Ina ua uma le faamalologa o se tagata pipili i le malumalu, (tagai Galuega 3), sa puefaapagotaina ia Peteru ma Ioane. Sa poloaiina e le au Saneterini i laua e soia le toe aoao atu i le suafa o Iesu. Peitai, sa faaauau pea ona folafola atu le au Aposetolo ma faamalolo i le suafa o Iesu. Sa toe puefaapagotaina i laua ma sasaina ona o le mumusu e usitaia le faatonuga a taitai Iutaia. Sa ola ia tagata o le Ekalesia i le tulafono o le faapaiaga, ae toalua i la’ua na oti ona o le pepelo ia Peteru ma le Atua.
Ua poloaiina e sui o le au Saneterini ia Peteru ma Ioane e soia le toe aoao atu i le suafa o Iesu
Fai i le vasega e mafaufau pe o le a se mea latou te faia i tulaga nei:
Ua tuu e se uo i luga o le upega tafailagi se mea e le moni e uiga i le Ekalesia.
Ua faatulaga e se faiaoga o ‘au taaalo se taaloga e manaomia ai lau au e taaalo i le Aso Sa.
Ua fesili atu au uo i sou manatu e uiga i se mataupu faaagafesootai ua lauiloa ma e lagolagoina ae e feteenai ma aoaoga a le Ekalesia.
A uma ua lava se taimi, fesili atu:
O a nisi tulaga e ono manaomia ai ona e faasoa atu pe puipuia ai lo tatou faatuatua?
O le a se mea e ono faigata e uiga i le faasoa atu poo le puipuia o lo tatou faatuatua?
Valaaulia le vasega e vaavaai mo upumoni a o latou suesue i le Galuega 4–5 ia e mafai ona taialaina ai i latou i nei ituaiga o tulaga.
Valaaulia le vasega e aotele mai mea latou te manatua e uiga i mea na tutupu ma aoaoga o loo tusia i le Galuega 3. A manaomia, faamanatu i ai ina ua uma ona faamalolo le tagta pipili, sa aoao atu e Peteru ma Ioane se vaega o tagata o e sa faapotopotoina atu ia i laua i le malumalu.
Valaaulia se tamaitiiti aoga e faitau leotele le Galuega 4:1–4. Fai i le vasega e mulimuli ai, ma vaavaai mo mea sa tutupu ia Peteru ma Ioane a o la aoao atu ia tagata i le malumalu.
O le a le mea na tupu ia Peteru ma Ioane?
Aotele le Galuega 4:5–6 i le faamatala atu e faapea na pue faapagotaina Peteru ma Ioane ma avatu i luma o le aufono faatonu o le pulega a Iutaia e faaigoa o le au Saneterini (tagai Bible Dictionary, “Sanhedrin”). Faamanatu i le vasega e toatele sui o le au Saneterini sa aofia ai i le faataunuuina o le puefaapagotaina ma le faasatauroga o le Faaola.
Valaaulia se tamaitiiti aoga e faitau leotele le Galuega 4:7. Fai atu i le vasega e mulimuli i le faitauga, ma vaavaai mo le fesili na fesili atu ai taitai Iutaia ia Peteru ma Ioane.
O le a le mea na fai atu ai taitai Iutaia ia Peteru ma Ioane e fai?
O le a le mea e ono tupu ia Peteru ma Ioane pe ana la tau atu o i laua o soo o Iesu Keriso?
Valaaulia ni tamaiti aoga e feauauai i le faitauina leotele o le Galuega 4:8–21. Valaaulia le vasega e vaavaai mo mea na tau atu e Peteru i le aufono.
E tusa ai ma le Galuega 4:10–12, o a upumoni na aoao atu e Peteru i le aufono? (E ono faailoa mai e le vasega ia ni upumoni, ae ia mautinoa e faamamafa atu o le suafa o Iesu Keriso ua na o le pau lea o le igoa e mafai ona tatou maua ai le faaolataga.)
E tusa ai ma le fuaiupu 13, aisea na ofo ai le aufono ia Peteru ma Ioane?
Valaaulia le vasega e toe iloilo lemu le Galuega 4:8, ma vaavaai pe o le a le mea na tosina ai Peteru ma fesoasoani ia te ia e tautala atu ma le lototoa i le aufono.
O le a a sou manatu i le faatumulia i le Agaga Paia na tosina ai le tomai o Peteru e aoao atu le talalelei ma le lototoa?
O le a le mataupu faavae ua mafai ona tatou aoao mai i le faataitaiga a Peteru e pei ona tusia i fuaiupu 8 ma le 13? (E ono faaaoga e le vasega a latou lava upu, ae ia mautinoa latou te faailoa maia le mataupu faavae lea: A faatumulia i tatou i le Agaga Paia, e mafai ona tatou faasoa atu le talalelei ma le lototoa.
Valaaulia tagata o le vasega e vaavaai mo nisi faapupulaga o lenei mataupu faavae a o latou suesue pea i le Galuega 4–5.
E tusa ai ma le fuaiupu 18, o le a le poloaiga na tuu atu e le aufono ia Peteru ma Ioane?
E tusa ai ma le fuaiupu 19–20, na faapefea ona tali atu Peteru ma Ioane i le faatonuga a le aufono?
Aotele le Galuega 4:23–28 i le faamatala atu e faapea ina ua uma ona tatalaina ia Peteru ma Ioane, sa latou potopoto ma isi na talitonu ma tatalo faatasi ma i latou.
Valaaulia se tamaitiiti aoga e faitau leotele le Galuega 4:29–30, ma fai atu i le vasega e vaavaai mo mea na fesili ai le au talitonu e uiga i le Atua.
O a mea na fesili ai le au talitonu e uiga i le Atua?
Valaaulia se tagata e faitau leotele le Galuega 4:31 ma fai i le vasega e mulimuli ai ma vaavaai mo mea na tutupu ina ua uma le tatalo.
O le a le mea na tupu ina ua uma ona tatalo tagata?
E faavae i nei fuaiupu, o le a le mea e mafai ona tatou faia e valaaulia ai le Agaga Paia e fesoasoani ia i tatou e tautala atu ai i upu a le Atua ma le lototoa?
Faasino i nisi o tulaga o loo taua i le amataga o le lesona.
O a ni auala e mafai ai ona tatou lototoa e faasoa atu le talalelei i tulaga e pei o nei?
E mafai faapefea ona tatou faasoa atu ma puipuia le talalelei i isi a o tatou faaaloalo pea ma faautauta?
O anafea na fesoasoani ai le Agaga Paia ia te oe e tautala atu i le afioga a le Atua ma le lototoa?
E ola tagata o le Ekalesia i le tulafono o le faapaiaga, ae na pepelo ia Anania ma Safaira ia Peteru
Fai i tamaiti e mafaufau i le tulaga lenei:
Ua fuafua e se vaega o le autalavou e faia papatisoga i le malumalu mo e ua maliliu. E i ai se tasi o le vaega ua iloa e tatau ona vaai le epikopo mo se pepa faataga, ae ua ia iloa foi sa ia faia se agasala e lei faailoa atu
O loo sauniuni se alii talavou e auauna atu i se misiona. Ua ia iloa o le a fesili atu le epikopo e uiga i lona agavaa e faamisiona. Ua taumafai o ia i se auala e tali ai na fesili e aunoa ma le tauina atu i le epikopo ni nai mea sese sa ia faia.
Valaaulia le vasega e vaavaai mo se mataupu faavae a o latou suesueina le Galuega 4:32–5:11 lea e mafai ona fesoasoani latou te malamalama ai i le taua o le faamaoni i auauna a le Atua.
Valaaulia se tamaitiiti aoga e faitau leotele le Galuega 4:32–35. Fai i le vasega e mulimuli ai, ma vaavaai mo mea na faia e tagata o le Ekalesia ia latou meatotino.
O le a le mea na faia e tagata o le Ekalesia ia latou meatotino?
E tusa ai ma fuaiupu 34–35, o le a la latou faiga o le faasoaina o a latou meatotino faaletino?
Valaaulia se tamaitiiti aoga e faitau leotele le Galuega 5:1–2. Fai i le vasega e mulimuli ai, ma vaavaai po o le a le mea sa faia e le ulugalii o Anania ma Safaira i le tupe sa la maua mai i le faatauina atu o lo la fanua.
O le a le mea na faia e Anania ma Safaira sa matuai matuia tele?
Valaaulia se tamaitiiti aoga e faitau leotele le Galuega 5:3–4, ma fai atu i le vasega e vaavaai po o a mea na tau atu e Peteru ia Anania.
E tusa ai ma le fuaiupu 4, o ai tonu lava lea na pepelo i ai Anania?
Mai le tali a Peteru, o le a le mataupu faavae e mafai ona tatou aoao mai i le pepelo i auauna a le Alii? (E ono faaaoga e le vasega a latou lava upu e faailoa mai ai le mataupu faavae lenei: Afai tatou te pepelo i auauna a le Atua, o le pepelo lava lea ia te Ia.
Aisea e te manatu ai o le pepelo i auauna a le Atua o le pepelo lava lea ia te Ia?
Valaaulia ni nai tamaiti aoga e feauauai i le faitauina leotele mai o le Galuega 5:5–11. Fai i le vasega e mulimuli ai, ma vaavaai mo mea na tupu ia Anania ma Safaira o se taunuuga o le solia o a la feagaiga ma le pepelo ia Peteru.
O le a le mea na tupu ia Anania ma Safaira?
E ui atonu tatou te le oo pe oo foi i latou tatou te iloa i ni taunuuga matuia pe vave foi ona o le pepelo, a o a ni taunuuga tatou te ono oo i ai pe afai tatou te pepelo i le Alii pe solia a tatou feagaiga?
Valaaulia se tamaitiiti aoga e faitau leotele le saunoaga lenei mai ia Peresitene Gordon B. Hinckley. Fai i le vasega e faalogologo mo nisi o taunuuga o le le faamaoni:
Ata
Peresitene Gordon B. Hinckley
“I o tatou aso, o i latou e maua e le faamaoni e le oti e pei ona i ai Anania ma Safaira, ae e iai se mea i totonu e oti. E fetoi le lotofuatia ifo, e mamae le amio, e mou atu le faaaloalogia, e mate le amiosao“ (“Matou Te Talitonu ia Faamaoni,” Ensign, Oct. 1990, 4).
E tusa ai ma le saunoaga a Peresitene Hinckley, o a ni taunuuga o le pepelo? Toe tagai i tulaga mai le amataga o lenei lesona.
O a mea e tatau i tagata o nei tulaga ona iloa e uiga i mea e tutupu ia i tatou pe a tatou talapepelo i se taitai perisitua?
O a faamanuiaga e maua mai i le faamaoni i auauna a le Alii?
Ua faafalepuipuiina ia Aposetolo ona o le faamalolo i le suafa o Iesu Keriso
Fai i le vasega e mafaufau e faapea o loo latou ola i le taimi o Peteru ma Ioane ma o i latou o ni fai lipoti mo se nusipepa. Faamatala o le a valaaulia i latou e suesue ia vaega o le Galuega 5:12–32ona latou tusia lea o se folamua e aotele ai le mea na tupu. (Ina ia saunia se matalalaga mo nei fuaitau, faamanatu i le vasega na poloaiina e le au Saneterini ia Peteru ma Ioane e soia le toe tautala i le suafa o Iesu Keriso.) Mulimuli i faatonuga loo tuuina atu i poloka taitasi o fuaiupu.
Galuega 5:12–16 (Faitau le fuaitau lenei e le vasega, ma tusi faatasi se folamua.)
Galuega 5:17–23 (Fai i le vasega e faitau le fuaitau lenei ma se paga ma tusi se folamua. Valaaulia nisi o paga e faasoa mai i le vasega a latou folamua.)
Galuega 5:24–32 (Fai i le vasega e faitau taitoatasi ma tusi se folamua. Valaaulia ni tagata e faasoa mai a latou folamua i le vasega.
A uma ona faasoa mai e le vasega a latou folamua, ona fesili lea:
E tusa ai ma le fuaiupu 29, aisea na fai mai ai Peteru ma isi Aposetolo sa latou faaauau pea ona folafola atu i le suafa o Iesu e ui i le poloaiga mai le aufono?
Tusi le faamatalaga lenei e lei maea i luga o le laupapa: Afai tatou te filifili e usitai i le Atua nai lo tagata, ona …
Mai mea sa outou faitauina mai le Galuega 4–5, o a ni auala e mafai ona tatou faamaea ai lenei faamatalaga? (A uma ona tali mai le vasega, faamaea le faamatalaga o i le laupapa e faapea: Afai tatou te filifili e usitai i le Atua nai lo tagata, ona faatasi lea o Ia ma i tatou.
O a ni auala na faatasi ai le Atua ma Peteru ma isi Aposetolo a o latou usiusitai ia te Ia ae le o le aufono? (Na faatumulia i latou e le Atua i le Agaga Paia [tagai Galuega 4:8, 31], ma mafai ai e i latou ona faia o vavega [tagai Galuega 5:12–16], ma sa auina atu Lana agelu e laveai i latou mai le falepuipui [tagai Galuega 5:17–20].)
O anafea na e filifili ai pe filifili ai se tasi e te iloa e usitai i le Atua nai lo tagata? Na faapefa ona faaalia e le Atua na faatasi o Ia ma oe po o lea tagata?
Valaaulia ni nai tamaiti aoga e feauauai i le faitauina leotele mai o le Galuega 5:33–42. Valaaulia le vasega e mulimuli ai, ma vaavaai mo nisi faataitaiga pe na faapefea ona faatasi le Alii ma Peteru ma isi Aposetolo.
Tau i ai ua tatou aoao i le Galuega 5:33 na saili le aufono e fasiotia ia Peteru ma Ioane.
E tusa ai ma fuaiupu 41–42, na faapefea ona tumau faamaoni ia Aposetolo i le Alii a o feagai ai ma lenei taufaamatau? Na faapefea ona faatasi le Alii ma i latou i le taimi lea?
E mafai faapefea ona fesoasoani ia upumoni sa tatou faailoaina i lenei lesona ia i tatou a o tatou ola i le talalelei ma faasoa atu ia i latou o siomia ai i tatou?
Ia faasoa atu lau molimau o upumoni na talanoaina i le aso.
Tala ma Faamatalaga o Talaaga
Galuega 4:1–13. Faasoa atu ma puipuia le talalelei ma le lototoa
Na aoao mai e Elder Dallin H. Oaks o le Korama a Aposetolo e Toasefululua le ala e mafai ai ona tatou faasoa atu ma puipuia lelei le talalelei ma isi atonu e le ioeina o tatou talitonuga:
“E tusa lava pe tatou te saili atu ia agamalu ma aloese mai finauga, e le tatau lava ona tatou fetuunaia pe faavaivaia lo tatou tuuto i upumoni ua tatou malamalama i ai. E le tatau ona tatou lafoaia o tatou tulaga po o tulaga faatauaina. O le talalelei a Iesu Keriso ma feagaiga ua tatou osia e le faapea o le a lē avea ai i tatou ma ni tagata e fetaiai ma luitau e faavavau o le va o le upumoni ma le mea sese. E leai se avanoa e fetōtōai ai i lena tauiviga. …
“… E tatau ona tatou mulimuli uma i le aoaoga o le talalelei e alolofa i o tatou tuaoi ma aloese mai finauga. O soo o Keriso e tatau ona avea ma faataitaiga o le amio aloaia E tatau ona tatou alolofa atu i tagata uma, avea ma tagata e faalogo lelei, ma faaalia le popole mo o latou talitonuga faamaoni. E ui lava atonu tatou te le ioe [i nisi manatu], ae e le tatau ona tatou le fiafia. O o tatou tulaga ma talanoaga e uiga i ni autu feteenai e le tatau ona tupu ai ni finauga. E ao ona tatou atamamai i le faamatalaina ma le tulimataia o o tatou tulaga ma i le faaaogaina o la tatou faatosinaga” (“Ola Faatasi ma Alolofa atu i Isi e Eseese o tatou Talitonuga,” Ensign po o le Liahona, Nov. 2014, 26, 27).
Na aoao mai Peresitene Boyd K. Packer o le Korama a Aposetolo e Toasefululua, e uiga i le taua o le suafa o Iesu Keriso:
“O le mea tupito ma lagolagoina o mea uma tatou te faia, o loo taula i ai faaaliga uma, o le suafa lea o le Alii, o le pule lea o loo tatou galulue ai i le Ekalesia. O tatalo uma o ofoina atu, e oo lava i tamaiti laiti, e faaiu i le suafa o Iesu Keriso. O faamanuiaga uma, sauniga uma, faauuga uma, o galuega aloaia uma e faia lea i le suafa o Iesu Keriso. O Lana Ekalesia lenei, ma ua faaigoa ia te ia—O Le Ekalesia a Iesu Keriso o le Au Paia o Aso e Gata Ai (tagai MF&F 115:4)” (“O Le Molimau,” Ensign po o le Liahona, May 2014, 96).
“Sa taumafai tagata o le Ekalesia i Ierusalema e ola i le tulafono o le faapaiaga. ‘Sa latou tuu tele a latou mea uma’ (Galuega 4:32)atonu e le faapea sa latou tuufaatasia a latou punaoa ona vaevae tutusa ai lea i e na talitonu. Ae na latou faaaogaina a latou punaoa na totoe e tausi ai e matitiva ma e le tagolima. Na i ai foi ni taumafaiga faapea e ola i le tulafono o le faapaiaga na tupu i le nuu o Enoka ma i le Tusi a Mamona (tagai Mose 7:18; 4 Nifae 1:3–18; MF&F 105:3–5)” (Tusi lesona a le Tagata Aoga o le Feagaiga Fou [Church Educational System manual, 2014], 286–87).