Lesona 114: 2 Korinito 4–5

Lesona 114

2 Korinito 4–5

Folasaga

I lana tusi i le Au Paia i Korinito, sa aoao atu ai e Paulo e faapea o tofotofoga ma mafatiaga o lenei olaga e mo na o sina taimi ma e laiti foi pe a faatusatusa i faamanuiaga o le faavavau. Sa ia aoao atu foi le Au Paia e uiga i le Faamasinoga ma molimau atu o Iesu Keriso ua mafai ai e i tatou ona faalelei ma le Atua.

Fautuaga mo le Aoaoina Atu

2 Korinito 4

Ua molimau atu Paulo e ui ina feagai o ia ma mafatiaga, ae e le o fefe lava pe faaletonu

Faaali atu le ata 1.

O le a se mea o faaalia i lenei ata?
Mata o le a se mafaufau o le tagata o loo fetulei ai e uiga i le tagata o tuleia o ia?

Faaali le ata 2

o se tagata o tuleia se isi tagata mai le auala ao loo sau se taavale

E faapefea i le vaai atu i le ata muamua i se talaaga lautele atu ona suia lau faamasinoga e uiga i le mea o loo faaalia mai ai?

Faamatala na tusia e Paulo i le Au Paia i Korinito e fesoasoani ai ia latou vaai atu i le talaaga e lautele atu o o latou puapuaga. Valaaulia le vasega e vaavaai mo upumoni a o latou suesueina le 2 Korinito 4 na aoao atu e Paulo i le Au Paia e uiga i o latou puapuaga.

Aotele le 2 Korinito 4:1–7 i le faamatala atu sa faamautinoa atu e Paulo i le Au Paia sa ia folafola atu ma le faamaoni le talalelei ia i latou. Sa ia aoao atu o Satani “o le atua o lenei lalolagi” fuaiupu 4, e galue e taofia tagata mai le taliaina o le talalelei. Sa faatusatusa e Paulo ia lava ma ona uso a auauna i ipu omea o i ai “oa” o “le malamalama o le iloa mamalu o le Atua” (fuaiupu 6–7).

Valaaulia se tamaitiiti aoga e faitau leotele le 2 Korinito 4:8–9. Fai i le vasega e mulimuli ai, ma vaavaai pe o faapefea ona faamatala e Paulo ia luitau o lana galuega faafaifeautalai.

Na faapefea ona faamatala e Paulo ia luitau o lana galuega faafaifeautalai?
O a fasifuaitau na faaaoga e Paulo e faamatala ai le ala na ia tali atu ai i nei luitau?
Aisea e te manatu ai sa mafai e Paulo ona faatumauina se uiga lelei a o ia feagai ma nei luitau?

Aotele le 2 Korinito 4:11–14 i le faamatala atu na aoao atu e Paulo e ui ina o le a oti nisi tagata mo le talalelei a Iesu Keriso, ae o lo latou oti e mo na o sina taimi.

Valaaulia se tamaitiiti aoga e faitau leotele le 2 Korinito 4:14–16. Fai i le vasega e mulimuli ai, ma vaavaai po o a mea na iloa e Paulo na fesoasoasoani ia te ia e faafetaiaia ai tofotofoga ma sauaga.

O le a le mea na iloa e Paulo na fesoasoani ia te ia e faafetaiaia ai tofotofoga ma sauaga?
O le a le uiga o le fasifuaitau “e ui lava ina tauau ina uma lo matou tagata i fafo, ua faafouina le i totonu i lea aso ma lea aso” (fuaiupu 16) (E ui ina o le a oti faaletino ia Paulo ma ana soa, ae sa faamalolosia o latou agaga i aso taitasi.)

Vaevae le vasega i ni paga. Valaaulia paga taitasi e faitau leotele faatasi le 2 Korinito 4:17–18, ma vaavaai mo upumoni na aoao atu e Paulo i le Au Paia e uiga i tofotofoga ma mafatiaga. Fai i paga taitasi e galulue faatasi e tali ia fesili nei i a latou api po o api talaaga mo le suesueina o tusitusiga paia. Atonu e te manao e saunia ia fesili i se tufaaga pe tusi foi i le laupapa

2 Korinito 4:17–18

Tusi lesona a le Faiaoga Seminare o le Feagaiga Fou—Lesona 114

O a upumoni na aoao atu e Paulo i le Au Paia e uiga i tofotofoga ma mafatiaga?
Aisea e taua ai le vaai i o tatou mafatiaga i le talaaga e lautele atu o le fuafuaga a le Tama Faalelagi?
O anafea na e vaai ai i se tagata o tumau malosi i taimi o tofotofoga ona sa latou vaai atu i o latou mafatiaga i le talaaga e lautele atu o le fuafuaga a le Tama Faalelagi?

A uma ua lava se taimi, valaaulia ni tagata e tusi a latou tali i le fesili muamua i luga o le laupapa. E mafai e le vasega ona tusi i upumoni se tele e aofia ai mea nei: O o tatou tofotofoga ma mafatiaga i lenei olaga e laiti pe a faatusatusa i faamanuiaga e faavavau ma le tuputupu ae e maua pe a tatou onosaia ma le faamaoni. Ona e mafai e mafatiaga mo na o sina taimi ona aumaia le tuputupu ae e faavavau, e le tatau ai ona tatou le fiafia i taimi o faalavelave. E i ai le faamoemoega e faavavau i o tatou mafatiaga, tusa lava pe le mafai ona tatou vaaia i le olaga nei.

Fai i ni tamaiti e lipoti mai a latou tali i le fesili lona lua. A uma ona latou lipoti mai, mafaufau e fai atu fesili nei e toe tulitatao ai:

O a ni auala e mafai ai e o tatou tofotofoga ma mafatiaga ona tatou tuputupu ae?
E mafai faapefea e le manatuaina o nei upumoni ona fesoasoani tatou te onosaia ai ma le faamaoni ia tofotofoga ma mafatiaga?

Valaaulia ni tagata e faasoa mai a latou tali i le fesili lona tolu. Mafaufau e faasoa atu se tasi o ou lava aafiaga.

2 Korinito 5

Ua aoao atu e Paulo le Au Paia e uiga i le Faamasinoga ma le Togiola a Iesu Keriso

Tuu atu i tamaiti taitasi se fasipepa. Fai ia tofu gaulua e tagata uma le pepa ma tusi ai lona igoa i le isi afa o le pepa a o leTama Faalelagii le isi afa. Faamatala ina ua tatou o mai i le lalolagi, sa tatou tuua le afioaga o le Tama Faalelagi. Valaaulia le vasega e saelua le pepa ma tuueseese afa e lua.

O a ni auala e mafai ai ona faatusa le pepa ua saelua i le mea na tupu ina ua tatou tuua le afioaga o le Tama Faalelagi ma o mai i le lalolagi ia maua le poto masani i le olaga nei.

Valaaulia le vasega e vaavaai mo upumoni a o latou suesueina le 2 Korinito 5o le a fesoasoani latou te malamalama ai i mea e tatau ona tatou faia e toe foi atu ai i le afioaga o le Tama Faalelagi.

Aotele le 2 Korinito 5:1–6i le faamatala atu sa faailoa atu e Paulo e ui ua vavaeese mai i tatou mai le Atua i le olaga nei, ae o le a iu ina oti, ma o le a tatou toetutu ma toe ola.

Valaaulia le vasega e faitau lemu le 2 Korinito 5:6–7, ma vaavaai mo mea na aoao atu e Paulo i le Au Paia e tatau ona latou faia ma le iloa ua vavaeese mai i latou mai le Atua i le olaga nei.

O le a le upumoni na aoao mai e Paulo e uiga i lo tatou vavaeese mai le Atua i le olaga nei? (E ono faaaoga e le vasega ni upu eseese, ae ia mautinoa latou te faailoa maia le upumoni lenei: Ona ua vavaeese mai i tatou mai le Atua i le olaga nei, ua tatau ai ona tatou savavali i le faatuatua ae le o le vaai. Valaaulia tagata taitoatasi e tusi le upumoni lenei i le afa o le pepa o loo i ai lona igoa.)
O le a le uiga o le “savavali i le faatuatua, (fuaiupu 7).
O a ni nai faataitaiga o tulaga po o faaiuga e ono oulua feagai e moomia ai oe e te savali i le faatuatua ae le o le vaaiga? (Tusi tali a tamaiti aoga i le laupapa. O a latou tali e ono aofia ai tulaga faatonuina nei o le Ekalesia, filifili e fai se misiona, pe faasoa atu a latou molimau.)

Valaaulia le vasega e mafaufau i se taimi na latou (po o se tasi latou te iloa) savavali ai i le faatuatua ae le o le vaaiga. Valaaulia nisi o i latou e faasoa mai o latou aafiaga.

Valaaulia le vasega e mafaufau i se tulaga po o se faaiuga o loo latou feagai i le taimi nei o loo latou tauivi ai e savavali i le faatuatua. Fautuaina i latou e savavali i le faatuatua i lena tulaga ma i tulaga uma lava.

Valaaulia se tamaitiiti aoga e faitau leotele le 2 Korinito 5:8–10. Fai i le vasega e mulimuli ai, ma vaavaai mo mea sa tau mai e Paulo e tatau ona tatou faia a o tatou o ese mai le Atua i le olaga nei.

E tusa ai ma le fuaiupu 9, o le a le tala a Paulo i mea e tatau ona tatou faia a o tatou o ese ai mai le Atua i le olaga nei?
E faavae i aoaoga a Paulo o loo tusia i le fuaiupu 10, o le a le upumoni e mafai ona tatou aoao mai e uiga i le mafuaaga e tatau ai ona tatou galulue e faia galuega lelei i lenei olaga? (E ono faaaoga e le vasega ni upu eseese ae e tatau ona latou faailoa maia se upumoni e pei o lenei: O le a faamasinoina i tatou taitoatasi e Iesu Keriso e tusa ai ma mea sa tatou faia i le olaga nei. Valaaulia le vasega e mafaufau e maka ia fasifuaitau i le fuaiupu 10o loo aoao mai ai lenei upumoni.)

Valaauia le vasega e mafaufau i suiga latou te ono moomia ona fai e sauniuni ai mo le taimi o le a faamasinoina ai e Iesu Keriso. Fautuaina i latou e mulimuli i soo se uunaiga latou te maua.

Valaaulia se tamaitiiti aoga e faitau leotele le 2 Korinito 5:15–16. Fai i le tagata lea e faitau leotele foi le Faaliliuga a Iosefa Samita o le 2 Korinito 5:16 (i le 2 Korinito 5:16, vaefaamatalaga a). Valaaulia le vasega e mulimuli ai, ma vaavaai mo mea na faia e Iesu mo i tatou ina ia mafai ai ona tatou toe foi atu i le afioaga o le Tama Faalelagi.

E tusa ai ma le fuaiupu 15, o le a le mea na faia e Iesu e fesoasoani ai ia tatou toe foi atu i le Tama Faalelagi?
E tusa ai ma le fuaiupu 15–16, o le a le mea e fai e le au talitonu ona o le Togiola a Iesu Keriso? (E ola le au talitonu i ni olaga e totonugalemu ia Keriso ma e le mulimuli i ala o le lalolagi pe faamatuu atu i le tino. Valaaulia tagata taitoatasi e tusi le faamatalaga lea i le afa o le pepa o loo i ai lona igoa.)

Valaaulia se tamaitiiti aoga e faitau leotele le 2 Korinito 5:17–19. Fai i le vasega e mulimuli ai, ma vaavaai pe mafai faapefea e le Togiola a Iesu Keriso ona fesoasoani i le Au Paia e toe foi atu i le afioaga o le Tama Faalelagi.

E mafai faapefea e le Togiola a Iesu Keriso ona fesoasoani tatou te toe foi atu i le afioaga o le Tama Faalelagi? A maea ona tali mai tamaiti aoga, tusi le upumoni lea i luga o le laupapa: O le Togiola a Iesu Keriso, e mafai ai ona avea i tatou ma tagata fou ma toe faalelei ma le Atua. Valaaulia le vasega e tusi le upumoni lenei i le afa o le pepa o loo tusi ai le “Tama Faalelagi”.)
O le a sou manatu o le a le uiga o le avea ma tagata fou? (fuaiupu 17).

Valaaulia le vasega e faitau lemu le Mosaea 27:23–26, ma vaavaai mo nisi faamatalaga e uiga i le avea ma tagata fou. A uma ua lava se taimi, valaaulia ni nai tagata e faasoa mai mea sa latou mauaina.

Valaaulia se tagata aoga e faitau leotele le saunoaga lenei a Elder David A. Bednar o le Korama a Aposetolo e Toasefululua. Fai i le vasega e faalogologo mo lana faamatalaga e uiga i le ala e mafai ai ona avea i tatou ma tagata fou.

“O le ute lava o le talalelei a Iesu Keriso e manaomia ai se suiga faavae ma le mausali i a tatou amioga lea e mafai e ala i le Togiola a le Faaola. O le liua moni e aumaia ai se suiga i lou talitonuga, o lou loto, ma le olaga e talia ai ma usitai atu i le finagalo o le Atua (tagai Galuega 3:19; 3 Nifae 9:20) ma e aofia ai se tautinoga maua’i e avea ma soo o Keriso.

“… A tatou faamamaluina sauniga ma feagaiga o le faaolataga ma le faaeaga (tagai MF&F 20:25), ‘fetaomi atu i luma ma le tumau ia Keriso’ (2 Nifae 31:20), ma tumau i le faatuatua e oo i le iuga (tagai MF&F 14:7), e avea i tatou o tagata fou ia Keriso (tagai 2 Korinito 5:17)” (“Faaliliuina i le Alii,” Ensign po o le Liahona, Nov. 2012, 107).

Valaaulia tagata taitoatasi e tuu faatasi ia afa e lua o le pepa. Faamatala o le toe faalelei o le toe tuufaatasia lea o ni itu se lua sa vaoeseese talu ai. Ona o le Pau o Atamu faapea foi a tatou lava agasala, tatou te vaoeseese ai faaleagaga mai lo tatou Tama Faalelagi. Ua ofo mai Iesu Keriso, e ala i Lana Togiola, e toe faaleleia i tatou ma le Tama ma toefuatai la tatou sootaga ma Ia.

Valaaulia se tamaitiiti aoga e faitau leotele le 2 Korinito 5:20–21. Fai atu i le vasega e vaavaai mo mea na apoapoai atu Paulo i le Au Paia e fai.

O le a le mea na apoapoai atu Paulo i le Au Paia i Korinito e fai?
O le a le mea na aoao atu e Paulo e uiga ia Iesu Keriso pei ona tusia i le fuaiupu 21? (E ui na aunoa Iesu Keriso ma se agasala, sa Ia puapuagatia mo a tatou agasala ina ia mafai ai ona faaamiotonuina i tatou.)

Molimau atu i upumoni na faailoa mai e le vasega i lenei lesona. Fai i le vasega e toe iloilo le lisi o upumoni sa latou tusia i lalo ma mafaufau pe o a mea e tatau ona latou faia ia o mai ai pe tumau ai ona lelei ma le Atua. Fautuaina i latou e mulimuli i soo se uunaiga latou te maua.

Tala ma Faamatalaga o Talaaga

2 Korinito 4:5–10. “Ua puapuagatia i matou i mea uma, ae le faaatuatuvaleina”

I se taimi faigata, sa maua ai e Siaosi A. Samita, Fesoasoani Muamua ia Polika Iaga, se fautuaga mai lona tausoga le Perofeta o Iosefa Samita e pei o aoaoga a Paulo i le Au Paia i Korinito:

“Na ia fai mai ia te au, e le tatau lava ona ou lotovaivai, pe o a lava faigata e ono siomia ai au. Pe afai ou te magoto ifo i le lua aupito maualalo o Nova Sikotia ma solo ifo Mauga Papa uma i ou luga, e le tatau lava ona ou lotovaivai ae pipiimau pea, faatino le faatuatua, ma lototele ma e tatau lava ona ou tulai mai i luga o le faaputuga”Aoaoga a Peresitene o le Ekalesia: Iosefa Samita [2007], 235).

2 Korinito 4:17. Tulimatai atu i o tatou mafatiaga i la le tino

Sa faaaoga e Elder Paul V. Johnson o le Fitugafulu ia upu a Paulo e fesoasoani ai ia i tatou e tulimatai atu o tatou mafatiaga o le olaga nei i se vaaiga e faavavau:

“Na aoao mai le Aposetolo o Paulo, ‘Aua o lo matou puapuaga mamasagia ma le vave mavae, e tupu mai ai mo i matou le manuia mamafa e matua silisili ese lava ma le faavavau’ [2 Korinito 4:17]. E malie na faaaoga e Paulo le faaupuga ‘puapuaga mamasagia.’ O lenei faaupuga e mai i se tagata sa sasaina, fetogia, afatia le folauga, faafalepuipui, ma sa feagai ma le tele o isi faigata [tagai 2 Korinito 11:23–28]. Ou te le iloa pe toatele nisi o i tatou e taumamaina o tatou mafatiaga. Ae pe a faatusatusa i faamanuiaga ma le tuputupu ae e iu ina tatou maua, e le gata i lenei olaga ma i le faavavau, e moni lava e mamasagia o tatou mafatiaga” (“More Than Conquerors through Him That Loved Us,” Ensign po o le Liahona, Me 2011, 79).

2 Korinito 5:19. “Ua faaleleia e ia le lalolagi ia te ia lava”

Na faamalamalama mai e Elder Bruce R. McConkie o le Korama a Aposetolo e Toasefululua le mea e tatau ona faapotopoto i ai le Au Paia:

“O le faaleleia o le faagasologa o le faaolaina o le tagata mai lona tulaga o le agasala ma le pogisa faaleagaga ma le toefuataiga o ia i se tulaga o le ogatusa ma le lotogatasi ma le Atua. E ala i lena, ua le toe avea ai le Atua ma le tagata o ni fili. O le tagata, o le sa faalelalolagi ma leaga, o le sa ola e tusa ai ma le tino, ua avea nei o se tagata fou o le Agaga Paia; ua toe fanauina; ma, ua pei o se tamaititi, ua ola o ia ia Keriso” (Doctrinal New Testament Commentary, 3 vols. [1965–73], 2:422–23).