Ina ua uma le tausamiga o le Paseka, sa faaauau e Iesu ona aoao atu Ona soo. Sa Ia ta’u atu ia te i latou e le o toe mamao ona alu a’e lea i Lona Tama ma o le Agaga Paia, po o le Fesoasoani, o le a afio mai e taiala i latou i le upumoni uma. Na valoia e Iesu Lona lava maliu ma le Toetu ma sa Ia folafola atu ua Ia manumalo i le lalolagi.
Ua faamalamalama atu e Iesu le matafaioi a le Agaga Paia
Valaaulia se tamaitiiti aoga e sau i luma o le vasega. Fusi mata o le tagata ia le mafai ona vaai. A uma ona fusi mata o le tamaitiiti aoga, valaaulia isi tamaiti aoga e tuu a latou tusitusiga paia i se mea o le potu. Ona fai lea i le tamaitiiti aoga ua fusi mata pe o le a le faigata e sue ai se seti o tusitusiga paia i le potu ma susue i se itulau patino. Fai i le tamaitiiti aoga o le a fesoasoani pe a faapea e i ai se tagata e fiafia e taitai atu o ia i le tusi.
Valaaulia le tamaitiiti aoga o fusi mata e filifili mai se isi tamaitiiti aoga e fai ma ona taiala. Valaaulia le tamaitiiti aoga na filifilia e taitai lea e fusi mata i se seti ua atofa o tusitusiga paia ma fesoasoani i ai e sue se itulau patino. A maea nei gaoioiga, faamatala atu, a o i ai Iesu Keriso i le lalolagi, sa Ia aoaoina ma toe aoaoina Ona soo. O Ia lava na taitaia i latou ia malamalama i upumoni sa Ia aoao atu.
Otooto le Ioane 16:1–4 i le faamatala atu faapea, ina ua uma ona talisua Iesu ma Ana Aposetolo i le tausamiga o le Paseka, sa Ia ta’u atu ia i latou, o le a oo mai le taimi o le a inosia ai i latou e tagata ma o le a manatu nei tagata o loo latou faia se tautua i le Atua e ala i le fasiotia o i latou.
Valaaulia se tamaitiiti aoga e faitau leotele le Ioane 16:5-6. Fai i le vasega e mulimuli ai, ma vaavaai mo mea na ta’u atu e Iesu i le au soo ma o latou lagona i ai.
O a ni lagona o le au soo e uiga i le tala faapea o le a alu ese Iesu ma o le a sauaina i latou?
Fai i le tamaitiiti aoga na taiala i le na fusi mata e toe foi i lona nofoaga. Fesili i le tamaitiiti aoga na fusi mata:
O le a sou lagona ina ua toe tuua na o oe ua leai se uo e fesoasoani ia te oe?
Ave ane se nofoa mo le tamaitiiti aoga o fusi mata ma fai i ai e nofo ai (ae fusi pea mata).
Valaaulia se tamaitiiti aoga e faitau leotele le Ioane 16:7. Fai i le vasega e mulimuli ai ma vaai po o ai lea na folafola atu e Iesu o le a auina mai pe a afio ese o Ia.
O ai na folafola atu e Iesu o le a afio mai pe a tuua e Ia? (O le a auina mai e Iesu le Fesoasoani, po o le Agaga Paia.)
Faamalamalama atu o le upu aoga e pei ona faaaogaina i le fuaiupu e 7 o lona uiga e taua pe manuia ai. Ta’u i ai ”e lei galue le Agaga Paia i le atoatoaga i tagata Iutaia i le taimi o femaliuai Iesu i le olaga nei (Ioane 7:39; 16:7)” (Bible Dictionary, “Holy Ghost”). Ina ia fesoasoani ia malamalama le vasega pe aisea na le galue ai le Agaga Paia i le atoatoaga, faitau leotele le saunoaga a Elder Bruce R. McConkie o le Korama a Aposetolo e Toasefululua:
Ata
Elder Bruce R. McConkie
”O le umi lava na mafuta ai Iesu i le tino ma ona soo, sa lei manaomia atoa e i latou le mafutaga faifai pea ma le Agaga Paia lea e tatau ona i ai pe a afio ese Iesu” (Doctrinal New Testament Commentary, 3 vols. [1965–73], 753).
Otooto le Ioane 16:8–12 i le faamatala atu faapea, o se tasi o matafaioi a le Agaga Paia o le aoa’i o le lalolagi ona o le agasala.
Valaaulia se tamaitiiti aoga e faitau leotele le Ioane 16:13, ma fai i le vasega e vaavaai mo isi matafaioi o le a faataunuu e le Fesoasoani i olaga o le au soo pe a afio ese Iesu.
O a matafaioi a le Agaga Paia e faataunuu i olaga o le au soo o le Alii pe a afio ese o Ia? E manuia faapefea le au soo mai le fesoasoani ma le taitaiga o le a tuuina atu e le Agaga Paia?
E fua i le fuaiupu 13, o le a le mea e mafai foi e le Agaga Paia ona fai mo i tatou i o tatou taimi? (A uma ona tali mai tamaiti aoga, tusi le upumoni lenei i luga o le laupapa: E mafai ona taitaia i tatou e le Agaga Paia i upumoni uma ma faaali mai ia i tatou mea o le a oo mai.)
O a ni nai auala e taiala ai e le Agaga Paia i tatou i le upumoni?
O a ni auala e ono faaali mai ai e le Agaga Paia ia i tatou mea a oo mai? (Afai e manaomia, faamatala e ala mai i le Agaga Paia, e mafai e le Atua ona aumaia le faamautinoaga, faamoemoe, vaaiga mamao, lapataiga, ma le taitaiga mo o tatou lumanai.)
Tuu se mea (se taui) i luga o se fata po o se nofoa po o se isi mea i le potu. Valaaulia le tamaitiiti aoga o fusi mata e alu e sue. Valaaulia se isi tamaitiiti aoga e musumusu atu faatonuga i le tagata o fusi mata e fesoasoani ai ia te ia pe faafoe ai o ia ia maua le taui. A maua e le tagata le mea lena, ona fai lea i ai e aveese le fusi. Fai i tamaiti aoga e toalua e toe fo’i atu i o laua nofoaga. Fesili i le vasega:
O anafea na e lagona ai le Agaga Paia o taitai oe i le upumoni? Na faapefea ona e iloa o le Agaga Paia na taitaia oe?
Atonu e te manao e faasoa atu se aafiaga o le taimi na taiala ai oe e le Agaga Paia i lou lava olaga. Ina ia fesoasoani e faaaoga le upumoni sa latou aoaoina, fautuaina i latou e ola i ni auala e valaaulia ai le taitaiga a le Agaga Paia i o latou olaga.
Ta’u i ai o le Ioane 16:13 ua ta’u mai ai o le Agaga Paia, o lana matafaioi o le tuuina atu o le molimau i le Tama ma le Alo, o le a ”le tautala fua ia na o ia; a o mea uma e faalogo i ai o ia, e tautala ai lava.” Valaaulia se tamaitiiti aoga e faitau leotele le Ioane 16:14–15, ma fai i le vasega e vaavaai pe o savali a ai o le a tautala mai ai le Agaga Paia ia i tatou.
O savali a ai e auina mai e le Agaga Paia ia i tatou? (A uma ona tali mai tamaiti aoga, tusi le upumoni lenei i luga o le laupapa: E faaali mai e le Agaga Paia upumoni ma faatonuga lea e sau mai le Tama Faalelagi ma Iesu Keriso.)
Aisea e fesoasoani tele ai le iloa a tautala mai le Agaga Paia, o loo tautala mai mo le Tama Faalelagi ma Iesu Keriso?
Faamatala atu i tamaiti aoga, o le Agaga Paia i ana ”fesootaiga i lou agaga e aumaia ai le mautinoa atili nai lo se isi lava fesootaiga e mafai ona e maua e ala i ou lava sane faalenatura” (Faamaoni i le Faatuatua [2004], 7). O lona uiga o le Agaga Paia o lo tatou taiala e aupito sili ona taua i le aoaoina o upumoni; o Lana faatosinaga e sili atu ona taua nai lo faamaoniga faaleagaga, o manatu o isi, po o le atamai o le lalolagi. E faapei o i tatou, sa manaomia e soo o le Faaola ona aoao e faalagolago i le Agaga Paia o se taiala i le le i ai faaletino o le Alii.
Ua talanoaina e le Faaola Lona alu ese mai le tino ma folafola mai ua Ia manumalo i le lalolagi
Valaaulia tamaiti aoga e mafaufau i se taimi na faatofa atu ai i se tagata o le aiga po o se uo mo se taimi.
O le a sau tala e faamafanafanaina ai e le tasi le isi a o e faatofa atu?
Valaaulia se tamaitiiti aoga e faitau leotele le Ioane 16:16. Fai i le vasega e mulimuli ai, ma vaavaai po o a isi mea na ta’u atu e Iesu i le au soo atonu sa faamafanafanaina ai i latou a o latou mafaufau o le a afio ese o Ia. Fai atu i le vasega e lipoti mai mea ua latou mauaina.
Faamatala atu, i le Ioane 16:17–19, ua tatou faitau ai sa lei malamalama le au soo i le uiga o le fetalaiga a Iesu faapea o le a alu o Ia ae o le a latou toe vaai foi ia te Ia.
Valaaulia se tamaitiiti aoga e faitau leotele le Ioane 16:20–22. Fai i le vasega e mulimuli ai ma vaavaai po o le a le fetalaiga a le Faaola i Ona soo i le mea o le a latou lagonaina pe a afio ese o Ia ma le mea o le a latou lagonaina pe a toe vaai ia te Ia. Atonu e manaomia ona faamatala atu, o le fasifuaitau ”a fanau se fafine ua tiga” e faasino i se tina maitaga ua tiga fanau a o lei fanau mai se pepe.
O a lagona o le au soo pe a afio ese Iesu? O le a le mea na Ia folafola atu pe a mavae lena?
Faamatala atu, o le a toe vaai le au soo ia Iesu pe a mavae Lona toetu. E ui ina o le a tele lo latou faanoanoa ona o Lona maliu, ae o le olioli o le a latou lagonaina i Lona Toetu o le a tumau.
Otooto le Ioane 16:23–32, i le faamatala atu faapea, sa aoao atu e Iesu Ona soo e tatalo sa’o i le Tama Faalelagi i Lona suafa (Keriso) ma sa faamautinoa atu ia i latou le alofa o le Tama ia i latou ma Ia.
Valaaulia se tamaitiiti aoga e faitau leotele le Ioane 16:33, ma fai i le vasega e vaavaai mo upu ma fasifuaitau sa faaaoga e le Faaola e faamafanafana ai Ona soo.
O a upu ma fasifuaitau na faaaoga e le Alii e faamafanafana ai Ona soo?
E tusa ai ma lefuaiupu 33, aisea e mafai ai ona tatou maua le fiafia ma le filemu e ui lava i se lalolagi ua tumu i faigata ma le oti? (A uma ona tali mai tamaiti aoga, tusi le mataupu faavae lenei i luga o le laupapa: Talu ai ua manumalo Iesu Keriso i le lalolagi, ua mafai ona tatou fiafia ma maua le filemu.)
O le a sou manatu o le a le uiga o le faatoilalo e Iesu Keriso o le lalolagi?
Faamatala atu, o le Alo Pele e Toatasi o le Tama, o Iesu Keriso sa soifua i se soifuaga e leai se agasala, sa faatoilaloina faaosoosoga faalelalolagi. Na oo foi o Ia i tiga ma mafatiaga uma ma sa totogiina agasala a i tatou uma. E ala i Lona soifuaga, Ona mafatiaga ma le maliu, ma Lona Toetu, sa Ia faatoilaloina ai papupuni uma ina ia tatou mama, maua le filemu, ma toe ola faatasi ma lo tatou Tama i le Lagi ma i latou tatou te alolofa i ai.
E mafai faapefea ona fesoasoani lo tatou iloa na faatoilalo e Iesu Keriso le lalolagi tatou te maua ai le olioli ma maua le filemu?
Saunia se kopi mo tamaiti aoga o le saunoaga lea a Peresitene Thomas S. Monson. Valaaulia se tamaitiiti aoga e faitau leotele le saunoaga ma fai i le vasega e vaavaai mo se faamalamalamaga e uiga i le mafuaaga e mafai ai ona tatou olioli e ui i tofotofoga ma faigata o lenei lalolagi.
Ata
Peresitene Thomas S. Monson
”Ia tatou olioli a o tatou ola i o tatou olaga. E ui o loo tatou ola i taimi ua matua faateleina le matautia, e alofa le Alii ia i tatou ma o loo silafia i tatou. E i ai pea lava o Ia i la tatou itu pe a tatou faia le mea sa’o. O le a fesoasoani o Ia ia i tatou i taimi tatou te manaomia ai. … E mafai foi ona faatumulia o tatou olaga i le olioli pe a tatou mulimuli i aoaoga o le talalelei a Iesu Keriso.
”Ua apoapoai mai le Alii, ’Ia outou loto tetele; ua ou manumalo i le lalolagi’ [Ioane 16:33]. Se fiafia ina a tele ua aumaia e lenei malamalama ia i tatou. Sa soifua o Ia mo i tatou ma sa maliu o Ia mo i tatou. Na Ia totogiina le tau mo a tatou agasala. Ina tatou mulimuli ia i Lana faataitaiga. Ina tatou faaali atu ia o lo tatou agaga faafetai tele ia te ia e ala i le taliaina o Lana taulaga ma ola ai i ni olaga o le a faaagavaaina ai i tatou e toe foi atu i se aso ma nonofo faatasi ai ma Ia” (“Ia Faatasi le Atua ma Outou, Seia Tatou Toe Feiloai,” Ensign po o le Liahona, Nov. 2012, 110–11).
O le a se taimi na fesoasoani ai ia te oe ia e lototele ma maua le filemu ina ua e iloa sa faatoilalo e Iesu Keriso le lalolagi?
Valaaulia tamaiti aoga ia lototetele ma ola i le talalelei a Iesu Keriso. Molimau atu afai latou te faia, o le a latou lagonaina le filemu ma le faamoemoe lea e mafai ona maua e ala i le taulaga togiola ma le Toetu o le Alii.
I le konafesi aoao ia Aperila 2009, na toe faamatala ai e Peresitene Thomas S. Monson se tala sa faamatalaina e Peresitene Ezra Taft Benson ma Frederick W. Babbel, o e sa asiasi atu i Europa ina ua faamuta le Taua Lona Lua a le Lalolagi. O le tala i se tina ua oti lana tane e toafa lana fanau laiti sa i ai i le itu a le fili. E ui ina sa malaga o ia i le silia ma le 1,000 maila mo le saogalemu, ma feoti uma ai lana fanau i le malulu ma le fiaaai, ae sa tumau lona faamaoni i lona faamoemoe ia Iesu Keriso o le a mafai ona toe faatasi lona aiga pe a mavae le Toetu.
Ina ua uma le tala, sa saunoa Peresitene Monson i le mea lenei:
“Ou te molimau atu ia te outou, e le mafuatiaina o tatou faamanuiaga folafolaina. E ui ina foufou mai afa, e ui ina to mai uaga i o tatou luga, ae o lo tatou malamalama i le talalelei ma lo tatou alolofa i lo tatou Tama Faalelagi ma lo tatou Faaola, o le a faamafanafanaina ma lagolagoina ai i tatou ma aumaia le olioli i o tatou loto a o tatou savavali sa’o ma tausi poloaiga. O le a leai se mea o lenei lalolagi e mafai ona manumalo ia i tatou.
“Ou uso e ma tuafafine pele, aua tou te fefefe. Ia outou lototetele. E i ai le faamoemoe i le lumanai, pei foi o o outou faatuatua” (“Ia Outou Lototetele,” Ensign po o le Liahona, Me 2009, 91).