Lesona 104: 1 Korinito 3–4

Lesona 104

1 Korinito 3–4

Folasaga

Sa faamatala e Paulo i le Au Paia i Korinito ia matafaioi a faifeautalai i le fausiaina o le malo o le Atua. Sa ia aoao atu o a latou potopotoga o nofoaga ia e mafai e le Agaga ona afio ai ma sa apoapoai atu ia i latou e aua nei mafaufau faapea e sili ae nisi tagata i lo isi. (Manatua: O le aoaoga faavae faapea o o tatou tino faitino e pei o malumalu o le a aofia ai i le lesona o le 1 Korinito 6.)

Fautuaga mo le Aoaoina Atu

1 Korinito 3

Ua faamatala e Paulo ia matafaioi a faifeautalai ma tagata o le Ekalesia i le fausiaina o le malo o le Atua

Valaaulia le vasega e mafaufau faapea ua lesitala se uo mo se vasega maualuga atu o le matematika, e pei o le calculus [suesuega faamatematika o suiga], ae na te lei avea ia vasega e muamua manaomia, e pei o numera faavae faafaailoga.

O le a sou manatu o le a se tulaga faamanuiaina o lau uo i le vasega maualuga atu o le matematika? Aisea?
Aisea e taua ai ona malamalama i manatu faavae o se mataupu a o le i mafai ona e taulimaina manatu faavae e sili atu ona faigata?

Valaaulia se tamaitiiti aoga e faitau leotele le 1 Korinito 3:1–3. Fai i le vasega e mulimuli ai, ma vaavaai mo le talafaatusa na faaaoga e Paulo e faaali atu ai i le Au Paia i Korinito latou te lei saunia mo upumoni maualuluga atu o le talalelei. Faamatala o le fasifuaitau “peitai pei o e faaletino” i le fuaiupu 1e faasino i le tagata natura, po “o se tagata e filifili ina ia faatosinaina e tuinanau, manao, ma mea e faamemelo i ai le tino nai lo o uunaiga a le Agaga Paia. O lea tagata e mafai ona malamalama i mea faaletino ae le o mea faaleagaga” (Taiala i Tusitusiga Paia, “Natural Man,” scriptures.lds.org).

Tusi upu o le suasusu ma le mea aano i luga o le laupapa.

O le fea o nei meaai e te fafagaina ai se pepe? Aisea?
O le a le mea o tau mai i le fasifuaitau “tama meamea ia Keriso” i le fuaiupu 1e uiga i le matutua faaleagaga o le Au Paia i Korinito?

Ina ia fesoasoani ia malamalama le vasega e lei saunia le Au Paia e talia upumoni sili atu, faamanatu i ai o le Au Paia i Korinito e lei lotogatasi ma o nisi o i latou sa faaaofia ai talitonuga ma faiga faapaupau (e le faaleatua) i lo latou tausiga o le talalelei. Faamatala sa faaaoga e Paulo ni upu faatusatusa e aoao atu ai nei Au Paia i le taua o le lotogatasi, e faasao talitonuga ma faiga sese, ma faamalolosia lo latou faatuatua i le talalelei a Iesu Keriso.

Vaevae le vasega i ni vaegataitoatolu. Tofi tagata taitasi i le vaega se tasi o otootoga faafaiaoganei. Avatu i tagata taitasi se tufaaga o lana otootoga faafaiaoga ua atofa i ai, ma tuu atu i le vasega ni nai minute e faitau ai i ai. A uma ua lava se taimi, valaaulia tagata taitasi e faaaoga le otootoga e aoao atu ai le isi toalua o le vaega. (Afai e le mafai ona fai ni vaega taitoatolu e mafai ona e vavaeina le vasega i ni paga ma atofa i ai ni otootoga faafaiaoga se lua i se tasi o tagata i paga taitasi.)

Tagata aoga 1

Tusi lesona a le Faiaoga Seminare o le Feagaiga Fou—Lesona 104

Valaaulia se vaega e manatu faapea sa latou auai i se sauniga faamanatuga lea sa talanoa ai se faifeautalai ua foi mai e uiga i lana misiona. I le taimi o lana lauga, sa ia faamatala ai e toatele tagata na ia papatisoina. I se vaiaso mulimuli ane, sa talanoa se isi faifeautalai ua foi mai i le sauniga faamanatuga e uiga i lana misiona ma faamatala ai e toatele tagata sa ia aoaoina ma sa papatisoina i latou i se taimi mulimuli ane a ua sii atu o ia i se isi eria.

E faapefea ona e tali atu pe fai atu se tasi o le faifeautalai sa toatele tagata na ia papatisoina i lana misona, sa sili ona faamanuiaina nai lo le faifeautalai e lei papatisoina ana tagata sailiili vagana ina ua ia tuua le eria?

Tusi upu toto ma le faasusuina i se fasipepa, ma faaali atu i lau vaega. Faamatala na faatusa e Paulo ia faifeautalai i tagata o e totoina fatu ma faasusuina laau. Faamanatu i lau vaega o le Au Paia i Korinito, na amata ona fevaevaeai i ni vaega e fua i e sa papatisoina i latou. Sa latou talitonu i o latou tulaga i le Ekalesia na fua i le taua o le tagata sa papatisoina i latou. Tagai i le 1 Korinito 1:10–16.)

Feauauai ma tagata o lau vaega e faitau leotele mai le 1 Korinito 3:4–9. Fai i le vaega e mulimuli ai, ma vaavaai poo le a le mea na tau atu e Paulo e uiga i faifeautalai o e sa aoao atu ma papatisoina tagata i Korinito.

E tusa ai ma le fuaiupu 5, o le a le tala a Paulo e uiga ia te ia ma Apolo? Faasino i ai le fuaiupu 5, vaefaamatalaga a, ma faamatala o auauna o lona uiga o faifeau.)
E tusa ai ma fuaiupu 6–7, o le a le tala a Paulo e uiga i faifeautalai o e totoina ia fatu o le talalelei ma faifeautalai o e fesoasoani ia ola na fatu?

Afai e tatau ai, faasino i ai fasifuaitau “e le o le toto, e le o le faasusu” i le fuaiupu 7, ma faamatala sa faaaoga e Paulo nei fasifuaitau e aoao atu ai e le o se tasi o nei matafaioi e sili ona taua nai lo le matafaioi a le Atua.

O le a le uiga o le fuaitau “o le Atua na te faatupuina” (fuaiupu 7)? (O le Atua, e ala i le Agaga Paia, o le e afua ai suiga i loto o tagata e taitaia le liliuga, ae le o i latou o e aoao atu ma papatisoina.)
O le a le upumoni e mafai ona tatou aoao mai le 1 Korinito 3:6–7 e uiga i la tatou matafaioi ma le matafaioi a le Atua i le fesoasoani i isi e liua i le talalelei a Iesu Keriso? (A uma ona tali mai lau vaega, valaaulia i latou e tusi le upumoni lea i a latou tusi paia i autafa o le 1 Korinito 3:6–7: E ui e mafai ona tatou fesoasoani i isi e aoao e uiga i le talalelei a Iesu Keriso, ae o le mana o le Agaga Paia e liua ai tagata.

Faamanino ina ia maua e tagata le Agaga Paia ma liua, e tatau ona fai le latou vaega e ala i le faatinoina o le faatuatua ma mulimuli i poloaiga a le Atua.

O le a sou manatu e mafai faapefea ona fesoasoani le iloaina o lenei upumoni i le Au Paia i Korinito e lotogatasi atili ai?

Fai i lau vaega pe mafai faapefea e lenei upumoni ona fesoasoani latou te tali atu ai i le tulaga e uiga i faifeautalai e toalua.

Aisea e taua ai mo i tatou ona malamalama o le Agaga Paia, ae le o so tatou lava mana, e liua ai?

Tagata aoga 2

Tusi lesona a le Faiaoga Seminare o le Feagaiga Fou

Tusi le upu faavae i se fasipepa, ma faaali i lau vaega.

Aisea e avea ai le faavae o se vaega taua o se fale?
O le a se mea e ono tupu pe afai e i ai se faafitauli i le faavae?

Valaaulia se tagata o lau vaega e faitau leotele le 1 Korinito 3:10, ma fai i le vaega o totoe o lau vaega e vaavaai po o le a le mea na taua e Paulo e uiga i lana galuega faafaifeautalai i Korinito.

O le a le mea na taua e Paulo na ia faia a o galue ai o se faifeautalai i Korinito?
O le a sou manatu i le uiga o le tala a Paulo ina ua ia fai mai “tuu se isi faavae”?

Valaaulia se isi tagata o lau vaega e faitau leotele le 1 Korinito 3:11, ma fai i le vaega o totoe e vaavaai pe o le a le faavae na faataatia e Paulo mo le Au Paia i Korinito.

O le a le faavae na faataatia e Paulo a o ia aoao atu i Korinito?
E tusa ai ma le fuaiupu 11, o ai e manaomia le avea ma faavae i o tatou olaga? (Ia mautinoa e faailoa mai e lau vaega le upumoni lea: O Iesu Keriso o le faavae e tatau ona tatou fausia ai. Fuafua e valaaulia lau vaega e maka lenei upumoni i le fuaiupu 11.)
E mafai faapefea e le fau i luga o le faavae o Iesu Keriso ona fesoasoani ia i tatou e onosaia ai tofotofoga ma faigata? (Tagai foi Helamana 5:12.)
E mafai faapefea ona tatou faamautinoa o fausia o tatou olaga i luga o le faavae o Iesu Keriso?

Valaaulia se tagata o le tou vaega e faasoa mai e uiga i se tasi na te iloa o lona olaga e atagia mai ai na fausia i luga o le faavae o Iesu Keriso. Fai i le tagata lea e faamatala mai pe na faapefea ona faamanuiaina lea tagata ona o le fausiaina i luga o Keriso.

Valaaulia tagata taitasi o vaega taitasi e faatu se sini o le a fesoasoani ia te ia e fausia ai i luga o le faavae o Iesu Keriso.

Tagata aoga 3

Tusi lesona a le Faiaoga Seminare o le Feagaiga Fou—Lesona 104

Tusi le upumalumalu i se fasipepa, ma faaali i lau vaega. Faamatala e tele taimi e faasino faafaatusa atu ai Paulo i le malumalu. E pei ona tusia i le 1 Korinito 3:16–17, sa ia faaaoga le upu malumalu e faasino atu ai i faapotopotoga a le Ekalesia.

Valaaulia se tagata o la outou vaega e faitau leotele le 1 Korinito 3:16–17. Fai i le vaega e mulimuli ai, ma vaavaai mo le mea na ta’u atu e Paulo i tagata o le Ekalesia i Korinito e manaomia ona malamalama i ai. Faamatala atu o le tou te (fuaiupu 16) o loo faasino i faapotopotoga a le Ekalesia ma le fasifuaitau “afai e faaleaga e se tasi le malumalu o le Atua” (fuaiupu 17) e faasino i soo se tasi e taumafai e faaumatia le nuu o le Atua.

E tusa ma le fuaiupu 16, o le a le mea na manao Paulo i tagata o le Ekalesia ia malamama ai e uiga i a latou faapotopotoga?

E ui o le 1 Korinito 3:16–17 e peiseai e faasino i le tino o le Ekalesia o se faapotopotoga, ae e mafai ona faatatau nei fuaiupu i o tatou tino faaletino.

E mafai foi faapefea ona faatatau le 1 Korinito 3:16–17 i o tatou tino faaletino? O a ni taunuuga o le faaleagaina o o tatou tino?

Aotele le 1 Korinito 3:18–23 i le faamatala atu i lau vasega e faapea na aoao atu e Paulo le Au Paia o le poto moni e maua ia Iesu Keriso ma o le poto faalelalolagi o le “vale lea i le Atua” (fuaiupu 19).

A uma ua lava se taimi, valaaulia ni nai tagata e lipoti mai mea sa latou aoaoina i a latou vaega ma mea o le a latou faia o se taunuuga o mea sa latou aoaoina.

1 Korinito 4

Ua tau atu e Paulo i le Au Paia i Korinito e aua nei mafaufau faapea e sili atu nisi tagata i lo isi.

Faamatala e faavae i le fautuaga a Paulo o loo tusia i le 1 Korinito 4:1–3, e foliga mai o nisi o tagata o le Ekalesia i Korinito sa faamasinoina le faatinoga a Paulo o se faifeautalai ma se taitai o le Ekalesia. Atonu na latou fesiligia lana faamasinoga pe sa mafaufau atonu e sili atu le lelei o se mea e fai e se isi.

Valaaulia se tamaitiiti aoga e faitau leotele le 1 Korinito 4:3–5. Fai atu i le vasega e mulimuli i le faitauga, ma vaavaai pe na faapefea ona tali atu Paulo i a latou faamasinoga.

Na faapefea ona tali atu Paulo ia latou faamasinoga?
Aisea na lei popole ai Paulo i faamasinoga a isi?
O le a se upumoni e mafai ona tatou aoao mai i le fuaiupu 5 e uiga i le ala o le a faamasino ai i tatou e le Alii? (E ono faaaoga e le vasega ni upu eseese, ae ia mautinoa latou te faailoa maia se upumoni e pei o lea: O le a faamasinoina tonu i tatou e le Alii aua Na te silafia mea uma, e aofia ai ma mafaufauga ma faamoemoega o o tatou loto.
E mafai faapefea e le talitonu i lenei upumoni ona fesoasoani i se tasi ua faamasinoina le tonu?

Valaaulia se tagata e faitau leotele le 1 Korinito 4:6–7, ma fai i le vasega e vaavaai pe o a mea na aoao atu e Paulo i le Au Paia e uiga i a latou sootaga ma isi tagata o le Ekalesia, e aofia ai ma taitai o le Ekalesia

E tusa ai ma le fuaiupu 6, o le a le mea na tau atu e Paulo i le Au Paia e aua le faia pe a latou matauina eseesega i faifeautalai ma taitai o le Ekalesia? (E le tatau ona latou “faafefeteina” i le faamaualuga ma mafaufau faapea e sili atu nisi tagata i lo isi.)
E faavae i fesili a Paulo o loo tusia i le fuaiupu 7, o ai na tuu maia i tagata taleni ma tomai eseese?
E mafai faapefea ona fesoasoani le fautuaga a Paulo ia i tatou a o tatou mafaufau e uiga i o tatou taitai ma faiaoga o le Ekalesia?

Aotele le 1 Korinito 4:8–21i le faamatala atu faapea na tau atu e Paulo i le Au Paia i Korinito o Aposetolo a Iesu Keriso e tofia ia puapupagatia ona o le amioleaga o le lalolagi. E faamasino e le lalolagi ia Aposetolo ma isi taitai o le Ekalesia o “vale” (fuaiupu 10)ona o le saili e mulimuli ia Keriso.

Faaiu i le molimau atu e uiga i upumoni ua aoaoina i lenei lesona.

Tala ma Faamatalaga o Talaaga

1 Korinito 3:16–17 “O outou o le malumalu o le Atua”

“Na aoao atu e Paulo, ‘Tou te le iloa ea o outou o le malumalu o le Atua?’ (1 Korinito 3:16). I le fuaiupu lea, o loo faaaoga ai e Paulo le outou,o se suinauna pelulale, e faasino ai i le Au Paia tuufaatasi i Korinito o se malumalu o le Atua. O le manatu o Paulo e faapea, o faapotopotoga a le Ekalesia e gaoioi e faapei o malumalu lea e mafai ona afio ai le Agaga o le Atua (tagai 2 Korinito 6:16; Efeso 2:21). O lea talafaatusa e matua ese lava mai lea na faaaoga e Paulo mulimuli ane i le 1 Korinito 6:19, lea na ia faatusa ai le tino o se tagata i se malumalu” (Tusi lesona a le Tagata Aoga o le Feagaiga Fou [Church Educational System manual, 2014], 365).

1 Korinito 4:9–10. Maliliu o Aposetolo

“Ina ua aoao atu e Paulo o Aposetolo ‘na tofia ia oti’ (1 Korinito 4:9), sa ia faaataata atu o lona valaauga o se Aposetolo o le a tau atu i lona oti. Sa ia faamatala foi o le toatele i Korinito sa vaai ia i latou lava ua popoto ma malolosi a o Paulo ma isi Aposetolo e valelea, vaivai, ma faaletaualoaina (tagai 1 Korinito 4:10). O nei mea moni e lua—o le maliliu o Aposetolo ma le teena e tagata o le Ekalesia o le pule faaaposetolo—e iu ina saofaga i le Liliuese Tele”(Tusi lesona a le Tagata Aoga o le Feagaiga Fou [Church Educational System manual, 2014], 365).