Lesona o Suesuega i le Fale

Luka 10:38–17:37 (Iunite 11)

Anomea o Sauniuniga mo le Faiaoga o Suesuega i le Fale

Aotelega o Lesona o Suesuega i le Fale i Aso Taitasi

O aotelega o loo i lalo o mea na tutupu, aoaoga faavae ma mataupu faavae ua aoaoina e tamaiti aoga ao latou suesue i leLuka 10:38–17:37 (iunite 11) e lei fuafuaina o se vaega e aoaoina o lau lesona. O le lesona e te aoaoina atu e taulai atu na o ni nai aoaoga faavae ma mataupu faavae nei. Mulimuli i musumusuga a le Agaga Paia a o e mafaufau i manaoga o au tamaiti aoga.

Aso 1 (Luka 10:38–12:59)

Mai upu a le Faaola ia Maria, sa aoao ai e tagata aoga afai tatou te filifili e tuuto atu i tatou lava i mea faaleagaga i lo popolega faaletino, o le a tatou maua faamanuiaga tumau. Na aoao mai foi e Iesu afai tatou te tatalo faatauanau atu ma saili ia faamanuiaga a le Tama Faalelagi i taimi e manaomia ai, o le a ia, tali mai a tatou tatalo i Lona lava taimi ma i Lana lava ala. O isi upumoni na aoaoina e le vasega o: Ua poloaiina i tatou e le Alii e aua le mata peapea i oa o le lalolagi. Afai tatou te saili e aumai le malo o le Atua ma Lana amiotonu, o le a fesoasani o Ia e saunia mea tatou te manaomia ma saunia se nofoaga mo i tatou i Lona malo.

Aso 2 (Luka 13–15)

I mataupu nei, sa aoaoina ai e le vasega mataupu faavae nei: Afai tatou te taumafai e fesoasoani i tagata e le tagolima, o le a tauia i tatou e le Alii i le Toetu. Afai tatou te tuu isi faamuamua i luga atu o le Alii ma Lana talalelei, o le a tatou le maua faamanuiaga o le talalelei semanu tatou te mauaina. E tatau i soo o Iesu Keriso ona naunau e ositaulagaina mea uma ae mulimuli ia te Ia. A tatou fesoasoani i isi ia maua se lagona e salamo, tatou te lagonaina le olioli ma e fiafia le lagi.

Aso 3 (Luka 16)

Mai faataoto i le auauna pule amioletonu ma le alii mauoa ma Lasalo, sa aoao ai e tagata aoga afai tatou te saunia ma le poto mo lo tatou lumanai e faavavau, ma faaaogaina ma le amiotonu oa o le lalolagi, e mafai ona faamanuiaina i tatou i oa e faavavau. Sa latou aoaoina foi mataupu faavae nei: Afai tatou te mata peapea ma le faaaogaina ma le amiotonu a tatou oa faalelalolagi, o le a oo ina tatou mafatia ma salamo ai. O le liuaina e maua mai i le talitonu ma le gauai atu i upu a perofeta ae le o le molimauina o vavega po o le vaai i agelu.

Aso 4 (Luka 17)

I leLuka 17, sa fesili ai Aposetolo ia Iesu ia faateleina lo latou faatuatua. Sa aoao e le vasega o le a faateleina lo tatou faatuatua pe a tatou taumafai e faia mea uma e poloai mai ai le Tama Faalelagi ma pe a tatou manatua tatou te nofo aitalafu pea lava ia te Ia. Sa aoao foi e le vasega tatou te mauaina faamanuiaga a le Alii pe a tatou faia mea e faatonuina ai i tatou e Ia e fai, ma e taua le faaali atu o le loto faafetai mo faamanuiaga ua tatou maua.

Folasaga

Sa tali atu le Faaola i faitioga a le au Faresaio e uiga ia te Ia o mafuta ma telona ma e agasala i le tuuina atu o faataoto i le mamoe na se, tupe na leiloa, ma le atalii faamaumau oa.

Fautuaga mo le Aoaoina Atu

Luka 15

Ua tuu atu e Iesu ia faataoto i le mamoe na se, o le tupe na leiloa, ma le atalii faamaumau oa

Amata le vasega i le fesili atu i ai pe na i ai se taimi na leiloa ai se mea e taua ia i latou.

• O le a se mea na e naunau e fai ia maua ai? Aisea?

• O le a sou manatu i le uiga o se tagata ua “leiloa” faaleagaga? (Fesoasoani ia malamalama le vasega e mafai ona faasino lenei mea ia i latou o e e lei mauaina le talalelei toefuataiina a Iesu Keriso pe e le o ola nei e tusa ai ma aoaoga o le talalelei.)

Valaaulia le vasega e mafaufau i se tasi latou te iloa atonu ua leiloa faaleagaga. Fai i ai e mafaufau pe o a o latou lagona i lenei tagata.

Faamatala o le Luka 15o loo i ai aoaoga a le Faaola e uiga i ai latou ua leiloloa faaleagaga. Valaaulia le vasega e vaavaai mo upumoni i le Luka 15e tusa ma lagona o le Tama Faalelagi mo i latou o e ua leiloloa faaleagaga ma o tatou tiutetauave mo i latou.

Fai i se tamaitiiti e faitau leotele le Luka 15:1–2. Valaaulia le vasega e mulimuli i le faitauga, ma vaavaai mo mea na faitio ai le au Faresaio ma le au tusiupu.

• Aisea na faitio ai le au Faresaio ma le au tusiupu?

• O le a se mea na faaalia i lenei faitioga e uiga i le au Faresaio ma le au tusiupu?

Faamatala sa tali atu le Faaola e ala i le tuuina atu o faataoto e tolu: o le tasi i le mamoe na leiloa, o le isi o le tupe na leiloa, ma le tasi o se atalii na leiloa. Fai i ai e gauai atu i le mafuaaga na avea ai le leiloa ma le ala na maua ai ma mataupu autu o faataoto taitasi.

Faamatala i faataoto i le mamoe na leiloa ma le tupe na leiloa, sa faamatala ai e le Faaola le ala na sailia ai ma le filiga tele e le leoleo mamoe ma le fafine na leiloa le tupe, seia la mauaina le mea na leiloa.

Valaaulia se tagata o le vasega e faitau leotele le Luka 15:4–6, 8–9. Fai i le vasega e mulimuli ai, ma vaavaai pe o a lagona i le leoleo mamoe ma le fafine ina ua maua le mamoe ma le tupe.

• O le a le eseesega pe na faapefea ona leiloa le mamoe ma le tupe? (O le mamoe na leiloa ina ua mulimuli atu i lona ala masani o le olaga ma e le o sona lava sasi, a o le tupe sa leiloa ona o le faatamala po o le le faautauta o lona pule [tagai David O. McKay, in Conference Report, Apr. 1945, 120–22].)

• O le a le upu na faaaoga e faamatala ai lagona o le leoleo mamoe ma le fafine?

Valaaulia le vasega e faitau lemu leLuka 15:7, 10, ma vaavaai mo mea na faatusa i ai e Iesu le olioli o le leoleo mamoe ma le fafine. (O le olioli i le lagi i se tagata agasala e salamo.)

Faamatala o le faataoto lona tolu i le Luka 15o le tala i se atalii faamaumau oa (o lona uiga o se tagata sa faamaumauina ma ola soona fai), lona uso matua, ma lo la tama.

Fuafua e vaevae le vasega i ni vaega taitoatolu. Tuu atu i vaega taitasi se kopi o le tufaaga lea. Valaaulia i latou e faitau leotele le Luka 15:11–32 Tofi se tagata se toatasi e maufaufau i le faataoto mai le vaaiga a le atalii faamaumau oa, o le isi e mafaufau i ai mai le vaaiga a le tama, ma le lona tolu e mafaufau i ai mai le vaaiga a le uso matua.

A uma ona faitau e tagata, fai i ai e talanoaina fesili o loo i le tufaaga i a latou vaega.

Nai lo le fai i le vasega e faitau ma talanoaina le faataoto, e mafai ona e faaali le vitio “OLe Atalii Faamaumau Oa” (5:35) mai le O Vitio Faatusi Paia o le Soifuaga o Iesu Keriso. Saunia ia tofu le tagata ma se kopi o le tufaaga lenei, ma fai i ai e vaavaai mo tali i fesili a o latou matamataina le vitio. O loo maua lenei vitio i le LDS.org.

O Le Faataoto i le Avepasi

Tusi lesona a le Faiaoga Seminare o le Feagaiga Fou—Suesuega i le Aiga (Iunite 11)

O Le Atalii Faamaumau Oa

• O le a se mea na fesoasoani ia te oe lava ia, pe iloa ai le tulaga matautia sa e i ai?

• Na faapefea se tali atu a lou tama na e faamoemoeina i lou toe foi atu i le fale?

• Mata o a ni ou mafaufauga ma ni lagona ina ua fai e lou tama mea na ia faia ia te oe?

O Le Tama

• Mata o a ni ou mafaufauga ma ni lagona a o alu lou atalii laitiiti?

• Aisea o le a e faafeiloaia ai lou atalii faamaumau oa i le ala na e faia ai?

• Ina ua tetee lou atalii matua i le ala na e faia ai lona uso laitiiti, na faapefea ona e fesoasoani ia te ia ia malamalama i mea na e faatinoina?

O Le Uso Matua Atu

• Mata o a ni ou mafaufauga ma ni lagona a o alu lou uso?

• Aisea na faigata ai mo oe ona e olioli i le toe foi mai o lou uso?

• O a faamanuiaga na e maua mai i le faamaoni i lou tama?

© 2015 Puletaofia e le Intellectual Reserve, Inc.Ua taofia aia tatau uma.

• Aisea na leiloa ai le atalii faamaumau oa? (I se faatusatusaga i le mamoe ma le tupe, na leiloa le atalii faamaumau oa ona o lona lava fouvale.)

• I le malamalama ai o le tama i le faataoto lenei e faatusa i le Tama Faalelagi, o le a se mea ua mafai ona tatou aoao e uiga i le ala e tali mai ai le Tama Faalelagi ia i latou o e toe foi atu ia te Ia e ala i le salamo? (E tatau i le vasega ona faailoa mai se mataupu faavae pei o lea: Afai tatou te toe foi atu i le Tama Faalelagi e ala i le salamo ma sailia Lana faamagaloga, o le a olioli o Ia ma toe talia i tatou ma ona aao mafola. Tusi lenei mataupu faavae i le laupapa.

• E mafai faapefea ona fesoasoani lenei mataupu faavae i ai latou o e lagona ua leiloloa faaleagaga?

Faamanatu i le vasega le uso matua i le faataoto.

• O le a sou manatu aisea na ita ai le uso matua?

Valaaulia se tamaitiiti e faitau leotele le saunoaga lea a Elder Jeffrey R. Holland o le Korama a Aposetolo e Toasefululua, ma fai i le vasega e faalogologo mo ni malamalamaaga e tusa ai ma le mafuaaga na ita ai le uso matua.

“O le lagonaina o le le talisapaiaina ma atonu faaapea ma sina inoino, o lenei atalii usiusitai—ma e faapitoalava lona usiusitai—ua galo mo sina taimi aua e lei oo lava o ia i se tulaga o le taugaeleelea po o le faanoanoa, o le fefe po o le inoino ia te ia lava. Ua galo ia te ia mo sina taimi o tamai povi uma lava o loo i ai i le faatoaga o ana ia faapea ma ofu talaloa uma o loo teuina i le fale mama uma o loo i le pusa toso. Ua galo ia te ia mo sina taimi o le faamaoni o le a tauia pea. …

“… O le tagata na toetoe a i ai mea uma ma o le tagata na galue malosi, i se auala manaia ina ia maua ai, sa le’i maua ia te ia le mea e tasi lea e mafai ai ona avea o ia ma se tagata atoatoa o le Alii na ia taulatalata atu i ai. E lei oo o ia i le alofa ma le alofa mutimutivale, o le lautele o le alofa moni o se vaaiga mamao, e iloa ai, o lenei toe foi mai e le o se faasagatau mai. O lona uso. …

“E mautinoa lava o lenei uso laitiiti sa avea ma se pagota—o se pagota o le agasala, faavalevalea ma se sai puaa. Ae o le uso matua o loo ola foi i se tulaga saisaitia. E lei mafai foi e ia ona tatalaina o ia mai manatu o loo saisaitia ai o ia. Sa matuai lofituina o ia i le lotoleaga. Na ia lagonaina le le amanaiaina o ia e lona tama ma le aveesea o lana aia e lona uso, e ui e le o aofia ai se tasi o ia mea.(“O Le isi Atalii Faamaumau Oa” Liahona, Iulai 2002, 70).

• E tusa ai ma Elder Holland, aisea na ita ai le uso matua? Na faapefea foi ona leiloa le uso matua ia?

• O le a se mea e tatau ona tatou manatua pe a tatou vaai atu ua alofa mutimutivale le Atua ma faamanuia i latou o e salamo ma toe foi atu ia te Ia?

• O le a le mataupu faavae e mafai ona tatou aoao mai i le faataoto lea e uiga i le avea atili e faapei o lo tatou Tama i le Lagi? (E tatau i le vasega ona faailoa mai se mataupu faavae e pei o lea: E mafai ona tatou avea atili e pei o lo tatou Tama i le Lagi i le tali atu ma le agaalofa ma le olioli pe a salamo isi tagata.

Faamanatu i le vasega le tagata na latou mafaufau i ai i le amataga o le vasega o le atonu ua leiloa faaleagaga. Fautuaina i latou e mafaufau ma le agaga tatalo pe mafai faapefea ona latou fesoasoani i lena tagata ia salamo ma faalatalata atu i le Tama Faalelagi. Valaaulia i latou e mafaufau foi i ni auala e mafai ai e i latou foi ona leiloloa ma manaomia ai ona salamo ma toe foi atu i le Faaola.

Le Isi Iunite (Luka 18–Ioane 1)

Valaaulia le vasega e mafaufau i se taimi na soona fai ai i latou e se tagata ma pe o a ni lagona. Faamatala a o latou suesueina le isi iunite, o le a latou aoaoina ai le ala na filifili le Faaola e tali atu ai ia i latou sa soona faia o Ia. Fai i ai e matau ni faamatalaga faaopoopo i le tala a Luka i puapuaga o Iesu Keriso i Ketesemane ma mea na taumafa ai Iesu ina ua mavae Lona Toetu.