Lesona 82: Galuega 1:9–26

Lesona 82

Galuega 1:9–26

Folasaga

Ina ua uma ona aoaoina Ona soo i aso e 40, sa afio ae Iesu Keriso i le lagi. Ua soofaatasi le Au Aposetolo ma isi i le tatalo ma le faatoga. E ala i musumusuga, sa tofia ai Matatia e faatumu le avanoa i le Korama a Aposetolo e Toasefululua lea na i ai ona o le faalataina ma le oti o Iuta le Sekara.

Fautuaga mo le Aoaoina Atu

Galuega 1:9–12

Ua afio ae le Faaola i le lagi

Tusi le fesili lenei i luga o le laupapa: Moni pe Sese?

Faitau leotele ia faamatalaga nei e uiga i le Afio Mai Faalua o Iesu Keriso. Valaaulia le vasega e tau mai pe moni pe sese ia faamatalaga. (Manatua: I le taimi lea o le lesona, e le tau manaomia ona iloa e tagata le tali i fesili taitasi pe faaalu ai se taimi tele e talanoaina ai tali.)

O le a toe afio mai Iesu i le lalolagi i aso e gata ai.
I Lona Afio Mai Faalua, o le a faaali atu ai Iesu Keriso i na o tagata amiotonu.
Ona o le a faafoliga ese mai Iesu Keriso pe a toe afio mai, o lea o le a le iloa ai e le toatele ua uma le Afio Mai Faalua.

Atonu e te manao e toe iloilo faapuupuu le tali i fesili i faamatalaga taitasi. (1) Moni (tagai Mose 7:60); (2) Sese (tagai Iosefa Samita—Mataio 1:26; MF&F 101:23); (3) Sese (tagai MF&F 49:22–23).

Faamatala i le taimi o Lana galuega i le olaga nei, sa valoia ai e Iesu Keriso e faapea o aso e gata ai o le a faalauiloa ai e nisi tagata ia aoaoga pepelo e uiga i Lona Afio Mai Faalua (tagai Iosefa Samita—Mataio 1:22–25).

E mafai faapefea ona tatou iloaina pe moni pe sese foi se aoaoga faapitoa e uiga i le Afio Mai Faalua o Iesu Keriso? (Afai tatou te usitaia upu a le Faaola ma upu a Ana perofeta, e mafai ona tatou aloese mai i le faaseseina [tagai Iosefa Samita—Mataio 1:37].)

Valaaulia le vasega e vaavaai a o latou suesueina pea le Galuega 1mo se upumoni taua e faatatau i le Afio Mai Faalua o Iesu Keriso.

Faamanatu i le vasega e faapea na aoaoina e le Faaola Ona soo mo aso e 40 ina ua mavae Lona Toetu (tagai Galuega 1:3). Faaali atu le ata O le Faasatauroga (Tusi Ata o le Talalelei [2009], nu. 62; tagai foi i le LDS.org).

Valaaulia se tamaitiiti aoga e faitau leotele le Galuega 1:9–12. Fai atu i le vasega e mulimuli i le faitauga, ma vaavaai mo mea na tutupu ina ua maea ona aoaoina e le Faaola Ana Aposetolo.

O le a le mea na tupu ina ua uma ona aoaoina e le Faaola Ana Aposetolo?
Pe ana e vaai i le Faaola o afio ae i le lagi, mata o a ni ou mafaufauga ma lagona?

Faamatala i Isaraelu anamua, o le ao i nisi taimi e avea ai o se faatusatusaga vaaia o le i ai o le mamalu o le Atua (tagai Esoto 40:34). O le ao o loo taua i le Galuega 1:9 o se ao o le mamalu (tagai Bible Dictionary, “Ao”), ma tagata e toalua o loo taua i le fuaiupu 10 o agelu.

O le a le mea na tau atu e agelu i Aposetolo?
O le a sou manatu o le a le uiga e faapea o le a toe afio mai Iesu “i le ala e tasi” (Galuega 1:11) A maea ona tali mai tamaiti aoga, tusi le upumoni lenei i le laupapa: I Lona Afio Mai Faalua, o le a afio ifo le Faaola mai le lagi i le mamalu.

Tau i ai o le Afio Ae o le Faaola na tupu i luga o le Mauga o Olive (tagai fuaiupu 12). Faamatala a toe afio mai le Faaola, o se tasi o Ona faaaliga mai o le a pei o le taimi o le a Ia afio ifo ai ma tu moni i luga o le Mauga o Olive (tagai Sakaria 14:4; MF&F 45:47–53; MF&F 133:19–20). O le a tupu lea mea a o lei oo i Lona faaali maoae ma le atoatoa mai i le lalolagi (tagai Isaia 40:5).

E mafai faapefea e le iloa o le tulaga o le a toe foi mai ai le Faaola, ona fesoasoani tatou te taumamao ai mai le faaseseina a o tatou faatalitali atu i Lona Afio Mai Faalua?

Galuega 1:13–26

Ua filifilia ia Matatia e faatumu le avanoa i le Korama a Aposetolo e Toasefululua

Faamatala ina ua toe foi atu le Au Aposetolo i Ierusalema, sa latou faapotopoto ma ni alii ma tamaitai faatuatua, e aofia ai Maria le tina o Iesu, e tatalo ma tapuai. Valaaulia le vasega e faitau filemu le Galuega 1:13ma faitau le aofai o Aposetolo o loo lisiina mai ai. Fai atu i tagata aoga e lipoti mai mea ua latou mauaina.

Aisea sa na o le toa 11 ai Aposetolo i lena taimi? (Sa faalataina e Iuta le Sekara ia Iesu Keriso ona ia faamutaina ai lea o lona lava ola [tagai Mataio 27:3–5].)

Aotele le Galuega 1:15–20e ala i le faamatala atu e faapea sa tu Peteru i luma o soo e 120 ma toe faamatalaina ai le oti o Iuta le Sekara. Talu ai o Iuta sa avea o se tasi o Aposetolo e Toasefululua, sa faapotopotoina ai le au soo e filifili se Aposetolo fou.

Valaaulia le vasega e faamatala auala eseese e filifili ai nisi o nei taitai: se kapeteni o se au, se taitai faalemalo i le lotoifale, se tupu po o se masiofo, ma se peresitene o se kamupani.

Mata o a ni agavaa mo nei tulaga faaletaitai e tatau ona i ai?

Faaali i le vasega se ata po o niatao le Au Peresitene sili ma le Korama a Aposetolo e Toasefululua o i ai nei, ma molimau atu o nei tamalii taitoatasi o se Aposetolo a Iesu Keriso. Fai i le vasega e mafaufau pe faapefea ona filifilia se Aposetolo a Iesu Keriso ma o le a le mea e agavaa ai se tagata e avea o se Aposetolo.

Vaevae le vasega i ni paga. Valaaulia i latou e faitau leotele le Galuega 1:21–26 ma a latou paga ma vaavaai pe na faapefea ona filifilia se Aposetolo fou ina ua maliu Iuta le Sekara.

O le a le uiga o le “sa fai la latou vili”? (fuaiupu 26).

Atonu e manaomia ona faamatala o aso anamua, o le faia o se vili o se auala faamaoni lea e faia ai se faaiuga e faaali ai le faatuatuaina o le Atua e faatonutonuina taunuuga (tagai Galuega 1:26; tagai foi Faataoto 16:33). “Afai latou te faia se vili, o se taimi lea e filifili ai e le Alii le tali. Peitai, atonu pe ‘sa latou avatu la latou palota,’ ma le manatu ‘o palota lagolago’ e faamautu ai o ia o le ua filifilia e le Atua e galue i le tofi paia faaaposetolo” (Bruce R. McConkie, Doctrinal New Testament Commentary, 3 vols. [1965–73], 2:32).

E tusa ai mafuaiupu 21–22, o a ni agavaa na fai mai ai Peteru e tatau ona i ai i se Aposetolo fou? (E tatau ona avea o ia o se soo o Iesu Keriso ma o se molimau foi o Lana galuega ma le Toetu.)
O le a se mea o tulaga ese i le tatalo a le au Aposetolo o loo tusia i fuaiupu 24–25?
O le a le upumoni e mafai ona tatou aoao mai i le fuaiupu 24e uiga i le auala e tofia ai se Aposetolo a Iesu Keriso? E ono faaaoga e le vasega ni upu eseese, ae ia mautinoa e faamamafa atu e faapea oAposetolo a Iesu Keriso e valaauina e le Atua e ala i faaaliga. Tusi le upumoni lenei i le laupapa, ma valaaulia le vasega e fuafua e tusi i a latou tusi paia i autafa o le fuaiupu 24.)
Aisea e te manatu ai e taua ona valaauina se Aposetolo e le Atua e ala i faaaliga nai lo le filifilia i se auala e pei o isi taitai i le lalolagi?

Ina ia faapupula le auala e valaauina ai Aposetolo i ona po nei e le Atua e ala i faaaliga, valaaulia se tagata e faitau leotele le tala lea mai le soifuaga o Peresitene Heber J. Grant:

“Na mauaina e Peresitene [Heber J.] Grant ni faaaliga o se Peresitene o le Ekalesia e taiala le Ekalesia atoa. O se tasi o na faaaliga na oo mai a o lei umi ona uma ona vaetofia o ia e fai ma Peresitene o le Ekalesia, ina ua ia saili atu i le finagalo o le Alii i le tofiaina o se uso fou o le Korama a Aposetolo e Toasefululua. A o ia manatunatu loloto i lenei tiutetauave, sa faliu atu faafia ona mafaufauga i lana uo i le olaga atoa o Richard W. Young, o se tagata faamaoni o le Au Paia o Aso e Gata Ai ma o se taitai iloga. Sa talanoaina e Peresitene Grant lenei avanoa ma ona fesoasoani, o e sa lagolagoina lana faaiuga. Ina ua iu ina ia lagonaina ua mautinoa le faia o lea faaiuga, sa ia tusia le igoa o lana uo i se fasipepa ma sa ia aveina le pepa i le malumalu i le fonotaga faalevaiaso a le Au Peresitene Sili ma le Korama a le Toasefululua. Peitai, ina ua oo i le taimi o le a ia tuuina atu le igoa mo le faamaoniga a lana Usoga, sa ia le mafai ona faia. Nai lo le tuuina atu o le igoa o Richard W.Young, sa ia tuuina atu le igoa o Melvin J. Ballard, o se alii na te tau le iloaina. Sa faamatala e Peresitene Grant lona aafiaga i lenei mea:

“‘Sa ou lagonaina le musumusuga a le Atua soifua o taitaiina au i au galuega. Mai lava i le aso na ou filifilia ai se tagata ou te le masani lelei ai e avea ma aposetolo, ae le o se uo i le olaga atoa ma e pele, na ou iloa ai e pei ona ou iloa o loo ou ola, ua ia te au le aia tatau i le malamalama ma le musumusuga ma le taitaiga a le Atua e taitaia ai Lana galuega i le lalolagi’” (Aoaoga a Peresitene o le Ekalesia: Heber J. Grant [2002], 181–82).

O faapefea e le upumoni o loo aoao mai i le Galuega 1:24o loo faapupula mai i lea tala ona faamatalaina ai le valaauina o se Aposetolo i ona po nei?
E faapefea e le valaauina o se Aposetolo ona faaalia o loo taitaia pea e le Faaola Lana Ekalesia? (Atonu e te manao e faamanatu i le vasega le upumoni o loo aoao mai i le Galuega 1:2—e faapea o Iesu Keriso e taitaia Lana Ekalesia e ala i le faaalia mai o Lona finagalo i Ana Aposetolo e ala i le Agaga Paia.)

Faasino i le ata po o ata sa e faaalia muamua o Aposetolo soifua. Atonu e te manao e faaaoga sina taimi e fesoasoani ai i le vasega e aoao pe toe faamanatu o latou suafa.

Tusi fesili nei i luga o le laupapa:

O a ni aafiaga na fesoasoani ia te oe e te iloa ai o Aposetolo soifua na valaauina e le Atua?

Aisea e taua ai ia te oe le i ai o se molimau o Aposetolo soifua na valaauina e le Atua?

Valaaulia tamaiti aoga e tusi se tali i se tasi o fesili nei i le api po o le api talaaga o le suesueina o tusitusiga paia. Valaaulia ni nai tamaiti aoga e faasoa mai a latou tali i le vasega.

Faaiu i le molimau atu i upumoni na faailoa mai e le vasega i le Galuega 1:9–26.

Toe Faamanatuina o Mau Tauloto

Ina ia fesoasoani i le vasega i le iloiloina o mau tauloto e 10, tusi ia mau faasino ma upu autu e o faatasi ai i le laupapa (afai e te manao ai, e mafai ona avatu i le vasega ni kopi o le siata:

Mataio 5:14–16	Ia faapea ona pupula atu lo outou malamalama.	Luka 24:36–39	O se tino toetu e i ai aano ma ivi.
Mataio 11:28–30	O mai ia te au.	Ioane 3:5	Fanau i le vai ma le Agaga
Mataio 16:15–19	O ki o le malo	Ioane 14:6	O le ala, upu moni, ma le ola
Mataio 22:36–39	Alofa i le Alii; alofa i lou tuaoi.	Ioane 14:15	Afai tou te alofa mai ia te au, ia outou tausi i au poloaiga.
Mataio 28:19–20	Aoao atu ma papatiso i malo uma.	Ioane 17:3	O le iloaina o le Atua ma Iesu Keriso o le ola e faavavau lea.

Vaevae le vasega i ni paga. Fai i le vasega e toe iloilo ma a latou paga ia fuaitau o mau o loo tusia i le laupapa. E mafai ona e fautuaina atu e faitau leotele e le isi paga ia upu autu mai se mau tauloto a o le isi paga e tauina atu le mau faasino. Valaaulia le vasega e feauauai i matafaioi seia latou toe iloiloina fuaitau uma e 10.

A lava se taimi, fuafua e tuu atu i le vasega se suega puupuu. Avatu i le vasega ni fasipepa o loo i ai upu autu mo mau tauloto taitasi e sosoo ai ma se laina avanoa. Valaaulia le vasega e tusi le mau faasino e faatatau i ai i le laina avanoa. A uma ua lava se taimi, toe iloilo le suega puupuu.

Tala ma Faamatalaga o Talaaga

Galuega 1:18. O le oti o Iuta

Ua fesoasoani le Faaliliuga a Iosefa Samita e faamanino ai le faaletonu i le va o le Mataio 27:3–5, lea o loo tusia ai e faapea na sisi e Iuta o ia lava, ma le Galuega 1:18, lea o loo tusia ai na tito Iuta ma “ua masaa ai i fafo lona totoga uma lava” O le Faaliliuga a Iosefa Samita o le Mataio 27:6 e faitauina e faapea: “Ma sa ia lafo i lalo tupe siliva i totonu o le malumalu, ma sa ia tuua ai, ma ua alu atu ma sisiina o ia lava i luga o le laau. Ma sa pau ifo loa o ia i lalo, ma masaa mai i fafo ona totoga, ma sa oti ai o ia” (tagai Mataio 27:5, vaefaamatalaga a).

Galuega 1:21–22. “O se molimau faatasi ma i matou o lona toetu”

Na aoao mai Peresitene Iosefa Filitia Samita e faapea o le molimau aupito silisili o le paia o le Faaola e mai i le Agaga Paia.

“O i latou [Aposetolo e Toasefululua] o ni molimau faapitoa a Iesu Keriso. O la latou aia tatau le iloa o le upumoni ma ia i ai se molimau mautu. O se tiute lea e fitoitonu ma i latou, ia iloa o Iesu Keriso o le Alo moni e Toatasi na Fanaua e le Atua, o le Faaola o le lalolagi. …

“E tele taimi e tulai mai ai le fesili: ‘Pe tatau i se sui o le Aufono a le Toasefululua ona vaai i le Faaola ina ia avea ai o ia ma aposetolo?’ O lo latou avanoa leaumaua le vaai atu ia te ia pe a moomia i taimi, ae sa aoao mai le Alii e i ai se molimau e malosi atu nai lo le vaaia o se peresona, e oo lava i le vaai i le Alo o le Atua i se faaaliga. O uunaiga i le agaga ia e mai le Agaga Paia e sili atu ona taua nai lo se vaaiga”(“The First Presidency and the Council of the Twelve,” Improvement Era, Nov. 1966, 979).

Galuega 1:24–26. E faapefea ona valaauina Aposetolo i o tatou aso?

Ina ua uma ona valaauina ma lagolagoina ia Elder Robert D. Hales e avea ma Aposetolo, sa faamalamalama mai e Peresitene Gordon B. Hinckley le ala e valaauina ai se Aposetolo i aso nei:

“I lalo o le fuafuaga a le Alii, o i latou e i ai le tiutetauave e filifili ai tofi e faatautaia i se fesili aupito taua lea: ‘O ai ua finagalo ai le Alii?’ O se iloiloga totoa ma le filemu. E tele talosaga e faia ina ia maua ai le faamautuuga a le Agaga Paia ua sao le faaiuga.

“… I le faatumuina [o le avanoa i le Korama a le Toasefululua], e saoloto sui taitasi o le Au Peresitene Sili ma le Korama a le Toasefululua e tuu atu ni fautuaga. Ua ou mautinoa i tulaga uma, sa i ai lava le tatalo gauai ma le lotofaamaoni. Sa faia ai loa se faaiuga e le Au Peresitene Sili ina ua uma se tatalo gauai ma le naunautai. Sa lagolagoina lenei faaiuga e le Aufono a le Toasefululua. O le aso, o tagata o le Ekalesia sa potopoto i le konafesi na lagolagoina lena faaiuga.

“Ou te tuuina atu lau molimau … o le uunaiga e valaau ia Brother Hales i lenei tofi maualuga ma le paia, na oo mai e ala i le Agaga Paia, e ala i le agaga o valoaga ma faaaliga. E lei fautuaina mai e Brother Hales lona lava igoa. O lona igoa na fautuaina mai e le Agaga” (“O le Atua o loo i le Ao o lenei Ekalesia,” Liahona, Iulai 1994, 53–54).

Galuega 1:24–26. O Aposetolo e tofia i o tatou aso

E ui e le filifiia e tagata lautele o le Ekalesia le isi Aposetolo e oo lava i taitai perisitua i le lotoifale o le Ekalesia, ae tatou te maua le avanoa e lagolago ai i latou e valaauina e le Atua. Na aoao mai e Peresitene Gordon B. Hinckley le uiga o le lagolagoina o isi: “O le faiga o le lagolagoina e sili atu nai lo na o le siiga masani o le lima. O se tautinoga e puipui, e lagolago, e fesoasoani ia i latou o e ua filifilia” (“This Work Is Concerned with People,” Ensign, Me 1995, 51).