A o faaauau e le Faaola Lana Lauga i luga o le mauga i Kalilaia, sa Ia faamatala atu faapea e lei sau o Ia e faaumatia le tulafono a Mose ae ia faataunuuina. Na tuu atu foi e le Faaola i Ona soo ia poloaiga e manaomia ona latou mulimuli ai ina ia mafai ai ona atoatoa i latou e pei o le Tama Faalelagi.
Ua aoao atu e Iesu Keriso Ona soo i le ala e avea atoatoa e faapei o le Tama Faalelagi
A o lei amataina le vasega, tusi le fesili lenei i luga o le laupapa: O le fea poloaiga e te manatu e sili ona faigata mo tagata ona tausia? A amata le vasega, fai i le vasega e tali atu i le fesili. Lisi a latou tali i luga o le laupapa.
Valaaulia se tamaitiiti aoga e faitau leotele le Mataio 5:48. Fai atu i le vasega e mulimuli i le faitauga, ma vaavaai mo se poloaiga e faigata ona tusia. Atonu e te manao e fautuaina le vasega e maka le Faaliliuga a Iosefa Samita o le Mataio 5:48, vaefaamatalaga a.
O le a sou lagona i le poloaiga ia atoatoa?
O le a sou manatu i le uiga o le atoatoa?
Valaaulia le vasega e faitau filemu le Mataio 5:48, vaefaamatalaga e,, ma vaavaai mo le uiga o le upu atoatoa, ma fai atu i ai e lipoti mai mea latou te maua. Faamatala o le atoa po o le ola mae’ae’a o lona uiga o le avea faapei o le Tama Faalelagi.
A o faaauau pea ona suesue le vasega i le Lauga a le Faaola i luga o le Mauga i le Mataio 5, valaaulia i latou e vaavaai mo mataupu faavae latou te manaomia ona mulimuli ai ina ia agaigai atu ia atoatoa e faapei o lo tatou Tama i le Lagi.
Otooto le Mataio 5:17–20 i le faamatala atu na aoao mai e le Faaola na sau o Ia e faataunuu le tulafono a Mose, ae le faaumatia, pe aveesea, se tasi o upumoni e faavavau i le tulafono a Mose. Na toefuatai mai e Iesu Keriso le atoaga o le talalelei lea na mou atu ona o le amioleaga ma le liliuese, ma faasa’o aoaoga sese, ma faataunuu ia valoaga na faia e perofeta o le Feagaiga Tuai. I le iuga, i le avea ai o se vaega o le Toefuataiga o le atoaga o le talalelei, sa i ai ni vaega o le tulafono a Mose na le toe faaauauina, e pei o le peritomeina ma taulaga na osia i manu.
Faamatala atu o le Mataio 5:21–48 o loo aofia ai ia aoaoga a le Faaola e uiga i tulafono eseese ma uputuu a Iutaia sa atinae pe sa faaopoopo i le tulafono a Mose. A o faamatalatala e Iesu Keriso le uiga moni o le tulafono, sa ia aoao atu se ala e maualuga atu o le amiotonu. E tatau i tagata o Lona malo ona ola i lenei tulafono maualuga atu. O nei tulafono maualuluga atu ua aumaia ai se taitaiga e fesoasoani ai i soo o Iesu Keriso e aloese mai le solia o poloaiga a le Atua.
Ina ia saunia le vasega e suesue i aoaoga a le Faaola e uiga i le ita, valaaulia i latou e mafaufau i se taimi ina ua ita ai i se tasi.
O ni tulaga matautia o le le taofiofia o lou ita?
Valaaulia se tamaitiiti aoga e faitau leotele le Mataio 5:21–22. Fai i le vasega e mulimuli ai, ma vaavaai mo mea na aoao mai i le tulafono a Mose e uiga i faiga saua ma le ita ma pe o a isi upumoni faaopoopo na aoao mai e le Alii e uiga i le ita o se vaega o le tulafono maualuga.
O a mea na aoao mai e le Faaola e uiga i faiga saua ma le ita? (Faamatala o faaupuga o le Raka i le fuaiupu 22 o le fai’aivale, vale, tagata faavalevalea.)
E tusa ai ma nei fuaiupu, o le a le mea e tupu pe afai tatou te le aoao e taofiofi lo tatou ita?
Aisea e tulaga ese ai le aveesea o le fasifuaitau “e aunoa ma se mafuaaga” mai lenei fuaiupu?
E fesoasoani faapefea le taofiofi o lo tatou ita i lo tatou agaigai atu i le avea ma e atoatoa?
Tusi le fasifuaitau lenei i luga o le laupapa: O le mea lea, afai tou te o mai ia te au, pe o le a mananao e o mai ia te au …
Faamatala atu faapea o le Faaliliuga a Iosefa Samita ua faaopoopo ai le fasi fuaitau “afai tou te o mai ia te au, pe o le a outou mananao e o mai ia te au” i le amataga o le fuaiupu 23 ia faitau ai faapea, “O le mea lea, afai tou te o mai ia te au, pe o le a outou mananao e o mai ia te au, pe tou te aumai a outou meaalofa i le fatafaitaulaga, ma manatua ai iina ua i ai i lou uso se mea e le o fiafia ai ia te oe” (Faaliliuga Iosefa Samita, Mataio 5:25).
Valaaulia se tagata e faitau leotele le Mataio 5:23–24, e aofia ai le fasifuaitau faaopoopo mai le Faaliluga a Iosefa Samita. Fai i le vasega e mulimuli ai, ma vaavaai mo mea na aoao mai e le Faaola e tatau ona tatou faia i lo tatou ita i isi pe afai tatou te mananao e o atu ia te Ia.
O le a le uiga o le fasifuaitau “ina tuu ia i lea mea o lau taulaga, i luma o le fatafaitaulaga ae alu oe”? (A o lei osia e tagata ia taulaga i le Alii, e ao ona latou muai faaleleia a latou sootaga ma o latou tagata.)
E tusa ai ma le fuaiupu e, o le a le mea e tatau ona tatou faia pe afai tatou te mananao e o mai ia Keriso? (E mafai e le vasega ona faaaoga ni upu eseese, ae ia mautinoa latou te faailoa maia le upumoni lenei: Afai tatou te mananao e o mai ia Iesu keriso, e tatau ona tatou muai faia la tatou vaega o le faalelei ma isi.
O le a le uiga o le faalelei ma se tasi? (O le faaleleia lea o se eseesega po o le toefuatai le tulaga sologa lelei o le mafuataga. E aofia ai i latou e i ai lagona le lelei mo i tatou ma i latou atonu i ai ni o tatou lagona le lelei.)
Aisea e te manatu ai e manaomia ona faaleleia o tatou eseesega ma isi ina ia tatou o mai ai ia Keriso?
Valaaulia se tamaitiiti aoga e faitau leotele le Mataio 5:25–26. Fai atu i le vasega e mulimuli i le faitauga, ma vaavaai mo mea na fetalai mai le Faaola e mafai ona tatou faia ina ia faalelei ai ma isi.
O le a sou manatu i le uiga o le vave ona e ioe faatasi ma lou fili? (Afai e manaomia e le vasega se fesoasoani, valaaulia i latou e vaai i le Mataio 5:25, vaefaamatalaga a.)
E mafai faapefea e le filifili ia i ai mafaufauga agalelei i se tasi ona fesoasoani tatou te faaleleia ai se eseesega pe toefuatai se sootaga ua afaina ma ia?
Fai i le vasega e mafaufau i se taimi na latou faaleleia ai se eseesega ma se tasi tagata ma sa mafai ai ona latalata atili atu ai i le Alii. Atonu e te manao e valaaulia se tasi pe lua o tagata e faasoa mai o latou aafiaga, pe afai e le o ni mea e patino tele. Fautuaina le vasega e faalelei ni o latou eseesega ma isi ina ia mafai ai ona latou agaigai i luma ia atoatoa faapei o lo tatou Tama o i le Lagi.
Ata
dandelions
Faaali atu se vao po o se ata o se vao).
Mata o le a se mea e tupu pe afai e le vele eseina ia vao mai se togalaau?
E ono avea faapefea ia vao e pei o ni agasala?
Valaaulia se tamaitiiti aoga e faitau leotele le Mataio 5:27–28. Fai i le vasega e mulimuli ai, ma vaavaai mo se agasala na lapatai mai ai le Faaola ma le tulafono maualuga ua Ia faamoemoe i Ona soo e ola ai.
O le a le mea na aoao mai e le Faaola e uiga ia i latou o e taliaina mafaufauga faatuinanau po o manaoga? (E mafai e le vasega ona faaaoga ni upu eseese, ae ia mautinoa e manino afai tatou te filifili e talia ia mafaufauga faatuinanau po o manaoga, ua tusa lava ia ma le faatinoina o le mulilua i o tatou loto.)
Faamatala e ui e le mafai ona tatou puipuia pea ia mafaufauga le mama mai le ulufale mai i o tatou mafaufau, e mafai lava ona tatou puipuia mai le mau ai iina.
Valaaulia se tamaitiiti aoga e faitau leotele le Mataio 5:29–30. Fai atu i le vasega e mulimuli i le faitauga, ma vaavaai mo le mea na aoao mai e le Alii e uiga le aveesea o mafaufauga le mama.
O le a le fetalaiga a le Faaola i le mea e tatau ona tatou faia e aveesea ai mafaufauga le mama?
O le a sou manatu o le a le uiga o le sali ese o lou mata ma tipi ese lou lima i nei fuaiupu?
Valaaulia se tamaitiiti aoga e faitau leotele le Mataio 16:15–19. Fai i le vasega e vaavaai pe na faapefea e le Faaliliuga a Iosefa Samita ona fesoasoani tatou te malamalama ai i le uiga o le sali ese o le mata ma le tipi ese le lima i nei fuaiupu. Valaaulia tagata aoga e lipoti mai mea latou te maua.
E tusa ai ma mea na aoao mai e le Alii i le Mataio 5:29–30, o le a le mea semanu e tupu pe afai tatou te le aveesea agasala mai o tatou olaga? (A maea ona tali mai tamaiti aoga, tusi le mataupu faavae lenei i le laupapa: Afai tatou te filifili e aua nei aveesea agasala mai o tatou olaga, o le a faataumaoia ai i tatou faaleagaga.
O le a se mea e mafai ona tatou faia e aveesea ai agasala mai o tatou olaga?
O le a se mea e mafai ona tatou faia e aveesea ai agasala mai o tatou olaga ma mautinoa ai tatou te le toe faia na agasala?
Fautuaina le vasega e mafaufau e uiga i se agasala o latou mananao e aveesea mai o latou olaga ona faatu lea o se sini e fai ai e ala i le salamo ma le suia i ni faatinoga amiotonu.
Otooto le Mataio 5:31–37 i le faamatala atu sa aoao mai le Alii e uiga i le tatalaina o faaipoipoga, faaipoipoga, ma le faia o tautoga.
Valaaulia le vasega e mafaufau faapea ua fai atu e se paaga i le aoga ni mea leaga ma le le alofa e uiga ia i latou. Fesili i le vasega pe faapefea ona latou tali atu.
Valaaulia se tamaitiiti aoga e faitau leotele le Mataio 5:38. Fai i le vasega e mulimuli ai, ma vaavaai mo mea na aoao mai e le tulafono a Mose e uiga i le faasalaina o tagata mo a latou lava agasala ma faatausuai. Fai atu ia i latou e lipoti mai mea ua latou mauaina. Faamatala atu o le “mata mo le mata, ma le nifo i le nifo” o lona uiga i lalo o le tulafono a Mose, o le faasalaga e tatau lava ona tutusa lelei ma le matuia o le agasala.
Vaevae le vasega i ni paga. Valaaulia se paga se tasi e faitauina le Mataio 5:39–42 ma le lona lua e faitauina le Mataio 5:43–47. Fai i ai e vaavaai mo le tulafono maualuga. A uma ua lava se taimi, fai i le vasega e talanoaina fesili nei ma a latou paga (e mafai ona e tusia nei fesili i luga o le laupapa pe saunia se tufaaga mo i latou):
E tusa ai ma le Faaola, o le a le tulafono maualuga?
O le a se mea o aoao mai e le tulafono maualuga ia i tatou e uiga i le ala e tatau ona tatou tali atu ai ia i latou o e faatiga mai?
A uma ua lava se taimi, valaaulia ni nai tamaiti aoga e faasoa mai mea na latou maua i le vasega.
Valaaulia se tamaitiiti e toe faitau leotele le Mataio 5:45. Fai i le vasega e mulimuli ai, ma vaavaai mo mea o le a tutupu pe afai tatou te alolofa i o tatou fili ma faia mea lelei mo i latou e inoino mai ia i tatou.
O le a le mea e tupu pe afai tatou te alolofa i o tatou fili ma faia mea lelei ia i latou o e inoino mai?
O le iloa ai o i tatou uma o fanau agaga a le Atua, o le a sou manatu i le uiga o lenei fuaiupu ia avea o fanau a lo tatou Tama i le Lagi? (O lona uiga ia avea e faapei o Ia ma ia avea ma suli o Lona malo.)
Na faataitai mai faapefea e le Faaola le alofa i Ona fili ma le faia o mea lelei i isi i Lona soifuaga?
Valaaulia le vasega e toe mafaufau i mea sa latou aoaoina i le Mataio 5 e uiga i mea e manaomia ona tatou faia ia atoatoa ai e faapei o le Tama Faalelagi.
O a nisi o mea e manaomia ona tatou faia ia atoatoa ai e faapei o lo tatou Tama i le Lagi? (E mafai e tagata ona faaaoga ni upu eseese, ae e tatau ona latou faailoa maia se mataupu faavae e pei o lenei: A tatou mulimuli i aoaoga a le Faaola ma poloaiga, e mafai ona tatou atoatoa e faapei o lo tatou Tama i le Lagi.
Faamanatu i le vasega e na o Iesu Keriso lava ma Lona alofa tunoa e mafai ai ona faaatoatoaina i tatou (tagai Moronae 10:32).
Ina ia fesoasoani i tagata o le vasega ia malamalama lelei i le faagasologa o le atoatoa, valaaulia se tagata o le vasega e faitau leotele le saunoaga lenei mai ia Elder Russell M. Nelson o le Korama a Aposetolo e Toasefululua.
Ata
Elder Russell M. Nelson
“Tatou te le manaomia ona faanoanoa pe afai o a tatou taumafaiga lelei agai atu i le atoatoa, e foliga mai nei e matua faigata ma e le muta. O loo faatalitali le atoatoaga. E oo mai lona atoatoaga pe a maea le Toetu ma e na o le Alii lava e ala ai. E faatalitali mai mo i latou uma o e alolofa ia te Ia ma tausia Ana poloaiga” (“Atoatoaga O Lo o Faatalitali,” Ensign, Nov. 1995, 88).
E tusa ai ma Elder Nelson, o afea o le a tatou taunuu ai i le atoatoaga?
E mafai faapefea e lenei saunoaga ona fesoasoani i se tasi ua lagona le lofituina ma le lotovaivai i ona le atoatoa?
Fautuaina le vasega e faaauau pea ona usiusitai i poloaiga a le Atua ina ia mafai ai ona iu ina latou avea e faapei o lo tatou Tama Faalelagi.
Na faamatala e Elder Bruce R. McConkie o le Korama a Aposetolo e Toasefululua se uiga lautele atu o le faaupuga Raca:
“O faaupuga masoa ma paaa e eseese mai lea atunuu i lea atunuu faapena foi lea vaitausaga ma lea vaitausaga, ae o le faamoemoe o lenei vaega o le tusiga o le ta’usalaina lea o soo se gagana e ta’u mai ai ni lagona e le lelei e uiga i se tasi”(Faamatalaga Faaaoaoga Faavae o le Feagaiga Fou, 3 vol. [1965–73], 1:222).
Mataio 5:27—28. “Ai Se Vaai Atu i le Fafine Ina ia Manao I Ai”
Na faailoa mai e Elder Jeffrey R. Holland o le Korama a Aposetolo e Toasefululua, le matautia o le agasala o le tuinanau:
“Aisea ua avea ai le tuinanau ma se agasala matautia? Ia e faaopoopo atu i le faatamaiaina o o tatou agaga e ala i le tulieseina o le Agaga, ae ou te manatu o se agasala aua na te faaleagaina le sootaga aupito maualuga ma sili ona paia ua tuuina mai e le Atua ia i tatou i le olaga nei—o le alofa o se alii ma se tamaitai i le tasi ma le isi ma le naunau o le ulugalii e aumai ni fanau i se aiga ua faamoemoe ina ia faavavau. … O le alofa e otometi ai lava ona tatou aapa atu i le Atua ma isi tagata. O le tuinanau, i le isi itu, e matuai aunoa ma se amioatua, ma e fiafia i le faamalieina o le tagata lava ia. O le alofa e oo mai ma lima agalelei ma se loto matala; o le tuinanau e na o le matelaina lava la te o mai” (““Ia Le Toe Ulu Mai I Lo’u Agaga Lē Ita Mai ia te Au,” Ensign po o le Liahona, Me 2010, 44–45).
Na saunoa ia Elder Dallin H. Oaks o le Korama a Aposetolo e Toasefululua e uiga i aafiaga o ponokalafi ia i latou o e faaaogaina:
“O ponokalafi e faaleagaina ai le malosi o se tasi e fiafia ai i se mafutaga masani faalelagona, alofa, ma le faaleagaga ma se tagata o le isi itupa. Na te faaeleaina papupuni lelei lea e tutu e tetee atu i amioga le taupulea, le talafeagai, pe faasāina foi. A o faagaseina le mafaufau, o tagata e aafia i ponokalafi e oo atu lava i le faatinoina o mea ua latou vaaia, e tusa lava po o a ona aafiaga i o latou olaga ma olaga o isi.(“Ponokalafi,” Ensign po o le Liahona, Me 2005, 89).
I ona po o Iesu, o se tasi o mafaufauga tauaofai o Iutaia na faaliliuina le tulaga faavae faa-Mose (tagai Teuterenome 24:1–2) i se auala e faatagaina ai ona tete’a ona o ni mafuaaga faavalevalea. Mo se faataitaiga, afai e manao se tane i se ava talavou pe sili atu ona lalelei, pe afai foi e faaleagaina e le ava a se tane sana taumafataga, pe alu atu i nofoaga faitele ae le ufiufia lona ulu, pe le ioeina foi, sa taga ia te ia ona saili e faate’a. E pei ona tusia i le Mataio 5:31–37e pei foi o isi mea i le Lauga i luga o le Mauga, sa saili atu ai Iesu e valaau atu i ona soo i se tulaga maualuga atu o le amiotonu ma ia latou malamalama o le faaipoipoga o se faatulagaga e tatau ona faamamaluina ma faatumauina e tusa ai ma le mamanu na faavaeina e le Atua i le faaipoipoga e faavavau a Atamu ma Eva. (Tagai Bruce R. McConkie, The Mortal Messiah, 4 vols. [1979–81], 3:291–97; tagai foi Mataio 19:3–9.)
O le poloaiga “ia e alofa atu i lou tuaoi” o loo maua i le Levitiko 19:18, peitai e leai se mau o i le Feagaiga Tuai o loo poloaiina ai i tatou e inoino i le ua ita mai. E foliga mai sa faasino e le Faaola i se faaupuga masani i Ona taimi.