Folasaga i le Tusi a Paulo i Filipi
Aisea e suesue ai lenei tusi?
I lana Tusi i Filipi, na avatu ai e Paulo i le Au Paia i Filipi se faamalosiauga ma apoapoai atu ai ia te i latou e tutu mausali i le lotogatasi ma galulue faatasi e puipui le faatuatua. Atonu o se tasi o mataupu faavae e sili ona taua na aoao atu e Paulo i Filipi o le tatalo i le Atua ma talitonu ia te Ia e aumaia “le filemu o le Atua, lea e silisili i lo mea uma e manatu i ai” Filipi 4:7). O le suesue i savali a Paulo o le faamalosiauga i lenei tusi e mafai ona fesoasoani i le vasega ia latou taumafaiga e tumau faamaoni e oo i le iuga. A o taumafai le vasega e mulimuli ia Keriso, e mafai foi e i latou ona maua le mautinoa ma, e pei o Paulo, tautino au, “Ou te mafai ona faia o mea uma ia Keriso lea e faamalosia ai au” Filipi 4:13
O ai na tusiaina lenei tusi?
E ui o loo taua Timoteo faatasi ma Paulo i le faafeiloaiga a le tusi (tagai Filipi 1:1), ae sa tusi atu e Paulo le Tusi i Filipi. O loo lagolagoina lea i le faaaogaina o le suinauna segila Ii le tusi atoa ma le mau faasino ia Timoteo i le Filipi 2:19. Atonu na galue ia Timoteo e fai ma tusiupu a Paulo e tusia le tusi i lalo o le taitaiga a Paulo.
O anafea ma o fea foi na tusia ai lenei tusi?
Peiseai na tusia e Paulo le Filipi i se taimi i le va o le T.A. 60 ma le 62, ao faafalepuipuia o ia i Roma (tagai Filipi 1:7, 13, 17; tagai foi Galuega 28:16–31; Taiala i tusitusiga paia, “Filipi,” scriptures.lds.org).
O ai na faatatau i ai le tusiaina o lenei tusi, ma pe aisea foi?
O Filipi o le nofoaga muamua lea i Europa sa folafola aloaia atu ai e Paulo le talalelei ma faatuina se lala o le Ekalesia (tagai Galuega 16:11–40; Bible Dictionary, “Pauline Epistles”). O se tasi o faamoemoega o Paulo i le tusiaina o lenei tusi o le faaalia lea o le lotofaafetai mo le agalelei ma le fesoasoani tautupe a le au paia i Filipi na tuuina atu ia te ia i lana malaga faafaifeautalai lona lua ma lona faafalepuipuia i Roma (tagai Filipi 1:3–11; 4:10–19; tagai foi Bible Dictionary, “Pauline Epistles”).
Sa viia foi e Paulo ia tagata i Filipi i lo latou faatuatua ia Iesu Keriso ma avatu ia i latou fautuaga e faavae i faamatalaga e uiga ia i latou na ia maua mai se soo Filipi e igoa ia Epaferoti (tagai Filipi 4:18). O le fautuaga a Paulo e aofia ai le faamalosiauga ia lotomaulalo ma le lotogatasi (tagai Filipi 2:1–18; 4:2–3). Sa lapatia foi e Paulo ia Filipi e faaeteete i Kerisiano piopio, e pei o i latou o e aoao atu faapea e tatau ona peritomeina mo le liuaina. O na tagata (e tele ina faasino i ai o sa-Iutaia) sa le sao lo latou faapea mai o tagata fou ua liliu mai e tatau ona usitai atu i le tulafono o le Feagaiga Tuai o le peritomeina a o lei avea ma Kerisiano (tagai Filipi 3:2–3).
O a nisi o vaaiga iloga o lenei tusi?
O Filipi e masani ona faaigoa o se Tusi o le falepuipui, faatasi ai ma le Efeso, Kolose, ma Filemoni. E ui ina sa tusia mai le falepuipui, o le tusi a Paulo i Filipi sa faamatalaina e sikola o le tusi aupito fiafia o ana tusiga. Sa faaalia e Paulo le lotofaafetai, alofa, ma le talitonu mautinoa i tagata o le Ekalesia; sa faamatala ai taulaga sa ia faia e mulimuli ai ia Iesu Keriso; ma faatonuina ai le Au Paia i Filipi i mataupu faavae o le ola amiotonu. Atonu e iloa e le vasega i le Filipi 4:8nisi o le gagana o loo faaaoga i le mataupu faavae lona sefulutolu o le faatuatua,
Sa taua i se tulaga o se solo le faamaualaloina o le Faaola mai le paia i le muai olaga i le soifuaga i le tino, lea na Ia mafatia ai i le “maliu i le satauro” (tagai Filipi 2:3–8). Ona ua faataunuuina Lana misiona paia, ua tu nei Iesu Keriso ua faaeaina, ma o le a oo mai le aso o le “a tootutuli tulivae uma ma … tautau atu o Iesu Keriso o le Alii lava ia” (Filipi 2:10–11). Sa faaalia e Paulo o lona punavai i totonu o le talitonu mautinoa ma le malosiaga e mai ia Iesu Keriso (tagai Filipi 4:13).
Otootoga
Filipi 1ua faaalia ai e Paulo le lotofaafetai mo le faaaumea a le Au Paia i Filipi. Ua ia aoao atu o mea faafeagai na ia oo i ai i le auauna atu i le Alii, e aofia ai lona faafalepuipuia, sa faatupu atili ai le faamoemoe o le talalelei. Ua ia fautuaina tagata o le Ekalesia e tutu mausali i le lotogatasi i le puipuia o le faatuatua.
Filipi 2na toe faamalosiau ai e Paulo ia tagata o le Ekalesia ia tutu faatasi ma faasino i le faataitaiga a Iesu Keriso, o le sa faamaualalo ina ia afio mai i le olaga nei, e fai ma faataitaiga o le alofa, usiusitai, ma le lotomaualalo. O tagata uma o le a i ai se aso e faailoa atu ai o Iesu Keriso o le Alii ia. Ua faatonuina e Paulo tagata o le Ekalesia e galueaiina lo latou lava faaolataga.
Filipi 3Ua lapatai atu ai Paulo i le faa-Iutaia. Ua ia faamatala lona soifua muamua o se Faresaio ma le ala na ia lafoai ai ma le loto mea uma ia mulimuli ai ia Iesu Keriso. Ua ia apoapoai atu i le Au Paia e mulimuli i lana faataitaiga i le fetuleni atu i luma i le faaolataga. Ua faamatala atu e Paulo faapea o Iesu Keriso o le a suia o tatou tino faaletino i ni tino mamalu e pei o Lona.
Filipi 4Ua fautuaina e Paulo le Au Paia ia olioli e le aunoa i le Alii. Ua apoapoai atu o ia e suia le atuatuvale i le tatalo ma le faafetai, ma folafola atu ai o le a latou olioli i le filemu o le Atua, lea e silisili i lo mea uma e manatu i ai. Ua apoapoai atu Paulo i tagata o le Ekalesia e mafaufau i mea e faamaoni, e tonu, mama, matagofie, tauleleia, ma le amioatua. Na ia faailoa mai e mafai ona ia faia mea uma e ala ia Iesu Keriso, o le faamalosia o ia.