Ioane 2–6 (Iunite 13)

Anomea o Sauniuniga mo le Faiaoga o Suesuega i le Aiga

Aotelega o Lesona Suesueina i le Fale i Aso Taitasi

O aotelega o loo i lalo o aoaoga faavae ma mataupu faavae ua aoaoina e tamaiti aoga ao latou suesue i leIoane 2–6 (iunite 13) e lei fuafuaina o se vaega e aoaoina o lau lesona. O le lesona e te aoao atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.

Aso 1 (Ioane 2)

A o faitau le vasega e uiga i le uluai vavega a le Faaola o le faaliliuina o le vai i le uaina, sa latou iloa ai e ia Iesu Keriso le mana e pulea ai elemene faaletino. Sa latou aoaoina ai foi sa alofa ma faaaloalo le Faaola i Lona tina. A o latou suesue i le tala i le faamamaina e Iesu o le malumalu, sa aoao ai e le vasega o le malumalu o le maota lea o le Atua.

Aso 2 (Ioane 3)

Na aoaoina e tamaiti aoga ia upumoni nei mai aoaoga a le Faaola ia Nikotemo: O le papatisoina ma le mauaina o le meaalofa o le Agaga Paia e manaomia mo le toe fanauina faaleagaga ma le mauaina o le faaeaga i le malo selesitila. E mafai e tagata uma ona maua le ola e faavavau e ala i le Togiola a Iesu Keriso. E alofa tele le Tama Faalelagi i Ana fanau na Ia auina mai ai Lona Alo Pele e Toatasi e puapuagatia mo a latou agasala. Afai tatou te talitonu ia Iesu Keriso, lea e aofia ai lo tatou salamo ia tatou agasala ma usiusitai i Lana upu, e mafai ona tatou maua le ola e faavavau e ala i Lana Togiola. Mai le faataitaiga a Ioane le Papatiso, sa aoao ai e le vasega e mafai ona tatou faatosina mai isi mo le lelei e ala i le taitai atu o i latou ia Iesu Keriso.

Aso 3 (Ioane 4)

Ao faitau tamaiti aoga e uiga i aoaoga a le Faaola i se fafine Samaria i le vaieli, sa latou aoaoina ia upumoni nei: Afai tatou te o mai ia Iesu Keriso ma taumamafa ma le naunautai i Lana talalelei, o le a tatou maua le ola e faavavau. E silafia e Iesu Keriso a tatou agasala ma ua ofoina mai Lana talalelei e fesoasoani ia i tatou e faatoilaloina. Afai tatou te tapuai i le Tama i le agaga ma i le upumoni, o le a Ia faamanuiaina i tatou i Lona Agaga. A tatou maua se molimau ia Iesu Keriso, e faatumulia i tatou i se manao e faasoa atu i isi.

Aso 4 (Ioane 5–6)

A o faitau tamaiti aoga e uiga i le faamaloloina e le Faaola o se tagata pipili, sa latou aoao ai e ala i le mana ma le alofa mutimutivale o Iesu Keriso, e mafai ona tatou atoatoa ai. Sa latou aoaoina foi e na o le o mai lava ia Iesu Keriso e mafai ona tatou maua ai le ola e faavavau. Mai le lauga a le Faaola e uiga i le Areto o le Ola, sa aoao ai e tamaiti aoga o se molimau mausali ia Iesu Keriso o le a fesoasoani tatou te tumau faamaoni ai i taimi pe a faigata ona mulimuli i le Faaola pe ola i Ana aoaoga.

Folasaga

O le aso na sosoo ma le fafagaina faavavega o le motu o tagata e silia ma le 5,000, na Ia aoao atu ai o Ia o le Areto o le Ola.

Fautuaga mo le Aoaoina Atu

Ioane 6:22–59

Ua aoao atu Iesu e faapea, o Ia o le Areto o le Ola

Faaali atu se papa falaoa. Valaaulia se tamaitiiti aoga e otooto mai le tala i le Faaola o fafagaina le silia ma le 5,000 tagata i potoi areto e lima ma nai i’a laiti e lua.

Mata o a ni ou mafaufauga pe ana faapea sa e i ai i lena vavega ma aoao ai faapea sa ia Iesu le tomai e saunia faavavega ai meaai?

Faamatala atu, o le Ioane 6:22–25 o looo tusia ai o le toatele o tagata na fafagaina faavavega e Iesu na malaga atu i Kapanaumi e saili o Ia.

Valaaulia se tamaitiiti aoga e faitau leotele le Ioane 6:26–27. Fai atu i le vasega e mulimuli i le faitauga, ma vaavaai mo mea na tau atu e Iesu i tagata.

Faamatala o le Faaliliuga a Iosefa Samita o le Ioane 6:26 ua faamanino mai ai, “Sa tali atu Iesu ia te i latou ma faapea atu, E moni, e moni, ou te fai atu ia te outou, Ua outou saili mai ia te au, e le ona ua outou mananao e tausi a’u upu, e le ona ua outou vaai i vavega, ae ona ua outou aai i areto, ma ua maoona ai” (Faaliliuga a Iosefa Samita, Ioane 6:26 [i le Ioane 6:26, vaefaamatalaga a]). Faamatala atu foi o le upumea e ’ai i le Ioane 6:27 ma le Tusi Paia atoa e faasino i meaai. O le upu fleshua faaaoga e faasino i mea ua tatou ta’ua o aano o manu.

E tusa ai ma le Faaola, aisea na sailia ai o Ia e nei tagata? (Ua ta’u mai i upu a le Faaola sa latou mulimuli atu ia te Ia ia toe maua mai ai nisi meaai mai ia te Ia.)
O le a le mea na ta’u atu e le Faaola ia i latou e ao ona latou sailia?

Faamatala atu, o le “mea e’ai [po o meaai] lea e tumau e oo i le ola e faavavau” (Ioane 6:27)e mafai ona faasino i upumoni e faavavau o le talalelei a le Faaola.

Valaaulia se tamaitiiti aogae faitau leotele le Ioane 6:28–31. Fai i le vasega e mulimuli ai, ma vaavaai mo mea na mananao ai tagata ia Iesu e faamaonia atili ai ia i latou o Ia o le Mesia.

O le a le mea na mananao tagata e fai e Iesu mo i latou? (Faamatala atu, o le manai o le “areto mai le lagi” [Ioane 6:31] lea na saunia e le Atua mo le fanauga a Isaraelu a o latou feofeoai i le vao; tagai Esoto 16:14–15, 35.)

Valaaulia ni nai tamaiti aoga e feauauai i le faitauina leotele mai o le Ioane 6:32–35. Fai i le vasega e mulimuli ai, ma vaavaai mo mea na aoao atu e le Faaola i tagata e tali atu ai i la latou talosaga mo se faailoga.

O le a le mea na aoao atu e le Faaola e uiga ia te Ia lava ina ua Ia faasino i le manai, po o le areto mai le lagi?

Atonu e te manao e fautuaina le vasega e maka le fasifuaitau “O a’u nei le areto o le ola” i le Ioane 6:35.

O a ni auala tatou te faatatau ai le Faaola ma Ana aoaoga i le areto?
O le a sou manatu o le a le uiga faapea o i latou o e o mai ia Iesu Keriso “e le laina lava”? (Ioane 6:35). (O se tali e mafai ona i ai e faapea o le a Ia faafaileleina i latou faaleagaga.)
O a upumoni e mafai ona tatou aoao mai i aoaoga a le Faaola i le fuaiupu e 35? (E ui e mafai ona faaaoga e tamaiti aoga ni upu eseese, e tatau ona latou faailoa mai se mataupu faavae e talitutusa o le mea lenei: Afai tatou te o mai ia Iesu Keriso, o le a Ia fafagaina i tatou faaleagaga. Tusi lenei mataupu faavae i luga o le laupapa.)

Tusi le faamatalaga le uma lenei i luga o le laupapa:

Tatou te o mai ia Iesu Keriso e ala i le …

O le a Ia fafagaina i tatou e ala i le …

Vaevae tamaiti aoga i ni paga. Fai i ai e galulue faatasi e fai se lisi i a latou api po o api talaaga mo le suesueina o tusitusiga paia o ni mea e mafai ona tatou faia e o mai ai ia Iesu Keriso ma auala o le a Ia fafagaina ai i tatou faaleagaga. Valaaulia ni nai tagata aoga e faasoa mai a latou tali i le vasega.

Fuafua e valaaulia ni nai tagata e faasoa mai pe na faapefea ona latou maua se faafailelega faaleagaga a o latou o mai i le Faaola.

Ina ia saunia le vasega e faailoa mai se isi mataupu faavae na aoao mai e le Faaola, valaaulia ni nai tagata i luma o le vasega ma tuu ia tofu i latou ma se fasipepa. Valaaulia i latou e sogisogi i le falaoa ma mafaufau pe mata o le a sona tofo.

E mafai faapefea e lenei falaoa ona fafagaina oe pe a fai e na o lou sogisogi i ai, mafaufau pe o le a sona tofo, ma e fealuai ma ave i le aso atoa?
O le a le mea e tatau ona e faia ia e manuia ai i le mea e tatau ona avatu e le falaoa ia te oe?

Valaaulia ni nai tamaiti aoga e feauauai i le faitauina leotele mai le Ioane 6:49–54. Fai i le vasega e mulimuli ai, ma vaavaai pe mafai faapefea ona fesootai le mea na iloa e tagata o le latou vasega i le falaoa ma mea na aoao mai e le Faaola i nei fuaiupu.

E ese faapefea le Areto o le Ola mai le falaoa masani? (E le pei o le falaoa e mafai ona faamalie ai i tatou mo na o sina taimi puupuu, na ofoina mai e Iesu Keriso mo i tatou o faamanuiaga o le a tumau e faavavau.
E tusa ai ma fuaiupu e 53-54, o le a le mea na aoao atu e le Faaola i tagata e fai?

Faamatala atu, na faaaoga faafaatusa e le Faaola ia upuaai ma le inu. Ina ia fesoasoani ia malamalama le vasega i aoaoga a le Faaola, valaaulia tagata na volenitia e ’ai le falaoa. Ona fai lea i ai e toe foi i o latou nofoaga.

O le a le mea e tupu i le falaoa ma ona niuterene pe a ’ai? (O vaitamini ma niuterene e avea ma se vaega o le tino, e maua ai e le tino le malosi ma le soifua lelei.)
O le a sou manatu i le uiga o le ’ai ma inu i le tino ma le toto o Iesu Keriso? (E mafai ona faauiga ia teuloto Ana aoaoga ma le Togiola. E mafai foi ona faatusa i le aai ma feinu i le faamanatuga, lea o le a faatuina e le Faaola mulimuli ane.)
E tusa ai ma le Ioane 6:54, o a faamanuiaga e mafai ona tatou maua pe a tatou teulotoina, pe faaaoga, ia aoaoga ma le Togiola a Iesu Keriso? (A uma ona tali mai tamaiti aoga, tusi le mataupu faavae lenei i luga o le laupapa: Afai tatou te teulotoina, pe faaaogaina, ia aoaoga ma le Togiola a Iesu Keriso, o le mafai ona tatou maua le ola e faavavau.)

Valaaulia se tamaitiiti aoga e faitau leotele le saunoaga lenei a Elder Bruce R. McConkie o le Korama a Aposetolo e Toasefululua: Fai i le vasega e faalogologo mo auala na ia saunoa e mafai ona tatou teulotoina ai aoaoga ma le Togiola a Iesu Keriso.

“Ina ia ai i le tino ma inu i le toto o le Alo o le Atua o le, muamua, ia taliaina o ia i le uiga e aupito sili ona moni ma atoatoa, e aunoa ma se faatalitali, o le alo patino i le tino o le Tama e Faavavau; ma le lona lua, o le tausia o poloaiga a le Alo e ala i le taliaina o lana talalelei, auai i le Ekalesia, ma le tumau i le usiusitai ma le amiotonu e oo i le iuga. O i latou e aai i lona tino ma feinu i lona toto o le a maua le ola e faavavau, o lona uiga o le faaeaga i le lagi aupito maualuga o le lalolagi selesitila” (Doctrinal New Testament Commentary, 3 vols. [1965–73], 1:358).

O le a le fautuaga a Elder McConkie tatou te teulotoina ai aoaoga ma le Togiola a Iesu Keriso?

Faamatala atu, o le ola e faavavau o le ola e faavavau faatasi ma avea e faapei o lo tatou Tama Faalelagi ma Lona Alo o Iesu Keriso. Valaaulia se tamaitiiti aoga e faitau leotele le Ioane 6:56–57. Fai i le vasega e mulimuli ai, ma vaavaai pe mafai faapefea ona tatou avea e faapei o i La’ua pe a tatou teulotoina aoaoga ma le Togiola a Iesu Keriso. Fai atu i tamaiti aoga e lipoti mai mea ua latou mauaina.

Faamatala atu, o le a le nofo le Faaola i le tino i totonu o i tatou, ae o Lana faatosinaga paia o le a tumau ma i tatou e fesoasoani ai ia tatou avea atili e faapei o Ia ma le Tama Faalelagi.

Otooto le Ioane 6:59–66 i le faamatala atu faapea, o nisi o soo o Iesu sa teenaina Ana aoaoga ma fulitua ai mai le mulimuli atu ia te Ia.

Faasoa atu lau molimau o upumoni na faailoa mai e le vasega. Valaaulia tamaiti aoga e tusi i a latou api po o api talaaga mo le suesueina o tusitusiga paia se sini pe faapefea ona latou teulotoina atili le Togiola a le Faaola po o se tasi o Ana aoaoga.

Iunite e Sosoo ai (Ioane 7–10)

Ta’u i tamaiti aoga o le isi iunite o le a latou aoao ai i le faiga e Iesu Keriso o se fafine sa maua o mulilua ma Lana fetalaiga na taape ai tagata na mananao e fasiotia le fafine. E mafai ona e fai i tamaiti aoga e moeiini o latou mata ma mafaufau pe faape’i pe a tauaso. Ona fesili lea i ai pe o le a se lagona pe a faamaloloina mai le tauaso ma ua pupula mo le uluai taimi. O le a faitau tamaiti aoga e uiga i se tagata tauaso sa le gata ina maua lana vaaiga faaletino ae na maua foi le vaaiga faaleagaga ma maua se molimau o Iesu o le Keriso, o le Alo o le Atua. O le a latou aoaoina ai foi ua faaigoa e le Faaola o Ia lava o le Leoleo Mamoe Lelei ma le mana na Ia fetalai na Ia maua mai le Tama.