Folasaga i le Tusi e Tolu a Ioane
Aisea e suesueina ai lenei tusi?
I lenei tusi puupuu, na viia ai e Ioane ia Kaio, o se tagata o le Ekalesia o le sa faamaoni i se taimi o le tetee faasaga i taitai o le Ekalesia. O aoaoga a Ioane e mafai ona fesoasoani i tamaiti aoga ia malamalama lelei ai i le liliuese na tupu i le Ekalesia i le Feagaiga Fou ma mafai ona musuia ai i latou ia tumau le faamaoni i taitai o le Ekalesia e ui lava i tulaga e tetee ai.
O ai na tusia lenei tusi?
Na faailoa mai e le tusitala ia lava o “le toeaina” (3 Ioane 1:1) ma na masani ona malamalama i ai o le Aposetolo o Ioane.
O anafea ma o fea foi na tusia ai?
E le o mailoa tonu po o anafea ma po o fea foi na tusia ai le 3 Ioane.
Afai e sa’o talatuu sa umi ona nofo Ioane i Efeso, atonu la na ia tusia lenei tusi mai iina i le va o le T.A. 70 ma le 100.
O ai na tusi i ai, ma pe aisea foi?
O le Tusi e Tolu a Ioane na tusi ia Kaio, o se tagata faamaoni o le Ekalesia o le na viia e Ioane ona o le faaalia o le tuuto le manatu faapito i le faamoemoe o Keriso e ala i le tuuina atu o mea e faamautu ai auauna femalagaa’i a le Atua (tagai 3 Ioane 1:5–8).
Na lapataiina foi e Ioane ia Kaio e uiga i se tagata na igoa ia Tioterifi, o le atonu na umia se tulaga faaletaitai o le lotoifale i le Ekalesia. Na aliali faalauaitele lava le tetee o Tioterifi ia Ioane ma isi taitai o le Ekalesia ma taofia foi tagata o le Ekalesia i le lotoifale o e na mananao e talia i latou mai le auai atu i sauniga a le Ekalesia (tagai 3 Ioane 1:9–10). Na uunaia e Ioane ia Kaio e faaauau pea i le amio lelei ma fai mai na faamoemoe e asiasi atu i se taimi e le o mamao ia Kaio (tagai 3 Ioane 1:11–14).
O a nisi o vaaiga iloga o lenei tusi?
I le 3 Ioane tatou te vaai ai i le popole o Ioane e uiga i aafiaga o le liliuese i totonu o le Ekalesia. Tatou te vaaia ai foi le alofa o Ioane i isi ma le olioli na ia lagonaina mo i latou o e sa filifilia se olaga o le usiusitai (tagai 3 Ioane 1:4).
Otootoga
3 Ioane 1 Ua viia e Ioane ia Kaio ona o lona faamaoni ma lapatai atu e faasaga i se taitai o le na tetee ia Ioane ma isi taitai o le Ekalesia.