Mareko 4–9 (Iunite 8)

Anomea o Sauniuniga mo le Faiaoga o Suesuega i le Fale

Aotelega o Lesona o Suesuega i le Fale i Aso Taitasi

O aotelega o loo i lalo o aoaoga faavae ma mataupu faavae ua aoaoina e tamaiti aoga ao latou suesue i leMareko 4–9 (iunite 8) e lei fuafuaina o se vaega e aoaoina o lau lesona. O le lesona e te aoaoina atu e taulai atu na o ni nai aoaoga faavae ma matupu faavae nei. Mulimuli i musumusuga a le Agaga Paia ao e mafaufau i manaoga o au tamaiti aoga.

Aso 1 (Mareko 4–5)

Sa aoao e le vasega afai tatou te sailia le fesoasoani a le Alii i taimi o faaletonu po o le fefe, e mafai e Ia ona aumai ia i tatou le filemu. Sa latou aoaoina foi faapea a tatou iloaina le mana o le Faaola i o tatou oalga, e mafai ona tatou molimau atu i isi Ana faamanuiaga ma le alofa mutimutivale. Mai tala o le afafine o Iairo ma le fafine na maua i le punatoto, sa aoaoina ai e le vasega faapea afai tatou te faaalia lo tatou faatuatua ia Iesu Keriso e ala i a tatou taumafaiga e o mai ia te Ia, e mafai e Ia ona faaatoatoa i tatou ma o le faaaogaina o le faatuatua ia Iesu Keriso e manaomia ai ona faaauau pea lo tatou talitonu ia te ia e oo lava i taimi e faaletonu ai.

Aso 2 (Mareko 6–8)

Mai le vavega o le fafagaina o le silia ma le 5,000 tagata, sa aoao ai e le vasega a tatou ofoina atu i le Faaola a tatou mea uma, e mafai e Ia ona faateleina a tatou foai e faataunuu ai Ona faamoemoega. Sa aoaoina ai foi e le vasega e mafai ona tatou mulimuli i le faataitaiga a le Faaola e ala i le vaai atu i mea e manaomia e isi ona fesoasoani i ai lea e faataunuu ai na manaoga.

Aso 3 (Mareko 9:1–29)

Mai le tala i le tulieseina e Iesu o se agaga leaga mai se tamaitiiti, sa aoao ai le vasega afai tatou te talitonu ia Iesu Keriso, o le a mafai e i tatou mea uma. O isi mataupu faavae mai lenei lesona e aofia ai mea nei: Afai tatou te taofimau i mea tatou te talitonu i ai ma saili atu i le fesoasoani a le Alii, o le a fesoasoani o Ia e faamalolosia o tatou faatuatua. E mafai ona tatou faateleina lo tatou faatuatua ia Iesu Keriso e ala i le tatalo ma le anapogi.

Aso 4 (Mareko 9:30–50)

A o suesue e le vasega le Mareko 9:30–50, sa latou aoaoina afai tatou te faatosinaina tagata o e talitonu ia Iesu Keriso e fai le agasala, o le a tatou tutu atu i luma o le Atua e tali atu i ai. Mai aoaoga a le Faaola i nei fuaiupu, sa aoao ai e le vasega e sili atu ona vavaeese i tatou lava mai faatosinaga amioletonu nai lo le iu ane ua vavaeese mai le Atua.

Folasaga

E mafai ona fesoasoani lenei lesona e malamalama ai le vasega o le saili atu e faamalie isi nai lo le faia o mea ua tatou iloa e sa’o e mafai ona tau atu i filifiliga sese, faanoanoa, ma salamo.

Fautuaga mo le Aoaoina Atu

Mareko 6:1–29

Ua teena Iesu i Nasareta ma ua auina atu Aposetolo e Toasefululua; ua toe ta’ua le maliu o Ioane le Papatiso

Amata le vasega i le valaaulia o tagata e mafaufau e uiga i le taimi mulimuli na latou lagonaina ai le uunaia e fai se mea sa latou iloa e le sa’o.

Tusi le faamatalaga lea i luga o le laupapa (O loo maua lea faamatalaga “Faia o Filifiliga Sa’o,” Ensign, Nov. 1994, 37):

“O tagata e faia mea sese e mananao ia te outou e auai faatasi ma i latou aua ua sili atu lo latou lagona toafimalie i mea o latou faia pe a faia foi e isi” (Elder Richard G. Scott).

O a ni faataitaiga o le auala e taumafai ai isi e uunai oe e faia se mea e te iloa e sese?

Valaaulia le vasega e vaavaai mo se upumoni a o latou suesueina le Mareko 6 lea e mafai ona fesoasoani ia i latou e taumamao ai mai le gauai atu i uunaiga leaga a paaga.

Valaaulia se tamaitiiti aoga e faitau leotele le Mareko 6:17–18. Fai atu i le vasega e mulimuli i le faitauga, ma vaavaai pe o le a le mea na fai e Herota ia Ioane le Papatiso. Tuu atu i tamaiti e lipoti mai mea ua latou mauaina.

O le a le mea na fai e Herota ia Ioane ae aisea foi?

Sa faateaina e Herota lana ava ae faaipoipo atu ia Herotia, le ava a lona uso o Filipo. O lenei faatinoga o se solia pupula lea o le tulafono a Iutaia (tagai Levitiko 18:16), ma sa tautino atu e Ioane le Papatiso le tausalaina. O le tetee o Ioane i lenei faaipoipoga na ita ai Herotia, o lea na faafalepuipui ai e Herota ia Ioane ia faamalie ai o ia [Herotia].

Valaaulia se tamaitiiti aoga e faitau leotele le Eteru 2:16–20. Fai atu i le vasega e mulimuli i le faitauga, ma o le a le mea na manao Herotia e fai ia Ioane le Papatiso.

O le a le mea na manao Herotia e fai ia Ioane le Papatiso?
Aisea na le mafai ai e ia ona fasiotia o ia? (Aua sa fefe Herota ia Ioane ma sa iloaina o ia o se tagata o le Atua.)

Valaaulia ni nai tamaiti aoga e feauaua’i i le faitauina leotele mai o leMareko 6:21–29. Valaaulia le vasega e mulimuli i le faitauga, ma vaavaai mo le mea na fai e Herota ia Ioane le Papatiso.

E tusa ai ma lefuaiupu 26, o le a se lagona o Herota i le fasiotia o Ioane le Papatiso?
Aisea na faatonuina ai e Herota ia vavaeeseina le ulu o Ioane a o la na te iloa e sese ma sa lei manao o ia e fai? (Sa popole Herota i manatu o i latou sa nonofo faatasi ma ia.)
O le a le mataupu faavae e mafai ona tatou aoao mai filifiliga a Herota i le mea e tupu pe a tatou taumafai e faamalie isi nai lo le faia o le mea sa’o? (E ono faaaoga e le vasega ni upu eseese, ae ia mautinoa latou te faailoa mai le mataupu faavae lea: O le saili e faamalie isi nai lo le faia o le mea ua tatou iloa e sa’o e mafai ona tau atu ai i filifiliga sese, faanoanoa, ma salamo ai.

Ina ia fesoasoani i le vasega ia malamalama atili i lenei upumoni, tuu i latou i ni vaega taitoalua pe toafa ma fai i ai e ta’u mai ni faataitaiga o tulaga e tatau ai ona filifili le autalavou i le va o le saili e faamalie isi ma faia mea latou te iloa e sa’o. A uma ua lava le taimi, valaaulia vaega taitasi e lipoti mai. A o latou faia, tusi ni nai faataitaiga i luga o le laupapa.

O a ni auala o e vaaia ai o le gauai atu i uunaiga e pei o nei faataitaiga e aumaia ai le faanoanoa ma le salamo?
O anafea na e vaai ai i se tasi o filifili e fai le mea sa’o nai lo le saili e faamalie isi?
O le a se mea e mafai ona fesoasoani ia i tatou e filifili e fai le mea tatou te iloa e sa’o nai lo le saili e faamalie isi?

Faitau leotele le saunoaga lenei mai ia Peresitene Spencer W. Kimball e uiga i le faia o faaiuga sa’o:

“O faaiuga sa’o e aupito sili ona faigofie ona fai pe a tatou vave faia … ; e faasaoina ai le lototiga i le valalua [i le tulaga e fai ai se faaiuga], pe a tatou le lavava ma matuai faaosoosoina lava” (Aoaoga a Peresitene o le Ekalesia: Spencer W. Kimball [2006], 108).

Valaaulia le vasega e mafaufau i le vaiaso a sau ma faailoa mai ni tulaga e ono i ai lea atonu e manaomia ai ona filifili i le faamalieina o isi ma le faia o le mea e sa’o. Fautuaina i latou e fuafua pe o le a faapefea ona latou tali atu i lea uunaiga pe a te’i ua latou feagai.

Faamatala ina ua faalogo Herota e uiga i le tele o vavega sa faia e Iesu i Kalilaia, sa fefe o ia faapea ua tulai mai Ioane mai le oti ma faia nei vavega (tagai Mareko 6:14–16).

Mareko 7–8

Ua faamalolo e Iesu tagata e toalua ma aoao atu Ona soo

Faamatala o leMareko 7–8o loo i ai tala e lua o le faamaloloina e le Faaola o se tasi. Vaevae le vasega i ni paga. Tofi se tagata se toatasi mai paga taitasi e faitau leMareko 7:31–35 ae faitau e le isi le Mareko 8:22–25. Ona valaaulia lea o le vasega e faamatala i a latou paga le vavega o le faamalologa i fuaiupu latou te faitauina.

A uma ua lava se taimi, valaaulia le vasega e faamatala pe na faapefea ona faamalolo e le Faaola nei tagata e toalua.

O a lesona e mafai ona tatou aoao mai le mea moni sa lei faamaloloina atoatoa le tagata tauaso i le taimi muamua?

Valaaulia se tagata aoga e faitau leotele le saunoaga lenei a Elder Bruce R. McConkie o le Korama a Aposetolo e Toasefululua. Fai i le vasega e faalogologo mo mafuaaga atonu na ala ai ona faamalolo auauai e Iesu le tagata.

“O lenei vavega e tulagaese; e na o le pau lea o le vavega o loo tusia na faamalolo auauai ai e Iesu. Atonu na mulimuli le Alii i lea faiga ina ia faamalosia ai le faatuatua vaivai ae o loo tuputupu ae o le tamaloa tauaso. E foliga mai foi o taimi faasolosolo o le fesootaiga faaletino ma Iesu na i ai le aafiaga na aoga e maua ai le faamoemoe faaopoopo, mautinoa, ma le faatuatua o le tauaso. O Iesu lava ia (1) na taitaia le tagata tauaso i le lima i tua o le aai, (2) ma faaaoga lona lava feanuga i mata o le tauaso, (3) faatinoina le sauniga o le faaee atu o lima, ma le (4) tuuina atu o ona aao mo le taimi lona lua i luga o mata o le tagata.

“E moni lava o le faiga na faatino ai lenei faamalologa ua aoao mai ai e ao i tagata ona sailia le faamalologa o le alofa tunoa o le Alii ma lo latou malosi uma ma le faatuatua, e ui ua na o se vaega o le faamalologa e lava ai, peitai, a uma ona maua, ona mafai lea ona latou maua se faamautinoaga faaopoopo ma le faatuatua e faamalolo atoa ai. (E tele foi taimi e faamaloloina auauai ai tagata i o latou mafatiaga faaleagaga, o lea laasaga ma lea laasaga a o latou faaogatasia o latou olaga ma fuafuaga ma faamoemoega a le Atua” Doctrinal New Testament Commentary, 3 vols. [1965–73], 1:379–80).

E mafai faapefea e le faamaloloina ona faateleina auauai ai le faatuatua o se tagata ia Iesu Keriso?
Aisea e taua ai le malamalama faapea o nisi faamanuiaga, e pei o le mauaina o se molimau i le talalelei po o le mauaina o le faamalologa faaletino po o le faaleagaga, e tele taimi e oo mai ai faasolosolo pe auauai mai, nai lo le oo vave mai i le taimi e tasi?

Otooto le Mareko 8:27–28 i le faamatala atu faapea sa fesili Iesu i Ona soo po o le a le tala a isi, pe o ai o Ia. Sa latou tali mai i le faapea mai fai mai nisi o Ia o Ioane le Papatiso po o se isi perofeta.

Valaaulia se tagata aoga e faitau leotele le Mareko 8:29 Fai atu i le vasega ia mulimuli i le faitauga, ma vaavaai mo mea na tautino atu e Peteru e uiga ia Iesu.

O ai na fai mai ai Peteru e uiga ia Iesu? (O le upu Keriso e tutusa ma le upu Eleni o le Mesia.)

Otooto le Mareko 8:30–31 i le faamatala na aoao atu e Iesu i le au soo o le a teena o Ia e Iutaia ma fasiotia. Valaaulia se tamaitiiti aoga e faitau leotele le Mareko 8:32–33. Fai atu i le vasega e mulimuli i le faitauga, ma vaavaai pe na faapefea ona tali atu Peteru i lea tala.

Faamatala ona o le lauiloa o faamoemoega o Iutaia i se Mesia e faatoilaloina ma pulea, sa faigata ai ia Peteru, faapea foi le toatele o Iutaia i lena taimi, ona malamalama ma talia le manatu i se Mesia o le a mafatia ma maliu.

Na faapefea ona pei Peteru o le tauaso o loo faamatala mai i le Mareko 8:22–25? (Na oo ina “iloa” faasolosolo malie e Peteru le upumoni. Sa ia te ia le faatuatua i le Faaola, ae na atiinae i sia laasaga ma sia laasaga lona malamalama i le misiona a le Faaola.)
Na faapefea ona fesoasoani le Alii ia te oe po o se tasi e te iloaina le faasolosolo malie ai le manino atili o lau vaai i le upumoni?

Faaiu le lesona o le aso i le valaaulia o le vasega e faitau lemu le Mareko 8:34–38, ma mafaufau pe mafai faapefea ona fesoasoani le lesona o le aso ia i latou e faamuamua ai le Alii i o latou olaga.

Le Isi Iunite (Mareko 10–Luka 4)

Faamatala o le a faaiu e tagata aoga la latou suesuega o le Evagelia a Mareko ae amata ona suesue i tusiga a Luka. Valaaulia i latou e vaavaai mo faamatalaga fou a o latou toe faitau e uiga i mea mulimuli na tutupu i le soifuaga o Iesu Keriso ma Lana Togiola ma matau ia faaupuga faatauemu na faia ia Iesu a o i ai o Ia i luga o le satauro. I le Evagelia a Luka o le a latou faitau ai i se tasi o mataupu aupito lauiloa i le Tusi Paia—Luka 2—tala i e sauaina, o e ua faaaunuua, ma e agasala.