao, ‘ma o le a tulei mai e le Alii lona siufofoga, ma o le a lagona e tuluiga uma o le lalolagi’ [MF&F 45:49]. ‘Ma o le a … pei o se leo o vai e tele, ma e pei o le leo o se faititili tele’ [MF&F 133:22]. ‘Ma o le a tu le Alii, le Faaola, … i le lotolotoi o lona nuu’ [MF&F 133:25]. …

“I lena aso, o le a gugu le au masalosalo, ‘aua o le a faalogo tagata uma … , ma tootuli tulivae uma, ma tautino atu e laulaufaiva uma’ [MF&F 88:104] o Iesu o le Keriso, o le Alo o le Atua, o le Faaola ma le Togiola o le lalolagi” (“Ia Oo Mai Lou Malo,” Ensign po o le Liahona, Me 2015, 122).