Potutusi
Lesona 124: Filipi 1–3

Lesona 124

Filipi 1–3

Folasaga

Sa fautuaina e Paulo le Au Paia i Filipi e galulue faatasi i le ola ai i le talalelei. sa ia fautuaina i latou e mulimuli i le faataitaiga a le Faaola o le lotomaualalo ma le le manatu faapito ma sa aoao atu faapea sa galue le Atua i totonu o i latou e aumaia lo latou faaolataga. sa faamatala e Paulo ia taulaga sa ia faia e mulimuli ai ia Iesu Keriso.

Fautuaga mo le Aoaoina Atu

Filipi 1

Ua faamatala e Paulo ia faamanuiaga e maua mai i mea faafeagai

A o lei amataina le vasega, tusi i le laupapa le saunoaga lea a Peresitene Polika Iaga. (O loo maua lea saunoaga i le Discourses of Brigham Young, sel. John A. Widtsoe [1954], 351.) Sui ia upu o loo vase i ni laina avanoa:

“O taimi uma e te kikiina ai le ‘Faamamona’ e te kikiina i luga; e te le kikiina lava ilalo. Ua poloaiina ai e le Atua Silisiliese” (Peresitene Polika Iaga).

Amata le lesona i le fesili atu:

  • O a ni nai faataitaiga, pe mai le talafaasolopito pe mai o tatou taimi, o tagata o fekikiina, pe tetee, i le Ekalesia a le Faaola ma Ona soo?

Valaaulia le vasega a o latou suesueina le Filipi 1 e vaavaai mo se upumoni e mafai ona fesoasoani ia i latou e malamalama ai pe mafai faapefea ona aafia le galuega a le Alii i le tetee.

Fuafua e valaaulia le vasega e sue le Filipi i Faafanua o le Tusi Paia, nu 13, “O Malaga Faafaifeautalai a le Aposetolo o Paulo,” o loo i le faaopoopoga o le Tusi Paia. Faamatala sa faatuina e Paulo se lala o le Ekalesia i Filipi i lana malaga lona lua faafaifeautalai (tagai Galuega 16). Na ia tusia mulimuli ane lana tusi i Filipi a o faafalepuipuiina, e le taumate i Roma. Aotele le Filipi 1:1–11 i le faamatala atu faapea sa faaalia e Paulo le lotofaafetai ma le alofa mo le Au Paia mo tagata Filipi.

Valaaulia se tamaitiiti aoga e faitau leotele le Filipi 1:12–14. Fai i le vasega e mulimuli ai, ma vaavaai mo mea na tulai mai ona o le tetee na feagai ma Paulo i le taimi o ana taumafaiga faafaifeautalai.

  • E tusa ai ma le fuaiupu e 12 , o le a le taunuuga o le tetee na feagai ma Paulo? (“O le faatupulaia [faalauteleina] o le talalelei.”)

  • E tusa ai ma fuaiupu 13–14 , na faapefea e le tetee lenei ona fesoasoani e faalautele le talalelei? (O tagata uma i le “fale uma” [ fuaiupu 13 ], po o le laumua o le militeli, sa iloa sa faafalepuipui ia Paulo ona o le talai atu e uiga ia Iesu Keriso. O le faafalepuipuia o Paulo sa musuia ai isi tagata o le Ekalesia e atili ona lotototoa i le folafolaina atu o le talalelei.)

  • O le a le upumoni e mafai ona tatou aoao mai nei fuaiupu e uiga i mea e mafai ona tulai mai pe a tatou feagai ma le tetee ona o le mulimuli ia Iesu Keriso? (E ono faaaoga e tamaiti aoga isi upu, ae ia mautinoa latou te faailoa mai lenei mataupu faavae: O le tetee tatou te feagai i le mulimuli ia Iesu Keriso e mafai ona fesoasoani e faatupu atili ai Lana galuega

Toe tepa i le sauoaga a Peresitene Iaga o i le laupapa. Fesili i le vasega pe o a upu latou te faaaogaina e faatumu ai avanoa. Faatumu avanoa i upu sao. Atonu e manaomia ona e faamatala atu o luga i le matalalaga lenei o lona uiga o le agai i luma.

  • O a ni faataitaiga o le ala sa fesoasoani ai tetee e faatupu atili ai le galuega a le Faaola?

Aotele le Filipi 1:15–26 i le faamatala atu faapea na faaalia e Paulo o le a faateleina e le Faaola e ala i soo se mea e tupu ia Paulo.

Valaaulia se tamaitiiti aoga e faitau leotele le Filipi 1:27–30 . Fai i le tagata lea e faitau foi le Faaliliuga a Iosefa Samita Filipi 1:28 (i le Filipi 1:28, vaefaamatalaga a). Valaaulia le vasega e mulimuli ai, ma vaavaai mo mea na fautuaina e Paulo le Au Paia e fai. faamatala o le amio (fuaiupu 27) e faasino i amioga.

  • O le a le mea na fautuaina e Paulo le Au Paia e fai?

  • E tusa ai ma le fuaiupu 29--30o a mea o le a oo i ai tagata o le Ekalesia mo le Faaola?

Faamanatu i le vasega le upumoni sa latou faailoa maia muamua.

  • O le a sou manatu o le a se mea semanu e faamanuiaina ai le Au Paia i Filipi i le manatuaina o tetee na latou feagai i le mulimuli ia Iesu Keriso e mafai ona fesoasoani e faatupu atili ai Lana galuega?

Filipi 2

Ua aoao atu Paulo e uiga i le faamaulalo o le Faaola ma faatonuina le Au Paia e faatatau i lo latou faaolataga

Valaaulia le vasega e faitau lemu le Filipi 2:2, ma vaavaai mo le fautuaga a Paulo i le Au Paia i Filipi.

  • E faapefea ona e aoteleina le fautuaga a Paulo?

Vaevae vasega i ni paga. Faatonu paga taitasi e faitau leotele faatasi le Filipi 2:3–8 ma vaavaai mo mea na faatonuina e Paulo le Au Paia e fai ina ia tuufaatasia ai. Fai i se tagata mai paga taitasi e tusi i le laupapa se mea se tasi o le fautuaga na latou maua.

  • E tusa ai ma aoaoga a Paulo, na faapefea ona avea Iesu Keriso ma se faataitaiga o le lotomaualalo ma le le manatu faapito?

  • O le a le mataupu faavae e mafai ona tatou aoao mai aoaoga a Paulo e mafai ona fesoasoani ia i tatou e atili ai ona soofaatasi? (E ui atonu latou te faaaogaina ni upu eseese, e tatau i tamaiti aoga ona faailoa mai le mataupu faavae lenei: Afai tatou te mulimuli i le faataitaiga a Iesu Keriso o le lotomaualalo ma le popole ma le le manatu faapito mo isi, ona mafai lea ona soofatasi atili i tatou.

  • O a ni nai auala e mafai ona tatou mulimuli ai i le faataitaiga a le Faaola o le lotomaualalo ma le le manatu faapito i o tatou aiga, aoga, po o uarota po o paranesi?

  • O anafea na e vaaia ai tagata o mafaufau muamua i manaoga o isi nai lo o latou lava? Na faapefea ona faateleina le lotogatasi i nei taumafaiga?

Faamatala e pei ona tusia i le Filipi 2:9–11, sa aoao atu e Paulo o le a oo ina ifo tagata uma ma “tautau o Iesu Keriso o le Alii lava ia” ( fuaiupu 11). Valaaulia le vasega e mafaufau i mea ua latou faamoemoe pe faapei lenei aafiaga mo i latou.

Valaaulia se tamaitiiti aoga e faitau leotele Filipi 2:12–13. Fai i le vasega e mulimuli ai, ma vaavaai po o a mea na fautuaina e Paulo ia Filipi e fai e mafai ona avea la latou aafiaga o le ifo atu i luma o le Alii o se mea fiafia. Atonu e moomia ona faamatala atu o le “matau ma le gatete” ( fuaiupu 12) e faasino i le maofa ma le migao ma le olioli (tagai Salamo 2:11; Taiala i Tusitusiga Paia, “Fear,” scriptures.lds.org).

Tau iai o nisi tagata sa malamalama sese i upu a Paulo i le Filipi 2:12faapea e faasaoina i tatou i a tatou lava galuega.

  • O ai na mafai ai le faaolataga mo i tatou? E faapefea?

  • E tusa ai ma le Filipi 2:13, o a auala e lua o loo fesoasoani ai le Atua ia i latou o e o loo taumafai e fai mea o manaomia mo le faaolataga? (Ua fesoasoani le Atua ia i latou ia “loto,” pe naunau, ma ia usiusitai i “lona finagalo alofa,” po o Ana poloaiga. A maea ona tali mai tamaiti aoga, tusi le upumoni lenei i le laupapa: E fesoasoani le Atua ia tatou loto e fai le mea o loo manaomia mai ia i tatou mo le faaolataga, lea e mafai ona o le Togiola a Iesu Keriso.

  • O a mea e manaomia o le faaolataga, lea sa saunia e le Atua ma fesoasoani ia tatou faataunuuina? (E mafai ona e valaaulia le vasega e faasino i mataupu faavae lona tolu ma le fa o le faatuatua.)

Tau i ai e ala i le faatosinaga a le Agaga Paia, e mafai ai e le Atua ona fesoasoani ia i tatou e suia ma faamama o tatou naunauga ina ia tatou mananao ai e usitai ia te Ia (tagai Mosaea 5:2). Valaaulia le vasega e mafaufau pe na faapefea ona fesoasoani le Atua e suia o latou loto ina ia latou mananao ai e usitai ia te Ia ma pe na faapefea ona ia fesoasoani ia i latou ia atili tausia ai ma le faamaoni ana poloaiga.

Aotele le Filipi 2:14–30 i le faamatala atu faapea na faamanatu atu e Paulo i le Au Paia faapea latou te “pupula atu e faapei o malamalama o le lalolagi” ( fuaiupu 15) ma sa tau atu ia i latou o le a ia auina atu ni avefeau ia aoao e uiga i lo latou soifua manuia.

Filipi 3

Ua faamatala e Paulo ia taulaga na ia osia e mulimuli ai ia Iesu Keriso.

Valaaulia le vasega e mafaufau i se mea latou te faatauaina lea o le a manatu foi le lalolagi e taua (e pei o le aiga, uo, aoga, meaai, tekinolosi, po o tupe) ma, afai e mafai, ia faaali se mea e faatusa i le mea sa latou mafaufau i ai. Fai i ai e mafaufau pe o le a le mea o le a latou naunau e lafoai ai nei meatotino taua.

Valaaulia le vasega a o latou suesueina le Filipi 3 e vaavaai po o a mea na lafoai e Paulo ina ia maua ai se taui lea foi e avanoa mo i tatou.

Aotele le Filipi 3:1–3 i le faamatala atu faapea na lapataia e Paulo ia Filipi e uiga i aoao piopio o e fai mai o tagata ua liliu mai i le Ekalesia e tatau ona tausisia ni faiga patino faa-Iutaia, e aofia ai le peritomeina (tagai Tusi lesona a le Tagata Aoga o le Feagaiga Fou [Church Educational System manual, 2014], 436).

Valaaulia se tamaitiiti aoga e faitau leotele le Filipi 3:4–6. Fai atu i le vasega e mulimuli i le faitauga, ma vaavaai po o le a le tala a Paulo e uiga i lona tofi faa-Iutaia.

  • O a itu aoga faalelotu o tagata Iutaia na umia e Paulo? (O lona gafa faa-Isaraelu, tulaga o se Faresaio, faamaufaailoga mo le faa-Iutaia, ma le usitai aiai i le tulafono.)

Valaaulia se tamaitiiti aoga e faitau leotele le Filipi 3:7–11. Fai i le vasega a mulimuli ai, ma vaavaai pe na faapefea ona vaai atu Paulo i itu aoga na ia te ia i le sosaiete o tagata Iutaia.

  • Na faapefea ona vaai atu Paulo i mea sa ia lafoai ina ia mulimuli ai ia Iesu Keriso?

  • Aisea na naunau ai Paulo e “[mafatia] i le faaleaogaina mea uma”? ( fuaiupu 8). (Ina ia mafai ona ia iloa Iesu Keriso; “ia maua foi ua ia te ia” [ fuaiupu 9], pe ia i ai se sootaga faamaoni i le feagaiga ma Ia; ia tauamiotonuina e ala i le faatuatua ia te Ia; mafatia ona o Ia; ma ia avea o se vaega o le Toetutu o e “faamaoni,” po o le amiotonu [Faaliliuga, Iosefa Samita, Filipi 3:11 (i le Filipi 3:11, vaefaamatalaga a)].)

Valaaulia se tamaitiiti aoga e faitau leotele le Filipi 3:12–14. Fai i le vasega e mulimuli ai, ma vaavaai po o a mea na faailoa e Paulo e uiga i lona alualu i luma faaleagaga. Faamatala o le mauao lona uiga ia maua mai.

  • Nai lo le taulai atu i mea ua tatou tuua, o le a le mea na agai atu i luma ia Paulo ia maua mai? (Faamatala “o le taui ua valaauina ai e le Atua” [ fuaiupu 14] o le ola e faavavau lea.)

  • O le a le mataupu faavae e mafai ona tatou aoao mai le faataitaiga a Paulo e uiga i mea e tatau ona tatou faia ia tatou iloa ai Iesu Keriso ma maua le ola e faavavau? (E mafai ona faaaoga e tamaiti aoga isi upu, ae ia mautinoa latou te faailoa mai lenei mataupu faavae: Afai tatou te lafoaia mea uma e tatau ai ina ia mulimuli ia Iesu Keriso ma fetuleni atu ai i luma i le faatuatua, e mafai ona tatou iloaina o Ia ma maua le ola e faavavau.

Valaaulia se tagata e faitau leotele le tala lea a Peresitene Gordon B. Hinckley, lea o loo tau mai ai le la feiloaiga ma se alii ofisa o le neivi na sau mai se isi malo i le Iunaite Setete mo se aoaoga maotua ma sa auai i le Ekalesia i le taimi na nofo ai. Fai i le vasega e faalogologo i le mea sa naunau le taulealea e lafoai ina ia mulimuli ai ia Iesu Keriso.

Peresitene Gordon B. Hinckley

“Sa faamasani mai ia te au ae lei toe foi i lona atunuu moni. … Sa ou fai atu: ‘O tou tagata e le Kerisiano. O le a le mea o le a tupu pe a toe foi i lou aiga o se kerisiano, ma leisi mea, o se Kerisiano Mamona?’

“Sa pogia ona foliga, ma ia faapea mai, O le a le fiafia lou aiga. Atonu latou te tuliesea au ma manatu faapea ua ou oti. O lo’u lumanai foi ma la’u matata faalegaluega, atonu foi o le a tapunia mo au.’

“Sa ou fesili, ‘Ua e filifilia e te totogiina se tau tele mo le talalelei?’

“O ona mata sa susu i loimata, sa iila mai i ona foliga aulelei ao ia tali mai, ‘E moni, A ea?’

“Ona o le maasiasi i le fai atu o le fesili, sa ou tali atu ‘Ioe, e moni.’

“Lea na ia tali mai ai, ‘O lea seisi mea e sili atu?’” (“E moni, A ea?” Liahona, Iulai 1993, 2).

  • O le a le mea na naunau lenei taulealea e lafoai ina ia mulimuli ai i le Faaola?

  • O le a se mea ua e lafoaia (pe lafoaia e se tasi e te iloa) ina ia mulimuli ai i le Faaola?

  • Aisea ua avea ai taui o le iloaina o Iesu Keriso ma agai i luma i le ola e faavavau ma mea e taua ai osigataulaga ua e faia?

Fai i le vasega e mafaufau pe i ai se mea e tatau ona latou lafoai ina ia latou mulimuli atili ai ia Iesu Keriso. Valaaulia i latou e tusi i lalo se sini e faia ai.

Aotele le Filipi 3:15–21 i le faamatala atu faapea sa lapataia e Paulo le faafanoga o loo faatalitali mai mo i latou o e taulai atoa atu i mea fiafia o le lalolagi. Na ia aoao atu faapea o le a suia e Iesu Keriso o tatou tino faaletino i ni tino ola pea e pei o Lona.

Faaiu i le molimau atu i upumoni sa faailoa mai i lenei lesona.

Tala ma Faamatalaga o Talaaga

Filipi 2:3–8. Le Manatu Faapito

Na faamatala e Elder H. Burke Peterson le uiga o le le manatu faapito:

“Ua tatou iloa o loo i ai foi nisi o loo faatasi ma i tatou e le manatu faapito —e pei o [Iesu Keriso].

“O le le manatu faapito o ia lea e sili ona popole mo le fiafia ma le lelei o isi nai lo ia lava, o ia lea ua loto malie e auauna atu ae lei fesiligia pe manaomia se faafetai atu i ai, o ia lea ua loto malie e auauna atu i isi e oo lava i ona fili. O le le manatu faapito o le fiafia lea e auauna atu, e fiafia e tuuese mai i lona loto ona lava manaoga ma lagona. Ia le sailia le viiga ma le mamalu mo i tatou lava, pe faamalie o tatou manao,o le tagata le manatu faapito na te faamuamua nei manaoga uma mo isi ” (“O le le manatu faapito: O se ala i le fiafia,” Liahona,Iulai 1985, 66).

Filipi 2:5–8 O le Faaola “sa faamaulalo e ia ia te ia”

O le fasifuaitau ua faaliliuina “faamaulalo”( Filipi 2:7) e sau mai le upu Eleni kenoō, o lona uiga “ia faagaogao.” Sa aoao mai e Elder Tad R. Callister, o le sa galue i le Au Peresitene o Fitugafulu e uiga i avanoa paia ma tulaga na “faagaogao” ai e Iesu Ia lava e afio mai i le lalolagi:

“O le Atua le Alo na faatau atu lona aiga faalelagi faatasi ma ona teuteuga uma faaselesitila mo se nofoaga faaletino ma ona teuteuga uma faaanamua. O Ia, ‘le Tupu o le lagi’ (Alema 5:50), ‘le Alii Mamana Aoao o le o nofotupu’ (Mosaea 3:5), na tuua le nofoalii ina ia maua le tofi i le faatanoa vao. Na Ia fesuiaia le pule o se atua mo se tulaga o se pepe. Na Ia tuua le tamaoaiga, mana, puleaga, ma le atoaga o lona mamalu—mo le a?—mo le taufaifai, tauemuina, faamamasagiaina, ma le usitai atu. O se faafesuiaiga o le fuataga e le mafaatusalia, o se faamaualaloina o vaega maoae, o se faasifoga o le loloto e le mafuatiaina” (The Infinite Atonement [2000], 64).

Filipi 2:12–13. “Galueaiina lou lava faaolataga. … Aua o le Atua e galue ia te oe”

Na aoao mai e Peresitene Iosefa Filitia le ala e mafai ai e tagata o le Ekalesia ona “galueaiina lo [latou] lava faaolataga”(Filipi 2:12)

“Ou te aioi atu i tagata o le Ekalesia ia faia galuega o le amiotonu ma tausi poloaiga, e saili i le Agaga, ia alolofa i le Alii, e faamuamua i o latou olaga le malo o le Atua, ona galueaiina ai lea o lo latou faaolataga ma le matau ma le gatete i luma o le Atua” (i le Conference Report, Oct. 1970, 8).

O na galuega, lea ua fai i ai e le Atua ia tatou mafaia ona faatino, e taua e faamalie ai manaoga sa Ia faatuina mo le mauaina o faamanuiaga uma ua mafai ona maua i le Togiola.

Na aoao mai e Elder Dallin H. Oaks o le Korama a Aposetolo e Toasefululua e faapea ona o le Togiola a le Faaola ua faaolaina ai i tatou:

“E le masalomia le iai i le tagata o ni mana maoae ma mafai ona faataunuuina mea maoae e tele e ala i taumafaiga mauai ma le loto e le mafaatoilaloina. Tusa poo le a lo tatou usitai uma ma a tatou galuega lelei, e le mafai ona faaolaina i tatou mai a tatou agasala e aunoa ma le alofa tunoa ua aumaia e le togiola a Iesu Keriso.

“… E le mafai e le Tagata ona maua lona ia lava saolotoga” (“Se a lo outou taofi ia Keriso?” Liahona, Ian. 1989, 67).