Lesona 116: 2 Korinito 8–9

Lesona 116

2 Korinito 8–9

Folasaga

Na tusi atu Paulo i le Au Paia i Korinito, e faamatala atu i ai o tagata o le au paia i Maketonia sa latou foai saoloto atu i e manaomia le fesoasoani. Sa ia fautuaina le Au Paia i Korinito ia mulimuli foi i le faataitaiga a le Faaola e ala i le foai atu i e matitiva. Na aoao atu Paulo e uiga i faamanuiaga e maua e i latou o e foai atu ma le fiafia i e matitiva.

Fautuaga mo le Aoaoina Atu

2 Korinito 8

Ua fautuaina e Paulo le Au Paia e tausia e matitiva

Tusi le saunoaga lea a Elder Jeffrey R. Holland o le Korama a Aposetolo e Toasefululua, (mai le “Pe Le o i Tatou Uma Ea o Ni Tagata Aisi?” Ensign po o le Liahona, Nov. 2014, 40) i luga o le laupapa a o lei amataina le vasega, ae tuu se avanoa e sui i le upu mativa.. Amata le lesona i le valaaulia o le vasega e faitau leotele le saunoaga

“I le talafaasolopito atoa, o le mativa ua mafaufauina o se tasi o faafitauli silisili ma sili ona taatele i tagata. O ona mafatiaga manino lava e masani ona faaletino, ae o faatamaiaga faaleagaga ma faalelagona e aumaia ai atonu e sili atu ona faataumaoi.

Fai i le vasega e mate mai le upu o loo misi i le faamatalaga. Ona tusi lea o le upumativa.

O le a le mativa? (O le tulaga o le itiiti po o le leai o se tupe, oloa, po o mea e lagolagoina ia.)
Aisea e mafai ai ona avea le mativa ma se luitau faigata?

Fautuaina le vasega e mafaufau i tagata latou te iloa atonu e manaomia se fesoasoani o soo se ituaiga, e aofia ai le faaletino, faalelagona, faaleagafesootai, po o le faaleagaga. Valaaulia le vasega e vaavaai upumoni a o latou suesueina le 2 Korinito 8–9 ia e mafai ona fesoasoani latou te malamalama ai ma faataunuu la latou matafaioi e fesoasoani i isi o e manaomia.

Aotele le 2 Korinito 8:1–8 e ala i le faamatala atu na tau atu e Paulo i le Au Paia i Korinito na foai atu ma le matamau e tagata o le Ekalesia i Maketonia e fesoasoani ai i e matitiva i mea sa latou moomia faaletino. (Atonu e te manao e sue e le vasega ia Korinito ma Maketonia i Faafanua o le Tusi Paia, nu. 13, “O Malaga Faafaifeautalai a le Aposetolo o Paulo.”) Sa faamatala e Paulo o tagata o le ekalesia i Maketonia sa faia ona sa latou mananao e faia le finagalo o le Atua. Sa ia fautuaina le Au Paia o Korinito e mulimuli i lenei faataitaiga o le saunia o mea mo manaoga o isi, mai i le alofa moni.

Tusi upu o le mauoa ma le mativa i luga o le laupapa.

Valaaulia le vasega e faitau lemu le 2 Korinikto 8:9, ma vaavaai po o le a le mea na tau atu na faia e Iesu Keriso mo le Au Paia. A uma ua lava se taimi, fai atu ia fesili nei, ma lisi tali a le vasega i le laupapa i lalo o upumauoa ma le mativa.

Na mauoa faapefea Iesu Keriso i le muai olaga? (O tali a tagata o le vasega e mafai ona aofia ai mea nei: O Iesu Keriso o le Ulumatua na Fanaua e le Tama i le agaga e oo lava a o lei fanau mai o Ia i la le tino. O Iesu Keriso o se Atua o le sa tu i autafa o le Tama Faalelagi i le pule, mana, ma le mamalu ma sa foafoaina lalolagi e tele i lalo o le taitaiga a le Tama.)
O a ni auala atonu na manatu ai sa mativa o Ia i Lona taimi i le olaga nei? (Sa Ia tuua le tulaga o le mamalu ina ia fanau mai ma soifua ai i tulaga maualalo i le lalolagi.)
O le a sou manatu o le a le uiga i le fuaiupu 9faapea “ia faatamaoaigaina i tatou i le mativa [o le Faaola]”? (Talu ai na afio maualalo ifo Iesu Keriso mai Lona nofoalii i le muai olaga ma afio mai ai i le lalolagi e auauna atu, ma faatu se faataitaiga mo i tatou, ma faatino le Togiola, ua mafai ai e i tatou ona maua le tamaoaiga o le ola e faavavau.)

Faamatala i le vasega pe tusa o se tausaga na muamua atu, sa tautino atu ai le Au Paia i Korinito e aoina ni oloa mo le Au Paia matitiva i Iutaia. Valaaulia se tamaitiiti aoga e faitau leotele le 2 Korinito 8:10–11. Fai atu i le vasega e mulimuli i le faitauga, ma vaavaai mo mea na fautuaina e Paulo ia Korinito e fai.

O le a le mea na fautuaina e Paulo le Au Paia i Korinito e fai?

Faamatala o fasifuaitau o le “e fai” ma “faatino le faiga” o lona uiga na apoapoai atu Paulo i le Au Paia e faataunuu la latou tautinoga talu ai e foai atu mea sa latou mafaia i le Au Paia matitiva, e faapei lava ona sa ofoina atu e le Faaola le tamaoaiga e faavavau ia te i latou.

O le a le mea e tupu ia i tatou taitoatasi pe a tatou malamalama i mea uma na tuuina mai e le Faaola ia i tatou? (E ono faaaoga e le vasega ni upu eseese ae e tatau ona faailoa maia se mataupu faavae e pei o lea: A oo ina tatou malamalama i mea uma na tuuina mai e le Faaola ia i tatou, o le a tatou naunau atili e foai atu a tatou mea i isi.
E mafai faapefea e le manatunatu i meaalofa a le Faaola mo i tatou ona faaosofia lo tatou fia foai atu i e manaomia le fesoasoani?
O a ni meaalofa patino na avatu e le Faaola ia te oe e mafai ona musuia ai oe e foai atu i isi?

Valaaulia ni nai tagata e faitau leotele le 2 Korinito 8:12–15. Fai i le vasega e mulimuli ai, ma vaavaai mo se isi upumoni na aoao atu e Paulo i tagata e uiga i le taua o le lagolagoina e le tasi o le isi i ala faaletino.

O le a se upumoni e mafai ona tatou aoao mai fuaiupu 12–13? (Fesoasoani i le vasega e faailoa mai le upumoni lea: E finagalo le Atua ia tatou naunau e foai atu tusa lava pe leai sa tatou mea e foai atu.

Ina ia fesoasoani i tamaiti aoga ia malamalama i lenei upumoni, valaaulia se tamaitiiti aoga e faitau leotele le saunoaga lenei a Elder Jeffrey R. Holland:

“Mauoa pe matitiva, e tatau ona tatou ‘fai le mea ua tatou mafai’ pe a i ai nisi e le tagolima”(“Pe Le o i Tatou Uma Ea O Ni Tagata Aisi?” 41).

O le a se mea e mafai ona tatou faia mo isi pe afai e leai sa tatou mea faitino e foai atu ia i latou?
E tusa ai ma fuaiupu 14–15, o ai e manuia ai pe a foai atu pea lava pea e le Au Paia uma i e manaomia? (Soo se tasi lava e ono manaomia i soo se taimi.)
O a ni nai auala e manuia ai tagata uma pe a tatou naunau uma e foai atu?

Ina ia fesoasoani i le vasega ia lagona le taua o nei upumoni ma mataupu faavae ma faaaogaina, faitau leotele le saunoaga lea a Elder Holland Valaaulia le vasega e faalogologo pe mafai faapefea e le Alii ona tali alofa mai i e matitiva.

“Ou te le iloa tonu pe o le a se tulaga e tatau ona outou faataunuu ai a outou matafaioi ia i latou o e e le fesoasoani pe ua le mafai ona fesoasoani ia i latou lava. Ae ou te iloa o loo silafia e le Atua, ma o le a Ia fesoasoani ma taiala outou i ni galuega agaalofa faalesoo pe afai o outou mananao ma le lotofuatiaifo ma tatalo ma saili mo ni auala e tausi ai se poloaiga ua Ia tuuina mai pea lava pea ia i tatou”(“Pe Le O i Tatou Uma Ea O Ni Tagata Aisi?” 41).

O le a le tala a Elder Holland e tatau ona tatou faia ina ia saunia ai e fesoasoani i e matitiva ma e le tagolima?
O a ni nai auala ua faatuina e le Ekalesia e mafai ai ona tatou fesoasoani e faafetaiaia manaoga o e matitiva? (E ala i taulaga anapogi, galuega faatino e auauna atu ai i le lotoifale, ma avanoa o auaunaga mo tagata.)

Fautuaina le vasega e tusi ia latou api po o api talaaga mo le suesueina o tusitusiga paia se mea se tasi ua latou fuafua e fai e faavae i mea na aoao mai e Paulo e uiga i le foai atu i e matitiva ma e le tagolima.

Aotele le 2 Korinito 8:16–24i le faamatala atu sa tautala Paulo i le Au Paia i Korinito e uiga ia Tito ma isi uso e toalua o e sa auina atu e aoina foai alofa mo le Au Paia i Ierusalema. Sa tautala Paulo e uiga i lona faatuatuaga i le Au Paia i Korinito ma faamatala atu e faapea o lo latou foai atu ma le matamau o le a avea ma faamaoniga o lo latou alolofa mo isi.

2 Korinito 9

Ua aoao atu Paulo e uiga i faamanuiaga o le avea o se e foai atu ma le loto faamaoni

Aotele le 2 Korinito 9:1–5i le faamatala atu sa viia pea lava e Paulo le Au Paia i Korinito. Sa ia tau atu i le Au Paia sa ia auina atu Tito ma isi e faamautu lo latou naunau e foai atu ma le matamau.

Fai i le vasega e mafaufau pe ua latou foai atu se mea i se tasi pe tuuina atu se auaunaga mo se tasi i se uiga musua.

Aisea e faigata ai i nisi taimi ona fiafia e uiga i le ofoina atu o ou taimi, tupe, ma isi punaoa e fesoasoani ai i isi?

Valaaulia se tamaitiiti aoga e faitau leotele le 2 Korinito 9:6–7 . Fai i le vasega e mulimuli ai, ma vaavaai mo le faatusatusaga na faaaoga e Paulo e aoao atu ai tagata o le ekalesia i Korinito e uiga i le foai atu ma le matamau.

O le a le uiga o le lulu o fatu? (Totoina fatu.)
O le a le mea na faatusa i ai e Paulo le toto o fatu? (Foai atu i isi.)

Tuu i luga ni nai fatu fualaau aina suamalie po o fualaau faisua, pe faaali foi seata.

O ai le au lulu saito i lenei faatusatusaga? (O le Au Paia, po o i tatou.)
E tusa ai ma le fuaiupu 7, o faapefea ona faamoemoe mai le Alii ia i tatou e lulu ia fatu, pe foai atu? (Ma le fiafia, ae le faia ma le musua. Tagai foi i le Moronae 7:8.)

Tusi le faamatalaga lenei e lei maea i luga o le laupapa: Afai tatou te foai atu ma se loto fiafia i e manaomia …

E tutusa faapefea le foai atu i isi ma le luluina o fatu i se fanua?
O le a le mea e tupu pe afai e na ona tatou lulu na o ni nai mea?
O le a le mea e tupu pe a tatou luluina ia tele?

Faamaea le mataupu faavae o i le laupapa ina ia aumai ai le upumoni lenei: Afai tatou te foai atu ma le loto fiafia i e manaomia, o le a faatupulaia i e le Atua faamanuiaga mo i tatou.

E mafai faapefea e le foai atu i isi ma se loto fiafia ona taitai tonu ai i tatou i lo tatou mauaina e sili atu nai lo mea sa tatou amata ai?

Valaaulia se tamaitiiti aoga e faitau leotele le 2 Korinito 9:8–10 Fai i le vasega e vaavaai mo faamanuiaga na fai mai Paulo o le a maua e le Au Paia pe afai latou te foai atu ma se loto fiafia.

O ni nai fasifuaitau na faaaoga e Paulo e faamatala ai faamanuiaga e foai atu e le Alii i e e foai atu ma se loto fiafia? (O tali e mafai ona aofia ai “e faatupulaia ia te outou o meaalofa uma” [fuaiupu 8], “o loo faalavaina i aso uma o mea uma ia te outou” [fuaiupu 8], “e tumau lana amiotonu e faavavau” [fuaiupu 9], ma “faatupuina e ia le fua o la outou amiotonu” [fuaiupu 10].)

Faamatala o nei fasifuaitau ua tau mai ai o le a tatou maua le alofa tunoa o le Alii, lea e mafai ona aofia ai faamanuiaga faaletino, e lava ma totoe mo mea tatou te manaomia.

E tusa ai ma le fuaiupu 10, o ai “le ua foai tele mai saito i le ua lulu ai”? (O Le Alii. Toe faaali le fatu, ma faamatala na pau le mea ua mafai ai ona tatou foai atu i isi ona sa muai aumaia e le Alii mo i tatou.)
E fesoasoani faapefea ia i tatou le manatua o le mea tatou te maua mai ai mea uma, tatou te foai atu ai ma le fiafia?

Valaaulia ni nai tamaiti aoga e feauauai i le faitauina leotele o le 2 Korinito 9:11–15. Fai i le vasega e mulimuli ai ma vaavaai pe o a mea na aoao mai e Paulo e uiga i na Au Paia o e foai atu ma taliaina ma le fiafia.

E tusa ai ma le fuaiupu 11–15, e faapefea lagona i le Atua, o le Au Paia o e foai saoloto atu ma mauaina mai mea a le tasi ma le isi?

Atonu e te manao e valaaulia le vasega e mafaufau e maka soo se fasifuaitau o le lotofaafetai o loo maua i nei (fuaiupu 11), “e tupu ai le faafetai i le Atua” (fuaiupu 12), “o loo vivii atu i latou i le Atua” (fuaiupu 13), ma le faafetai i le Atua i lana mea foai fua e le mafaamatalaina” (fuaiupu 15).

Atonu e te manao e fautua atu ia tusi e tagata o le vasega lenei upumoni i totonu o a latou tusitusiga paia i talane o lefuaiupu 11–15. O le faailoaina o le agalelei o le Atua i le faamanuiaina o i tatou e mafai ona fesoasoani tatou te lagonaina ai le lotofaafetai ia te Ia.

O anafea na e lagonaina ai le lotofaafetai i le Atua ina ua e iloaina faamanuiaga na Ia auina mai ia te oe ona o lou auauna atu ma foai atu i isi i se ala fiafia?

Molimau atu i mataupu faavae ma upumoni na faailoa mai e le vasega i le 2 Korinito 8–9.

Fautuaina le vasega e mafaufau i ni auala e mafai ona latou fesoasoani ai i se tasi e manaomia le fesoasoani i lenei vaiaso. Valaaulia i latou e faatu se sini e fesoasoani i lena tagata.

Tala ma Faamatalaga o Talaaga

2 Korinito 8:9. “Sa tamaoaiga ia, a ua faamativaina ona o outou”

Mo se faamalamalamaga o le afio maualalo mai ofoofogia o Iesu Keriso ona o i tatou, tagai“The Condescension of God and of Man” ([First Presidency Christmas devotional, Dec. 7, 2014], lds.org/broadcasts), saunia e Elder D. Todd Christofferson o le Korama a Aposetolo e Toasefululua.

2 Korinito 8:14. “Ina ia fai faatatau”

I le sauniga aoao o le perisitua, na faasoa mai ai e Peresitene Dieter F. Uchtdorf o le Au Peresitene Sili le saunoaga lea, e faatatau tutusa i alii ma tamaitai:

“I le taimi lava lenei, e toatele tagata o le Ekalesia o loo mafatia. Latou te fiaaai, e taufaasoasoa tupe, ma o loo tauivi ma ituaiga uma o faanoanoaga faaletino, faalelagona, ma le faaleagaga. Latou te tatalo ma le malosi uma o o latou agaga mo se fesoasoani, mo se toomaga.

“Uso e, faamolemole aua tou te mafaufau faapea o se tiutetauave lenei a se isi tagata. O lau, ma o lau na foi. Ua tauto i tatou uma. ‘Uma’ o lona uiga otagata uma—o i latou uma ua umia le Perisitua Arona ma le Mekisateko, o e mauoa ma e matitiva, i nuu uma lava. (“Saunia i le Ala a le Alii,” Ensign po o le Liahona, Nov. 2011, 54).