Potutusi
Folasaga i le Talalelei e Tusa ai ma Sagato Mareko

Folasaga i le Talalelei e Tusa ai ma Sagato Mareko

Aisea e suesueina ai lenei tusi?

O le tusi a Mareko o loo faamatala mai ai le galuega, maliu, ma le Toetu o Iesu Keriso i se tala saoasaoa e tele taimi e taulai atu ai i galuega mamana a le Faaola. O le mea aupito sili i nei mea o le Togiola, lea na faamamafa mai e Mareko o le totonugalemu o le misiona a Iesu i le avea ai ma Mesia ua loa ona folafola mai. O le suesueina o le tala a Mareko ma le molimau i le ala na faataunuuina ai e le Faaola Lana misiona togiola, e mafai ai e tagata aoao ona atili liua ai i le talalelei ma maua le lototoa e mulimuli ai i le Faaola.

O ai na tusiaina lenei tusi?

Mareko (sa faaigoa foi o Ioane Mareko) o le tusitala o le tusi lenei. E ui o Mareko e lei i ai i uluai soo o Iesu Keriso, ae na mulimuli ane liua ma avea ma fesoasoani i le Aposetolo o Peteru, ma atonu sa ia tusia lana Evagelia e faavae i mea sa ia aoaoina mai ia Peteru (tagai Bible Dictionary, “Mark”).

O Mareko ma lona tina, o Maria, sa nonofo i Ierusalema; o lo latou fale na avea ma nofoaga e potopoto i ai nisi o uluai Kerisiano Galuega 12:12 Na tuua e Mareko ia Ierusalema e fesoasoani ia Panapa ma Saulo (Paulo) i la la’ua uluai malaga faafaifeautalai (tagai Galuega 12:25; 13:4–6, 42–48). Na tusia mulimuli ane e Paulo faapea o Mareko sa faatasi ma ia i Roma (tagai Kolose 4:10; Filemoni 1:24) ma viia Mareko o se soa sa “aoga ia te [ia] mo le galuega” (2 Timoteo 4:11). Sa ta’u e Peteu o ia o “Mareko lo’u atalii”(1 Peteru 5:13), e ta’u mai ai le vavalalata o la la’ua mafutaga.

O anafea ma o fea foi na tusia ai lenei tusi?

Tatou te le iloa tonu pe o anafea na tusia ai le Evagelia a Mareko E peiseai na tusia e Mareko lana Evagelia i Roma i le va o le T.A. 64 ma le T.A 70, atonu pe lei leva ona uma le faamaturoina o le Aposetolo o Peteru pe tusa o le T.A. 64.

O ai na faatatau i ai le tusiaina o lenei tusi, ma pe aisea foi?

O le Evagelia a Mareko o loo i ai auiliiliga--e pei o upusii na faaliliu i le faa-Aramaika, faaupuga Latina, ma faamalamalamaga o agaifanua a Iutaia---ia na foliga na faamoemoe mo se aofia e i ai tagata Roma ma tagata mai isi malo o Nuuese, faapea foi i latou o e sa liua i le faa-Kerisiano, atonu i Roma ma le Malo o Roma atoa. E toatele na talitonu atonu sa i ai Mareko ma Peteru i Roma i le taimi sa iloga ai i se vaitau tofotofoga matuia o le faatuatua o le toatele o tagata o le Ekalesia i nofoaga i le Malo atoa o Roma.

O le tasi vaetolu o le Evagelia a Mareko o loo faamatala ai aoaoga a le Faaola ma aafiaga i le toe vaiaso o Lona soifua. Na tuu mai e Mareko le molimau faapea o puapuaga o le Alo o le Atua na fuaao le manumalo i le leaga, agasala, ma le oti. O lenei molimau o lona uiga e le tatau ona fefefe i latou o e mulimuli i le Faaola; pe a latou feagai ma sauaga, tofotofoga, e oo lava i le oti, o loo latou mulimuli i lo latou Matai. E mafai ona latou tumau ma le mautinoa, ma le iloa o le a fesoasoani le Alii ia i latou ma o le a iu ina faataunuuina Ana folafolaga uma.

O a nisi o vaaiga uigaese o lenei tusi?

E amata faafuasei ma malie le Evagelia a Mareko ma e tumau lava le saoasaoa, i le toe faamatalaina o mea na tutupu i se faasologa vave. E tele taimi na faaaoga ai e Mareko ia upu o le straightway ma le immediately, e aumai ai le aafiaga o le saoasaoa ma taga fai.

E ui o le 90 pasene o anomea i le Mareko o loo maua foi tala a Mataio ma Luka, ae e tele taimi o loo aofia ai i le tala a Mareko isi faamatalaga ua fesoasoani tatou te talisapaia atili ai le mutimuti alofa o le Faaola ma le tali o tagata na siomia ai o Ia (faatusatusa le Mareko 9:14–27 ma le Mataio 17:14–18). Mo se faataitaiga, sa faamatala e Mareko le salalau o le naunau e talia le Faaloa e i latou i Kalilaia ma isi mea i Lana uluai galuega (tagai Mareko 1:32–33, 45; 2:2; 3:7–9; 4:1). Na faamatalaina foi ma le faaeteete e Mareko le tali le fiafia a le au tusiupu ma le au Faresaio, o e na vave ona faateleina la latou tetee mai mafaufauga masalosalo (tagai Mareko 2:6–7) i le taupulepule e faaumatia Iesu (tagai Mareko 3:6).

Faatasi ai ma ni autu taua i le Mareko, o loo i ai ni fesili pe o ai Iesu ma pe o ai na malamalama i Lona faasinomaga, faapea foi ma le matafaioi a soo se tasi e tatau ona “ave lona satauro, ma mulimuli atu ia [Iesu]” (Mareko 8:34). E le gata i lea, o Mareko e na o le pau lea o le Evagelia o loo faamatalaina le faataoto i le fatu na ola ia lava (tagai Mareko 4:26–27),o le faamalologa o se tagata tutuli i le itu o Tekapoli (tagai Mareko 7:31–37), ma le faamalologa auauai o se tagata tauaso i Petesaita (tagai Mareko 8:22–26).

Otootoga

Mareko 1–4Ua papatisoina Iesu e Ioane le Papatiso ma amata ona talai atu, valaauina soo, ma faia vavega. A o faateleina le tetee faasaga ia te Ia, sa Ia aoao atu i faataoto.

Mareko 5–7 Ua faaauau ona faia e le Faaola o vavega e tele, faatino Lona mutimuti alofa mo isi. Ina ua mavae le fasiotia o Ioane, sa fafagaina e Iesu le silia ma le lima afe tagata ma savali i luga o le vai. Ua aoao atu Iesu e faasaga i uputuu pepelo.

Mareko 8–10Ua faaauau e Iesu Keriso ona faia o vavega. Ua molimau atu Peteru o Iesu o le Keriso. Ua valoia e le Faaola faatolu Ona puapauga, maliu, ma le Toetu, ae e lei malamalama lava Ona soo i le uiga o Lana fetalaiga. Ua Ia aoao atu i latou e uiga i le lotomaualalo ma le auaunaga e moomia mai Ona soo.

Mareko 11–16I le toe vaiaso o Lona soifua, ua ulu atu Iesu i Ierusalema, aoao atu Ona soo, mafatia i Ketesemane, ma ua faasatauroina. Ua Toetu Mai Iesu Keriso.