Lesona 103

1 Korinito 1–2

Folasaga

Ina ua uma ona aoao e uiga i faafitauli sa feagai ma tagata o le Ekalesia i Korinito, sa tusi atu loa Paulo i nei tagata ma apoapoai atu ia i latou e tuu le fefinauai ma ia lotogatasi. Sa ia faamatala atu foi e valaauina e le Atua o e vaivai ma lotomaualalo e folafola atu Lana talalelei ma o mea a le Atua e na o le Agaga e mafai ona iloa ma malamalama ai.

Fautuaga mo le Aoaoina Atu

1 Korinito 1:1–16

Ua tusi atu Paulo i le Au Paia i Korinito ma apoapoai atu i latou e tuu le fefinauai ma ia lotogatasi.

Faaali i le vasega se ata o se aiga, se au taaalo, ma se vaega o uo (pe tusi le aiga, au taaalo, vaega o uo i luga o le laupapa).

• O a ni mea e ono afua ai ni fevaevaeaiga ma le fefinauai i nei vaega taitasi?

• E mafai faapefea e na fevaevaeaiga ma fefinauaiga ona aafia ai se aiga, se au, po o se vaega o uo?

• E mafai faapefea e na fevaevaeaiga ma fefinauaiga i tagata o le Ekalesia ona aafia ai le Ekalesia?

Valaaulia le vasega e vaavaai a o latou suesueina le 1 Korinito 1mo se upumoni e uiga i fevaevaeaiga ma fefinauaiga ia na aoao atu ai Paulo i le Au Paia i Korinito.

Valaaulia le vasega e sue i le Faafanua o le Tusi Paia, Bible Maps, no. 13, “O Malaga Faafaifeautalai a le Aposetolo o Paulo,” e maua i le faaopoopoga i le Tusi Paia, ma sue ai Korinito i le faafanua.

Valaaulia se tagata aoga e faitau leotele le parakalafa lenei:

I le taimi o le malaga lona lua faafaifeautalai, sa malaga atu ai Paulo i se aai e igoa o Korinito, lea sa ia folafola atu ai le talalelei. E toatele tagata na papatiso i le taimi lena (tagai Galuega 18:1–18). Mulimuli ane, ao talai atu Paulo i Efeso, sa ia aoaoina ai faafitauli sa tulai mai i tagata o le Ekalesia i Korinito ona o nisi o tagata liliu mai ua toe foi i o latou talitonuga muamua ma faiga o le ifo i tupua. Sa tusi atu Paulo i tagata o le Ekalesia i Korinito e faamalolosia ai i latou ma faamanatu atu ia i latou a latou tautinoga e auauna atu i le Alii.

Valaaulia se tamaitiiti aoga e faitau leotele le 1 Korinito 1:1–2 Fai i le vasega e mulimuli ai, ma vaavaai pe na faapefea ona talanoa atu Paulo i tagata o le Ekalesia i Korinito.

• Na faapefea ona talanoa atu Paulo i tagata o le Ekalesia i Korinito?

• E tusa ai ma le fuaiupu 1, o le a le tulaga o le Ekalesia na umia e Paulo?

Aotele le 1 Korinito 1:3–9 i le faamatala atu faapea na tau atu e Paulo i le Au Paia i Korinito na ia faafetai atu i le Atua mo i latou, mo le alofa tunoa sa latou maua mai e ala ia Iesu Keriso, lea sa manuia ai i latou i soo se itu. Tau i ai a o talanoa atu Paulo i le Au Paia sa ia faaaogaina le gagana e tau atu ai o le Tama Faalelagi ma Iesu Keriso o ni tagata mavaevae (tagai fuaiupu 3).

Valaaulia se tamaitiiti aoga e faitau leotele le 1 Korinito 1:10–11 . Fai atu i le vasega e mulimuli i le faitauga, ma vaavaai mo mea na apoapoai atu Paulo i le Au Paia e fai.

• E tusa ai ma le 1 Korinito 1:10, o le a le mea o faamoemoe mai le Alii ia i tatou e fai, o ni tagata o le Ekalesia? (Faaaogaina o a latou lava upu, e tatau i le vasega ona faailoa mai se mataupu faavae e pei o lea: Ua faamoemoe mai le Alii ia i tatou o ni Au Paia ina ia lotogatasi ma tuu le fevaevaeai ma le fefinauai.

• O le a se mea e mafai ona tatou fai o ni tagata o le Ekalesia e tuu ai le fevaevaeai ma le fefinauai i o tatou aiga? i a tatou uarota? (Tusi tali a tagata i luga o le laupapa.)

• O a faamanuiaga e mafai ona tatou maua mai le lotogatasi ma le tuu o le fefinauai?

• O anafea na faamanuiaina ai oe o se taunuuga o le lotogatasi i se vasega, korama, po o le uarota po o le paranesi?

Faasino le vasega i tali o tusia i le laupapa, ma fautuaina i latou e filifili se auala se tasi e mafai ona latou tuua ai le fevaevaeai ma le fefinauai ma faatu se sini e amatalia.

Aotele le 1 Korinito 1:12–16 i le faamatala atu faapea o le Au Paia i Korinito sa fevaevaeai i ni vaega e fua i le tagata na papatisoina i latou. Sa amatalia le fefinauai ona sa latou talitonu o o latou tulaga i le Ekalesia e fuafua i le taua o le tagata sa papatisoina i latou.

1 Korinito 1:17–31

Ua aoao atu Paulo e valaau e le Atua e vaivai e folafola atu Lana talalelei.

Faamatala atu o le taimi o Paulo, sa toatele tagata Eleni sa nonofo i Korinito. Sa tuu e nei tagata Eleni le faataua maualuga i manatu faafilosofia ma le poto o le lalolagi.

• Aisea e faigata ai i se tagata e faatauaina manatu o le lalolagi ona talia le talalelei? (Atonu e te manao e faitau le 2 Nifae 9:28.)

Valaaulia le vasega e vaavaai mo se upumoni a o latou suesueina le 1 Korinito 1:17–31 lea e mafai ona fesoasoani ia i latou e malamalama ai i le taufaasese o le poto o le lalolagi.

Vaevae le vasega i ni vaega se fa. Tofi atu se tasi o mau nei i vaega taitasi: 1 Korinito 1:17–18; 1 Korinito 1:19–20; 1 Korinito 1:21–22; ma le 1 Korinito 1:23–24. Valaaulia le vasega e faitau ia fuaiupu nei i a latou vaega, ma vaavaai mo mea na tau atu e Paulo e uiga i le poto o le lalolagi ma le poto o le Atua. Faamatala o le fasifuaitau “aua e lei auina mai au e Keriso e papatiso” i le fuaiupu 17 ua fautua mai ai e lei auina atu Paulo e fausia se uiga onomea e faavae i le aofaiga o tagata liliu mai sa mafai ona ia maua. Atonu foi e te manao e faamatala o fasifuaitau “poto o e popoto” i le fuaiupu 19 ma le “poto o le lalolagi” i le fuaiupu 20e faasino i tu ma aga sese faafilosofia o le aso.

A uma ua lava se taimi, valaaulia se tagata mai vaega taitasi e aotele mo le vasega mea na aoao atu e Paulo i le Au Paia i Korinito e uiga i le poto. A uma ona lipoti mai vaega uma, fesili:

• Aisea e te manatu ai sa mafaufau le au le talitonu e valea le savali o le Togiola a Iesu Keriso?

Valaaulia se tagata aoga e faitau leotele le 1 Korinito 1:25. Fai i le vasega e mulimuli ai, ma vaavaai mo mea na aoao atu e Paulo e uiga i le poto o le tagata pe a faatusatusa i le poto o le Atua. Faamatala na faaaoga e Paulo ia fasifuaitau “o le valea i le Atua o le poto lea i le tagata” ma “o le vaivaiga o le Atua o le malosi lea i le tagata” e avatu ai le poto taualuga ma le mana o le Atua. E le valea le Atua, e leai foi ni Ona vaivaiga.

• O le a le upumoni na aoao atu e Paulo e uiga i le poto o le tagata pe a faatusatusa i le poto o le Atua? A maea ona tali mai tamaiti aoga, tusi le upumoni lenei i le laupapa: O le poto o le Atua e silisili atu i lo le poto o le tagata.

• O a ni auala e aafia ai le ala e vaavaai ai se tasi mo vaifofo o ana faafitauli ona o le malamalama i lenei upumoni?

Valaaulia se tamaitiiti aoga e faitau leotele le 1 Korinito 1:26–27. Fai i le vasega e mulimuli ai, ma vaavaai mo e ua filifilia e le Atua e folafola atu Lana talalelei.

• O ai e filifilia e le Atua e folafola atu Lana talalelei?

• Aisea e te manatu ai e filifili e le Atua i latou o e manatu le lalolagi e valea ma vaivai e folafola atu Lana talalelei?

1 Korinito 2

Ua faamatala e Paulo le ala tatou te aoao ai mea a le Atua

Valaaulia se tamaitiiti aoga e faitau leotele le saunoaga lenei mai ia Peresitene Boyd K. Packer o le Korama a Aposetolo e Toasefululua:

“Sa ou nofo i se vaalele i autafa o se tagata na fai mai e le iloa le Atua, ma sa vave ona ia uunai mai lona le talitonu i le Atua ma sa ou tuu atu i ai lau molimau ia te ia. ‘E sese oe,’ sa ou fai atu ai, ‘o lo o i ai se Atua. Ou te iloa o loo soifua o Ia!’

Sa ia tali tetee mai, ‘E te le iloa. E leai se tasi na te iloa lena mea! E le mafai ona e iloa!’ Ina ua ou le gauai atu, sa fesili le tagata faapaupau, o se loia, atonu o e fesili taualuga i le mataupu o le molimau. ‘Ua lelei,’ sa ia fai mai ai i se ala faaulaula, ma faaamuamu, ‘ua e fai mai e te iloa. Tau mai ia te au pe faapefea ona e iloa.’

“Ina ua ou taumafai e tali atu, e ui lava e i ai o’u faailoga maualuluga faaakatemia, sa ou le maua se fesoasoani e talanoa ai. …

“Ina ua ou faaaogaina ia upu o le Agaga ma le molimau,sa tali mai le tagata faapaupau, ‘Ou te le iloa le mea na e te talanoa mai ai.’ O upu tatalo, iloatino, ma le faatuatua, sa faapena foi ona leai se uiga ia te ia. ‘Ua e vaai la,’ na ia fai mai ai, ‘e te matua e le iloaina lava. A na e iloa, semanu e mafai ona e tau maia ia te aupe faapefea ona e iloa.’

“Sa ou … leiloa le mea e fai” (“O le Moligao a le Alii,” Ensign, Ian. 1983, 51).

• Mata o le a sau tala i le tagata faapaupau?

Valaaulia le vasega e vaavaai mo se upumoni a o latou suesue i le 1 Korinito 2 o le a fesoasoani ia i latou e iloa ai pe aisea sa le mafai ai ona malamalama lenei tagata ia Peresitene Packer ma pe aisea e mafai ai ona latou talitonu mautinoa i lo latou malamalama i mataupu faaleagaga.

Aotele le 1 Korinito 2:1–8 i le faamatala atu faapea na tau atu e Paulo i le Au Paia i Korinito na te lei faaaogaina le poto o le lalolagi e faatalitonu ai i latou i le talalelei. Sa ia aoao atu i latou e ala i le Agaga ina ia latou maua le faatuatua i le Atua. Sa tau atu foi e Paulo ia i latou e le mafai e tagata e le talitonu ona malamalama i mealilo a le Atua.

Valaaulia ni tamaiti aoga e feauauai i le faitauina leotele o le 1 Korinito 2:9–16. Fai i le vasega e mulimuli ai, ma vaavaai mo mafuaaga na fai atu ai Paulo e mafai e nisi tagata ona iloa ma malamalama i mea loloto a le Atua” (fuaiupu 10).

• E tusa ai ma fuaiupu 9–10, aisea na mafai ai e Paulo ma isi tagata faamaoni ona malamalama i mea a le Atua?

• E tusa ai ma le fuaiupu 14, aisea e le mafai ai e nisi tagata ona malamalama i mea a le Atua?

• O le a le upumoni e mafai ona tatou aoao mai nei fuaiupu e uiga i le auala e mafai ai ona tatou iloa ma malamalama i mea a le Atua? (E ono faaaoga e le vasega ni upu eseese, ae ia mautinoa latou te faailoa maia le upumoni lea: E na o Lona Agaga e mafai ai ona tatou iloa ma malamalama i mea a le Atua.

Tagai i le tala a Peresitene Packer, ma faamatala na musuia Peresitene Packer e fesili i le tagata sa nofo i ona autafa i le vaalele pe o le a le tofo o le masima. Valaaulia se tagata e faitau leotele le vaega o totoe o le tala a Peresitene Packer:

“Ina ua mavae ni nai taumafaiga, ioe, sa le mafai ona ia faia. Sa le mafai e ia ona tau mai, i na o upu lava ia, se mea e matua faatauvaa lava e pei o le tofo i le masima. Sa ou toe tuu atu le molimau ia te ia ma fai atu, ‘Ou te iloa o loo i ai se Atua. Ua e ulagia lena molimau ma fai mai afai ou te iloa moni, semanu e mafai ona ou tau atu ia te oe le alatonu na ou iloa ai. Lau uo e, i le itu faaleagaga, ua ou tofo i le masima. Ua ou le toe mafai ona tau atu ia te oe i upu pe na faapefea ona oo mai o lenei malamalama nai lo lou tau maia ia te au pe o le a le tofo o le masima. Ae ou te toe fai atu ia te oe, o loo i ai se Atua! O loo soifua o Ia! Ma talu ai e te le iloa, aua e te taumafai e tau mai ia te au faapea ou te le iloa, aua ou te iloa!’

“A o ma faamavae, sa ou faalogo atu o loo ia tomumu, ‘Ou te le manaomia le tou lotu mo se fesoasoani! Ou te le manaomia.’

“Talu mai lena aafiaga, ou te le i toe matamuli pe ma ona e le o mafai ona ou faamatalaina i upu lava ia mea uma ou te iloaina faaleagaga” (“The Candle of the Lord,”  52).

Tusi upu O Mea a le Atua i le laupapa ma fai i le vasega pe o a mea latou te manatu o mea a le Atua e na o Lona Agaga e mafai ai ona iloa ma malamalama i ai. Tusi a latou tali i luga o le laupapa.

• Aisea e taua ai mo i tatou le talitonu e na o le Agaga e mafai ai ona tatou iloa ma malamalama i mea a le Atua?

Faasino le vasega i le lisi o i le laupapa ma valaaulia e faasoa mai se aafiaga na latou iloa ai ma malamalama e ala i le Agaga se tasi o mea nei a le Atua. Mafaufau e faasoa atu sa oe lava aafiaga.

Valaaulia tagata aoga e faasoa mai

O le fefaasoaai o malamalamaaga ma aafiaga talafeagai e faamanino ai le malamalama o tamaiti aoga i aoaoga faavae ma mataupu faavae o le talalelei. A o faasoa mai e le vasega na aafiaga, e tele ina taitai e le Agaga Paia i latou i se malamalama e loloto atu ma molimau i mea tonu o loo latou taua. E ala i le mana o le Agaga Paia, e mafai foi e a latou upu ma aafiaga ona i ai se aafiaga taua i loto ma mafaufau o a latou paaga.

Fautuaina le vasega e mafaufau pe o a mea e mafai ona latou faia e sailia ai le fesoasoani a le Agaga a o latou taumafai ia iloa ma malamalama i mea a le Atua.

Faaiu i le molimau atu e uiga i upumoni ua aoaoina i le lesona lenei.

Tala ma Faamatalaga o Talaaga

1 Korinito 1:17–2:13. O le poto o le lalolagi

“Ina ua tautala Paulo e faasaga i ‘le poto o lenei lalolagi’ (1 Korinito 1:20), sa ia faasino i tu ma aga masani faalefilosofia sese i ona taimi ae le o le tulimataiga aoga o le aoaoina ma le aotauina lea e fautuaina e le Alii (tagai Mataio 22:37; 2 Nifae 9:29; MF&F 88:78–80). Sa faaaoga soo e Paulo ia upuatamai ma le poto i le 1 Korinito 1:17–2:13e faasino atu ai i filosofia o le lalolagi ma i latou o e lagolagoina. O manatu faafilosofia sa avea pea lava ma mataupu o felafolafoaiga faitele. Sa faatusatusa e Paulo le eseesega o le utiuti o le poto o le tagata i le savali mamana a le Alo sa faasatauroina o le Atua (tagai 1 Korinito 1:17–25). E ui i e sa tauemuina le talalelei, e le tatau ona faalagolago le faatuatua o le Au Paia i ‘le poto o tagata, ae … o le mana o le Atua’ (1 Korinito:5).

“O le savali o se Mesia ua faasatauroina sa faigata mo Iutaia ma Nuuese ona talia. I le lalolagi o Roma, o le faasatauroga o se faasalaga sa faasaosao mo tagata solitulafono po o pagota ma e faatusa i le maasiasi ma le toilalo. O le manatu o le puapuagatia ma maliu se tasi e fai ma sui o isi, ma toe ola mai, o se ‘valea’ lea i mafaufau faaelalolagi o tagata Eleni (1 Korinito 1:23). Mo Iutaia, o lo latou manatu faavae o le Mesia e aumai ai le faamoemoega o le aigatupu, mana, ma le manumalo, o le savali sa maliu le Mesia(1 Korinito 1:23)” (Tusi lesona a le Tagata Aoga o le Feagaiga Fou [Church Educational System manual, 2014], 364).

1 Korinito 1:18–29. “Na filifilia e le Atua o mea vaivai o le lalolagi e faafememeai ai mea e malolosi”

“E ui ina toatele Iutaia ma Nuuese sa teena le savali o le talalelei faapea e ‘valea’ (1 Korinito 1:18), sa aoao atu Paulo e faapea ‘o le valea i le Atua o le poto lea i le tagata; ma o le vaivai i le Atua o le malosi lea i le tagata’ (1 Korinito 1:19–25). E tele ina faatino e le Atua Lana galuega e ala ni tagata o e manatu le lalolagi e ‘valea’ pe ‘vaivai’ (tagai MF&F 35:13–14; 124:1). I le 1 Korinito 1:28, o le ‘faavae o mea a le lalolagi’—o i latou o e agamaulalo ma lotomaualalo—o i latou ia e filifilia e le Atua e faataunuu Lana galuega” (Tusi lesona a le Tagata Aoga o le Feagaiga Fou [Church Educational System manual, 2014], 364).

1 Korinito 2:6–16. O “mea a le Atua” e “iloa faaleagaga”

Ona “o mea a le Agaga o le Atua” e na o le “iloa faaleagaga” e mafai ai (1 Korinito 2:14), o i latou o e manatu faalelalolagi e le mafai ona malamalama i upumoni faaleagaga. Ua saunia e le Atua se ala mo i tatou e maua ai le malamalama faaleagaga. Elder Paul V. Johnson o le Fitugafulu:

“I le lalolagi faasaienitisi e faaaoga metotia faasaienitisi e aoao ai upumoni ma le malamalama silia atu. Sa matua tele le fesoasoani i le tele o tausaga ma sa gauai atu le tele o le malamalama faasaienitisi ma faaauau ai lava ona tuleia i tua le pupuni o le valea e uiga i lo tatou lalolagi faaletino. Peitai, o le aoaoina o mea faaleagaga, e manaomia ai se faiga ese nai lo le aoaoina o mea faasaienitisi. O le metotia faasaienitisi ma le mafaufau e fesoasoani tele, ae e le mafai lava ona maua ai le malamalama faaleagaga pe a na o na mea.

“O le aoaoina o mea faaleagaga e aofia ai le mafaufau, ae e le lava lena. E na o le Agaga tatou te aoao mai ai mea faaleagaga. …

“… E tuuina atu tali i fesili faaleagaga i tagata taitoatasi o e le faamaaaina o latou loto; o e ole atu i le faatuatua, ma le talitonu o le a latou mauaina; ma e tausia ma le filiga poloaiga. Tusa lava foi pe tatou te mulimuli i le mamanu lea, tatou te le pulea le taimi o le mauaina o tali. O nisi taimi e vave ona oo mai a tatou tali, ma o nisi foi taimi e tatau ona tatou tuu ia fesili i luga o le fata mo se taimi ma faalagolago i lo tatou faatuatua sa atiina ae mai tali ua tatou iloa” (“O Se Mamanu mo le Aoaoina o Mea Faaleagaga” [Seminaries and Institutes of Religion satellite broadcast, Aug. 7, 2012], si.lds.org).

Sa aoao mai Elder Dallin H. Oaks o le Korama a Aposetolo e Toasefululua:

“O auala faatonuina a le Alii mo le mauaina o le malamalama paia e matua ese lava mai metotia o loo faaaoga e i latou o e tele naua le aoaoina e maua e ala i le suesue. Mo se faataitaiga, o se auala faisoo o suesuega o le felafolafoai po o talatalanoaga faatautava, o se metotia e tele naua ai sou poto masani patino. Ae sa faatonuina i tatou e le Alii i tusitusiga paia anamua ma ona po nei, e le tatau ona tatou fefinauai i mea o lana mataupu. (Tagai 3 Ni. 11:28–30; MF&F 10:63.) … E maua upumoni ma molimau o le talalelei mai le Agaga Paia e ala i le suesue migao o le tagata lava ia ma le manatunatu filemu loloto” (“Leo Fetuunai,” Ensign, May 1989, 29).