Folasaga i le Tusi a Paulo ia Eperu
Aisea e suesueina ai lenei tusi?
O le tusi o Eperu o loo molimau mai i le maoae o Iesu Keriso. E sili atu o ia i lo agelu ma e i ai se suafa e sili atu ona matagofie ma se valaauga e maualuga atu. O agelu o auauna a le Atua, ae o Iesu Keriso o Lona Alo lea. O loo aoao mai foi i lenei tusi, o Iesu Keriso e sili atu nai lo Mose ma o Lana galuega na aumaia ai se feagaiga fou maoae i le fegaiga tuai i lalo o le tulafono a Mose. I le avea ai ma Faitaulaga Sili Maoae o le Perisitua Mekisateko, o Lona perisitua e maoae atu nai lo o faitaulaga sili i lalo o le tulafono a Mose.
E ui ina faatumulia tusitusiga paia i faatatauga i le taulaga togiola a Iesu Keriso, Lona Toetu, ma Lona Afio Ae i le lagi, ua faamamafa mai e Eperu le galuega faifaipea a le Togiola i olaga o tagata uma o e liliu atu ia te Ia i le usiusitai ma le faatuatua. O le suesueina o le tusi o Eperu e mafai ona fesoasoani i tamaiti aoga ia malamalama lelei i le aoaoga faavae o le Togiola ma musuia ai i latou ia ola ma le faatuatua i le Tama Faalelagi ma Iesu Keriso.
O ai na tusiaina lenei tusi?
O le toatele o le Au Paia o Aso e Gata Ai ua talia o Paulo le tusitala o le Eperu (tagai Bible Dictionary, “Pauline Epistles”). Ae peitai, e i ai nisi ua fesiligia pe na tusia e Paulo lenei tusi ona o lona tusiga ma le gagana ua ese mai isi tusi a Paulo. Ua taliaina faalauaitele e faapea, e tusa lava pe sa le’i tusia e Paulo, ae o manatu [o Paulo] ona o aoaoga i le Eperu e tutusa ma manatu o loo maua i isi tusi a Paulo. Sa manatu le Perofeta o Iosefa Samita o faamatalaga mai le Eperu na afua mai i le Perofeta o Paulo (tagai Aoaoga a Peresitene o le Ekalesia: Iosefa Samita [2007], 105). Mo faamoemoega o lenei tusi lesona, ua tatou talia ai o Paulo o le tusitala.
O anafea ma o fea foi na tusia ai lenei tusi?
Tatou te le iloa po o fea na tusia ai e Paulo le tusi ia Eperu. Tatou te le iloa tonu foi po o anafea na tusia ai. Ae peitai, e toatele lava ua manatu sa tusia i le vaitaimi o le T.A. 60–62, e latalata i le taimi o tusi a Paulo i Filipi, i Kolose, i Efeso, ma Filemoni (tagai Taiala i Tusitusiga Paia, “Tusi a Paulo,” scriptures.lds.org).
O ai na faatatau i ai le tusiaina o lenei tusi, ma pe aisea foi?
Sa tusia e Paulo le Tusi ia Eperu e uunaia ai tagata Iutaia o le Ekalesia ia faatumau lo latou faatuatua ia Iesu Keriso ae aua le toe foi atu i o latou ala sa i ai muamua (tagai Eperu 10:32–38).
I lalo o uunaiga o puapuaga eseese, o le toatele o nei Kerisiano Iutaia sa iu ina o ese mai le Ekalesia ma toe foi atu i le saogalemu o le tapuai faaIutaia i le sunako (tagai Eperu 10:25, 38–39). Sa manao Paulo e faaali atu i nei Kerisiano Iutaia o le tulafono a Mose lava ia sa faasino atu ia Iesu Keriso ma Lana Togiola o le puna moni o le faaolataga.
O a nisi o vaaiga iloga o lenei tusi?
Nai lo na o le avea o se tusi, o le Eperu e tele ina pei o se lauga faaumiumi lea sa faatatau soo atu i tusitusiga paia ma faiga a Isaraelu. O le lauga aupito umi lea i tusitusiga paia e uiga i le pogai ma le auala e maoae ai Iesu Keriso i mea uma.
Ua aoao mai Eperu o Iesu Keriso e sili atu nai lo o le tulafono aua o Ia na tuuina mai le tulafono. Ua aoao mai foi Eperu e faapea, na maua e perofeta le mana e ala i le faatuatua ia te Ia, ma o Ia o le Faitaulaga Sili maoae lea na faapea ona faataunuuina ai taulaga i taimi o le Feagaiga Tuai, ma o Ia e sili atu nai lo o agelu, ma e ala mai i Lana taulaga togiola, e mafai ai ona tatou maua se faamagaloga o agasala.
O le tusi a Eperu o se tasi o vaega itiiti i le Tusi Paia e mafai ona tatou faitau ai i le perofeta o Mekisateko (tagai Eperu 7:1–4) ma le perisitua ua faaigoaina ia te ia (tagai Eperu 5:5–6, 10; 6:20; 7:11–17). Ua aoao mai Eperu o le Perisitua Mekisateko e sili atu nai lo o le Perisitua Arona, ma o loo faaalia ai o le faaolataga e le maua i le tulafono a Mose po o i sauniga na faataunuuina e faitaulaga sa Levi ae o Iesu Keriso ma sauniga o le Perisitua Mekisateko (tagai Eperu 7:5–28). O le Eperu 11:1–12:4 o loo tuuina mai ai se talanoaga matagofie i le faatuatua ma aoao mai i auala e mafai ai e tagata taitasi ona talitonu ia Iesu Keriso. (Tagai Bible Dictionary, “Pauline Epistles: Epistle to the Hebrews.”)
Otootoga
Eperu 1–6 O Iesu Keriso o loo i le faaalia moni o le Tama. E sili atu o ia nai lo o agelu ma perofeta uma o e na muamua atu ia te Ia, e aofia ai ma Mose. O tagata Isaraelu anamua o e na aumai i fafo o Aikupito sa le’i mafai ona ulu atu i le malologa o le Alii ona sa faamaaa o latou loto faasaga ia Iesu Keriso ma Lana auauna o Mose. I le avea ai ma Faitaulaga Sili Maoae, o Iesu Keriso e maoae atu i faitaulaga sili uma a sa Mose. Sa faaatoatoaina Keriso e ala i Lona puapuagatia. E mafai ona tatou ulu atu i le malologa o le Alii ma “faaoo atu i le atoatoaga” e ala i aoaoga faavae ma sauniga o le talalelei (Eperu 6:1).
Eperu 7–13 O le Perisitua Mekisateko e pulea le talalelei ma e sili atu nai lo o le Perisitua Arona. O le tapeneko ma sauniga sa Mose sa muai faaataataina ai le galuega a Keriso. Na faataunuuina e Iesu Keriso le tulafono a Mose e ala i le faamaligiina o Lona toto, ina ia mafai ona tatou maua le faaolataga ma se faamagaloga o a tatou agasala. O le faatuatua, na faia ai e perofeta ma isi tamalii ma tamaitai galuega amiotonu ma vavega.