Folasaga i le Tusi e Lua a Ioane

Aisea e suesueina ai lenei tusi?

I lana Tusi Lona Lua, na faaalia ai e Ioane le popole e faatatau i aafiaga o le liliuese i totonu o le Ekalesia. I le taimi lava lea, na ia faaalia ai foi le olioli i tagata o le Ekalesia o e na tumau malosi ma faamaoni aiai i le talalelei (tagai 2 Ioane 1:4). O upu nei na faaalia ai le olioli ma le agaga faafetai na lagona e taitai o le Ekalesia ia i latou o e na tumau faamaoni i le Alii. A o suesue e tamaiti aoga le 2 Ioane, e mafai ona faamalosia i latou e ala i faamanatu a Ioane ina ia alofa le tasi i le isi, usitai i poloaiga a le Atua, ma usitai faamaoni i le aoaoga faavae a Keriso.

O ai na tusiaina lenei tusi?

Na faailoa mai e le tusitala o ia lava o “le toeaina” (2 Ioane 1:1), ma e tusa ai ma talatuu, o Ioane, o se tasi o uluai Aposetolo e Toasefululua, na tusia lenei tusi (tagai Bible Dictionary, “John, Epistles of”).

O anafea ma o fea foi na tusia ai lenei tusi?

E le o mailoa tonu po o anafea ma o fea foi na tusia ai le 2 Ioane.

Afai e sa’o talatuu sa umi ona nofo Ioane i Efeso, atonu la na ia tusia lenei tusi mai iina i le va o le T.A 70 ma le 100.

O ai na tusi i ai, ma pe aisea foi?

O le Tusi Lona Lua a Ioane na tusi atu “i le tamaitai ua filifilia ma ana fanau ” (2 Ioane 1:1). E le o mailoa pe na talanoa atu Ioane i lona aiga po o se isi vaega patino o tagata pe na talanoa atu i le Ekalesia atoa i se gagana faafaatusa.

Na tusia e Elder Bruce R. McConkie o le Korama a Aposetolo e Toasefululua e faapea, o le 2 ma le 3 Ioane, atonu o ni tusi na tusi atu e Ioane i tagata o lona aiga patino (tagai Doctrinal New Testament Commentary, 3 vols. [1965–73], 3:409–10, 412–14).

O le isi mea e faapea, “o le tamaitai ua filifilia” e faatatau moni i se aulotu Kerisiano (tagai 2 Ioane 1:13). O le upu Eleni mo le ekalesia o le faatamaitai, ma sa masani ona faatusa le Ekalesia i se tamaitai (tagai Efeso 5:25–27, 32; Faaliliuga Iosefa Samita, Faaaliga 12:1–3, 7 [i le faaiuga o le Tusi Paia]; Faaaliga 19:7–8).

E pei o le 1 Ioane, na foliga mai sa tusia e Ioane le tusi lenei e tali atu ai i aoaoga sese e faapea, e le’i afio moni mai Iesu Keriso i le lalolagi i le tino faaletino. Sa ia faamalamalama atu, o tagata o le ekalesia o e na aoao atu e faapea, sa le’i i ai se tino faaletino o Keriso e le tatau ona taliaina i totonu o le fale o se tagata, po o le aulotu (tagai 2 Ioane 1:7–10).

O a nisi o vaaiga iloga o lenei tusi?

I le tusi lenei, na lapatai atu ai Ioane e uiga i aoao pepelo o e na oo mai i totonu o le Ekalesia. Sa ia fautuaina tagata o le Ekalesia ia aua ne’i faalogo pe faauo atu i nei tagata.

Otootoga

2 Ioane 1 ua faamanatu atu e Ioane i le Ekalesia e uiga i le poloaiga ia alofa atu o le tasi i le isi. Ua ia lapatai atu e uiga i aoao pepelo ma taufaavalea i totonu o le Ekalesia ma fautuaina tagata o le Ekalesia ina ia le faatagaina i latou e nonofo mau i a latou aulotu.