Eperu 7–10

Folasaga

Na aoao mai Paulo o Iesu Keriso o le Fautua o le “feagaiga fou” (Eperu 8:8). Ua ia faamalamalama mai, o le taulaga a Keriso e maualuga atu i taulaga faa Mose ma o sauniga faaMose sa fuafuaina ia faasinoina atu ai tagata i le Faaola ma Lana Togiola.

Fautuaga mo le Aoaoina Atu

Eperu 7–8

Na aoao mai Paulo o Iesu Keriso o le Fautua o le feagaiga fou

Faaaoga se moliuila, fai se ataata o se mea faitino laitiiti (e pei o ni ki po o se seleulu) i luga o le laupapa. Fai atu i tamaiti aoga pe mafai ona latou faailoa mai le mea faitino e ala i le na o le tilotilo atu i lona ataata. Faailoa atu, e tele ina mafai ona tatou iloa se mea faitino e ala i le vaai atu i lona ataata.

Faaali atu le ata O Iesu o loo Tatalo i Ketesemane (Tusi Ata o le Talalelei [2009], nu. 56; tagai foi i le LDS.org). Faamatala atu, o loo tusia i le Feagaiga Tuai ia faatinoga aloaia ma sauniga ia e faaaoga o ni ituaiga ma ni ataata, pe faatusaina foi ma muai faaataata mai ai le Faaola ma Lana Togiola.

O a ni faataitaiga o loo tusia i le Feagaiga Tuai o ni mamanu po o ataata o Iesu Keriso ma Lana Togiola?

Faamatala atu o vaega uma o le tulafono a Mose sa fuafuaina e faaaoga o se mamanu po o se ataata e faasino atu ai le fanauga a Isaraelu ia Iesu Keriso ma Lana taulaga togiola (tagai 2 Nifae 11:4; Iakopo 4:4–5). Na faamalamalama mai e Paulo le auala na faia ai e nisi o vaega o le tulafono lenei mea. Sa manao o ia e fesoasoani i le Au Paia i Iutaia ia tumau le faamaoni ia Iesu Keriso nai lo le toe foi e mulimuli i le tulafono a Mose.

Aotele le Eperu 7:1–22 i le faamatala atu, na taua e Paulo se valaoaga i le Feagaiga Tuai e uiga i le oo mai o se faitaulaga “e uiga faatasi ma Mekisateko” (Salamo 110:4; tagai foi Eperu 7:1). Sa ia aoao mai ua faataunuuina e Iesu Keriso lenei valoaga. O Mekisateko o se tupu amiotonu ma o se faitaulaga sili sa pulefaamalumalu ia Aperaamo (tagai Faaliliuga Iosefa Samita, Kenese 14:25–40 [i le faaopopooga o le Tusi Paia]; Alema 13:14–19; Bible Dictionary, “Melchizedek”). Sa faaaoga e Paulo ia Mekisateko o se mamanu ma se ataata o Iesu Keriso. Sa ia aoao mai o Iesu Keriso ma Lana perisitua sa alagatatau ona o le Perisitua sa Levi, faatasi ai ma le tulafono a Mose na tuuina mai ai, e le mafai ona atoatoa ai le fanau a le Atua (tagai Eperu 7:11). Atonu e te manao e faamalamalama atu, o le Perisitua sa Levi e faatatau i le pule o le Perisitua Arona na umia e tagata o le ituaiga o sa Levi (tagai Bible Dictionary, “Aaronic Priesthood”).

Faaali atu le ata O Mose o loo Tuuina Atu ia Arona le Perisitua (Tusi Ata o le Talalelei, nu. 15; tagai foi i le LDS.org) faatasi ma le ata O Iesu o loo Tatalo i Ketesemane. Faamatala atu, e pei ona tusia i le Eperu 7, sa faatusa e Paulo ia faitaulaga sa Levi ia Iesu Keriso. Atonu e te faamatala atu, o se tasi o matafaioi o se faitaulaga sa Levi, o le avea ma se fautua, e tu faafaatusa i le va o le tagata a le Atua e fofo o latou feeseeseaiga.

Tusi le Eperu 7:23–28 i le laupapa. Vaevae tamaiti aoga i ni paga, ma valaaulia paga taitasi e faitau leotele faatasi ia fuaiupu nei. Fai atu ia i latou e faitau foi le Faaliliuga Iosefa Samita, Eperu 7:25–26. O lenei mau o loo i le faaopoopoga o le Tusi Paia. Valaaulia se tamaitiiti aoga se toatasi e vaai mo ni fuaitau o loo faamatala ai faitaulaga sa Levi, ae fai atu i le isi tamaitiiti aoga o le paga, e vaai mo ni fuaitau o loo faamatala ai Iesu Keriso. Faamalamalama atu o le upu latou i le Eperu 7:23 e faatatau i faitaulaga.

A ua lava loa se taimi, valaaulia tamaiti aoga o e sa vaavaai mo fuaitau e faamatala ai faitaulaga e lipoti atu mea na latou maua. Tusi a latou tali i luga o le laupapa i lalo o le ata o Mose ma Arona. (O a latou tali e mafai ona aofia ai mea nei: sa manaomia le suia o faitaulaga e isi faitaulga pe a maliliu i latou [tagai Eperu 7:23]; latou te osia taulaga i aso uma mo a latou lava agasala ma mo agasala a tagata [tagai Eperu 7:27]; ma o faitaulaga sa i ai mea na le atoatoa ai [tagai Eperu 7:28].)

Valaaulia tamaiti aoga sa vaavaai mo fuaitau o loo faamatala ai Iesu Keriso e lipoti atu mea na latou mauaina. Tusi a latou tali i luga o le laupapa i lalo o le ata o Iesu Keriso. (O a latou tali e tatau ona aofia ai faamatalaga e pei o nei: O Iesu Keriso ma Lana perisitua e “tumau pea,” pe e faavavau [Eperu 7:24]; E mafai ona Ia faaola i latou o e “faalatalata atu i le Atua ona o ia” [Eperu 7:25]; O loo soifua o Ia e “fautua mo i [tatou]” [Eperu 7:25]; Sa leai Sana agasala ma o lea “e le manaomia ai le osi taulaga mo ana lava agasala” [Faaliliuga Iosefa Samita, Eperu 7:26]; Sa na o le tasi le taulaga sa manaomia ona Ia faia, lea e “mo agasala a tagata” [Faaliliuga Iosefa Samita, Eperu 7:26]; ma “ua faaatoatoaina [o Ia] e faavavau” [Eperu 7:28].)

Faamalamalama atu o le fuaitau “o loo soifua pea ia e fautua mo i latou” (Eperu 7:25) o lona uiga o le misiona a le Faaola o le tu atu e fai ma o tatou sui e fesoasoani tatou te toe foi atu ai i le Atua.

E faapefea ona e faamatalaina le eseesega i le va o Iesu Keriso ma faitaulaga sa Levi?

Valaaulia se tamaitiiti aoga e faitau leotele le Eperu 8:1–3. Fai atu i le vasega e mulimuli i le faitauga, ma vaavaai mo le mea na faauuina, pe valaauina ia faitaulaga uma, e aofia ai ma Iesu Keriso e fai.

O le a le mea na faauuina faitaulaga sili e fai?

Valaaulia se tamaitiiti aoga e faitau leotele le Faaliliuga a Iosefa Samita, Eperu 8:4 (i le Eperu 8:4, vaefaamatalaga a). Fai atu i le vasega e mulimuli i le faitauga, ma vaavaai mo le taulaga sa ofoina mai e Iesu Keriso.

O le a le upumoni e mafai ona tatou aoao mai i lenei fuaiupu e uiga i le mea na faia e Iesu Keriso mo i tatou? (I le faaaogaina o a latou lava upu, e tatau ona faailoa mai e tamaiti aoga le upumoni lenei: Sa ofoina mai e Iesu Keriso Lona lava soifua o se taulaga mo a tatou agasala.)
O a fuaitau ua lisiina i luga o le laupapa, e fesoasoani tatou te malamalama ai i le pogai sa mafai ai e Iesu Keriso ona ofo mai Lona lava soifua o se taulaga mo a tatou agasala?

Valaaulia tamaiti aoga e mafaufau loloto i le uiga o le taulaga togiola a Iesu Keriso ia i latou. Fai atu ia i latou e faauma faamatalaga nei i a latou api o le vasega po o api talaaga mo le suesueina o tusitusiga paia:

Ou te faafetai i lo’u Faaola ona …
Ou te iloa e alofa lo’u Faaola ia te a’u ona …
Ua faamanuiaina a’u i le Togiola ona …

A ua lava loa se taimi, valaaulia ni nai tamaiti aoga e faasoa mai mea na latou tusia pe a latou lagona e le patino tele.

Aotele le Eperu 8:5–13 i le faamatala atu ona o Lana taulaga, ua avea ai Iesu Keriso “ma puluvaga o le feagaiga e sili ona lelei” (fuaiupu 6), o se feagaiga lea, afai e taliaina e tagata, o le a fesoasoani latou te o mai ai e “iloa le Alii” (fuaiupu 11) ma ia faamamaina mai a latou amioleaga.

Eperu 9–10

Ua faaali mai e Paulo le auala e faatatau ai sauniga faaMose i le Togiola

Ao le’i amataina le vasega, tusi le ata lenei i luga o le laupapa.

Faamatala atu, e pei ona tusia i le Eperu 9–10, sa faaauau ona faatusa e Paulo faitaulaga sili sa Levi ia Iesu Keriso i le talanoaina o tiute na faatinoina e faitaulaga i le Aso o le Togiola. Valaaulia se tamaitiiti aoga e faitau leotele le parakalafa lenei:

E tasi i le tausaga i le aso paia faaIutaia e ta’ua o le Aso o le Togiola (e ta’ua foi o le Yom Kippur), sa faatagaina ai le faitaulaga sili ona ulu atu i le Nofoaga e Sili ona Paia (e ta’ua foi o le Paia o Paia) i le falefetafa’i, po o le, mulimuli ane, o le malumalu o Ierusalema. O iina, e ositaulagaina ai e le faitaulaga sili se povi po’a ma se oti-po’a. Na te sausauina le toto o le meaola i nofoaga atofaina i totonu o le Nofoaga e Sili ona Paia e faatusa i le Togiola a Keriso mo agasala a le faitaulaga ma mo agasala a tagata. Ona faafaatusa foi lea ona tuu e le faitaulaga sili agasala a tagata i luga o se isi oti-po’a (e ta’ua o le ’oti ua tuua’ia), ona tuli lea i le togavao, o le faailoga o le aveesea o agasala a tagata. Na te ositaulagaina foi ni mamoe e le’i faamamaina o ni taulaga mu mo ia lava ma tagata. (Tagai Bible Dictionary, “Fasts”; tagai foi Levitiko 16:22.)

Tofi le afa o le vasega e faitau le Eperu 9:11, 12, 24, 28 ae o le isi afa e faitau le Eperu 10:1, 4, 10–12. Fai atu i vaega taitasi e faitau filemu a latou fuaiupu atofaina, ma vaavaai pe faapefea ona avea mea na tutupu i le Aso o le Togiola o ni mamanu ma ataata o le taulaga a Iesu Keriso. A ua lava loa le taimi, valaaulia tamaiti aoga mai vaega taitasi e lipoti mai mea na latou maua. Ona fesili atu lea:

E pei ona ulufale atu faitaulaga sili i le Nofoaga e Sili ona Paia o le falefetafa’i i le Aso o le Togiola, o le a le “mea paia” (Eperu 9:12) e mafai ona ulu atu i ai le Faaola ona o Lana Togiola? (Afioaga o le Tama Faalelagi, po o le mamalu selesitila.)
O le a le mea e mafai ona faia e le taulaga a Iesu Keriso lea e le mafai ona faia e le “toto o povi po’a ma ’oti” (Eperu 10:4)?
Ae aisea la, na fai ai e faitaulaga sili nei taulaga i le Aso o le Togiola? (E faataitai ai “le ata o mea lelei atali” [Eperu 10:1], po o le, ina ia faasino atu i le Togiola a le Faaola.)

Valaaulia se tamaitiiti aoga e faitau leotele le Eperu 10:17–20. Fai atu i le vasega e mulimuli i le faitauga, ma vaavaai po o a mea ua mafai ona faia ona o le Togiola.

E tusa ai ma le fuaiupu 19, o fea e mafai ona tatou ulu atu i ai ona o le taulaga a Iesu? (O le nofoaga “aupito sili ona paia”, po o le afioaga o le Atua i le malo selesitila.)
E tusa ai ma le fuaiupu 20, e faapefea ona tatou ulu atu i le afioaga o le Atua?

Faamatala atu, o le “ala fou e ola ai” e faatatau i le talalelei a Iesu Keriso, po o le ata lea e mafai ona faamagalo ma faapaiaina ai i tatou e ala i Lana Togiola ma faapea ona agavaa ai e toe foi atu i le afioaga o le Atua.

Tusi le faamatalaga le uma lenei i luga o le laupapa: Ona o le Togiola a Iesu Keriso, ua mafai ona tatou ulu atu i le malo selesitila pe afai …

Valaaulia se tamaitiiti aoga e faitau leotele le Eperu 10:22–23. Fai atu i le vasega e mulimuli i le faitauga, ma vaavaai mo mea e tatau ona tatou faia e ulu atu ai i le malo selesitila. Valaaulia tagata o le vasega e lipoti mai mea latou te maua.

Faauma le faamatalaga o loo i luga o le laupapa ina ia faitauina faapenei: Ona o le Togiola a Iesu Keriso, ua mafai ona tatou ulu atu i le malo selesitila pe afai tatou te taofi mau i lo tatou faatuatua ia te Ia.

E te manatu o le a le uiga o le ia “taofi mau” (fuaiupu 23) i lo tatou faatuatua ia Iesu Keriso?

Valaaulia se tamaitiiti aoga e faitau leotele le Eperu 10:35–38. Fai atu i le vasega e mulimuli i le faitauga, ma vaavaai mo le fautuaga na tuuina mai e Paulo e fesoasoani tatou te taofi mau ai i lo tatou faatuatua ia Iesu Keriso.

O le a le mea e mafai ona tatou faia e taofi mau ai i lo tatou faatuatua ia Iesu Keriso?
O le a le uiga o le “aua le lafoai ai o outou faamalosiauga”? (fuaiupu 35).

Valaaulia se tamaitiiti aoga e faitau leotele le saunoaga lenei a Elder Jeffrey R. Holland o le Korama a Aposetolo e Toasefululua, lea o loo ia faamalamalama mai ai le uiga o le “aua le lafoai ai o [tatou] faamalosiauga”:

“I le gagana a le Au Paia o Aso e Gata Ai, e mafai ona faapea, Ioe e faigata—ae e te le’i auai i le Ekalesia, a’o e taumafai e auai, ma ina ua e auai. Fai mai Paulo, o le faiga lena sa i ai lava, ae aua le faavaivai. Aua le popole ma foi i tua . Aua ne’i aluese le talitonuga . Aua ne’i galo le faalogona sa e lagonaina. Aua ne’i e le talitonu i le aafiaga sa e mauaina. O lena filiga o le mea lea sa faasaoina ai Mose ma Iosefa Samita ina ua faafetaia’i i laua e le fili, ma o le mea foi lena o le a faasaoina oe” (“Cast Not Away Therefore Your Confidence,” Ensign, Mat. 2000, 8).

O ai e te iloa o se faataitaiga lelei o le taofi mau i lona faatuatua ia Iesu Keriso?

Valaaulia tamaiti aoga e mafaufau loloto i a latou tautinoga ia taofi mau i o latou faatuatua ia Iesu Keriso. Fai atu ia i latou e tusi i lalo ni auala o le a faateleina ai lo latou tautino ma le gafatia e fai ai lenei mea.

Tala ma Faamatalaga o Talaaga

Eperu 7:1–2. Mekisateko

“O Mekisateko ‘o se faitaulaga sili, perofeta, ma se taitai o le Feagaiga Tuai o le sa ola ina ua mavae le lolo ma i le taimi o Aperaamo. Sa ta’ua o ia o le tupu o Salema (Ierusalema), tupu o le filemu, tupu o le amiotonu (o le faauigaga faaEperu o Mekisateko), ma le faitaulaga o le Atua sili ona maualuga’ (Taiala i Tusitusiga Paia, ‘Melchizedek’; scriptures.lds.org). Ua ta’u mai e isi mau e faapea, sa faaee atu e Mekisateko le perisitua i luga o Aperaamo, tauaaoina sefuluai mai ia Aperaamo, ma sa lemafaatusalia i lona tamalii (tagai MF&F 84:14; Eperu 7:4; Kenese 14:18–20; Faaliliuga a Iosefa Samita, Kenese 14:25–40 [i le faaopoopoga o le Tusi Paia]; Alema 13:19). I le Tusi a Eperu, o Mekisateko ua avea o se uluai mamanu o le Alo o le Atua (tagai Eperu 7:15–16)” (New Testament Student Manual [Church Educational System manual, 2014], 480).

Eperu 7:3. “E leai sona tama, e leai sona tina”

“Ua faamanino mai i le Faaliliuga a Iosefa Samita o le Eperu 7:3 e faapea, o le perisitua lea sa ‘leai sona tama, leai sona tina’: ‘O lenei Mekisateko sa faauuina o se faitaulaga i le faatulagaga o le Alo o le Atua, o lea faatulagaga sa leai sona tama, leai sona tina’ (i le faaopoopoga o le Tusi Paia). O lenei fuaitau ua faaalia ai, e le pei o le faatulagaga faaLevi po o le faaArona i aso anamua, o le Perisitua Mekisateko e le faapea e na o le [tagata] e tupuga mai ai e faaeeina atu i ai. Sa faamalamalama atili mai e Elder Bruce R. McConkie … o le Korama a Aposetolo e Toasefululua: ‘O le aia tatau i lenei perisitua maualuga sa lei mauaina i le ala e tasi e pei o le tulaga o sa Levi ma atalii o Arona. O le amiotonu sa o se tulaga sa matuai manaomia mo le faaeeina atu o le perisitua maualuga’ (Mormon Doctrine, 2nd ed. [1966], 478)” (New Testament Student Manual [Church Educational System manual, 2014], 480).