Lesona 13

Mataio 8–10

Folasaga

A o femaliuai Iesu Keriso i Kalilaia, sa Ia faatinoina le tele o vavega. Sa Ia valaauina foi Aposetolo e Toasefululua, faaeeina i latou ma aoaoina, ma auina atu i latou e galulue i tagata.

Fautuaga mo le Aoaoina Atu

Mataio 8:1–9:34

Ua faatinoina e Iesu le tele o vavega

I le amataga o le vasega, valaaulia tagata o le vasega e tali i le fesili lea:

• A na e iloa ina o le a afio mai le Faaola e asiasi mai i lou aai po o le taulaga i le aso, mata o ai o le a e aumaia ia te Ia ina ia faamaloloina? Aisea?

Tusi mau faasino nei i luga o le laupapa: Mataio 8:1–4; Mataio8:5–13; Mataio8:14–15; Mataio 8:23–27; Mataio 8:28–32; Mataio 9:1–8; Mataio 9:18–19, 23–26; Mataio 9:20–22; Mataio 9:27–31; ma le Mataio 9:32–33. Tuu atu ia tofu tagata ma se mau faasino se tasi. (Afai e toalaiti lau vasega, e mafai ona sili atu i le tasi le mau a nisi.)

Valaaulia le vasega e faitau a latou mau na tofi atu i ai ma vaavaai mo vavega na faia e Iesu. A uma ua lava se taimi, fai i ai e lipoti faapuupuu mai mea sa latou aoaoina. (Manatua: O le a suesue loloto atili e le vasega nei vavega i leMareko 1–5.)

Suesueina faasolosolo o tusitusiga paia

O Mataio, Mareko, Luka, ma Ioane o loo tofu tusia ia mea na tutupu ma auiliiliga o le soifuaga o le Faaola ia e tulagaese i a latou tala. Peitai, o Evagelia a Mataio, Mareko, ma Luka o loo faamatala mai ai foi le tele o anotusi lava e tasi. O faamanatu mo faiaoga o loo tuuina atu i vaega eseese i le tusi lesona e fesoasoani ai ia outou iloa mea o le a aoao atu ai auiliili mea patino na tutupu. Mo se faataitaiga, o vavega o loo tusia i le Mataio 8 ma le 9 o le a matua auiliiliina i lesona mo le Mareko1–5.

Valaaulia se tamaitiiti aoga e faitau leotele le Mataio 8:16–17. Fai i le vasega e mulimuli ai ma vaavaai mo se valoaga na faataunuuina e Iesu Keriso a o Ia faatinoina nei vavega. Valaaulia tagata aoga e lipoti mai mea ua latou mauaina.

• O le a le upumoni e uiga ia Iesu Keriso e mafai ona tatou aoaoina mai tala a nei vavega? (E ono faaaoga e le vasega ni upu eseese, ae ia mautinoa latou te faailoa mai ia le upumoni lea: E mafai e Iesu ona faamalolo i tatou mai o tatou mafatiaga ma ma’i. Atonu e manaomia ona e faamatala atu o se mafatiaga o se ma’i, augavaivai, po o se vaivaiga.)

• E mafai faapefea e le Faaola ona faamalolo i tatou pe faamalolosia o tatou vaivaiga pe afai tatou te le o savavali faatasi ma Ia i le aso? (E ala i Lana Togiola. Tagai Alema 7:11–13.)

Mataio 9:35–10:8

Ua valaauina e Iesu Aposetolo e toasefululua

Faaali se ata po o ni ata o Aposetolo o i ai nei o le Ekalesia, e aofia ai ma le Au Peresitene Sili. (E mafai ona maua na ata i le LDS.org [see Meet Today’s Prophets and Apostles] ma lomiga o konafesi aoao Ensign po o le Liahona.)

• O le a le mea ua tulagaese ai nei tamalii mai lo tagata uma o i ai i le lalolagi i le taimi nei?

Valaaulia le vasega e vaavaai mo upu moni ao latou suesueina le Mataio 9–10 e uiga i matafaioi a Aposetolo ma faamanuiaga e mafai ona latou aumaia i o tatou olaga.

Valaaulia se tamaitiiti aoga e faitau leotele le Mataio 9:35. Fai i le vasega e mulimuli ai ma vaavaai mo mea na faia e Iesu e faaopoopo i le faamaloloina o isi.

• E le gata i le faamaloloina o isi, o le a le mea na faia e Iesu i le taimi o Lana galuega?

Faamatala sa talai atu e Iesu le talalelei ma faia vavega i Iutaia uma, sa faateleina le aofai o tagata na mulimuli atu ma saili ia te Ia.

Valaaulia se tamaitiiti aoga e faitau leotele le Mataio 9:36–38. Fai i le vasega e mulimuli ai ma vaavaai po o ai lea na fetalai le Faaola Na te manaomia e fesoasoani ia te Ia e auauna atu ia i latou uma sa mulimuli atu ia te ia.

• E tusa ai ma le fuaiupu 37–38, o ai lea na fetalai Iesu Na te manaomia e fesoasoani ia te ia e tausia ma vaaia i latou o e sa mulimuli atu ia te Ia?

Valaaulia se tamaitiiti aoga e faitau leotele le Mataio 10:1–4. Fai i le vasega e mulimuli ai, ma vaavaai mo mea na faia e Iesu e fesoasoani ai e taulima manaoga o tagata.

• O le a le mea na faia e Iesu e fesoasoani ai i le motu o tagata o e sa mulimuli atu ia te Ia?

• O le a le aoaoga faavae e mafai ona tatou aoao mai nei fuaiupu e uiga i le ala e tasi na auauna atu ai Iesu Keriso i tagata i le lalolagi? (E ono faaaoga e tagata ni upu eseese, ae ia mautinoa latou te faailoa maia le aoaoga faave lenei: Ua valaauina e Iesu Keriso ia Aposetolo ma faaee atu Lana pule i o latou luga. Atonu e te manao e fautua atu i tamaiti aoga e tusi lenei aoaoga faavae i autafa ole Mataio 10:1–4.)

Valaaulia se tamaitiiti aoga e faitau leotele le Mataio 10:5–8. Fai atu i le vasega e mulimuli i le faitauga, ma vaavaai po o le a le mea na poloaiina e Iesu Ana Aposetolo e fai.

• O le a le mea na poloaiina e le Alii Ana Aposetolo e fai?

Faamatala o le upuaposetoloe sau mai le upu Eleni o lona uiga “o le e auina atu.” O le taimi muamua sa auinia atu ai Aposetolo i na o le aiga o Isaraelu. Mulmuli ane, sa poloaiina ai e le Faaola toetu ua tatau foi ona talai atu le talalelei i Nuuese, po o i latou e le o ni aiga o Isaraelu.

• O a ni mea e tutusa ai na e matauina i le va o galuega na faia e Iesu ma galuega na Ia poloaiina Ana Aposetolo e fai?

• O le a le upumoni e mafai ona tatou aoao mai nei fuaiupu e uiga i le mea na valaau e Iesu Keriso ia Aposetolo e fai? (E ao i le vasega ona faailoa mai se upumoni e talitutusa ma lenei: Ua valaauina e le Alii ia Aposetolo e talai atu Lana talalelei ma faia Lana galuega. Mafaufau e tusi le upumoni lenei i luga o le laupapa.)

Toe fasino i ata o Aposetolo o i ai nei. Fai i le vasega e tuu mai ni faataitaiga pe o faafefea e Aposetolo o le taimi nei ona tali atu ma auauna atu e faapei ona faia e Iesu Keriso pe ana i ai o Ia iinei.

Fesoasoani i tagata o le vasega ia lagona le moni ma le taua o aoaoga faavae ma mataupu faavae

A uma ona faailoa mai e le vasega ma malamalama i mataupu faavae ma aoaoga faavae ole talalelei o loo maua i mau, atonu e le mafai ona latou faaaogaina seia vagana ua latou lagonaina lo latou moni ma le taua e ala i le Agaga ma maua se lagona o le faanatinati e faaaoga ia mataupu faavae i o latou lava olaga. O se tasi o ala e sili ona aoga e fesoasoani ai i tagata aoga e faia lenei mea o le uunaia lea o i latou e toe manatunatu ma faasoa mai ni aafiaga patino e tusa ma nei upumoni.

Ina ia fesoasoani ia lagona e le vasega le taua o le upumoni sa latou faailoa mai i luga, faitau pe faaali se vaega o se lauga talu ai nei a se Aposetolo o onapo nei e talafeagai ma le autalavou. A uma ona faitau se saunoga pe faaali se ata vitio, ona fesili lea:

• E mafai faapefea e le malamalama o Aposetolo na tofia e Iesu Keriso e fai Lana galuega ona tosina ai le ala tatou te tali atu ai i mea latou te aoao mai ma fautuaina i tatou e fai?

• O faapefea ona tosinaina lou olaga i auaunaga ma savali a Aposetolo i le taimi nei?

Valaaulia le vasega e saili ma le faamaoni ni avanoa e faalogologo ai, suesue, ma faaaoga ia upu a Aposetolo filifilia a le Alii?

Mataio 10:9–42

Ua faatonuina e Iesu ia Aposetolo e Toasefululua a o lei o atu i latou e talai atu ma auauna atu

Otooto le Mataio 10:9–16i le faamatala atu na faatonuina e le Alii ia Aposetolo e faalagolago i le Tama Faalelagi e tuuina atu mea latou te manaomia, a o latou femalagaai e folafola atu le talalelei. Na aoao atu foi i latou e le Faaola e faamanuia i tagata o e taliaina ma tali i latou.

Fai i le vasega e mafaufau i se taimi na fesili atu ai se tasi e le auai i lo latou faatuatuaga, i se fesili faigata e uiga i le talalelei, pe fesili atu e uiga i se mea e feteenai ma le Ekaelsia.

• O le a le tulaga o lou mautinoa i le iloaina pe o le a lau tala e tatau ona fai atu i lena tulaga? Aisea?

Valaaulia le vasega e vaavaai mo se mataupu faavae i aoaoga a Iesu i Ana Aposetolo i le vaega o totoe o le Mataio 10 e mafai ona fesoasoani ia i tatou pe a manaomia ona tatou faamatala atu le talalelei pe faasoa atu a tatou molimau.

Valaaulia ni nai tagata aoga e feauauai i le faitauina leotele mai o le Mataio 10:16–20. Fai i le vasega e mulimuli ai, ma vaavaai mo ituaiga o luitau na fetalai Iesu o le a feagai ma Aposetolo a o latou femalagaai e talai atu.

• O le a le luitau na fai mai Iesu o le a feagai ma Ana Aposetolo a o latou o atu e talai atu le talalelei?

• E tusa ai ma fuaiupu 19–20, na faapefea ona iloa e le au Aposetolo le mea e fai atu ai i nei tulaga faigata? (Atonu e manaomia ona e faamatala atu o le fasifuaitau “aua le mafaufau” o lona uiga”aua nei soona popole” [tagai fuaiupu 19, vaefaamatalaga a].)

• O a mataupu faavae e mafai ona tatou aoao mai nei fuaiupu e uiga i le tautala atu i isi pe a tatou i ai i le galuega a le Alii? (E ono faaaoga e le vasega ni upu eseese, ae e tatau ona faailoa mai le mataupu faavae lenei: A tatou i ai i le galuega a le Alii, o le a Ia musuia i tatou i mea tatou te tautala atu ai pe a manaomia.

• O le a se taimi na e lagonaina ai le musuia o oe e le Alii ia iloa le mea e ta’u atu i se isi tagata? (Atonu e te manao e avatu i le vasega se taimi e mafaufau ai a o lei fesili atu ia i latou e tali mai i le fesili lea.)

Otooto le Mataio 10:21–42 i le faamalamalama atu na faaauau pea e Iesu Keriso ona tuu atu faatonuga i Aposetolo, lapataiga, ma faamafanafanaga e uiga i luitau o le a latou feagai. Ina ia fesoasoani i le vasega e suesue i afioga a le Faaola i leMataio 10:37–39, vaevae i latou i ni paga po o ni vaega toalaiti ma tuu atu i paga taitasi po o vaega se kopi o le tufaaga o loo avatu i i. Valaaulia le vasega e mulimuli i faatonuga o i luga o tufaaga e ala i le suesue faatasi i fuaiupu ua atofa atu ai, ma talanoaina a latou tali i fesili.

Mataio 10:37–39

Tusi lesona a le Faiaoga Seminare o le Feagaiga Fou—Lesona 13

I paga po o vaega toalaiti, suesue faatasi ia fuaiupu na atofa atu i ai, ma talanoaina a outou tali i fesili.

Faitau leMataio 10:37–38, ma vaavaai mo osigataulaga na fetalai le Faaola e tatau ona tatou naunau e fai i le avea ai ma Ona soo. O le fasifuaitau “aoga ia te au” i nei fuaiupu o lona uiga ia avea o se sui agavaa o le Alii ma ia tatau ai mo Ana faamanuiaga.

• Aisea e te manatu ai e tatau i soo o Iesu Keriso ona alolofa ia te Ia i lo isi mea uma—e aofia ai tagata o o latou lava aiga?

O le satauro o loo ta’ua i le fuaiupu 38 e faasisi i le satauro faaletino na tauamoina e Iesu Keriso ma sa sii a’e ai i luga ina ia faataunuu ai le fiangalo o Lona Tama. I se tulaga faafaatusa, ua valaau atu “ia ave [o latou] satauro, ma mulimuli atu ia te [Ia]” (Mataio 16:24).

Faitau le Faaliliuga a Iosefa Samita (i le Mataio 16:24, vaefaamatalaga e), ma vaavaai poo le a le uiga o le avea o o tatou satauro ma mulimuli atu ia Iesu Keriso.

Faitau leMataio 10:39, ma vaavaai mo mataupu faavae na aoao mai e Iesu Keriso e uiga i le ositaulaga. O le Faaliliuga a Iosefa Samita o loo faamanino mai ai le amataga o lenei fuaiupu ina ia faitauina, “O le e saili e faasao lona ola …” (tagai fuaiupu 39, vaefaamatalaga a). I le talaaga lea, o le fasifuaitau “faasaoina lona ola” o lona uiga o le ola ma le manatu ifo ia te ia lava ae le saili e auauna atu i le Atua ma Ana fanau.

• O a ni auala e te manatu o le a iu i ai tagata e taulai atu i o latou lava loto ma manaoga manatu faapito ma “maumau” ai o latou ola?

E fua i mea sa e faitauina, faamaea le mataupu faavae lenei:

Afai tatou te saili e faasao o tatou ola, ona .

Fuafua e maka i le fuaiupu 39 le folafolaga na fai atu e le Faaola ia i latou o e faamaumau o latou ola ona o Ia. Ia i latou o e faamaumau o latou ola ona o Ia e sili atu i le na ona naunau e oti mo Ia. O lona uiga o le naunau e ofo atu i tatou lava i aso taitasi e auauna atu ia te Ia ma tagata o siomia ai i tatou.

• O le a sou manatu i le uiga o le maua o o tatou ola pe a tatou faamaumau mo Ia?

E fua i mea sa e faitauina, faamaea le mataupu faavae lenei:

Afai tatou te faamaumau o tatou ola ona o Iesu Keriso, ona .

Faitau le saunoaga lea a Peresitene Thomas S. Monson, ona talanoaina lea o au tali i fesili e sosoo ai.

“Ou te talitonu ua tau mai e le Faaola ia i tatou, sei vagana ua tatou faamaumau o tatou ola ona o isi, o le a itiiti se faamoemoega o o tatou lava olaga. O i latou o e ola mo na o i latou lava, e iu ina maanuminumi ma, maumau ai lo latou ola, a o i latou o e faaalu o latou lava ola e auauna atu ai i isi, e ola ma lauusiusi—ma faasaoina ai o latou ola.”(“O Le A Se Mea Ua Ou Faia mo Se Tasi i le Aso?” Ensign po o le Liahona, Nov. 2009, 85).

• O ai e te iloaina na filifili e faamaumau lona ola mo Iesu Keriso? O le a se aafiaga o lenei faaiuga i lenei tagata?

© 2015 Puletaofia e le Intellectual Reserve, Inc.Ua taofia aia tatau uma.

A uma ona faamaea e tagata le tufaaga, e mafai ona e fai atu i nisi e aotele mai mo le vasega mea sa latou aoaoina.

Atonu e te manao e faasoa atu lau molimau i le mataupu faavae na faailoa mai e le vasega e faatatau i le maumau o o tatou ola ona o Iesu Keriso. Valaaulia le vasega e lisi i a latou api po o api talaaga mo le suesueina o tusitusiga paia ni nai mea e mafai ona latou faia i le aso pe i se aso lata mai e faamaumau ai o latou ola e auauna atu ia Iesu Keriso ma isi. Valaaulia i latou e faatu se sini ma galulue ai i lena sini.

Tala ma Faamatalaga o Talaaga

Mataio 10:35–37. “O le ua tele lona alofa i lona tama po o lona tina a e itiiti ia te au”

Na saunoa Peresitene Ezra Taft Benson e uiga i le Mataio 10:35–37o se tasi o filifiliga aupito sili ona faigata e ono fai e se tagata o le filifili lea i le va o le Atua ma se tagata o le aiga:

“O se tasi o suega aupito sili ona faigata o suega uma o le taimi ua tatau ai ona e filifili i le va o le faamalieina o le Atua pe faamalie se tasi e te alofa ma faaaloalo i ai—aemaise lava o se tagata o le aiga.

“Sa feagai Nifae ma lena suega ma sa lelei ona ia taulimaina ina ua muimui lona tama lelei mo sina taimi e uiga i le Alii (tagai 1 Nifae 16:18–25). Sa tausisia e Iopu lana amiotonu i le Alii e ui ina sa fai atu i ai lana ava e fetuu ia i le Atua ona oti ai lea (tagai Iopu 2:9–10).

“Fai mai le mau, ‘Ia e ava i lou tama ma lou tina’(Esoto 20:12; tagai foiMosaea 13:20). O nisi taimi e tatau i se tagata ona filifili e faamamalu i le Tama Faalelagi nai lo le tama faaleolaga nei”(“O Poloaiga Sili—Alofa i le Alii,” Ensign, Me 1988, 5).

Manatu Faaopoopo mo le Aoaoina Atu

Mataio 10:34–38. Ua aoao atu e Iesu Ona soo o le a i ai e tetee mai

A uma ona aotele mai le Mataio 10:21–42, valaaulia se tagata e faitau leotele le Mataio 10:34–35. Fai atu i le vasega e mulimuli i le faitauga, ma vaavaai mo mea na fetalai Iesu Keriso o le a tutupu a o talai atu Lana talalelei.

Faamatala i le vasega e lei faapea mai Iesu Keriso o le faamoemoega o Lona afio mai o le vaevaeina o aiga ma aumaia le feteenai i le laueleele, ae sa ia aoao mai faapea o le ala o le a tali atu ai tagata ia te Ia ma Lana talalelei e mafai ona afua ai fevaevaeaiga ma le le nofolelei. O i latou o e filifili e mulimuli ia Keriso e ono oo i fevesiaiga ma isi e oo lava ina inosia e o e le taliaina o Ia ma Lana talalelei, e aofia ai tagata o aiga ma uo. O se lapataiga lea i Ona soo ia aua nei faapea o le a aunoa o latou olaga ma tofotofoga po o le tetee mai o tagata.

• E mafai faapefea e le talalelei a Iesu Keriso ona aumaia le filemu i se tagata o le e taliaina ma ola ai? O a ni auala e mafai ai e lena lava tagata ona oo i vatau, feteenaiga, po o le le nofolelei ona o lona taliaina o le talalelei?

• O a ni auala na fevaevaeai ai tagata o ola i le laueleele ona o le afio mai o Iesu Keriso i le taimi o Lana galuega i le olaga nei?

Valaaulia se tamaitiiti aoga e faitau leotele le Mataio 10:36 Fai i le vasega e mulimuli ai ma vaavaai mo mea na faailoa mai e le Faaola o le puna o nisi o tetee o le a oo i ai Ona soo ona o lo latou taliaina o le talalelei.

• O fea na fetalai le Faaola o le a oo ai nisi o Ona soo i sauaga ona o le mulimuli atu ia te ia? (I o latou lava fale, po o aiga.)

Valaaulia le vasega e sii o latou lima pe afai na latou oo i ai, pe iloa foi se tasi sa oo i ai i tetee po o sauaga mai se tagata o le aiga ona o le talitonu i le talalelei toefuataiina a Iesu Keriso.

• O a ni luitau e ono afua mai i lea ituaiga o tetee mo e mulimuli ia Iesu Keriso? (Afai e le ta’ua mai e le vasega, ta’u i ai o tagata i nei tulaga o nisi taimi e lagona ai le manaomia ona filifili i le va o ni tagata se toalua latou te alolofa i ai: o le Faaola ma se tagata o le aiga.)

• O a isi filifiliga faigata e ono feagai ma soo po o e mulimuli ia Iesu Keriso ona o lo latou taliaina o le talalelei?

Valaaulia se tagata e faitau leotele le Mataio 10:37–38 . Fai i le vasega e mulimuli ai, ma vaavaai pe o le a le fetalaiga a le Faaola ia i latou o e ua filifili i le va o le mulimuli ia te ia ma se isi lava mea po o se tagata.

• I au lava upu, o le a le fetalaiga a le Faaola ia i latou o e mananao e mulimuli ia te ia?

Faaauau le lesona e ala i le vavaeina o le vasega i ni paga pe o ni vaega toalaiti ma avatu ia i latou ni kopi o le tufaaga ua faaulutalaina “Mataio 10:37–39.”