Mataio 23:1–26:30 (Iunite 6)

Anomea o Sauniuniga mo le Faiaoga o Suesuega i le Fale

Aotelega o Lesona o Suesuega i le Fale i Aso Taitasi

O lenei otootoga o aoaoga faavae ma mataupu faavae na aoaoina e tamaiti aoga a o latou suesueina le Mataio 23:1–26:30 (iunite 6)e le o faamoemoe e aoao atu o se vaega o lau lesona. O le lesona e te aoaoina atu e taulai atu na o ni nai aoaoga faavae ma matupu faavae nei. Mulimuli i musumusuga a le Agaga Paia ao e mafaufau i manaoga o au tamaiti aoga.

Aso 1 (Mataio 23)

Sa suesue e le vasega le aoaia e Iesu o taitai Iutaia ma sa aoaoina ai e mafai ona tatou filifili e usitai i tulafono a le Atua tusa lava pe tatou te vaai atu i isi o amio pepelo. Sa latou aoaoina afai tatou te taumafai e faaeaina i tatou lava i luga atu o isi, o le a faamaualaloina i tatou, ma afai tatou te lotomaualalo ma auauna atu i isi, o le a faaeaina i tatou e le Alii. Sa latou aoao foi a o tatou taumafai ia mama faaleagaga i totonu, o le a atagia mai i a tatou filifiliga i fafo atu, ma afai tatou te naunau e faapotopotoina e le Faaola, ona tatou maua lea o Lana tausiga ma le puipuiga.

Aso 2 (Mataio 24)

Mai le aoaoga a le Faaola e uiga i Lona Afio Mai Faalua sa aoao ai e le vasega mea nei: Afai e tumau lo tatou mausali ma e le faatoilaloina, o le a faasaoina i tatou. A o lei oo mai le Afio Mai Faalua o Keriso, o le a faapotopotoina le au filifilia a le Alii ma o le a folafola atu le talalelei i le lalolagi uma. Afai tatou te teuina le upu a le Alii, o le a le faaseseina i tatou. E na o le Tama Faalelagi e silafia le taimi o le a tupu ai le Afio Mai Faalua o le Faaola. Afai tatou te vaavaai atu mo faailoga ma usiusitai i poloaiga a le Alii, o le a tatou saunia mo le Afio Mai Faalua o le Faaola.

Aso 3 (Mataio 25)

A o suesue e le vasega le faataoto i taupou e toasefulu, sa latou aoaoina e le mafai ona tatou nonoina mai se sauniuniga faaleagaga mai isi ma e tatou te saunia mo le Afio Mai Faalua e ala i le faateleina o a tatou molimau ma le liua e ala i le amiotonu i aso taitasi. Sa latou aoaoina foi faapea ina ia saunia mo le afio mai o le Alii ma agavaa e tumau i Lona afioaga, e tatau ona tatou iloa o Ia. Sa suesue puupuu e le vasega le faataoto i taleni ma sa aoaoina ai o le fefe e mafai ona taofia ai i tatou mai le faaaogaina o meaalofa ma tomai na tuuina mai e le Alii ia i tatou, ma afai tatou te le atinaeina ma faaaoga a tatou meaalofa faalegaga mo le lelei, o le a tatou le toe maua.

Aso 4 (Mataio 26:1–30)

A o suesue e le vasega ia toe aso o le galuega a Iesu Keriso i le olaga nei, sa latou aoaoina ai ina ua faalogo le au soo o Iesu Keriso i le upu a le Alii, sa latou suesueina o latou lava olaga ia iloa ai pe faapefea ona faaaoga ia i latou. Sa latou aoaoina o faatusa o le faamanatuga e faatusa i le tino ma le toto o Iesu Keriso, lea na taulagaina mo i tatou ma o Iesu Keriso na faatuina le faamanatuga mo i tatou e manatua ai o Ia ma Lana Togiola mo a tatou agasala. Sa latou aoaoina foi a tatou salamo ma aai ma feinu i le faamanatuga ma le faamoemoega moni, e mafai ona tatou maua se faamagaloga o a tatou agasala.

Folasaga

A o aoao atu e Iesu Keriso Ona soo e uiga i Lona Afio Mai Faalua i luga o le Mauga o Olive, sa Ia faamatalaina le faataoto i taleni.

Fautuaga mo le Aoaoina Atu

Mataio 25:14–30

Ua aoao atu e Iesu Keriso Ona soo le faataoto i taleni

A o lei amataina le vasega, tuu ni tupe siliva se lima i le tasi itu o le potu ma ni tupe siliva se lua i le isi itu. Tuu nisi tupe siliva se valu i lau taga.

Ina ia amata le lesona, valaaulia ni tagata se toatolu e o mai i luma o le vasega e fesoasoani ia te oe i le faatinoina o se faataoto na aoao atu e Iesu Keriso i Ona soo, o se vaega o Lana aoaoga e faatatau i le Afio Mai Faalua.

Valaaulia se tamaitiiti aoga e faitau leotele le Mataio 25:14–18. Fai i le vasega e mulimuli ai, ma vaavaai mo mea sa tofu maua e auauna taitasi ma pe o le a le mea na ia faia i ai.

O le a le mea na tuu atu e le matai i ana auauna taitasi? (Faamatala o taleni i le faataoto lenei o loo faasino i se aofaiga o tupe. Aveese mai tupe siliva mai lau taga, ma tuu atu le lima i se tagata e toatasi, lua i le isi tagata, ma le tasi i le lona tolu.)
O le a le mea na fai e auauna taitasi i le tupe na tuu atu i ai?

Valaaulia le tagata o i ai tupe e lima e toe aumai isi tupe siliva mai le tasi itu o le potu. Fai i le tagata lona lua e toe aumai ia tupe faaopoopo mai le isi itu o le potu. Valaaulia le tagata o i ai le tupe e tasi e nana pe faafoliga o loo tanuina le tupe.

Fai i tagata e toe faafoi ane ia te oe ma o e nonofo i lalo. Tusi elemene o le faataoto i luga o le laupapa (e aunoa ma faauigaga o loo faapuipui):

O le matai o auauna (O Le Alii o Iesu Keriso)

O auauna (O soo o le Alii)

O taleni (O meaalofa ma tomai na tuu atu e le Alii i Ona soo)

O a mea e ono faatusa i ai elemene o le faataoto? (Afai e manaomia, fesoasoani i tagata aoga e faailoa mai po o ai ma pe o a mea e faatusa i ai elemene. Tusi ia faauigaga i autafa o elemene i luga o le laupapa. Faamatala o nisi o meaalofa ma tomai o ia i tatou i le olaga nei, sa mauaina ma atinaeina i lo tatou muai olaga. E mafai ona tatou filifili e faaauau ona atinae na meaalofa ma isi i le olaga nei.)
E tusa ai ma leMataio 25:15, aisea na tuu atu ai e le matai i auauna taitasi se aofaiga eseese o tupe? (A uma ona tali atu tagata, ta’u i ai o le fasifuaitau “ua faatatau i le mea ua mafai e le tagata” e ta’u mai ai e tuu mai e le Atua ia i tatou taitoatasi ia meaalofa ma tomai tatou te manaomia e tusa ai ma o tatou tulaga. Ua tofu le tagata ma se meaalofa faaleagaga mai le Atua [tagai MF&F 46:11]. Faamatala atu o le aofaiga o taleni na tuuina mai ia i tatou e le o se faailoga o lo tatou lava aoga patino.)

Faitau leotele ia fesili nei, ma valaaulia le vasega e mafaufau i ai:

O le fea auauna e te manatu e pei uma lava o oe: o le na tuu atu i ai taleni e lima, lua taleni, po o le taleni e tasi? Aisea?

Valaaulia se tamaitiiti aoga e faitau leotele le Mataio 25:19–21. Fai i le vasega e mulimuli ai, ma vaavaai po o le a le fetalaiga a le matai i le auauna na tuu atu i ai taleni e lima.

O le a le tala a le matai i le auauna muamua?

Faamatala o le “faia ma pule i mea e tele’ ma le “ulufale … atu i le fiafia o lou alii”(Mataio 25:21) o lona uiga o le faataunuuina o lo tatou gafatia paia ma le mauaina o le ola e faavavau faatasi ma le Tama Faalelagi.

O le a se mataupu faavae e mafai ona tatou aoao mai i le aafiaga o le auauna muamua? (O se tasi lea o mataupu faavae e ono faailoa mai e le vasega: Afai tatou te faaaogaina ma le faamaoni ia meaalofa ma tomai na tuu mai e le Alii ia i tatou, ona mafai lea ona tatou faataunuuina lo tatou gafatia paia ma maua le ola e faavavau.
O a ni nai faataitaiga pe mafai faapefea ona tatou faaaogaina ma le faamaoni ia meaalofa ma tomai ua tuuina mai e le Alii ia i tatou?

Ta’u atu o le auauna lona lua sa mafai ona faitio ina ua ia vaai atu i le auauna muamua e lima ana taleni na maua, ae o ia e na o le lua. Ae, sa ia faaaogaina ma le faamaoni mea sa tuuina atu ia te ia.

Valaaulia se tamaitiiti aoga e faitau leotele le Mataio 25:22–23. Fai i le vasega e mulimuli ai, ma vaavaai po o le a le tala a le matai i le auauna na maua taleni e lua.

O le a le tala a le matai i le auauna na maua taleni e lua?
E ui ina sa tuu atu e le matai i auauna muamua e toalua ni aofaiga eseese o tupe, ae aisea e te manatu ai na maua e i la’ua uma le tali lava e tasi mai lo la matai?
O le a le mataupu faavae e mafai ona tatou aoao mai le aafiaga o le tagata na tuu atu i ai taleni e lua? (E ono faaaoga e tagata ni upu eseese ae e tatau ona faailoa mai le mataupu faavae lenei: O le a faamanuiaina i tatou e le Alii pe afai tatou te faaaogaina ma le faamaoni ia meaalofa ma tomai na Ia tuuina mai ia i tatou, tusa lava pe fia ae pe o a foi. I le faaaogaina o upu a tagata aoga, tusi lenei mataupu faavae i luga o le laupapa.)

Fai i le vasega e mafaufau loloto pe i ai se taimi na latou lagonaina ai e sili atu pe tele atu foi meaalofa ma tomai o se tasi nai lo i latou. Faasino i le mataupu faavae na e tusia i luga o le laupapa.

E mafai faapefea e le manatuaina o lenei mataupu faavae ona fesoasoani ia i tatou pe a tatou lagonaina e tele atu mea na maua e se tasi pe sili atu foi ana meaalofa nai lo i tatou?

Valaaulia se tagata aoga e faitau leotele le saunoaga lenei a Elder Quentin L. Cook o le Korama a Aposetolo e Toasefululua:

“O le tuputupu ae i a tatou lava taleni o le fuataga sili lea o le alualu i luma o le tagata lava ia. … O le faatusatusa o faamanuiaga e toetoe lava ina mautinoa e aveesea ai lo tatou olioli. E le mafai ona tatou lotofaafetai ma lotoleaga i le taimi e tasi. Afai tatou te mananao moni ia maua le Agaga o le Alii ma maua le olioli ma le fiafia, e tatau ona tatou olioli i o tatou faamanuiaga ma ia lotofaafetai (“Rejoice!” Liahona, Nov. 1996, 2930).

E mafai faapefea ona tatou iloa ia meaalofa ma tomai na tuuina mai e le Alii ia i tatou?

Tuu atu i tagata taitasi se fasipepa ma fai i ai e tusi o latou igoa i le pito i luga. Valaaulia i latou e pasi a latou pepa i le tagata o loo nofo i ona autafa. Fai i le vasega e tusi se meaalofa poo se tomai ua latou vaai i ai i le tagata lea e ona ia le igoa o loo i luga o le pepa. Faatonnu i latou e faaauau ona fepasiai ia pepa i le potu ma tusi i lalo meaalofa ma tomai ua latou matauina.

A uma ni nai minute, ona fai lea i le vasega e toe faafoi ane ia pepa i tagata e ona ina. Tuu atu se taimi i le vasega e faitau ai e uiga i meaalofa ma tomai na vaai ai isi ia i latou. Ona fai lea i ai e tusi i luga o a latou pepa se tali i le fesili lea:

O le a se ala se tasi e mafai ona e faaaoga ai se tasi o au meaalofa e faalautele ai le galuega a le Alii?

Ta’u i ai o le faataoto i taleni e aofia ai lapataiga e uiga i meaalofa ma tomai na tuuina mai ia i tatou. Valaaulia ni tamaiti aoga e feauauai i le faitauina leotele o le Mataio 25:24–30. Fai i le vasega e mulimuli ai, ma vaavaai pe na faapefea ona tali atu le matai i le auauna na nana le taleni. A uma ona faitau le fuaiupu 27 faamatala atu o le taui o lona uiga o le tului (tupe e maua mai le faagaoioia po o le nono atu o le tupe).

Aisea na nana ai e le auauna mulimuli lana taleni? Na faapefea ona tali atu le matai i le filifiliga a lenei auauna?
E ui e lei leiloa i le auauna se tupe a le matai, ae o le a le mea na sese ai taga a le auauna?
O le a sou manatu na semanu e faapefea ona tali atu le matai i le auauna pe ana toe foi mai ma ni taleni se lua?

Valaaulia le vasega e faasoa mai a latou molimau i mataupu faavae sa latou talanoaina. Fautuaina i latou e faaaoga a latou meaalofa ma tomai e faalauaitele ai le galuega a le Alii.

Iunite e Sosoo Ai (Mataio 26:31–Mareko 3)

Faamatala o le vaiaso a sau o le a suesue auiliili ai e le vasega le Togiola a Iesu Keriso, lea e amata i Lona puapuaga i le Faatoaga i Ketesemane ma faaauau atu ai i faamasinoga e le tusa ai ma tulafono, o le tauemuina, o le sasaina, ma Lona maliu e ala i le faasatauroga, ma iu ai i Lona Toetu mamalu.