Lesona 129

2 Tesalonia

Folasaga

E lei leva ona uma ona tusi lana tusi muamua i le Au Paia i Tesalonia, na tusi atu ai Paulo ia i latou i se tusi lona lua, lea na ia faamanino ai upumoni e uiga i le Afio Mai Faalua. Na ia aoao atu o le a le toe afio mai le Faaola sei vagana ua uma ona tupu le liliuese. Ona folafola atu lea e Paulo e faasaga i le paie ma sa fautuaina le Au Paia ia “aua nei faavaivai i le amio lelei”(2 Tesalonia 3:13).

Fautuaga mo le Aoaoina Atu

2 Tesalonia 1–2

Ua fautuaina e Paulo le Au Paia e ala i le vavalo atu e uiga i le Afio Mai Faalua o Iesu Keriso

Valaaulia se tamaitiiti aoga e faitau leotele le tautinoga lenei a Elder Jeffrey R. Holland o le Korama a Aposetolo e Toasefululua:

“Ou te fai atu i tagata uma aemaise lava i le autalavou o le Ekalesia pe afai tou te lei faia, o le a oo lava i se tulaga o le a manaomia ai ona e puipuia lou faatuatua pe atonu foi o le onosaia o nisi o sauaga faaletagata ona o oe o se tasi o le Ekalesia a Iesu Keriso o le Au Paia o Aso e Gata Ai” (“O le Tau—ma faamanuiaga—o le Avea ma Soo,” Ensign or Liahona, Me 2014, 6).

Fai i le vasega e sii o latou lima pe afai na tatau ona latou faatuatua pe onosai i mea faafeagai ona o lo latou avea ai ma tagata o le Ekalesia. Valaaulia ni nai tamaiti aoga e faasoa mai o latou aafiaga.

Faamatala na tusia e Paulo se tusi lona lua i le Au Paia i Tesalonia ma talanoaina ai le mau autu, e aofia ai mea faafeagai na feagai ma le Au Paia. Valaaulia le vasega e vaavaai mo se mataupu faavae a o latou suesue i le Tesalonia 1 e mafai ona fesoasoani ai e onosaia ai mea faafeagai ma puapuaga e ono feagai ma tagata o le Ekalesia.

Valaaulia se tamaitiiti aoga e faitau leotele le 2 Tesalonia 1:3–5. Fai atu i le vasega e mulimuli i le faitauga, ma vaavaai pe aisea na faaviivii ai e Paulo le Au Paia i Tesalonia.

• Aisea na faaviivii ai Paulo i le Au Paia i Tesalonia?

• E tusa ai ma le fuaiupu 5, o le a le taui o le a maua e le Au Paia mo le onosaia o mea faafeagai ma puapuaga ma le “onosai ma le faatuatua”?

• O le a le mataupu faavae e mafai ona e aoao mai nei fuaiupu e faatatau i le ala o le a faamanuiaina ai i tatou pe afai tatou te onosaia mea faafeagai ma puapuaga i le onosai ma le faatuatua? (E ono faaaoga e le vasega ni upu eseese ae e tatau ona faailoa mai se mataupu faavae e pei o lea: Afai tatou te onosaia ma le faamaoni mea faafeagai ma puapuaga i le onosai ma le faatuatua, e mafai ona faitaulia i tatou ua agavaa mo le malo o le Atua.

Valaaulia se tagata o le vasega e faitau leotele le saunoaga lenei a Peresitene Dieter F. Uchtdorf o le Au Peresitene Sili. Fai atu i le vasega e faalogologo mo le uiga o le faatalitali ma le onosai.

“O le onosai e le o le taliaina ma le usiusitai, pe o le toilalofoi e galue ona o o tatou atuatuvalega. O le onosai o lona uiga o le faatalitali ma le tumau. O lona uiga o le tumau ai i se mea ma le faia o mea uma tatou te mafaia—galue, faamoemoe, ma le faaaogaina o le faatuatua; o le tauaveina o faigata ma le lototele, e tusa lava pe tolopoina manaoga o o tatou loto. O le onosai e le na o le tumau, ae o le tumau lelei ai!” (“Faaauau i le Onosai,” Ensignpo o le Liahona, Me 2010, 57).

• E tusa ai ma Peresitene Uchtodorf, o le a le uiga o le tumau ma le onosai?

• Aisea tatou te manaomia ai le faatuatua ina ia onosaia ai ma tumau i mea faafeagai po o puapuaga?

Valaaulia le vasega e mafaufau i se tasi latou te iloa pe ua faitau e uiga i ai i tusi paia o se sa onosaia ma le faamaoni ma le onosai mea faafeagai ma puapuaga.

• O na e manatu i ai, ma na faapefea ona ia faaalia ma le faamaoni ma le onosai le onosaia o mea faafeagai ma puapuaga?

Valaaulia le vasega e mafaufau i mea faafeagai po o puapuaga atonu latou te oo i ai i le taimi nei ma fuafua ai pe mafai faapefea ona latou onosaia nei luitau ma le onosai ma le faatuatua. Fautuaina i latou e tatalo o se fesoasoani.

Faamatala e pei ona tusia i le 2 Tesalonia 1:6–10, sa valoia e Paulo le Afio Mai Faalua o Iesu Keriso. Vaevae tamaiti aoga i ni vaega taitoalua pe taitoatolu. Valaaulia vaega taitasi e faitau faatasi le 2 Tesalonia 1:6–10ma talanoaina ia fesili nei. (Atonu e te manao e tusi fesili nei i luga o le laupapa pe saunia i se tufaaga.) Fai atu i tagata o le vasega e tusi ia autu i a latou api o le vasega po o api talaaga mo le suesueina o tusitusiga paia.

• O a upu ma fuaitau na faaaogaina e Paulo e faamatala ai le Afio Mai Faalua?

• O le a le mea o le a tupu i e amiotonu pe a oo mai le Afio Mai Faalua?

• O le a le mea o le a tupu i e amioleaga pe a oo mai le Afio Mai Faalua?

A lava loa le taimi, valaaulia ni nai tamaiti aoga e lipoti mai a latou tali i le vasega. Tusi le upumoni lenei i le laupapa: I le Afio Mai Faalua o Iesu Keriso, o le a malolo e amiotonu ae o le a faaumatia e amioleaga.

• O le a le mea e te manatu o le a malolo mai ai e amiotonu?

• E mafai faapefea ona faamafanafanaina e lenei aoaoga faavae i latou o e o loo feagai i le taimi nei ma faigata ona o a latou tautinoga ia Iesu Keriso?

Fai i le vasega e sii mai o latou lima pe afai na i ai se taimi na latou tau manatunatu ai i le taimi o le oo mai ai le Afio Mai Faalua o Iesu Keriso? Faamatala sa taumanatunatu le Au Paia i Tesalonia e uiga i lenei lava mea ma sa popole ia Paulo nei taitaiseseina i latou.

Valaaulia se tamaitiiti aoga e faitau leotele le 2 Tesalonia 2:1–2 Fai i le vasega e mulimuli ai, ma vaavaai mo mea na mafaufau Paulo atonu e fai ai le faaiuga a le Au Paia i Tesalonia e uiga i le taimi o le Afio Mai Faalua.

2 Tesalonia 2:1–3 o se fuaitau o mau tauloto. O le suesueina o fuaitau o mau tauloto o le a fesoasoani i tagata o le vasega e faateleina ai lo latou malamalama i aoaoga faavae autu ma saunia ai e aoao atu i isi. Atonu e te manao e fautua atu i tagata o le vasega e faailoa mau tauloto i se auala iloagofie e faigofie ai ona latou sueina. Tagai i le manatu mo le aoaoina atu i le faaiuga o le lesona e fesoasoani ai i tagata aoga i le taulotoina o le mau lenei.

• O le a le mea e lei manao ia Paulo i tagata Tesalonia e talitonu ai e uiga i le taimi o le Afio Mai Faalua? (E le o toe mamao.)

Fai i le vasega e faitau lemu le 2 Tesalonia 2:3, ma vaavaai mo mea na fai mai Paulo o le a tupu a o lei oo mai le Afio Mai Faalua. Faamatala o le fasifuaitau “lena aso” e faasino i le Afio Mai Faalua, ma le “pauu ese” e faasino i le liliuese.

• O le a se mea e mafai ona tatou aoao mai nei fuaiupu e uiga i le mea o le a tupu a o lei oo mai le Afio Mai Faalua? (E ono faaaoga e le vasega ni upu eseese ae e tatau ona faailoa mai se upumoni e pei o lenei: Ao lei oo mai le Afio Mai Faalua, o le a tulai mai se liliuese.

Tau i ai o nei fuaiupu, sa fautua mai ai e Paulo e tatau i tagata o le Ekalesia i ona taimi ona popole atili e uiga i le liliuese ua amata ia i latou nai lo le taimi o le Afio Mai Faalua o le Alii.

Ina ia fesoasoani ia malamalama atili pe o le a le Liliuese, fai i se tasi e faitau leotele le faamalamalamaga lea:

“Ina ua mavae le maliu o Iesu Keriso, sa sauaina e tagata amioleaga ia Aposetolo ma tagata o le Ekalesia ma fasiotia le toatele o i latou. Faatasi ai ma le maliliu o Aposetolo, o ki o le perisitua ma le pule o le perisitua e pulefaamalumalu ai, ua aveeseina mai i le lalolagi. Sa tausia pea e Aposetolo aoaoga faavae manino o le talalelei, ma tausia pea le faatulagaga ma tulaga faatonuina o le agavaa mo tagata o le Ekalesia. Ina ua leai ni Aposetolo, sa faasolo ina faaleagaina ia aoaoga faavae, ma sa faia ni suiga e le’i faatagaina i le faatulagaga o le Ekalesia faapea ma sauniga o le perisitua, e pei o le papatisoga ma le tuuina atu o le meaalofa o le Agaga Paia.(Talai Lau Talalelei: O Se Taiala mo le Galuega Faafaifeautalai[2004], 35).

• E faavae i le malamalama i le Liliuese, aisea na tatau ai ona i ai se toefuataiga o le talalelei a Iesu Keriso ma Lana Ekalesia?

Faamatala o le “tagata o le agasala” o loo taua i le 2 Tesalonia 2:3e faasino ia Satani. O le Toefuataiga o le talalelei, e aofia ai le oo mai o le Tusi a Mamona, “faaalia” fuaiupu 3o taufaasese a Satani ma ona soo.

Aotele le 2 Tesalonia 2:4–17i le faamatala atu faapea na valoia e Paulo o le a faataga ia Satani e faasese i e o nonofo i le lalolagi seia oo i le Afio Mai Faalua. Sa fautuaina e Paulo le Au Paia ia “tumau ai” i mea sa ia aoaoina ai i latou fuaiupu 15.

2 Tesalonia 3

Ua lapataia e Paulo i latou o e amio le pulea ma folafola atu i ai le ola faalagolago i le tagata lava ia

Faamatala o le taimi na tusia ai e Paulo le Tusi e Lua i Tesalonia, sa faia e le aunoa e tagata o le Ekalesia se tausamiga e o faatasi ma e aai ma feinu i le faamanatuga. Peitai, o nisi o tagata o le ekalesia i Tesalonia o le a auai i le tausamiga e aai ai ae mumusu e fesoasoani e tuuina atu ma saunia meaai mo le tausamiga.

• O a faafitauli e ono tulai mai ona o lea tulaga?

Aotele le 2 Tesalonia 3:1–9 i le faamatala atu faapea na faamalo atu Paulo i le Au Paia o e sa faamaoni ma lapataia i latou e uiga i le mafuta ma i latou o e “e le tusa ma le uputuu,” po o e amio le pulea (fuaiupu 6). Na tusia e Paulo faapea o ia ma ana soa ua faatuina se faataitaiga o le ola faalagolago ia te ia lava e ala i le galulue e lagolagoina i latou lava.

Valaaulia se tamaitiiti aoga e faitau leotele le 2 Tesalonia 3:10–13. Fai i le vasega e mulimuli ai, ma vaavaai mo mea na faatonu e Paulo le Au Paia e fai e tusa ai a i latou o e sa mumusu e galulue.

• E tusa ai ma le fuaiupu 12, o le a le faatonuga na avatu e Paulo iai latou o e sa mumusu e galulue? (Ia “galulue, ma aai a latou lava mea e ‘ai,” pe faalagolago ia i latou lava i le saunia o a latou lava mea e manaomia.)

• E tusa ai ma le fuaiupu 13, o a nisi faatonuga na avatu e Paulo i le Au Paia faamaoni?

• O le a le uiga o le “e aua le faavaivai i le amio lelei”?

• O a ni upumoni e mafai ona tatou aoao mai i nei fuaiupu? (E ono faaaoga e le vasega ni upu eseese ae e tatau ona faailoa mai upumoni e pei o lea: Ua poloaiina i tatou e taumafai ia faalagolago ia i latou lava ma fesoasoani i isi.

Valaaulia se tamaitiiti aoga e faitau leotele le faamatalaga lenei mai le tamaitusi Mo Le Malosi o le Autalavou. Fai i le vasega e faalogologo pe mafai faapefea ona tatou taumafai ia faalagolago ia i tatou lava.

“O se tasi o faamanuiaga o le galue o le atinaeina lea o le faalagolago ia te oe lava. Pe a e faaalgolago ia te oe lava, ua e faaaogaina ia faamanuiaga ma tomai ua tuu atu e le Atua ia te oe e tausia ai oe lava ma lou aiga ma maua vaifofo mo au lava faafitauli. O le faalagolago ia te oe lava e le faapea e tatau ona e mafaia ona fai o mea uma e oe lava. Ina ia e faalagolago moni ia te oe lava, e tatau ona e aoao pe faapefea ona galulue faatasi ma isi ma liliu atu i le Alii ma Lana fesoasoani ma le malosi.

“Ia manatua o loo i ai se galuega taua a le Atua mo oe e fai. O le a Ia faamanuiaina oe i au taumafaiga e faataunuu lena galuega” (Mo Le Malosi o le Autalavou [tamaitusi, 2011], 41).

• E mafai faapefea ona tatou taumafai ia faalagolago ia te oe lava?

• O a faamanuiaga o le ola tutoatasi?

Molimau atu a o tatou taumafai ia faalagolago ia te oe lava, o le a fesoasoani le Alii ia i tatou e faafetaiaia o tatou manaoga ma fesoasoani ia maua vaifofo ia tatou faafitauli.

Fai i le vasega e mafaufau po o a mea e mafai ona tatou faia ia avea atili ai ma e faalagolago ia i tatou lava i le taimi nei ma i le lumanai. Valaaulia i latou e faatu se sini o le a fesoasoani ia i latou e atili faalagolago atili ai ia i latou lava, ma fautuaina i latou e saili atu i le fesoasoani a le Alii ia ausia ai.

Aotele le 2 Tesalonia 3:14–18i le faamatala atu faapea sa faaiu e Paulo lana tusi e ala i le fautuaina o le Au Paia e aua le paie ma aloese mai tagata faapalapala ma le faasoesa. Peitai, e le tatau i le Au Paia ona faia i latou o ni fili ae aoai i latou o ni uso ma ni tuafafine i le talalelei.

Faaiu i le molimau atu e uiga i upumoni na aoao i lenei lesona.

Mau Tauloto—2 Tesalonia 2:1–3

Valaaulia tamaiti aoga taitasi e faaaoga fesoasoaniga mo le suesueina o tusitusiga paia (e pei o vaefaamatalaga, o le Taiala i Tusitusiga Paia, po o le Taiala o Autu) e sue si se mau e ese mai le 2 Tesalonia2:1–3 o aoao mai ai e uiga i le Liliuese. A uma ua lava se taimi, ona fai lea i ni nai tagata e faasoa mai a latou mau na maua ma faamatala mai pe o a mea o aoao mai e uiga i le Liliuese. Atonu e te manao e lisi i le laupapa ia mau faasino na latou maua. Valaaulia le vasega e filifili se mau se tasi e fai ma mau faasino i le 2 Tesalonia 2:1–3 (Atonu e te manao e fautuaina tamaiti aoga e tusi le mau i le laina a latou tusi paia i autafa o le2 Tesalonia 2:1–3. Faamatala o le fuaitau o le mau tauloto e tele ina faaaoga e aoao atu ai e uiga i le Liliuese ma le manaomia o le Toefuataiga. Valaaulia ia le vasega e faaaoga le 2 Tesalonia 2:1–3ma se tasi o mau faasino o loo lisi i le laupapa e aoao atu ai se paga e uiga i le Liliuese.

Tala ma Faamatalaga o Talaaga

2 Tesalonia 2:3. O Le Liliuese

“O le ‘pauu ese’ o se faaliliuga o le upu Eleni apostasia,o se upu e latalata lona faauigaga i le ‘fouvale’ po o le ‘tetee aliali.’ O lea sa tautala ai Paulo e uiga i le finauga faamoemoeina e faasaga i le talalelei a Iesu Keriso ae le o se o ese malie mai ai. I le Tusi a Mamona, o le faaaliga ia Nifae o le lumanai na aoaoina ai o ia e faapea ‘o le aiga o Isaraelu’ na aufaatasi ma i latou i le fale tele ma le ateatea ‘e tau faasaga i aposetolo e toasefululua a le Tamai Mamoe’ (1 Nifae 11:35). O le Liliuese e tele lava ua le na o se lafoai o le upumoni ae o se fouvale moni lea e faapogai mai i totonu o le nuu o le feagaiga” (Tusi lesona a le Tagata Aoga o le Feagaiga Fou [Church Educational System manual, 2014], 453).

Sa faamatala e Elder M. Russell Ballard o le Korama a Aposetolo e Toasefululua faapea na tupu le Liliuese ona sa teena e tagata ia Keriso ma Ana Aposetolo:

“I se taimi puupuu o tausaga na aofia i le Feagaiga Fou … sa fulitua ai tagata ia Keriso ma Ana Aposetolo. Sa matua tele lava le faaletonu lea ua tatou taua o le Liliuese Tele, lea na taitai atu ai i le tele o seneturi o le paie ma le valelea faaleagaga e taua o le Vaitau o le Pogisa.

“Ia, e tatau ona ou matua faamaninoina nei vaitaimi ua mavae o le tupu pea o le liliuese ma le pogisa faaleagaga. E tutusa le alofa o lo tatou Tama Faalelagi i Ana fanau uma lava, ma e finagalo o Ia ia latou maua uma faamanuiaga o le talalelei i o latou olaga. E le o aveesea le malamalama faaleagaga ona ua tuulafoai e le Atua ia Lana fanau. Ae e tupu, le pogisa faaleagaga pe a tuulafoai e lana fanau uma o ia” (“Aoaoina o Lesona o Aso ua Mavae,” Ensign or Liahona, Me 2009, 32).

2 Tesalonia 2:3. O Le Toefaatulagaina ma le Toefuataiga

E toatele o e sa ola ina ua mavae le maliliu o Aposetolo na tumau pea ona mulimuli i le Alii. O la latou tautinoga i le Alii sa matuai malosi tele o lea sa latou naunau ai e puapuagatia i mea faafeagai e oo lava i le oti mo o latou talitonuga. I le vaitau o le Toefaatulagaina, e toatele tagata na iloa o nisi o aoaoga faa-Kerisiano sa suia ma e lei ogatusa ma aoaoga o i le Tusi Paia. Na saili nei tagata na toefaatulagaina e toe faaogatusa le faa-Kerisiano ma tusi paia. Sa saunoa Peresitene Ioane Teila i le mea lenei e faatatau i e sa silia le upumoni i na Vaitau Pogisa:

“Sa i ai tagata i na aso pogisa o e sa mafai ona fesootai ma le Atua, ma o e, e ala i le mana o le faatuatua, sa mafai ona tatalaina le ie puipui o le faavavau ma pulatoa atu i le lalolagi e le mavaaia[,] … e i ai le auaunaga a agelu, ma tatalaina ai le taunuuga i le lumanai o le lalolagi. I na vaitau pogisa ou te tatalo i le Atua e aumai ia te au sina pogisa itiiti, ma laveai au mai le malamalama ma le atamai ua manumalo i o tatou aso” (in Journal of Discourses, 16:197). (Mo nisi faamatalaga e tusa ai ma taumafaiga faamaoni a nei tagata sa toefaatulagaina, tagai Thomas S. Monson, “The Way Home,” Ensign, May 1975, 15–16; tagai foi Talai lau Talalelei: O Se Taiala mo le Galuega Faafaifeautalai [2004], 45–46.)

E tusa ai ma taumafaiga o nei tagata toefaatulagaina ma isi soo faamaoni o le Atua, o upumoni e uiga i le Tama Faalelagi ma Lana fuafuaga na ola ai mai le Liliuese ma e mafai ona maua i tapuaiga uma i le lalolagi. Peitai, o upumoni e tatau mo lo tatou faaolataga sa leiloloa, faapea foi le pule o le perisitua e taitai ai le galuega ma faatautaia ai sauniga o le faaolataga. Na faamautinoa mai e le Alii ia i latou i isi tapuaiga e faapea o le Toefuataiga o le Ekalesia ma le Tusi a Mamona e le o tautino mai ai faapea o mea uma sa latou aoao maia e sese: “Faauta, Ou te lē aumaia e faaumatia ai mea ua latou maua, ae e ati ae ai i luga” (MF&F 10:52). Mo lenei mafuaaga, na valaaulia ai e Peresitene Gordon B. Hinckley tagata uma o le lalolagi e “aumai uma a outou mea e lelei ma mea moni sa outou maua mai i soo se punavai ma o mai sei vaai pe mafai ona matou faaopoopo atu i ai” (“O Le Faavae Ofoofogia o lo Tatou Faatuatuaga,” Ensign, Nov. 2002, 81).