Potutusi
Folasaga i le Evagelia e Tusa ai ma Sagato Luka

Folasaga i le Evagelia e Tusa ai ma Sagato Luka

Aisea e suesueina ai lenei tusi?

O le tusi a Luka ua aumaia ai se molimau faaopoopo i le tele o upumoni o loo tusia e Mataio ma Mareko ma o loo i ai foi se anotusi tulagaese. O le Evagelia a Luka e mafai ona loloto atili ai le malamalama o tagata aoga i aoaoga a Iesu Keriso ma fesoasoani ai ia latou talisapaia atili Lona alofa ma le mutimuti alofa i tagata uma, e pei ona faaalia i le taimi o Lana galuega i le olaga nei ma i Lana Togiola le iu.

O ai na tusia lenei tusi?

O Luka o le tusitala o le Evagelia lenei. O ia o se fomai (tagai Kolose 4:14) ma o “se avefeau a Iesu Keriso” Faaliliuga a Iosefa Samita, Luka 1:1 [i le Luka1:1, vaefaamatalaga a]). O Luka o se tasi sa “galulue faatasi” ma Paulo (Filemoni 1:24) ma o se soa faifeautalai a Paulo (vaai 2 Timoteo 4:11). Sa tusia foi e Luka le tusi o Galuega(tagai Bible Dictionary, “Luke”).

O anafea ma o fea foi na tusia ai lenei tusi?

E ui e le o iloa tonu le taimi na tusia ai e Luka lana Evagelia, ae peiseai na tusia i le afa lona lua o le seneturi muamuaT.A. O punavai a Luka o tagata o e “mai le amataga o i latou na matamata i ai” Luka 1:2 i le galuega a le Faaola i le olaga nei ma le Toetu. Tatou te le iloa po o fea na tusia ai le Evagelia a Luka.

O ai na tusi i ai, ma pe aisea foi?

Na faamoemoe Luka ia muai faitauina lana Evagelia e se aofia o Nuuese, ma sa ia tuuina atu Iesu Keriso o le Faaola o Iutaia ma Nuuese. Na faatuatusi patino atu e Luka Lana evagelia ia “Teofilo” (Luka 1:3), i le faa-Eleni o lona uiga o le “uo a le Atua” po o se “pele i le Atua” (tagai Bible Dictionary, “Theophilus”). E manino na maua e Teofilo muamua se faatonuga e faatatau i le soifua ma aoaoga a Iesu Keriso (tagai Luka 1:4). Sa faamoemoe Luka e tuuina atu isi faatonuga e ala i le ofoina atu o se tala faatulagaina lelei o le misiona ma le galuega a le Faaola. Sa manao o ia ia i latou o e faitauina lana molimau ia “iloaina le faamaoni” Luka 1:4 o le Alo o le Atua—Lona alofa mutimutivale, Togiola, ma le Toetu.

O a nisi o vaaiga iloga o lenei tusi?

O le Luka e sili ona umi i Evagelia e fa ma o le tusi aupito umi lea i le Feagaiga Fou. O nisi o tala e sili ona lauiloa o le faaKerisiano e tulagaese i le Evagelia a Luka: o tulaga a siosiomia ai le soifua mai o Ioane le Papatiso (tagai Luka 1:5–25, 57–80); o le tala masani o le Kerisimasi (tagai Luka 2:1–20); o le tala ia Iesu o se taulealea e 12-tausaga i le malumalu (tagai Luka 2:41–52); faataoto e pei ole Samaria agalelei (tagai Luka 10:30–37), o le atalii faamaumauoa (tagai Luka 15:11–32), ma le alii mauoa ma Lasalo (tagai Luka 16:19–31); o le tala i lepela e toasefulu (tagai Luka 17:11–19); ma le tala i le Alii toetu sa savavali faatasi ma Ona soo i le ala i Emau (tagaiLuka 24:13–32).

O isi itu iloga o le faaaofia ai e Luka o aoaoga a Ioane le Papatiso ia e le o maua i isi Evagelia (tagai Luka 3:10–14); o lana faamamafa i le agaga tatalo o Iesu Keriso (tagai Luka 3:21; 5:16; 9:18, 28–29; 11:1); ma lona faaaofia ai o le valaauina, aoaoina, ma galuega faafaifeautalai a Fitugafulu (tagai Luka 10:1–22). Ae le gata i lea, o Luka ua na o le pau lea o le tusitala o evagelia na tusia faapea na faamaligiina e le Faaola Lona toto i Ketesemane ma sa auauna atu se agelu ia te Ia (tagai Luka 22:43–44).

Talu ai e amata le Evagelia a Luka ma faaiu i le malumalu, o loo ta’u mai ai foi le taua o le malumalu o se nofoaga autu o fegalegaleaiga a le Atua ma tagata (tagai Luka 1:9; 24:53).

Otootoga

Luka 1–3 Na valoia le soifua mai ma misiona a Ioane le Papatiso ma Iesu Keriso. Ua tautino atu e molimau o le tamameamea o Iesu o le Mesia. I le 12 o tausaga, sa aoao atu ai Iesu Keriso i le malumalu. Ua folafola atu e Ioane le Papatiso le salamo ma papatisoina Iesu Keriso. Ua tusia e Luka se gafa o Iesu Keriso.

Luka 4–8 Ua faaosoosoina Iesu Keriso i le vao. I Nasareta ua Ia folafola atu Ia lava o le Mesia ma ua teenaina. Ua filifilia e Iesu Keriso ia Aposetolo e Toasefululua ma aoao atu Ona soo. Ua Ia faamagaloina agasala ma faia vavega e tele.

Luka 9–14 Ua auina atu Aposetolo e Toasefululua e talai atu ma faamalolo. Ua fagaina e Iesu Keriso le lima afe ma ua liua i luga o se mauga. Ua Ia valaauina ia Fitugafulu ma auina atu i latou e aoao atu. Ua aoao atu Iesu Keriso e uiga i le avea ai ma soo, pepelo, ma le faamasinoga. Ua Ia faamatalaina le faataoto i le Samaria agalelei.

Luka 15–17 Ua aoao atu Iesu Keriso i faataoto. Ua Ia aoao atu e uiga i le faatausuai, faatuatua, ma le faamagalo atu. Ua Ia faamalolo i lepela e toasefulu ma aoao atu i Lona Afio Mai.

Luka 18–22 Ua faaauau e Iesu Keriso ona aoao atu i faataoto. Ua Ia faamalolo i se tagata tauaso ma aoao atu ia Sakaio. Ua Ia malaga faatupu atu i Ierusalema, tagi mo le aai, ma faamamaina le malumalu. Ua valoia e Iesu Keriso le faatafunaina o Ierusalema ma aoao atu ai e uiga i faailoga o le a muamua mai i Lona Afio Mai Faalua. Ua Ia faatuina le faamanatuga, aoao atu Ana Aposetolo, ma ua puapuagatia i Ketesemane. Ua faalataina o Ia, pu’e faapagotaina, tauemuina, sasa, ma suesueina.

Luka 23–24 Ua faamasinoina Iesu Keriso i luma o Pilato a Herota, faasatauroina, ma tanuina. Ua molimau mai agelu i le tuugamau ma soo e toalua i le ala i Emau ua toetu Iesu Keriso. Ua faaali atu le Faaola i Ona soo i Ierusalema, ua folafola atu i Ana Aposetolo o le a tuuina atu ia i latou le mana, ma ua afio ae i le lagi.