Lesona 136: Eperu 5–6

Lesona 136

Eperu 5–6

Folasaga

Na aoao mai Paulo, o i latou o e maua le perisitua e ao ona valaauina e le Atua ma o Iesu Keriso sa “taua e le Atua [e avea ma] faitaulaga sili e uiga faatasi ma Mekisateko” (Eperu 5:10). Sa uunaia e Paulo tagata o le Ekalesia ina ia filiga, faatuatua, onosai, ma faamoemoe i le mauaina o folafolaga a le Atua.

Fautuaga mo le Aoaoina Atu

Eperu 5

Ua aoao mai Paulo, o i latou o e maua le perisitua, e ao ona valaauina e le Atua.

Ao lei amataina le vasega, tusi faalagiga taitasi nei i pepa eseese: Fomai ma le Tagata e Faamalosia le Tulafono. Valaaulia ni tamaiti aoga se toalua e o mai i luma o le vasega, ma tuu atu i ia tamaiti aoga taitoatasi se tasi o pepa. Ona fai atu lea o fesili nei:

E ui o loo uu e nei tamaiti aoga ia pepa ua faaalia ai faalagiga sa’o, o a ni ou popolega e i ai pe afai e taumafai [ta’u le igoa o le tamaitiiti aoga o loo uuina le pepa “Fomai”] e fai lou taotoga ina ua e aafia i se faalavelave faafuasei?
O le a sau tali atu pe afai e taumafai [ta’u le igoa o le tamaitiiti aoga o loo uuina le pepa “Tagata e Faamalosia le Tulafono”] e tuuina atu ia te oe se pepa o lau sala?
Aisea o le a e musu ai e faataga nei tamaiti aoga e faataunuu galuega e faatatau i faalagiga na latou tauvaeina i o latou luga? (O nei tamaiti aoga e le o i ai le pule ma le gafatia e faataunuu ai na galuega.)

Faamalamalama atu, e pei lava ona faavaeina e le lalolagi ia tulaga manaomia alagatatau ma auala e maua ai le pule e faataunuu ai ia tiutetauave faapitoa, ua faatuina foi e le Atua ia tualga manaomia alagatatau (e pei o le faamaoni ma le agavaa) ma auala e maua ai le pule e faataunuu ai tiutetauave faapitoa i Lana Ekalesia. Valaaulia tamaiti aoga, a’o latou suesue i le Eperu 5 e vaavaai mo le mamanu ua faatuina e le Atua mo le mauaina o lenei pule.

Faamanatu atu i tamaiti aoga, e pei ona tusia i le Eperu 4:14–16, na faamatalaina e Paulo le Faaola o “se faitaulaga silisili” (fuaiupu 14). Valaaulia se tamaitiiti aoga e faitau leotele le Eperu 5:1–3. Fai atu i le vasega e mulimuli i le faitauga, ma vaavaai mo le mea na aoao mai e Paulo e uiga i le matafaioi o le faitaulaga sili ia Isaraelu.

O le a le matafaioi o le faitaulaga sili ia Isaraelu?

Faamalamalama atu o le tofi sa i ai o le faitaulaga sili o loo taua i nei fuaiupu, sa i lalo o le tulafono a Mose, o le taitai pulefaamalumalu i le Perisitua Arona. O Arona, o le uso o Mose, “o le uluai faitaulaga sili lea o le faatulagaga faaArona.” O le tofi sa faaee atu i tagata tofi; i le faiga i le vaitaimi o Arona, le faitaulaga sili sa filifilia mai ulumatua e tupuga mai ia Arona ma ona atalii. O le faitaulaga sili e masani lava ona tautua mo aso uma o totoe o lona ola, ae o lenei tofi sa iu ina faoa e tagata amioleaga. “Sa faapea ona tofia ma aveese ma le le tatau ia faitaulaga sili e Herota faapena foi ma tagata Roma. Sa faatumuina le tofi e ni alii eseese e 28 i le va o le 37 T.L.M. ma le T.A. 68” (Bible Dictionary, “High priest”).

Valaaulia se tamaitiiti aoga e faitau leotele le Eperu 5:4 . Fai atu i le vasega e mulimuli i le faitauga, ma vaavaai pe na faapefea ona filifili le faitaulaga sili.

Na faapefea ona filifilia le faitaulaga sili?

Ina ia fesoasoani i tamaiti aoga ia malamalama i le auala na “filifilia [ai] e le Atua” ia Arona (fuaiupu 4), valaaulia se tamaitiiti aoga e faitau leotele le Esoto 28:1 . A’o le’i faitau e le tamaitiiti aoga lenei fuaiupu, faamatala atu, o lenei feutagaiga na faia i le va o le Atua ma Mose i le Mauga o Sinai.

Na faapefea ona valaauina Arona e le Atua ina ia faauuina i le perisitua?
Aisea e taua ai le faapea, na tuuina mai e le Alii lenei faatonuga ia Mose ae le o se isi tagata? (O Mose sa avea ma perofeta ma sa faapea ona faatagaina ai e maua sea faaaliga ma pulea le faaaogaina o le perisitua i luga o le fogaeleele.)
O le a le mea e ao ona tupu ina ia mafai ai ona faauuina se tasi i le perisitua? (E mafai ona faaaoga e tamaiti aoga ni faaupuga eseese, ae ia mautinoa latou te faailoa mai le upumoni lenei: O i latou e faauuina i le perisitua e ao ona valaauina e le Atua i faaaliga e ala i Ana auauna faatagataina. Atonu e te manao e faamatala atu, i le Ekalesia i aso nei, e tatau i taitai perisitua ua faatagaina ona faatalanoaina sui faatutu taitasi mo le faauuga [i le perisitua] ma saili le taitaiga a le Agaga Paia e iloilo ai le saunia ma le agavaa o le sui faatu ina ia faauuina i le perisitua. Tagai foi Ioane 15:16.)
E faapefea ona faatatau lenei upumoni i le faagasologa o le valaauina o tagata e auauna i tofiga i le Ekalesia?

Valaaulia se tamaitiiti aoga e faitau leotele le mataupu faavae o le faatuatua lona lima. Fai atu i le vasega e mulimuli i le faitauga, ma vaavaai pe faapefea ona atagia le upumoni na latou faailoaina mai i le Eperu 5:4 i le mataupu faavae o le faatuatua lona lima. Faamalamalama atu o le valoaga e faatatau i le faaaliga.

E tusa ai ma lenei mataupu faavae o le faatuatua, o le a le isi mea e ao ona tupu iina ia mafai ona faatagaina se tagata “e talaʼi atu ai le Talalelei ma faia sauniga o i ai”?

Ata

O Mose o loo Tuuina Atu ia Arona le Perisitua

Faaali atu le ata O Mose o loo Tuuina Atu ia Arona le Perisitua (Tusi Ata o le Talalelei [2009], nu. 15; tagai foi LDS.org). Faailoa atu, o loo tusia i le Feagaiga Tuai ma le Feagaiga Fou e faapea, na maua e perofeta, i latou o loo umia le perisitua, ma faiaoga o le talalelei o latou valaauga e ala i le faaee atu o lima o se tagata ua faatagaina o loo umia le perisitua (tagai Numera 27:18–23; Galuega 6:6; 13:2–3; 1 Timoteo 4:14).

O faapefea ona atagia i le faagasologa o le valaauina o tagata i tofiga i le Ekalesia i aso nei, le mamanu sa faavaeina i tusitusiga paia?
Aisea e taua ai le iloa, o le pule o le perisitua e na’o le auala lava lenei e mafai ai ona maua?

Valaaulia se tamaitiiti aoga e faitau leotele le Eperu 5:5–6 . Fai atu i le vasega e mulimuli i le faitauga, ma vaavaai po o ai na tuuina atu i le Faaola Lana pule. Faailoa atu o le fuaiupu 5 o loo sii maia le Salamo 2:7 ae o le fuaiupu 6 o loo sii maia le Salamo 110:4.

O ai na tuuina atu i le Faaola Lana pule? (Tama Faalelagi.)
O le a le perisitua o loo umia e Iesu Keriso? (O le Perisitua Mekisateko. Faailoa atu o lenei perisitua sa uluai faaigoaina i le Faaola [tagai MF&F 107:2–4].)

Valaaulia se tamaitiiti aoga e faitau leotele le Eperu 5:7–10 . Fai atu i le vasega e mulimuli i le faitauga, ma vaavaai mo le tulaga na avea ai Iesu Keriso. Faamalamalama atu, o le Eperu 5:7–8 e faatatau ia Mekisateko, o se perofeta ma se tupu sa ola i le vaitaimi o Aperaamo. Ae peitai, ona o Mekisateko sa o se mamanu o Keriso, ua faapea foi ona faatatau ai nei fuaiupu i le Faaola (tagai Bruce R. McConkie, Doctrinal New Testament Commentary, 3 vols. [1965–73], 3:157).

E tusa ai ma le Eperu 5:9, o le a le tulaga na avea ai le Faaola?
E faapefea ona avea Iesu Keriso ma “le tupuga o le ola e faavavau” ia i latou uma o e usitai ia te Ia?

Aotele le Eperu 5:11–14 i le faamatala atu, na faaalia e Paulo se manao ia aoao atili atu e uiga i lenei mataupu, ae na fai mai, sa le’i lava le iloa ma le malamalama faaleagaga o tagata e malamalama ai i aoaoga e sili atu ona faigata.

Eperu 6

Ua uunaia le Au Paia ia filiga, faatuatua, onosai, ma faamoemoe i le mauaina o folafolaga a le Atua

O a ni faataitaiga o ni faamanuiaga ua folafolaina mai e le Atua i Lana fanau? (O ni tali e mafai ona i ai e aofia ai le filemu, fiafia, faamagalo atu, tali i tatalo, faamanuiaga o loo aofia i faamanuiaga faapeteriaka, toetutu, ma le ola e faavavau. Faailoa atu o nisi o faamanuiaga e faalagolago lea i a tatou filifiliga.)
O a ni faataitaiga o tulaga tatou te ono mafaufau ai pe faamata o le a tatou maua se faamanuiaga faapitoa na folafolaina mai?

Fai atu i tamaiti aoga e tusi i a latou api talaaga mo le suesueina o tusitusiga paia po o se fasipepa se faamanuiaga folafolaina o loo latou faatalitali i ai e maua. Valaaulia i latou e vaavaai mo upumoni i le Eperu 6 e mafai ona fesoasoani ia i latou ia maua faamanuiaga ua folafolaina mai e le Atua.

Valaaulia se tamaitiiti aoga e faitau leotele le Eperu 6:1–3. Fai atu i le vasega ia mulimuli i le faitauga, ma vaavaai mo mea na aoao atu e Paulo i le Au Paia e galulue agai i ai. Faailoa atu o le Faaliliuga a Iosefa Samita o le, Eperu 6:1 (i le Eperu 6:1, vaefaamatalaga a) o loo faapea mai, “O le mea lea e le tuua ai mataupu faavae o le aoaoga faavae a Keriso” (ua faaopoopo le faatusilima) ma o le Faaliliuga a Iosefa Samita o le, Eperu 6:3 (i le Bible appendix) o loo faapea mai, “Ma o le a tatou o atu ai, agai i le atoatoa pe a finagalo i ai le Atua.”

E tusa ai ma le fuaiupu 1, o le a le mea na aoao atu e Paulo i le Au Paia e galulue agai i ai? (Faamalamalama atu o le atoatoa e faatatau i le tulaga o le “atoatoa, atoa, po o le atoa lelei. …O soo moni o Keriso e mafai ona faaatoatoaina e ala i Lona alofa tunoa ma [Lana] Togiola” [Taiala i Tusitusiga Paia, “Atoatoa,” scriptures.lds.org].)
O a aoaoga faavae o loo ta’ua i nei fuaiupu ua faia ai le faavae e tatau ona tatou atiina ae ai i luga a’o tatou galulue agai atu i le atoatoa?

Aotele le Eperu 6:4–8 i le faamalamalama atu, sa faamatala e Paulo i latou o e o atalii o le malaia, o e ua malamalama lelei i le Atua ona toe o ese lea mai lenei upumoni, tetee e faasaga i le Faaola, ma mumusu e salamo (tagai foi MF&F 29:44–45; 76:31–38). Sa faatusatusa e Paulo nei tagata ma le Au Paia faamaoni sa ia tusi atu i ai i lenei tusi.

Valaaulia tamaiti aoga e faitau filemu le Eperu 6:9–10, ma vaavaai mo le mea na viia ai e Paulo le Au Paia i Eperu. Fai atu i tamaiti aoga e lipoti mai mea latou te mauaina.

Valaaulia ni nai tamaiti aoga e feauaua’i i le faitauina leotele mai o le Eperu 6:11–15. Fai atu i le vasega e mulimuli i le faitauga, ma vaavaai mo mea na manao ai Paulo i le Au Paia.

O le a le mea na manao i ai Paulo i le Au Paia?

Faamalamalama atu o le fuaitau “faaali mai lea lava filiga ina ia mautinoa le faamoemoe” (fuaiupu 11) e faatatau i le filiga seia oo ina tatou maua faamanuiaga folafolaina a le Atua.

Na faapefea ona avea Aperaamo ma se faataitaiga o le filiga, faatuatua, ma le onosai i le sailia o faamanuiaga folafolaina a le Atua?
O le a le mataupu faavae e mafai ona tatou aoao ai e uiga i le mea e ao ona tatou faia e maua ai ia faamanuiaga ua folafolaina mai e le Atua? (E ono faaaoga e tamaiti aoga ni upu eseese, ae e tatau ona faailoa mai le mataupu faavae lenei: E ala i le filiga e oo i le iuga, faatuatua ia Iesu Keriso, ma onosai, e mafai ai ona tatou maua faamanuiaga ua folafolaina mai e le Atua. Tusi le mataupu faavae lenei i luga o le laupapa.)

Vase lalo o upu filiga, faatuatua, ma le onosai o loo i luga o le laupapa. Fai atu i tamaiti aoga e faamatala uiga o nei upu i a latou api o le vasega po o api talaaga mo le suesueina o tusitusiga paia: A ua lava loa le taimi, fai atu i nisi o tamaiti aoga e lipoti mai mea na latou tusia.

O le a se mea e luitauina i le faaalia o nei uiga faaalia?
Aisea e te manatu tatou te manaomia ai nei uiga faaalia ina ia mafai ona “faaoo atu i le faaatoatoaga”? (Eperu 6:1).
O le a se taimi na e maua ai se faamanuiaga folafolaina e ala i le filiga, faatuatua ia Iesu Keriso, ma le onosai?

Valaaulia se tamaitiiti aoga e faitau leotele le Eperu 6:16–20 . Fai atu i le vasega e mulimuli i le faitauga, ma vaavaai mo mea na aoao mai e Paulo e uiga i le faamoemoe ma folafolaga a le Atua. Atonu e manaomia ona e faamalamalama atu o le e le mafai ona liua (fuaiupu 18) o lona uiga e le mafai ona suia.

O le a se upumoni e mafai ona tatou aoao mai i le aoaoga a Paulo e uiga i le faamoemoe? (E ono faaaoga e tamaiti aoga ni upu eseese, ae ia mautinoa latou te faailoa mai le upumoni lenei: O lo tatou faamoemoe i folafolaga a le Atua o se taula faaleagaga mo o tatou agaga. Tusi le upumoni lenei i luga o le laupapa.)

Faamalamalama atu, e pei ona faaaogaina i tusitusiga paia, o le faamoemoe o lona uiga “o le faalagolago i le faamoemoe ma moomooga i faamanuiaga folafolaina o le amiotonu” (Taiala i Tusitusiga Paia, “Faamoemoe scriptures.lds.org).

E faavae i aoaoga a Paulo e uiga i le Atua i fuaiupu 17–18, aisea e mafai ai ona tatou maua le talitonuga i folafolaga a le Atua?
E mafai faapefea e lo tatou faamoemoe i folafolaga a le Atua ona fesoasoani ina ia tatou filiga ma onosai, ma ia i ai le faatuatua, ae maise lava pe a tatou feagai ma luitau?

Ata

ata tusi, taula

Valaaulia se tamaitiiti aoga e tusi se ata o se taula i luga o le laupapa.

O le a le mea a se taula e fai mo se vaa?
O faapefea ona avea lou faamoemoe i folafolaga a le Atua o se taula faaleagaga mo oe?

Valaaulia tamaiti aoga e tusi se sini ina ia atiina a’e atoatoa le filiga, faatuatua, onosai, ma le faamoemoe. Atonu e te uunaia i latou e amata i le tusi o se fuafuaga mo le atiina a’e o se tasi o nei uiga faaalia, ona taulai atu lea i le atiina a’e o se isi [uiga faaalia]. Fautuaina i latou e faaaoga le mea sa latou tusia.

Tala ma Faamatalaga o Talaaga

Eperu 5:4. Mauaina o le perisitua

Sa aoao mai le Perofeta o Iosefa Samita:

“Matou te talitonu e le mafaia e se tagata ona taitaia le faaolataga e ala i le talalelei, i agaga o tagata, i le suafa o Iesu Keriso, vagana ua faatagaina o ia mai le Atua, e ala i faaaliga, pe ala i le faauuina o ia e se tasi o le ua auina mai e le Atua e ala i le faaaliga. … [Fai mai le] Eperu 5:4 , ‘E le fai fua foi e se tasi lenei faiva mamalu, tau o le ua filifilia e le Atua, e faapei o Arona foi.’—Ma ou te fesili atu, na faapefea ona valaauina Arona, e aunoa ma le faaaliga?” (Aoaoga a Peresitene o le Ekalesia: Iosefa Samita [2007], 110; tagai foi MF&F 42:11).

Eperu 5:7–8. Iesu Keriso ma Mekisateko

Na faamalamalama mai e Elder Bruce R. McConkie o le Korama a Aposetolo e Toasefululua e faapea:

“O le [Eperu, mataupu 5,] fuaiupu 7 ma le 8 e faatatau uma ia Mekisateko ma Keriso, aua o Mekisateko sa o se uluai mamanu o Keriso ma o le galuega a perofeta na faataitaia ma muai faaataata mai ai lo tatou Alii i le tulaga lava lea e tasi e pei ona sa faia ai e le galuega a Mose. (Teuteronome 18:15–19; Galuega 3:22–23; [3 Nifae 20:23; Joseph Smith—History 1:40].) O le mea lea, e ui lava o upu o nei fuaiupu, ae maise lava o na e i le fuaiupu lona 7, sa i ai lona faatatauga muamua ia Mekisateko, sa latou faatatau atu le malosi tutusa pe sili atu foi i le olaga ma le galuega a ia o le na faataunuuina uma ai folafolaga sa faia ia Mekisateko” (Doctrinal New Testament Commentary, 3 vols. [1965–73], 3:157).

Eperu 6:4–8. “Ua toe faasatauroina e i latou lava le Alo o le Atua”

Na faamalamalama mai e Elder Bruce R. McConkie o le Korama a Aposetolo e Toasefululua e faapea:

“O tiutetauave o le agasala e le mafaamagaloina e aofia ai le toe faasatauroina e le tagata lava ia o le Alo o le Atua, ma le faalumaina i luma o tagata. (Eperu 6:4–8; MF. & F. 76:34–35.) Ina ia solia lenei solitulafono e le mafaamagaloina, e ao i se tagata ona maua le talalelei, maua mai i le Agaga Paia e ala i faaaliga le malamalama atoatoa o le paia o Keriso, ona toe teena lea ‘o le feagaiga fou ma faavavau lea sa faapaiaina ai o ia, ma ta’ua ai o se mea ua le paia, ma faia e ui lava i le Agaga o le alofa tunoa.’ [Iosefa Samita, i le History of the Church, 3:232.] Ona ia faia ai lea o le fasioti tagata e ala i le faamaonia o le maliu o le Alii, o lona uiga, o le fouvale aliali ae ua malamalama lelei i le upumoni, ma faapea ona tuua ai o ia i se tulaga lea e na te faasatauroina ai le Keriso ma le iloa lelei o Ia o le Alo o le Atua. O le ala lea e toe faasatauroina ai Keriso ma faalumaina i luma o tagata. (MF. & F. 132:27.)” (Mormon Doctrine, 2nd ed. [1966], 816–17).